1 Maŋtsɛmɛi 21
21
Nabot waintrom lɛ
1Saji nɛɛ asɛɛ lɛ sane ko hu ni ba nɛ. Nuu ko ni egbɛi ji Nabot, Yezreelnyo lɛ, yɛ waintrom yɛ Yezreel. Waintrom nɛɛ yɛ Samaria Maŋtsɛ Ahab mɔɔ lɛ masɛi kpaakpa. 2Gbi ko lɛ Ahab kɛɛ Nabot akɛ, “Ŋɔɔ owaintrom lɛ ohã mi koni mikɛfee ameo kɛ shitɔ kɛ amɛhenɔi lɛ abɔɔ, ejaakɛ ebɛŋkɛ miwe nɛɛ; mikɛ waintrom ni hi fe onɔ lɛ baato bo najiaŋ, aloo kɛji ooosumɔ lɛ, mawo bo nyɔmɔ kɛji oootsɔ̃ɔ mi ejara.” 3Shi Nabot kɛɛ Ahab akɛ, “Yehowa akahã enɛ miigbale mi fɔ̃ŋfɔ̃ akɛ maŋɔ mitsɛmɛi agboshinii lɛ mahã bo.”
4Ahab ku esɛɛ etee ewe lɛ ni efee gblinii, ni emli ewo la yɛ wiemɔ ni Nabot, Yezreelnyo lɛ, kɛ lɛ wie lɛ hewɔ; ejaakɛ ekɛɛ akɛ. “Mikɛ mitsɛmɛi agboshinii lɛ haŋ bo.” Eho ekã esaa nɔ, ni etsɔ̃ ehiɛ ehã gbogbo, ni ekpɛlɛ̃ɛɛ niyeli. 5Eŋa Yezebel ba eŋɔɔ, ni ebabi lɛ akɛ, “Mɛɛba ni ofee gblinii nɛkɛ, ni oyee nii nɛɛ?”
6Ahab here nɔ, ni ekɛɛ, “Ejaakɛ mikɛ Nabot, Yezreelnyo lɛ, wie ni mikɛɛ lɛ akɛ, ‘Ŋɔɔ owaintrom lɛ ohã mi, ni mahe, aloo kɛji oosumɔ lɛ mikɛ waintrom kroko aaato bo no najiaŋ.’ Shi ekɛɛ mi akɛ, mikɛ miwaintrom lɛ hãaa bo.”
7Kɛkɛ ni Yezebel kɛɛ Ahab akɛ, “Aso maŋtsɛ kɛ̃ oyeɔ yɛ Israel nɛɛ? Tee shi ni oye nii, ni ona tsui. Mi, mahã onine ashɛ Nabot, Yezreelnyo lɛ, waintrom lɛ nɔ.”
8Kɛkɛ ni Yezebel ŋma woji yɛ Ahab gbɛi mli, ni ekɛ Ahab wolonaasɔomɔnɔ lɛ sɔo woji lɛ anaa, kɛkɛ ni ekɛmaje Yezreel maŋ onukpai kɛ abladei ni kɛ Nabot yɔɔ jɛi lɛ. 9Eŋma yɛ woji lɛ amli akɛ, “Nyɛshiɛa akɛ ahĩ ŋmãa; no sɛɛ lɛ nyɛtsɛa maŋbii lɛ kpee, ni nyɛhãa Nabot ataa kpee lɛ yitso; 10#Hiob 1.5; Ɛks 23.28 ni nyɛhãa hii yakagbɔmɛi enyɔ ataraa shi ni amɛmiikwɛ Nabot hiɛ, koni amɛye odase amɛshi lɛ akɛ, ‘Olomɔ Nyɔŋmɔ kɛ maŋtsɛ lɛ.’ Enɛ sɛɛ lɛ akpala lɛ kɛje kpo koni ayatswia lɛ tɛ ni egbo.”
11Yezreel maŋ lɛ mli onukpai lɛ kɛ abladei lɛ ye wiemɔ ni yɔɔ wolo ni Yezebel kɛmaje amɛ lɛ mli lɛ nɔ pɛpɛɛpɛ. 12Amɛshiɛ akɛ ahĩ ŋmãa, ni amɛhã Nabot yata kpee ni atsɛ lɛ yitso. 13Amɛhã hii yakagbɔmɛi enyɔ komɛi sɛ̃i, ni amɛmiikwɛ Nabot hiɛ. Hii yakagbɔmɛi enyɔ nɛɛ kɛ sane shi Nabot yɛ maŋbii lɛ ahiɛ akɛ Nabot lomɔ Nyɔŋmɔ kɛ maŋtsɛ lɛ. Kɛkɛ ni maŋbii lɛ kpala Nabot kɛshi maŋ lɛ mli, ni amɛyatswia lɛ tɛ ni amɛgbe lɛ. 14Kɛkɛ ni atsu ayakɛɛ Yezebel akɛ, “Atswia Nabot tɛ agbe lɛ.”
