1 Maŋtsɛmɛi 5
5
Solomon saa ehe kɛhã Sɔlemɔtsu lɛ mãa
1 #
2 Sam 5.11
Hiram, Tiro maŋtsɛ lɛ, naanyo ji Maŋtsɛ David yɛ ewala beiaŋ fɛɛ. Be ni Hiram nu akɛ afɔ Solomon mu awo lɛ maŋtsɛ yɛ etsɛ David sɛɛ lɛ, etsu etsuji kɛba Solomon ŋɔɔ. 2Solomon hu tsu akɛ wiemɔ yahã Maŋtsɛ Hiram akɛ, 3“Bo diɛŋtsɛ ole bɔ ni mitsɛ David shwe akɛ emã tsu ehã Yehowa, eNyɔŋmɔ lɛ, jamɔ; shi henyɛlɔi ni bɔle lɛ gba enaa kɛ taitai, hewɔ lɛ enyɛɛɛ tsu lɛ emã. 4Shi agbɛnɛ Yehowa, miNyɔŋmɔ lɛ, ehã mikoji anɔ ejɔ mi; henyɛlɔ ko bɛ lɛ, osharã ko hu bɛ. 5#2 Sam 7.12-13; 1 Kron 17.11-12 Yehowa wo mitsɛ David shi akɛ, ‘Obi mɔ ni maŋɔ ta osɛi lɛ nɔ yɛ osɛɛ lɛ, lɛ eeema tsu ehã mi.’ Hewɔ lɛ mito miyiŋ akɛ mamã nakai tsu lɛ mahã Yehowa, miNyɔŋmɔ lɛ jamɔ. 6No hewɔ lɛ, agbɛnɛ tsu koni omɛi lɛ ayatoo tsenedru tsei yɛ Lebanon ahã mi; bɔ fɛɛ bɔ ni ooohe mi lɛ mawo akɛ apaafoi lɛ anyɔmɔwo. Mahã mitsuji lɛ tete abafata amɛhe. Ejaakɛ bo diɛŋtsɛ ole akɛ mɔ ko mɔ ko bɛ wɔteŋ ni le tsotoomɔ tamɔ Sidonbii.”
7 #
1 Maŋ 10.9
Ni eba mli akɛ be ni Maŋtsɛ Hiram nu Maŋtsɛ Solomon wiemɔi lɛ, ena miishɛɛ babaoo ni ekɛɛ, “Ajie Yehowa yi ŋmɛnɛ gbi nɛɛ, akɛ ehã David bi nilelɔ ni tamɔ nɛkɛ ni baaye nɛkɛ maŋ kpeteŋkple nɛɛ nɔ.” 8Ni Hiram tsu abakɛɛ Solomon akɛ, “Minu oshɛɛ ni oshɛ mi lɛ; ni nɔ fɛɛ nɔ ni otaoɔ lɛ mafee. Mahã bo tsenedru tsei kɛ sɛsɛo lɛ. 9Mitsuji lɛ aaaŋɔ tsei lɛ kɛjɛ Lebanon kɛba ŋshɔ lɛ naa, ni mahã afimɔ amɛ atsara kɛtsɔ̃ ŋshɔ hiɛ kɛyashwie he ni oootsɔ̃ɔ mi. Mahã afɛne amɛ yɛ jɛi, koni ohã abahole kɛya. Nɔ pɛ ni mitaoɔ ni ofee ji akɛ ohã minitsulɔi lɛ niyenii.”
10No hewɔ lɛ, Hiram hã Solomon tsenedru tsei kɛ sɛsɛo bɔ ni etaoɔ lɛ fɛɛ. 11Ni Solomon hã Hiram ŋmãa ni tsiimɔ ji talentai akpei nyɔŋmai enyɔ kɛ mu tɔi litai ohai ejwɛ ni ji Hiram webii lɛ niyenii daa afi.
12Ni Yehowa hã Solomon nilee tamɔ bɔ ni ewo lɛ shi lɛ; hejɔlɛ hi Hiram kɛ Solomon teŋ. Ni amɛkɛ amɛhe kpãŋ.
13Maŋtsɛ Solomon fã mɛi akpei nyɔŋmai etɛ̃ yɛ Israel maŋ fɛɛ mli koni amɛya ni amɛyatoo tsei yɛ Lebanon. Aduram ji mɔ ni kwɛɔ amɛnɔ. 14#1 Maŋ 12.18 Aja mɛi lɛ amli kui etɛ̃. Mɛi akpei nyɔŋma yaa amɛyayeɔ nyɔŋ kome yɛ Lebanon, ni amɛbayeɔ nyɔji enyɔ yɛ shĩa. 15Solomon yɛ jatsuterelɔi akpei kpawo kɛ tɛgbalɔi akpei kpaanyɔ yɛ gɔji lɛ anɔ. 16Solomon yɛ mɛi akpei etɛ̃ kɛ ohai etɛ̃ ni kwɛɔ nitsumɔ lɛ fɛɛ nɔ. 17Ni Solomon fã amɛ, ni amɛgbala tɛi agboi kɛba, tɛi ni jara wa koni akɛto shĩa lɛ shishi.
18Ni Solomon nitsulɔi lɛ kɛ Hiram nitsulɔi lɛ kɛ Giblibii lɛ ko tɛi lɛ, ni amɛsaa tsei kɛ tɛi lɛ koni akɛma tsu lɛ.
Currently Selected:
1 Maŋtsɛmɛi 5: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
