1 Maŋtsɛmɛi 3
3
Solomon kpa nilee he fai
(2 Kronika 1.3-13)
1 #
Deut 23.8
Solomon kɛ Ijipt maŋtsɛ Farao fee shaanuu, ni Solomon kpee Farao biyoo. Ni ekɛ lɛ ba Yerusalɛm kɛyashi beyinɔ ni agbe lɛ diɛŋtsɛ ewe lɛ kɛ Yehowa we lɛ kɛ Yerusalɛm he gbogboi lɛ atswaa naa. 2Nakai be mli lɛ akɛni amako tsu ahãko Yehowa hewɔ lɛ, maŋ lɛ shã afɔle yɛ wɔŋkoi lɛ amli. 3Solomon sumɔɔ Yehowa, ni enyiɛ etsɛ David tsɔ̃ɔmɔ lɛ sɛɛ pɛpɛɛpɛ; shi Solomon hu shã afɔle kɛ tsofakɛŋma yɛ jemawɔji ajamɔhei lɛ.
4 #
1 Kron 21.29
Afɔleshãa latɛ wulu fe fɛɛ lɛ Gibeon eyɔɔ; no hewɔ lɛ, Solomon yiŋ etee koni eyashã afɔle yɛ jɛi. Solomon eshã afɔle fe shii akpe yɛ nɛkɛ afɔleshãa latɛ nɛɛ nɔ. 5#1 Maŋ 9.2 Nyɔɔŋ be ni eyɔɔ jɛi lɛ, Nuŋtsɔ Naa Nyɔŋmɔ jie ehe kpo etsɔ̃ɔ lɛ yɛ lamɔ mli. Ni Nyɔŋmɔ kɛɛ lɛ akɛ, “Bi mi nɔ ni otaoɔ ni mahã bo!” 6Ni Solomon kɛɛ lɛ akɛ, “Ofee mitsɛ David ejurɔ, ni osumɔ lɛ kɛ suɔmɔ kpele, ejaakɛ eye bo anɔkwa; eja, ni ekɛ bo hi shi kɛ tsui krɔŋŋ. Ni bo hu osumɔ lɛ, ni ohã lɛ binuu koni eta esɛ̃i lɛ nɔ, tamɔ bɔ ni eba mli ŋmɛnɛ nɛɛ. 7Ni amrɔ nɛɛ, Ao Yehowa, miNyɔŋmɔ, owo mi, otsulɔ, maŋtsɛ yɛ mitsɛ sɛɛ. Gbekɛ bibioo kɛ minaa fufɔ sã kɛkɛ ji mi, ni mileee maŋnɔyeli. 8#1 Maŋ 4.20 Shi esa akɛ maye omaŋ kpeteŋkple nɛɛ nɔ, maŋ ni bo diɛŋtsɛ ohala, maŋ ni amɛfa babaoo bɔ ni anyɛŋ amɛ akane tete lɛ. 9#Lal 143.10 No hewɔ lɛ, dromɔ mi, otsulɔ, nilee koni mikɛye omaŋ lɛ nɔ yɛ jalɛ mli. Hã mayoo srɔto ni yɔɔ nɔ ni hi kɛ nɔ ni ehiii teŋ; kɛjeee nakai lɛ te mafee tɛŋŋ manyɛ maye omaŋ kpeteŋkple nɛɛ nɔ hu?” 10Ni nɛkɛ wiemɔ nɛɛ sa Nuŋtsɔ lɛ hiɛ akɛ Solomon bi enɛ. No hewɔ lɛ, 11Nyɔŋmɔ kɛɛ lɛ akɛ, “Akɛni obi enɛ, shi obiii ni ahã bo wala sɛɛtsɛlɛ, ni asaŋ obiii ninamɔ ohãaa ohe, ni osaa obiii ohenyɛlɔi agbele; shi moŋ obi ni ahã bo jwɛŋmɔ kɛ niiasɛɛyoomɔ lɛ, 12#Abɛi 2.3-6 mɔ ko ehiŋ shi ni aaale nii tamɔ bo, ni mɔ ko hu baŋ yɛ osɛɛ ni aaatamɔ bo. 13Ni asaŋ nɔ ni obiko tete hu maŋɔ mafata he mahã bo; ninamɔ kɛ anunyam fɛɛ, bɔ ni maŋtsɛmɛi lɛ ateŋ fɛɛ lɛ, mɔ ko mɔ ko kɛ bo yeŋ hegbɔ owala gbii abɔ fɛɛ. 14Kɛ ooobo mi toi, ni oooye mikpɔi kɛ mimlai lɛ anɔ, tamɔ bɔ ni otsɛ David fee lɛ, no lɛ mahã ni otsɛ yɛ jeŋ.”
