1 Maŋtsɛmɛi 6
6
Solomon mã Sɔlemɔtsu lɛ
(2 Kronika 3.1-13)
1Solomon nitsulɔi lɛ bɔi Sɔlemɔtsu lɛ mãa yɛ nyɔŋ ni ji enyɔ ni atsɛɔ lɛ Zif lɛ nɔ. Nakai beiaŋ lɛ Solomon eye maŋtsɛ afii ejwɛ. Israelbii lɛ shi Ijipt nɛɛ afii ohai ejwɛ kɛ nyɔŋmai kpaanyɔ nɛ. 2Solomon tsu lɛ kɛlɛ ji ninetalɔi nyɔŋmai ekpaa, ni elɛɛmɔ ji ninetalɔi nyɔŋmai enyɔ ni ekwɔlɛ ji ninetalɔi nyɔŋmai etɛ̃. 3#1 Maŋ 7.14-21 Koi ko ni ekɛlɛ ji ninetalɔi nyɔŋmai enyɔ kɛ elɛɛmɔ ninetalɔi nyɔŋma kã Sɔlemɔ we lɛ hiɛ. 4Afee samfɛji awo tsu lɛ he. Samfɛji nɛɛ lɛɛ yɛ mligbɛ fe ekponɔ gbɛ. 5Amãmɔ ŋwɛi tsui sɔɔdoi etɛ̃ yɛ Sɔlemɔtsu lɛ sɛɛ kɛ ekoŋ biɛ kɛ biɛ. Ekome kwɔlɛ ji ninetalɔi enyɔ kɛ fioo. 6Tsui ni yɔɔ shishigbɛ kwraa lɛ ekome lɛɛmɔ ji ninetalɔi enumɔ. Nii ni yɔɔ teŋ lɛ, ekome lɛɛmɔ ji ninetalɔi ekpaa, ni nii ni yɔɔ yiteŋ kwraa lɛ, ekome lɛɛmɔ ji ninetalɔi kpawo. Afee kpokui yɛ tsu lɛ gbogboi lɛ ahe kɛkpe, bɔ ni afee ni nɔsɛŋmɔ mplaŋi lɛ akabote tsu lɛ gbogboi lɛ amli. 7Tɛi ni akɛmã tsu lɛ ako fɛɛ yɛ tɛgbamɔ he lɛ, bɔ ni afee ni akanu hamle loo lema loo dade ko naa he be ni amãa Sɔlemɔtsu lɛ. 8Tsu ni yɔɔ shishigbɛ kwraa lɛ shinaa lɛ naa kã Sɔlemɔ we lɛ ninejurɔgbɛ, no ji wuoyigbɛ; ni akwɔɔ atrakpoi lɔgɔligi lɔgɔligi ko kɛyaa teŋ pia lɛ kɛ pia ni ji etɛ̃ lɛ mli. 9Solomon tswa tsu lɛ egbe naa, ni ekɛ tsenedru mplaŋi kɛ sɛsɛo ŋmoŋmolo sɛŋ nɔ. 10Ŋwɛi tsui etɛ̃ ni amãmɔ kɛbɔle Sɔlemɔtsu lɛ ekome kwɔlɛ ji ninetalɔi enumɔ. Ni akɛ tsenedru tso mɔmɔ amɛ akpɛtɛ Sɔlemɔtsu lɛ. 11Ni Nuŋtsɔ Nyɔŋmɔ kɛɛ Solomon akɛ, 12#2 Sam 7.13 “Tsu ni omãa nɛɛ, kɛji oooye mikpɔi kɛ mimlai lɛ anɔ, ni oooto mikitãi lɛ fɛɛ, ni oooba ojeŋ jogbaŋŋ lɛ, no lɛ mafee nɔ ni miwo otsɛ David shi yɛ he lɛ mahã bo. 13Mahi shi yɛ nyɛ Israelbii ateŋ. Mikwaŋ mimaŋ Israel kɔkɔɔkɔ.” 14#Bɔf 7.47 Bɔ ni Solomon fee ema tsu lɛ nɛ.
Sɔlemɔtsu lɛ mlisaamɔ
(2 Kronika 3.8-14)
15Akɛ tsenedru ŋmoŋmolo ha tsu lɛ mligbɛ gbogboi lɛ ahe, kɛjɛ shishi kɛyashi ŋwɛi nɔsɛŋmɔ tsei lɛ anaa. Ni akɛ sɛsɛo ka Sɔlemɔtsu lɛ shikpɔŋ lɛ. 16#Ɛks 26.33-34 He Krɔŋkrɔŋ Fe Fɛɛ lɛ amã no yɛ Sɔlemɔtsu lɛ sɛɛgbɛ. Ekɛlɛ ji ninetalɔi nyɔŋmai enyɔ. Ni akɛ tsenedru ŋmoŋmolo fo ekɛ Sɔlemɔtsu lɛ teŋ kɛjɛ ŋwɛi kɛyi shi. 17Ni tsu ni ji Sɔlemɔtsu lɛ diɛŋtsɛ lɛ, ekɛlɛ ji ninetalɔi nyɔŋmai ejwɛ, ni eyɛ He Krɔŋkrɔŋ Fe Fɛɛ lɛ hiɛ. 18Tsenedru ŋmoŋmolo ni akɛha tsu lɛ mli lɛ ayeyee fɔfɔi kɛ akpaki sãmãi awo he. Ŋmoŋmolo lɛ eha tɛi lɛ anɔ, hewɔ lɛ anaaa tɛi lɛ ekome nɛkɛ.
