1 Maŋtsɛmɛi 22
22
Gbalɔ Mikaia bɔ Ahab kɔkɔ
(2 Kronika 18.2-27)
1Israel kɛ Siria hi shi afii etɛ̃ ni ta ko kwraa bɛ amɛteŋ. 2Shi afi ni ji etɛ̃ lɛ nɔ lɛ, Yuda Maŋtsɛ Yehoshafat yiŋ etee eyasara Israel Maŋtsɛ Ahab.
3 #
Yos 21.38
Ahab kɛɛ etsuji lɛ akɛ, “Bɛ nyɛle akɛ Ramot-Gilead lɛ wɔnɔ ni? Ni kɛ̃lɛ wɔtara shi, ni wɔfeee he eko koni wɔshɔ̃ yɛ Siria maŋtsɛ lɛ dɛŋ?” 4#2 Maŋ 3.7; 2 Kron 19.2 Kɛkɛ ni Ahab bi Yehoshafat akɛ, “Bɛ okɛ mi aaatee koni wɔyatua Ramot-Gilead?” Yehoshafat kɛɛ Ahab akɛ, “Mi nɔŋŋ ji bo; mimaŋbii lɛ omaŋbii ni, mikpɔŋɔi lɛ okpɔŋɔi ni.”
5Shi Yehoshafat kɛshi nɔ akɛ, “Shi, wɔtsɔ̃ hiɛ wɔbi Yehowa daaŋ gbee dã.”
6No hewɔ lɛ, Israel Maŋtsɛ Ahab bua gbalɔi lɛ anaa kɛkpe, amɛyi aaafee ohai ejwɛ, ni ebi amɛ akɛ, “Miya miyatua Ramot-Gilead lo, aloo mikaya?” Gbalɔi lɛ to he akɛ, “Yaa, ni Yehowa baatu maŋ lɛ ewo odɛ̃ŋ.”
7 #
2 Maŋ 3.11
Shi Yehoshafat bi akɛ, “Ani Yehowa gbalɔ ko bɛ biɛ nɛɛ dɔŋŋ, koni wɔyabi nii yɛ eŋɔɔ?”
8Israel Maŋtsɛ Ahab kɛɛ Yehoshafat akɛ, “Mɔ kome ko yɛ, ni kulɛ wɔɔnyɛ wɔyabi Yehowa daaŋ gbee yɛ eŋɔɔ. Lɛ ji Imla bi Mikaia lɛ; shi moŋ misumɔɔɔ esane, ejaakɛ egbako gbalɛ kpakpa ko yɛ mihe dã, fe akɛ be fɛɛ be lɛ gbalɛ gbonyo.” Shi Yehoshafat kɛɛ akɛ, “Nii akakɛɛ nakai!”
9Kɛkɛ ni Ahab tsɛ piafonyo ko, ni ekɛɛ lɛ akɛ, “Yaa koni okɛ Imla bi Mikaia lɛ ashɛ biɛ nɛɛ nɔŋŋ!”
10Israel Maŋtsɛ Ahab kɛ Yuda Maŋtsɛ Yehoshafat ewula kɛ maŋtsɛmɛi atadei kɛtara amɛmaŋtsɛ sɛ̃ii anɔ, yɛ ŋmãagbeemɔhe ni yɔɔ Samaria agbo lɛ naa kpataa lɛ, ni gbalɔi lɛ fɛɛ miigba yɛ amɛhiɛ. 11Gbalɔi lɛ ateŋ mɔ ko ni ji Kenaana bi Zedekia lɛ fee dade akloŋtoi, kɛkɛ ni ekɛɛ Ahab akɛ, “Bɔ ni Yehowa kɛɛ nɛ: ‘Enɛɛmɛi okɛbaashimɔ Siriabii lɛ kɛyashi beyinɔ ni oookpãtã amɛhiɛ.’ ” 12Gbalɔi lɛ fɛɛ miigba gbalɛ koome akɛ: “Yaa koni oyatua Ramot-Gilead, ni obaaye omanye, ejaakɛ Yehowa baatu maŋ lɛ ewo maŋtsɛ dɛŋ.”
Mikaia gba musu gbalɛ
(2 Kronika 18.12-27)
13Bɔfo ni tee Mikaia tsɛmɔ lɛ kɛɛ lɛ akɛ, “Naa, gbalɔi lɛ fɛɛ kɛ naabu kome egba gbalɛ kpakpa ehã maŋtsɛ lɛ. No hewɔ lɛ, hã ogbalɛ lɛ kɛ amɛteŋ mɔ kome pɛ nɔ afee pɛ.”
