1 Maŋtsɛmɛi 4
4
Maŋtsɛ Solomon tsuji lɛ
1Solomon ye Israel fɛɛ nɔ maŋtsɛ. 2#1 Maŋ 2.35 Ni etsuji nukpai ni eyɔɔ nɛ: Zadok bi Azaria ji osɔfo. 3Elihoref kɛ Ahia, Shisha bii lɛ, ji woloŋmalɔi; Yehoshafat, Ahilud bi lɛ, ji sajiaŋmlãlɔ. 4#2 Sam 23.20 Yehoiada bi Benaia ji tatsɛnukpa; ni Zadok kɛ Abiatar ji osɔfoi. 5Natan bi Azaria lɛ ji mɔ ni kwɛɔ kpokpai anɔ tsuji lɛ anɔ; Natan bi Zabud lɛ ji Osɔfo kɛ maŋtsɛ lɛ naanyo. 6Ahishar kwɛɔ maŋtsɛ we lɛ nɔ; ni Abda bi Adoniram lɛ kwɛɔ maŋtsɛ nitsulɔi lɛ anɔ.
7Maŋtsɛ Solomon hala nitsulɔi nyɔŋma kɛ enyɔ yɛ Israel maŋ fɛɛ. Amɛ amɛkɛ niyenii baa maŋtsɛ we lɛ daa afi. Daa afi mli lɛ mɔ fɛɛ mɔ yɛ nyɔɔŋ nɔ ni ekɛ niyenii baa. 8Amɛgbɛii nɛ: Ben-Hur yɔɔ Efraim gɔji lɛ anɔ. 9Ben-Deker kwɛɔ Makaz kɛ Shaalbim kɛ Bet-Shemash kɛ Elon-Bet-Hanan. 10Ben-Hesed kwɛɔ Arubot, ni lɛ nɔŋŋ ekwɛɔ Soko kɛ Hefer shikpɔji lɛ. 11Ben-Abinadab kwɛɔ Nafat-Dor. Eŋa ji Tafat, Solomon biyoo lɛ. 12Ahilud bi Baana kwɛɔ Taanak kɛ Megido kɛ Bet-Shean yɛ Zaretan masɛi yɛ Yezreel ŋshɔnaa gbɛ, kɛjɛ Bet-Shean kɛyashwie Abel-Mehola kɛ Yokmeam sɛɛ. 13Ben-Geber kwɛɔ Ramot-Gilead, lɛ nɔŋŋ ekwɛɔ akrowai komɛi ni ji Manase bi Yair nɔ lɛ anɔ, nɔ ní yɔɔ Gilead lɛ. Ekwɛɔ Argob kpokpai ni yɔɔ Bashan lɛ. Maji nyɔŋmai ekpaa kɛ amɛhe gbogboi kɛ shinai ni akɔɔble adabaŋi yɔɔ he ni. 14Ido bi Ahinadab kwɛɔ Mahanaim. 15Ahimaaz kwɛɔ Naftali. Ekpee Basemat, Solomon biyoo lɛ. 16Hushai bi Baana kwɛɔ Asher kɛ Bealot. 17Parua bi Yoshafat kwɛɔ Isakar. 18Ela bi Shimei kwɛɔ Benyamin. 19Ur bi Geber kwɛɔ Gilead he ni Amorbii amaŋtsɛ Sihon kɛ Bashanbii amaŋtsɛ Og hi lɛ. Mɛnɛɛmɛi fɛɛ asɛɛ lɛ mɔ kome ko yɛ ni kwɛɔ shikpɔŋ muu lɛ fɛɛ nɔ.
Solomon Maŋtsɛyeli lɛ dalɛ
20 #
Jɛn 13.15; 22.17 Yuda kɛ Israel yi fa babaoo diɛŋtsɛ tamɔ ŋshɔnaa shia. Amɛyeyeɔ nii, ni amɛnunuɔ dãi, ni amɛmii shɛɔ amɛhe. 21#Jɛn 15.18; 2 Kron 9.26 Solomon ye maŋtsɛyelii fɛɛ nɔ lumɔ kɛjɛ Eufrate Faa lɛ naa, kɛ Filistibii lɛ ashikpɔŋ lɛ nɔ kɛyashwie Ijipt husui lɛ anɔ. Amɛtsu onia amɛhã Solomon, ni amɛsɔmɔ lɛ ewala gbii abɔ fɛɛ.
