1 Maŋtsɛmɛi 2
2
David wo Solomon ŋaa
1Be ni eshwɛ fioo ni Maŋtsɛ David baagbo lɛ, ewo ebi Solomon ŋaa akɛ, 2“Mibi, eshwɛ fioo pɛ ni magbo tamɔ bɔ ni adesai fɛɛ gboiɔ lɛ. No hewɔ lɛ, ohe awa, ni ofee ekãa taakɛ nuu. 3#Deut 17.14; Yos 1.7; 23.6 Ye Yehowa, oNyɔŋmɔ lɛ, tsɔ̃ɔmɔi lɛ anɔ, ni oba ojeŋ ni oye ekpɔi lɛ kɛ ekitãi lɛ kɛ emlai kɛ edasei lɛ anɔ, taakɛ bɔ ni aŋmã yɛ Mose mla lɛ mli lɛ, koni nɔ fɛɛ nɔ ni ofeɔ kɛ he fɛɛ he ni oyaa lɛ oye omanye. 4Kɛkɛ lɛ shi ni Yehowa wo mi lɛ baaba mli. No ji, ‘Kɛji oshwiei lɛ kɛ amɛtsui fɛɛ kɛ amɛsusuma fɛɛ aaaba amɛjeŋ yɛ mihiɛ, ni amɛaaye mi anɔkwa lɛ, no lɛ nuu ni aaaye maŋtsɛ yɛ Israel ebɔŋ bo.’
5 #
2 Sam 3.27; 20.10 “Solomon, ohiɛ akakpa nɔ ni Zerua bi Yoab fee mi lɛ nɔ, bɔ ni egbe Israel tatsɛmɛi enyɔ. Ner bi Abner kɛ Yeter bi Amasa, kɛtɔ ta mli lá shi ni ashwie he owele, be mli ni ta bɛ lɛ. Etɔ̃, ni no hewɔ lɛ, okɛ lɛ aye 6#Jɛn 42.38 yɛ onilee naa bɔ ni sa ohiɛ pɛ. Shi moŋ kaahã ekɛ eyiteŋ waji miikpeleke shi kɛmiiya gbohiiaje yɛ hejɔlɛ mli.
7 #
2 Sam 17.27; 19.32-41 “Feemɔ Barzilai, Gileadnyo lɛ, bii lɛ ejurɔ koni ohã amɛye nii yɛ okplɔ̃ he, ejaakɛ amɛwa mi be ni mijo onyɛmi Absalom naa foi lɛ. 8#2 Sam 16.5; 19.16-32 Ni naa, mɔ kroko hu ji Gera bi Shimei, ni jɛ Bahurim lɛ. Lɛ lɛ elomɔ mi dikadika gbi ni mitee Mahanaim lɛ. Shi fee sɛɛ be ni ekɛ mi bakpe yɛ Yordan Faa lɛ naa lɛ, mikɛ Yehowa gbɛi kã kitã akɛ, ‘Migbeŋ bo kɛ klante!’ 9#Lal 101.4, 5 Shi bo lɛ kaahã ni eye ehe. Nilelɔ ji bo; ni ole bɔ pɛ ni ooofee lɛ; egbɔ moŋ nɛ, shi ohã ni agbe lɛ kɛ eyiteŋ waŋ lɛ.”
Maŋtsɛ David gbele
(1 Kronika 3.4; 29.26-28)
10 #
Bɔf 13.36
David gbo ni afu lɛ yɛ Yerusalɛm.#2.10: Heb. David Maŋ lɛ mli 11#2 Sam 5.4, 5; 1 Kron 29.27 Gbii abɔ ni David kɛye maŋtsɛ ji afii nyɔŋmai ejwɛ. Eye maŋtsɛ afii kpawo yɛ Hebron; ni eye maŋtsɛ afii nyɔŋmai etɛ̃ kɛ etɛ̃ yɛ Yerusalɛm. 12#1 Kron 29.23 Ebi Solomon baye maŋtsɛ yɛ esɛɛ, ni emaŋtsɛyeli lɛ ma shi kpɛŋŋ diɛŋtsɛ.
Adonia gbele
13Gbi ko lɛ Hagit bi Adonia ba Solomon nyɛ Batsheba ŋɔɔ. Ni Batsheba bi Adonia akɛ, “Ani oba yɛ hejɔlɛ mli lo?” Ni Adonia kɛɛ, “Hɛɛ, hejɔlɛ mli miba. 14Asaŋ miyɛ sane ko ni mi mibakɛɛ bo.” Ni Batsheba kɛɛ Adonia akɛ, “Mɛni sane ni; wiemɔ!” 15Ni Adonia kɛɛ, “Ole akɛ kulɛ maŋtsɛyeli lɛ minɔ ni; ni Israel fɛɛ hiɛ kã minɔ akɛ mi mibaye maŋtsɛ lɛ; shi kɛ̃lɛ maŋtsɛyeli lɛ etsɔ̃ ehã he kroko, ni Nuŋtsɔ lɛ suɔmɔ naa lɛ etsɔ̃ minyɛmi lɛ nɔ. 16Nɔ kome pɛ kɛkɛ he fai mikpaa bo; kaakãmã mi!” Ni Batsheba kɛɛ, “Wiemɔ!” 17#2 Sam 3.7; 1 Maŋ 1.3-4 Ni Adonia kɛɛ, “Ofainɛ, okɛ minyɛmi Maŋtsɛ Solomon awie, ejaakɛ mile akɛ ekamaŋ bo, koni ekɛ Abishag, Shunam yoo lɛ, ahã mi gbãlã.” 18Ni Batsheba kɛɛ, “Ojogbaŋŋ, mi kɛ maŋtsɛ lɛ baawie ahã bo.”