14Shi Mikaia to he akɛ, “Gbii abɔ ni Yehowa hiɛkãalɔ lɛ yɔɔ nɛɛ lɛ, nɔ ni Yehowa aaakɛɛ mi lɛ, no mawie.”
15Be ni Mikaia shɛ Maŋtsɛ Ahab hiɛ lɛ, Ahab bi lɛ akɛ, “Ani mikɛ Maŋtsɛ Yehoshafat aya koni wɔyatua Ramot-Gilead, aloo wɔkaya?” Mikaia here nɔ akɛ, “Nyɛyaa; nyɛbaaye omanye. Yehowa baajɔɔ maŋ lɛ nɔ ahã nyɛ.”
16Shi Ahab kɛɛ Mikaia akɛ, “Shii enyiɛ po mahã okã mi kitã akɛ, kɛji okɛ mi miiwie yɛ Yehowa gbɛi mli lɛ, okagba mi nɔ kroko fe anɔkwale lɛ kɛkɛ?”
17 #
Num 27.17; Mat 9.36; Mar 6.34 Mikaia to he akɛ, “Miina Israel tabilɔi lɛ ni amɛgbɛ amɛshwã gɔji lɛ anɔ tamɔ toi ni bɛ kpalalɔ. Kɛkɛ ni Yehowa kɛɛ akɛ, ‘Hii nɛɛ bɛ nuŋtsɔ; hã amɛteŋ mɔ fɛɛ mɔ aku esɛɛ eya shĩa yɛ toiŋjɔlɛ mli.’ ”
18Kɛkɛ ni Ahab kɛɛ Yehoshafat akɛ, “Ani mikɛɛɛ bo akɛ egbaŋ gbalɛ jurɔ kɔkɔɔkɔ yɛ mihe, fe efɔŋ pɛ?”
19 #
Yes 6.1; Hiob 1.6 Mikaia tee nɔ ekɛɛ, “Agbɛnɛ bo Yehowa naa wiemɔ toi! Mina Yehowa ta emaŋtsɛ sɛ̃i lɛ nɔ yɛ ŋwɛi, ni ebɔfoi asafo lɛ fɛɛ damɔ emasɛi yɛ eninejurɔ nɔ kɛ ebɛku nɔ. 20Ni Yehowa bi akɛ, ‘Namɔ aaayalaka Ahab koni eya ni eyanyɔ yɛ Ramot-Gilead?’ ” Bɔfoi lɛ ekomɛi kɛɛ nɛkɛ, be mli ni mɛi komɛi hu miikɛɛ nɔ kroko. 21#Yes 19.14 Ahiɛ nakai aahu kɛyashi mumɔ ko je kpo kɛbadamɔ Yehowa hiɛ; ekɛɛ akɛ, “Mi maya mayalaka lɛ.” 22Ni Yehowa bi lɛ akɛ, “Yɛ mɛɛ gbɛ nɔ?” Mumɔ lɛ to he ekɛɛ, “Maya, ni mibatsɔ̃ amale mumɔ yɛ gbalɔi lɛ fɛɛ anaa.” Kɛkɛ ni Yehowa kɛɛ akɛ, “Yaa koni oyalaka lɛ; onine baashɛ enɔ.”
23Ni Mikaia mu ewiemɔ lɛ naa nɛkɛ, “Enɛ ji nɔ ni eba lɛ. Yehowa ehã ogbalɔi nɛɛ egba amale gbalɛ amɛkɛlaka bo. Shi lɛ lɛ eto akɛ okɛ amanehulu baaya ayakpe!”
24Kɛkɛ ni Kenaana bi Zedekia, gbalɔ lɛ, tsi bɛŋkɛ Mikaia, ni egba Mikaia hiɛ mã, ni ebi lɛ akɛ, “Mɛɛ be nɛ ni Yehowa mumɔ lɛ je minɔ, ni ekɛ bo bawie?”
25Mikaia to he akɛ, “Gbi ni obaajɛ pia kome mli kɛya pia kroko mli ni oootee ohe lɛ, gbi lɛ nɔ ooona ole.”