15Kɛkɛ ni Solomon hiɛ tsɛ̃, ni naa lamɔ ni. Nyɔŋmɔ kɛ lɛ ewie yɛ mli. Eba Yerusalɛm, ni ebadamɔ Yehowa afɔleshãa latɛ lɛ hiɛ, ni eshã shãa afɔle. No sɛɛ lɛ, eŋmɛ etsuji lɛ fɛɛ okplɔ̃.
Solomon bu atɛŋ
16Gbi ko lɛ yei ajwamãŋi enyɔ komɛi badamɔ Maŋtsɛ Solomon hiɛ. 17Ni yei lɛ ateŋ mɔ kome kɛɛ, “Minuŋtsɔ maŋtsɛ, ofainɛ, mi kɛ nɛkɛ yoo nɛɛ fɛɛ yɔɔ tsu kome mli yɛ shĩa kome mli. Ni mifɔ bi yɛ shĩa lɛ mli. 18Enɔ gbii etɛ̃ sɛɛ lɛ eba mli akɛ nɛkɛ yoo nɛɛ hu bafɔ; wɔyi enyɔ nɛɛ pɛ wɔyɔɔ shĩa lɛ mli. Mɔ ko mɔ ko fataaa wɔhe yɛ shĩa lɛ mli. 19Nɛkɛ yoo nɛɛ binuu lɛ bagbo, ejaakɛ eyakã enɔ. 20Ni nyɔɔŋteŋ be ni mi oweyoo, miwɔ lɛ, ete shi, ni ebawo mibi nuu lɛ yɛ mimasɛi, ni eŋɔ lɛ eyawo emlishi, ni ewo ebi nuu ni egbo lɛ ebawo mimlishi. 21Be ni mite shi leebi ni mibahã mibi lɛ fufɔ lɛ, naa, egbo! Shi be ni je tsɛre ni mikwɛ lɛ jogbaŋŋ lɛ, mina akɛ jeee mibi ni mifɔ lɛ ni.” 22Ni yoo kroko lɛ hu kɛɛ, “Dabi, mibi ji hiɛkãalɔ lɛ, ni bo obi ji mɔ ni egbo lɛ.” Yoo mɔ ni wie klɛŋklɛŋ lɛ bo akɛ, “Dabida, mɔ ni egbo lɛ ji obi lɛ! Mɔ ni egbo lɛ ji obi lɛ, mɔ ni hiɛ kã lɛ ji mibi lɛ!” Kɛkɛ ni amɛbɔ̃i naataamɔ yɛ maŋtsɛ lɛ hiɛ.
23Kɛkɛ ni Maŋtsɛ Solomon kɛɛ akɛ, “Mɔ kome kɛɛ, ‘Mibi ji hiɛkãalɔ lɛ, ni obi ji mɔ ni egbo lɛ.’ Ni mɔ kome hu kɛɛ, ‘Dabi, shi obi ji mɔ ni egbo lɛ, ni mibi ji mɔ ni hiɛ kã lɛ.’ ” 24Ni maŋtsɛ lɛ saa kɛɛ akɛ, “Nyɛbahãa mi klante!” Ni akɛ klante bahã maŋtsɛ lɛ. 25Kɛkɛ ni maŋtsɛ lɛ kɛɛ, “Nyɛjaa bi hiɛkãalɔ lɛ mli enyɔ, ni nyɛŋɔa fã nyɛhãa mɔ kome, ni akɛ fã ni eshwɛ lɛ ahã mɔ kome!” 26#Yes 49.15 Kɛkɛ ni yoo mɔ bi ni ji hiɛkãalɔ lɛ bo akɛ, “Ao, minuŋtsɔ maŋtsɛ, mimusuŋ miishã mi yɛ mibi lɛ he. Ofainɛ, ŋɔɔ bi hiɛkãalɔ lɛ ohã lɛ; akagbe lɛ kɔkɔɔkɔ!” Shi mɔ kome lɛ kɛɛ, “Akɛ lɛ akahã wɔteŋ mɔ ko mɔ ko, aja emli enyɔ!” 27Kɛkɛ ni Solomon kɛɛ akɛ, “Nyɛkagbea lɛ. Nyɛŋɔa bi hiɛkãalɔ lɛ nyɛhãa yoo mɔ ni wie klɛŋklɛŋ lɛ. Ejaakɛ lɛ ji bi lɛ nyɛ!” 28Be ni Israelbii fɛɛ nu bɔ ni Maŋtsɛ Solomon bua sane nɛɛ he ehã lɛ, amɛkɛ bulɛ kpele hã maŋtsɛ lɛ, ejaakɛ amɛna akɛ Nyɔŋmɔ nilee yɛ emli, ni no hã enyɛ nɛkɛ kojomɔ ekojo!
Currently Selected:
1 Maŋtsɛmɛi 3: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