15Shɛɛ lɛ ni shɛ Yezebel dɛŋ nɔŋŋ pɛ, kɛkɛ ni ekɛɛ Ahab akɛ, “Tee shi koni oyaŋɔ Nabot, Yezreelnyo lɛ, abɔɔ lɛ ni ekpɛlɛ̃ɛɛ akɛ ekɛaahã bo ni ohe kɛ shika lɛ, ejaakɛ Nabot egbo.” 16Be ni Ahab nu akɛ Nabot egbo lɛ, oya nɔŋŋ kɛkɛ ni Ahab ŋɔ shwie nɔ kɛmiiya Yezreel koni eyaŋɔ abɔɔ lɛ.
Elia tsɔ̃ɔ fɔ ni Nyɔŋmɔ ebu Ahab
17Kɛkɛ ni Yehowa kɛɛ Elia, Tishbinyo lɛ, akɛ, 18“Yaa koni okɛ Ahab, Israel Maŋtsɛ lɛ, ni yeɔ lumɔ yɛ Samaria lɛ ayakpe. Naa, eyɛ Nabot waintrom lɛ mli; etee akɛ eyaaŋɔ trom lɛ. 19#1 Maŋ 22.38 Kɛɛmɔ lɛ akɛ, ‘Ei Ahab, ogbe gbɔmɔ lɛ, koni oŋɔ enii lɛ okɛfee onɔ bɛɛ?’ Kɛɛmɔ lɛ ofata he akɛ, ‘Bɔ ni Yehowa kɛɛ nɛ: He ni gbei lɛmɔ Nabot lá yɛ lɛ, jɛi nɔŋŋ kɛ̃ gbei aaalɛmɔ bo hu olá yɛ.’ ”
20Be ni Ahab na Elia lɛ, ekɛɛ, “Ei mihenyɛlɔ, bo onine egbe mi nɛɛ.”
Elia here lɛ nɔ ekɛɛ, “Minine egbe bo lɛɛlɛŋ, ejaakɛ ohã efɔŋfeemɔ eŋɔ bo nom yɛ Yehowa hiɛ. 21#2 Maŋ 9.7, 8 No hewɔ lɛ, naa nɔ ni Yehowa kɛɔ bo: ‘Mahã sane fɔŋ aye nyɛ, mibaplene bo kɛ nuu fɛɛ nuu ni okɛyɔɔ weku yɛ Israel, nyɔŋ kɛ mɔ ni eye ehe fɛɛ. 22Mafee owe lɛ tamɔ mifee Nebat bi Yeroboam we lɛ kɛ Ahia bi Baasha hu we lɛ, ejaakɛ ohã mimli efu, ni ohã Israel efee esha.’ 23#2 Maŋ 9.33-36 Ni yɛ Yezebel hu gbɛfaŋ lɛ, Yehowa kɛɛ ‘Gbei baaye eloo yɛ Yezreel maŋ lɛ nɔŋŋ mli.’ 24#1 Maŋ 14.11 Kɛji owekunyo ko gbo yɛ maŋ lɛ, gbei aaaye eloo, ni owekunyo ni aaayagbo yɛ ŋa nɔ lɛ, loofɔji aaaye eloo.”
25(Anɔkwa, mɔ ko mɔ ko kwraa bɛ ni eŋɔ ehe ehã efɔŋfeemɔ yɛ Yehowa hiɛ tamɔ Maŋtsɛ Ahab. Fɛɛ jɛ ehe ni eŋmɛɛ ehã eŋa Yezebel mɔ ni tsirɛ eyisɛɛ kɛfee efɔŋ lɛ. 26Efee esha ni yɔɔ hiɛgbele kɛ ja ni eyaja amãgãi lɛ, tamɔ Amorbii ni Yehowa shwie yɛ Israelbii ahiɛ lɛ fee lɛ.)
27Be ni Ahab nu wiemɔi nɛɛ lɛ, egbala etadei lɛ yɛ ehe, ni ekɔ kpekpe ebu, ni ehi ŋmãa, ni ebuɔ kpekpe lɛ tete kɛwɔɔ, ni eyaa ni ebaa ni efee gblinii.
28Kɛkɛ ni Yehowa kɛɛ Elia, Tishbinyo lɛ, akɛ, 29#2 Maŋ 9.22, 26 “Ona bɔ ni Ahab humiɔ shi yɛ mihiɛ agbɛnɛ? Akɛni eba ehe shi yɛ mihiɛ hewɔ lɛ, mihaŋ efɔŋ lɛ aba yɛ eyinɔ nɛɛ; ebi yinɔ moŋ ni mahã efɔŋ lɛ aba ewe lɛ nɔ yɛ.”
Currently Selected:
1 Maŋtsɛmɛi 21: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