19Tsu ni amã yɛ Sɔlemɔtsu lɛ mligbɛ kwraa lɛ jɛi akɛ Nuŋtsɔ Nyɔŋmɔ Kpãŋmɔ Adeka lɛ mã. 20Tsu lɛ kɛlɛ ji ninetalɔi nyɔŋmai enyɔ, elɛɛmɔ hu ji ninetalɔi nyɔŋmai enyɔ, ni ekwɔlɛ ninetalɔi nyɔŋmai enyɔ. Akɛ shika ŋmiiŋmi eha tsu lɛ mli fɛɛ; shi afɔleshãa latɛ lɛ tsenedru ŋmoŋmolo akɛha he. 21Akɛ shika ŋmiiŋmi ha tsu lɛ hu mli. Ni akɛ shika kɔ̃sɔŋkɔ̃sɔi fo afabaŋ yɛ He Krɔŋkrɔŋ tsu lɛ hiɛ. 22#Ɛks 30.1-3 Bɔ ni afee ni shĩa lɛ aye emuu hewɔ lɛ, asaa akɛ shika ŋmiiŋmi ha mli fɛɛ. Aha afɔleshãa latɛ lɛ tete ni yɔɔ He Krɔŋkrɔŋ lɛ he fɛɛ kɛ shika ŋmiiŋmi.
23 #
Ɛks 25.18-20
Ni akɛ mutso gbɔ kerubim enyɔ ni kwɔlɔmɔ ji ninetalɔi nyɔŋma awo He Krɔŋkrɔŋ lɛ. 24Kerub fine kome kɛlɛ ji ninetalɔi enumɔ; no hewɔ lɛ, fiji enyɔ lɛ fɛɛ feɔ ninetalɔi nyɔŋma. 25Ni kerub kroko lɛ hu fine lɛ kɛlɛ ji ninetalɔi nyɔŋma. Kerubim enyɔ lɛ fɛɛ adaramɔ kome kɛ su kome. 26Kerub kome kwɔlɛ ji ninetalɔi nyɔŋma, ni ekroko lɛ hu nakai nɔŋŋ. 27Solomon kɛ kerubim nɛɛ wo mligbɛ tsu lɛ teŋ: kerubim lɛ egbɛgbɛɛ amɛfijiaŋ, bɔ ni ekome fine saa gbogbo kome he, ni kerub kroko lɛ fine saa gbogbo kroko lɛ he. Amɛfiji lɛ kpeɔ yɛ tsu lɛ teŋ. 28Ni akɛ shika eha kerubim lɛ ahe.
29Ni aye kerubim kɛ tɛŋ kɛ fɔfɔii ni egblegblee sãmãi yɛ shĩa lɛ gbogboi lɛ ahe fɛɛ kɛkpe, yɛ mligbɛ kɛ kpo nɔ gbɛ fɛɛ. 30Ni shĩa lɛ shikpɔŋ lɛ hu akɛ shika ŋmiiŋmi eka mli. 31Akɛ mutso shinaa nta ta He Krɔŋkrɔŋ lɛ naa. Shinaa lɛ ŋmawuiaŋ tsei enyɔ lɛ kpeɔ yɛ shinaa lɛ yiteŋ. 32Ni mutso shinaa nta nɛɛ aye kerubim kɛ tɛŋi kɛ fɔfɔii ni egblegblee sãmãi yɛ amɛhe. Ni akɛ shika eha fɛɛ he.
33Nakai nɔŋŋ akɛ mutso kpɛ Sɔlemɔtsu lɛ naagbɛ shinaa lɛ ŋmawuiaŋ tsei lɛ koji ejwɛ lɛ. 34Akɛ sɛsɛo kpɛ shinaa nta; ni shinaa fiji enyɔ lɛ adɔrɔɔ, ni shinaa kroko lɛ fiji enyɔ lɛ hu adɔrɔɔ. 35Ni aye kerubim kɛ tɛŋi kɛ fɔfɔii ni egblegblee sãmãi awo he; ni akɛ shika eha he fɛɛ. 36Ni akɛ tɛ ni ako kɛ tsenedru mplaŋi mã mligbɛ kpo lɛ. Kɛ atswa tɛ klɛmpɛi etɛ̃ lɛ, akɛ tsenedru mplaŋ klɛmpɛ kome foɔ mli.
37Solomon maŋtsɛyeli afi ni ji ejwɛ lɛ nɔ Zif nyɔŋ ni ji enyɔ lɛ nɔ, ato Yehowa we lɛ shishi. 38Ni afi ni ji nyɔŋma kɛ ekome lɛ nɔ, yɛ Bul nyɔŋ ni ji kpaanyɔ lɛ nɔ lɛ agbe Yehowa shĩa lɛ kɛ ehewɔ nibii lɛ fɛɛ naa. Bɔ ni ato ehe gbɛjianɔ lɛ nakai pɛpɛɛpɛ amã lɛ. Afii kpawo akɛmã tsu lɛ.
Currently Selected:
1 Maŋtsɛmɛi 6: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