19No hewɔ lɛ, Batsheba tee Maŋtsɛ Solomon ŋɔɔ, ni ekɛ lɛ yawie ehã Adonia. Be ni maŋtsɛ lɛ na enyɛ Batsheba lɛ, ete shi ekɛ lɛ yakpe, ni ekoto lɛ; kɛkɛ ni Maŋtsɛ Solomon ho eta emaŋtsɛ sɛ̃i lɛ nɔ ekoŋŋ. Ehã ayawo sɛ̃i kroko abahã enyɛ lɛ, ni eta maŋtsɛ ninejurɔgbɛ. 20Ni Batsheba kɛɛ Solomon akɛ, “Nɔ ko bibioo ko mibaba bo nɛɛ; kaakãmã mi.” Ni maŋtsɛ lɛ kɛɛ, “Bi mi, nyɛ awo, ni mikãmãŋ bo.” 21Ni ekɛɛ, “Hã aŋɔ Abishag, Shunam yoo lɛ, ahã onyɛmi Adonia gbãlã.” 22#1 Maŋ 6.7 Maŋtsɛ Solomon to he akɛ, “Shi mɛɛba obiɔ Abishag, Shunam yoo lɛ, shi ohã Adonia? Bi maŋtsɛyeli lɛ hu ohã lɛ, ejaakɛ lɛ ji minyɛmi nukpa. Mɛɛba obiii nɔ ko ohãaa Osɔfo Abiatar kɛ Zerua bi Yoab hu.” 23Kɛkɛ ni Maŋtsɛ Solomon kã Yehowa kitã ekɛɛ, “Kɛji wiemɔ ni Adonia wie nɛɛ lɛ jeee lɛ diɛŋtsɛ esusuma ewie eshi fii, Nyɔŋmɔ awo mi he nyɔmɔ. 24No hewɔ lɛ, gbii abɔ ni Yehowa, mɔ ni ehã mimaŋtsɛyeli lɛ emã shi kpɛŋŋ, ni eŋɔ mi eta mitsɛ David sɛ̃i lɛ nɔ, ni eŋɔ maŋtsɛyeli ehã mi kɛ mishwiei taakɛ bɔ ni ewo shi lɛ, ja agbe Adonia ŋmɛnɛ gbi nɛɛ nɔŋŋ.” 25No hewɔ lɛ, Maŋtsɛ Solomon tsu Yehoiada bi Benaia kɛtee ni eyatswa Adonia nɔ, ni egbe lɛ.
Ashwie Abiatar
26 #
1 Sam 22.20-23; 2 Sam 15.24; 1 Maŋ 1.7 Kɛkɛ ni Maŋtsɛ Solomon kɛɛ Osɔfo Abiatar akɛ, “Yaa Anatot yɛ bo diɛŋtsɛ oshikpɔŋ lɛ nɔ; kulɛ osa gbele; shi ŋmɛnɛ gbi nɛɛ migbeee bo, ejaakɛ bo ji mɔ ni otere Nuŋtsɔ Nyɔŋmɔ Adeka lɛ kɛnyiɛ mitsɛ David hiɛ, ni ona mitsɛ amanehului ni ena lɛ eko. 27#1 Sam 2.27-36 Shi moŋ mihaŋ ni oye Osɔfo dɔŋŋ, bɔ ni afee ni Yehowa wiemɔ ni ewie yɛ Eli we lɛ he yɛ Shilo lɛ aba mli.”