26Kɛkɛ ni Maŋtsɛ Ahab fã etsulɔ ko ekɛɛ, “Mɔ Mikaia koni okɛ lɛ ayawo Amon maŋ lɛ amralo lɛ kɛ maŋtsɛbi Yoash dɛŋ.” 27Kɛɛmɔ amɛ akɛ, “Bɔ ni maŋtsɛ kɛɛ nɛ: ‘Nyɛwoa lɛ tsuŋ, ni ahã lɛ aboloo fioo kɛ nu fioo pɛ daa gbi akɛ eniyenii kɛyashi beyinɔ ni maya mayaye omanye maba.’ ”
28Shi Mikaia kɛɛ akɛ, “Kɛji otee, ni oyaye omanye, ni oba fĩi, belɛ jeee Yehowa ni tsɔ̃ minɔ wie lɛ.” Kɛkɛ ni ekɛshi sɛɛ akɛ, “Nyɛ mɛi fɛɛ, nyɛboa nɔ ni mikɛɛ lɛ toi.”
Ahab gbele
(2 Kronika 18.18-34)
29Kɛkɛ ni Israel Maŋtsɛ Ahab kɛ Yuda Maŋtsɛ Yehoshafat fã kɛtee koni amɛyatua Ramot-Gilead. 30Ahab kɛɛ Yehoshafat akɛ, “Mibatsake mihe kɛya ta lɛ naa; shi bo lɛ wulamɔ kɛ obladei atadei lɛ.” No hewɔ lɛ, Ahab tsake ehe kɛtee ta lɛ naa.
31Shi Siria maŋtsɛ lɛ ewo etayaa shwiilii lɛ anɔ asafoiatsɛmɛi nyɔŋmai etɛ̃ kɛ enyɔ lɛ kitã akɛ, “Nyɛkɛ mɔ ko mɔ ko, mɔ wulu ni jio, mɔ bibioo ni jio, akawua akɛ ja Israel maŋtsɛ lɛ pɛ kɛkɛ.” 32No hewɔ lɛ, be ni Siria asafoiatsɛmɛi lɛ na Yehoshafat lɛ, amɛsusu akɛ Israel maŋtsɛ lɛ ni, ni amɛkɛɛ akɛ, “Israel maŋtsɛ lɛ pi nɛ!” Kɛkɛ ni amɛgba kɛtee koni amɛkɛ lɛ ayawu. Shi Yehoshafat bolɔ, kɛkɛ ni ayoo lɛ. 33Be ni shwiilii lɛ anɔ asafoiatsɛmɛi lɛ na akɛ jeee Israel maŋtsɛ lɛ ni lɛ, amɛkpa esɛɛnyiɛmɔ. 34#2 Kron 35.23 Shi Siria asraafonyo ko gãi ni etsɛ̃ ni jeee gbɛ eje etsɛ̃ lɛ yatsu Israel maŋtsɛ lɛ trukaa, yɛ eŋwɛigbɛ dama lɛ kɛ shishigbɛ dama lɛ kpeehe lɛ. Kɛkɛ ni Israel maŋtsɛ lɛ kɛɛ eshwiili kudɔlɔ lɛ akɛ, “Dɔɔ oyi koni okɛ mi aje ta lɛ naa, shi mipila.”
35Ta lɛ mli wa pam nakai gbi lɛ; ni ahiɛ Israel maŋtsɛ lɛ mli kɛdamɔ shi yɛ eshwiili lɛ mli yɛ Siriabii ahiɛ; lá ni jɛ epilamɔ lɛ mli lɛ bua shwiili lɛ mli; egbo gbɛkɛnaashi mli. 36Hulushinyɔɔ mli lɛ, ashiɛ yɛ ta lɛ naa akɛ, “Mɔ fɛɛ mɔ aya eshikpɔŋ nɔ kɛ emaŋ.”
37Belɛ Maŋtsɛ Ahab nyɔ yɛ ta lɛ mli, ni akɛ egbonyo lɛ ba Samaria, ni abafu lɛ yɛ jɛi. 38#1 Maŋ 21.19; 2 Maŋ 9.25 Ayafɔ Ahab shwiili lɛ he yɛ Samaria kpaakpo lɛ naa, ni gbei yalɛmɔ Ahab lá lɛ, ni yei ajwamãŋi yaju amɛhe yɛ mli taakɛ Yehowa ewie eto lɛ.