22Solomon gbi kome jenamɔ niyenii ji ashikishaŋ litai akpei enumɔ kɛ ŋmãa mamu litai akpei nyɔŋma. 23Tsinai ni ewo fɔ nyɔŋma kɛ tsinai nyɔŋmai enyɔ ni jɛ ŋa nɔ lɛɛhei, kɛ toi oha ni fata he. Enɛɛmɛi fɛɛ asɛɛ lɛ ofrotei kɛ soŋai kɛ baayelɔ kɛ loofɔji ni ewo fɔ shi nɔ. 24Solomon ye shikpɔji fɛɛ ni yɔɔ Eufrate Faa lɛ anaigbɛ, kɛjɛ Tifsa aahu kɛyashwie Gaza, lɛ nɔ. Eye maŋtsɛmɛi fɛɛ ni yɔɔ Eufrate Faa lɛ anaigbɛ lɛ nɔ. Solomon na toiŋjɔlɛ yɛ ehewɔhewɔ maji lɛ fɛɛ amli. 25#Lev 25.18; 2 Maŋ 18.31 Ni Solomon yinɔ fɛɛ lɛ, Yuda kɛ Israel hi shi shweshweeshwe. Mɔ fɛɛ mɔ hi shi yɛ ewain tso kɛ egbami tso shishi kɛjɛ Dan aahu kɛyashwie Beersheba.
26 #
1 Maŋ 10.26; 2 Kron 1.14; 9.25 Solomon yɛ okpɔŋɔiatsui akpei ejwɛ kɛhã eshwiilii lɛ, kɛ okpɔŋɔiatsɛmɛi akpei nyɔŋma kɛ enyɔ. 27Mɛi nyɔŋma kɛ enyɔ ni kwɛɔ Solomon niyenii anɔ lɛ kɛ niyenii baa daa kɛhã mɛi ni bayeɔ nii yɛ maŋtsɛ we lɛ. Mɔ kome yɛ nyɔɔŋ kome nɔ. Ni amɛhãaa nɔ ko nɔ ko he ahia. 28Amɛkɛ akoko kɛ jwɛi hu ni akɛbaahã okpɔŋɔi kɛ kooloi krokomɛi lɛ fɛɛ baa, bɔ ni afo tɛ ahã amɛ lɛ.
29Ni Nyɔŋmɔ hã Solomon jwɛŋmɔ ni mli kwɔ kɛ niiashishinumɔ kpele diɛŋtsɛ. 30Solomon le nii fe nilelɔi fɛɛ ni yɔɔ Bokã kɛ Ijipt lɛ fɛɛ. 31Ele nii fe jeŋ gbɔmɛi fɛɛ; ele nii fe Etan, Ezrahinyo lɛ kɛ Heman kɛ Kalkol kɛ Darda, Mahol bii lɛ. Solomon gbɛi hehee yɛ jeŋ maji lɛ fɛɛ mli kɛkpe. 32#Jaj 12.9 Ni Solomon bu abɛi akpei etɛ̃; ni elalai anaa ji akpe kɛ enumɔ. 33Ewie tsei ahe, kɛjɛ tsenedru tso ni yɔɔ Lebanon nɔ aahu kɛyashi tsei bibii ni kwɛ̃ɔ yɛ gbogboi anɔ ahe. Ewie kooloi kɛ loofɔji kɛ waamɔ nii kɛ nuŋloi hu ahe. 34#1 Maŋ 10.1, 6 Maŋtsɛmɛi ni yɔɔ jeŋ fɛɛ nu Solomon nilee lɛ he, no hewɔ lɛ, amɛhã mɛi ba, ni amɛbabo Solomon naa wiemɔ toi.
Currently Selected:
1 Maŋtsɛmɛi 4: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