Agbe Yoab
28Yoab waaa Absalom shi moŋ ewa Adonia. No hewɔ lɛ, be ni enu akɛ Adonia egbo lɛ ejo foi kɛtee Yehowa Kpee Buu lɛ mli, ni eyamɔmɔ afɔleshãa latɛ lɛ he aklontoi lɛ amli. 29#Ɛks 21.14 Ni ayagba Maŋtsɛ Solomon akɛ Yoab ejo foi kɛtee Yehowa Kpee Buu lɛ mli; ni naa, eyɛ afɔleshãa latɛ lɛ he. Kɛkɛ ni Solomon tsu Yehoiada bi Benaia ekɛɛ, “Yaa ni oyagbe lɛ.” 30Ni Benaia tee Yehowa Buu lɛ mli, ni eyakɛɛ Yoab akɛ, “Bɔ ni maŋtsɛ kɛɛ nɛ, jee kpo.” Shi Yoab kɛɛ, “Dabida, shi biɛ nɛɛ nɔŋŋ magbo yɛ!” Ni Benaia yakɛɛ maŋtsɛ lɛ ekoŋŋ akɛ bɔ ni Yoab kɛɛ nɛ, ni hetoo ni ehã mi nɛ. 31Ni Solomon kɛɛ lɛ akɛ, “Yaafee bɔ ni ekɛɛ lɛ; tswaa lɛ nɔ koni ogbe lɛ, ni ofu lɛ; koni okɛtɔ la ni Yoab fɔse shwie shi yakatswaa, yɛ mi kɛ mitsɛ we, lɛ he owele. 32Yehowa ahã lɛ diɛŋtsɛ elá abua eyiteŋ, ejaakɛ ekɛ klante gbe mɛi enyɔ be ni mitsɛ David leee he nɔ ko. Gbɔmɛi nɛɛ ji gbɔmɛi ni ji jalɔi kɛ mɛi kpakpai fe lɛ. Amɛ ji Abner, Ner bi lɛ, Israel Tatsɛ lɛ, kɛ Yeter bi Amasa, Yuda tatsɛ lɛ. 33Amɛlá abua Yoab kɛ eshwiei ayiteŋ kɛya naanɔ; shi Yehowa ajɔɔ David we lɛ, eshwiei kɛ emaŋtsɛ sɛi lɛ kɛya naanɔ!” 34Yehoiada bi Benaia yiŋ etee Yehowa Buu lɛ mli, ni eyagbe Yoab, ni afu lɛ yɛ ewe lɛ, yɛ ŋa lɛ nɔ. 35Kɛkɛ ni Maŋtsɛ Solomon ŋɔ Yehoiada bi Benaia efee tatsɛ yɛ Yoab najiaŋ, ni eŋɔ Zadok efee Osɔfo yɛ Abiatar najiaŋ.
Agbe Shimei
36Kɛkɛ ni maŋtsɛ Solomon tsu ayatsɛ Shimei kɛba eŋɔɔ, ni ekɛɛ lɛ akɛ, “Maa tsu ohã ohe yɛ Yerusalɛm, ni ohi jɛi; ni okaje jɛi kɛmiiya he ko he ko. 37Ejaakɛ gbi nɔ ni oooje kpo oyafo Kidron faa lɛ, na ole akɛ gbo obaagbo, olá abua bo diɛŋtsɛ oyiteŋ!”
38Ni Shimei kɛɛ maŋtsɛ lɛ akɛ, “Wiemɔ lɛ hi; bɔ ni minuŋtsɔ maŋtsɛ kɛɛ lɛ, nakai nɔŋŋ kɛ̃ otsulɔ baafee.” Ni Shimei hi Yerusalɛm gbii kplaŋŋ.
39Afii etɛ̃ sɛɛ lɛ eba mli akɛ Shimei tsuji lɛ ateŋ mɛi enyɔ jo foi kɛtee Gat Maŋtsɛ Akish, Maaka bi lɛ ŋɔɔ. Ni atswa Shimei adafi akɛ, “Naa onyɔji lɛ yɛ Gat.” 40Be ni Shimei nu enɛ lɛ ewo eteji nɔ nii, ni eyiŋ etee Akish ŋɔɔ yɛ Gat ni eyatao enyɔji lɛ. Ni Shimei tee eyakpala etsuji lɛ kɛjɛ Gat kɛba. 41Mɔ ko yabɔ Maŋtsɛ Solomon amaniɛ akɛ Shimei eyiŋ kɛjɛ Yerusalɛm kɛtee Gat, ni eku esɛɛ eba ekoŋŋ. 42Kɛkɛ ni maŋtsɛ lɛ tsu ayatsɛ Shimei kɛba. Ni Solomon kɛɛ lɛ akɛ, “Te mitsɛ́ Yehowa mikɛkã bo kitã akɛ gbi nɔ ni oooje kpo ni oooyanyiɛ kɛaatee he ko lɛ, na ole akɛ gbo ooogbo lɛ? Okɛɛ mi akɛ, ‘Wiemɔ lɛ hi, minu!’ 43Mɛɛ hewɔ mɔ oyeee Yehowa kitã lɛ kɛ akpɔ ni miwo bo lɛ nɔ? 44Maŋtsɛ lɛ kɛɛ Shimei akɛ, ‘Ole efɔŋ fɛɛ ni ohiɛ kã he ni ofee mitsɛ David lɛ, no hewɔ lɛ, Yehowa ahã efɔŋ ni ofee lɛ aku sɛɛ abua bo diɛŋtsɛ oyiteŋ. 45Shi Maŋtsɛ Solomon lɛ aaajɔɔ lɛ, ni mitsɛ David sɛ̃i lɛ aaama shi shiŋŋ yɛ Yehowa hiɛ kɛaatee naanɔ!’ ” 46Kɛkɛ ni maŋtsɛ lɛ fã Yehoida bi Benaia, ni eje kpo ni eyagbe Shimei. Ni maŋtsɛyeli lɛ ma shi shiŋŋ yɛ Solomon dɛŋ.
Currently Selected:
1 Maŋtsɛmɛi 2: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