39Ahab he saji krokomɛi ni eshwɛ kɛ nibii fɛɛ ni efee kɛ shuɔ wu tsu ko ni ema kɛ maji fɛɛ ni eto lɛ, aŋma fɛɛ yɛ Israel Maŋtsɛmɛi Ayinɔ Saji Awolo lɛ mli. 40Ahab gbele sɛɛ lɛ, ebi Ahazia baye esɛɛ akɛ Israel maŋtsɛ.
Yuda Maŋtsɛ Yehoshafat maŋtsɛyeli
(2 Kronika 20.31—21.1)
41Asa bi Yehoshafat bɔ̃i Yuda maŋtsɛyeli yɛ Israel Maŋtsɛ Ahab maŋtsɛyeli afi ni ji ejwɛ lɛ nɔ. 42Yehoshafat eye afii nyɔŋmai etɛ̃ kɛ enumɔ be ni ebabɔ̃i maŋtsɛyeli lɛ, ni eye maŋtsɛ afii nyɔŋmai enyɔ kɛ enumɔ yɛ Yerusalɛm. Enyɛ ji Shilhi biyoo ni egbɛi ji Azuba lɛ. 43Yehoshafat ba ejeŋ jogbaŋŋ tamɔ etsɛ Asa. Efee nɔ ni ja yɛ Yehowa hiɛ, shi moŋ efiteee jemawɔji ajamɔhei ni yɔɔ hei grɔŋŋi lɛ, ni no hewɔ lɛ, maŋbii lɛ tee nɔ amɛshã afɔlei kɛ tsofakɛŋma yɛ hei nɛɛ. 44Yehoshafat kɛ Israel Maŋtsɛ Ahab kpãŋ, ni amɛhi shi yɛ toiŋjɔlɛ mli.
45Agbɛnɛ Yehoshafat he saji ni eshwɛ kɛ ekãa ni efee kɛ bɔ ni etsɔ̃ ewuwuu tai ehã lɛ, aŋma fɛɛ yɛ Yuda Maŋtsɛmɛi Ayinɔ Saji Awolo lɛ mli. 46Eshwie hii kɛ yei ajwamãŋbɔlɔi ni ashi yɛ etsɛ Asa yinɔ, yɛ jemawɔji afɔleshãa latɛi lɛ anaa lɛ fɛɛ kɛje jɛi.
47Be nɛɛ mli lɛ maŋtsɛ ko bɛ Edom shikpɔŋ lɛ nɔ; amralo ko ni yeɔ maŋtsɛ najiaŋ yɔɔ jɛi.
48Maŋtsɛ Yehoshafat kpɛ Tarshishbii#22.48 Tashishbii: Tarshish alɛlɛ henɔi komɛi koni akɛtsɔ̃ ŋshɔ hiɛ kɛya Ofir yɛ jɛi shika tsuru hewɔ; shi ayanyɛɛɛ akɛya, ejaakɛ lɛji lɛ jwara yɛ Ezion-Geber. 49#1 Maŋ 9.28 Kɛkɛ ni Israel Maŋtsɛ Ahazia, Ahab bi lɛ, kɛɛ Yehoshafat akɛ, “Hã otsuji lɛ abashi mitsuji lɛ anɔ yɛ lɛji lɛ amli.” Shi Yehoshafat eyakpɛlɛ̃ɛɛ nɔ. 50Yehoshafat gbo, ni afu lɛ yɛ eblematsɛmɛi afũuhe lɛ yɛ David maŋ lɛ mli; kɛkɛ ni ebi Yehoram baye esɛɛ akɛ maŋtsɛ.
Israel Maŋtsɛ Ahazia
51 #
2 Maŋ 8.16
Yuda Maŋtsɛ Yehoshafat yinɔ afi ni ji nyɔŋma kɛ kpawo lɛ nɔ lɛ, Ahab bi Ahazia baye Israel maŋtsɛ, ni eye maŋtsɛ afii enyɔ yɛ Samaria. 52Ekɔ etsɛ Ahab kɛ enyɛ Yezebel yitsoŋwalɛ jeŋba lɛ, agbɛnɛ kɛ Nebat bi Yeroboam, mɔ ni hã Israel fee esha lɛ, hu jeŋba lɛ. 53#1 Maŋ 12.30 Esɔ̃mɔ, ni eja Baal, ni ewo Yehowa, Israel Nyɔŋmɔ lɛ, mli la tamɔ etsɛ fee lɛ pɛpɛɛpɛ.
Currently Selected:
1 Maŋtsɛmɛi 22: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
