1 Maŋtsɛmɛi 20
20
Ta ba Israel kɛ Siria teŋ
1Siria Maŋtsɛ Ben-Hadad bua etabilɔi fɛɛ anaa kɛkpe. Ena maŋtsɛmɛi nyɔŋmai etɛ̃ kɛ enyɔ krokomɛi hu kɛ amɛkpɔŋɔi kɛ tayaa shiwiilii fata ehe. Kɛkɛ ni efã kɛba, ni ebawo Samaria maŋ lɛ he ka, ni eyatua maŋ lɛ. 2Etsu bɔfoi kɛtee Israel Maŋtsɛ Ahab ŋɔɔ yɛ Samaria maŋ lɛ mli, ni ayakɛɛ lɛ akɛ, 3“Maŋtsɛ Ben-Hadad kɛɛ oŋɔ ojwiɛtɛi kɛ oshika kɛ oŋamɛi lɛ kɛ obii lɛ ateŋ mɛi ni yɔɔ hewalɛ lɛ obahã lɛ akɛ enɔ.”
4Kɛkɛ ni Israel Maŋtsɛ Ahab to he ekɛɛ. “Nyɛyakɛa minuŋtsɔ Maŋtsɛ Ben-Hadad akɛ mikpɛ̃lɛ̃ bɔ ni ekɛɛ lɛ nɔ. Ebaanyɛ ebaŋɔ mi diɛŋtsɛ kɛ nɔ fɛɛ nɔ hu ni miyɔɔ.”
5Bɔfoi lɛ ba ekoŋŋ, ni amɛbakɛɛ Ahab akɛ, “Naa bɔ ni Ben-Hadad kɛɛ, mitsu aba oŋɔɔ akɛ oŋɔ ojwiɛtɛi kɛ oshika kɛ oŋamɛi kɛ obii lɛ ohã mi; 6kɛ̃lɛ wɔ nɛkɛ be mli lɛ, mibatsu mitsuji oŋɔɔ koni amɛbakpa owe lɛ kɛ otsuji lɛ awei lɛ amli, ni nɔ fɛɛ nɔ ni aaasa amɛhiɛ lɛ, amɛŋɔ amɛhiɛ amɛdɛ̃ kɛba.”
7 #
2 Maŋ 5.7
Kɛkɛ ni Israel Maŋtsɛ Ahab tsɛ eshikpɔŋ lɛ nɔ onukpai lɛ fɛɛ, ni ekɛɛ amɛ akɛ, “Kɛji nyɛkwɛ lɛ nyɛbaana akɛ sane fɔŋ gbɔmɔ nɛɛ taoɔ ekɛye mi nɛɛ. Ejaakɛ etsu kɛba miŋɔɔ akɛ miŋɔ miŋamɛi kɛ mibii kɛ mijwiɛtɛi kɛ mishika mihã lɛ, ni mikamãaa lɛ.”
8Kɛkɛ ni onukpai lɛ fɛɛ kɛ maŋ muu lɛ fɛɛ kɛɛ Ahab akɛ, “Kaafo mli, ni kaakpɛlɛ̃ hu.”
9No hewɔ lɛ, Ahab kɛɛ Ben-Hadad bɔfoi lɛ akɛ, “Nyɛyakɛa minuŋtsɔ maŋtsɛ akɛ, klɛŋklɛŋ nibii fɛɛ hewɔ ni otsu otsulɔ ŋɔɔ lɛ, mibafee; shi enɛ lɛ minyɛŋ mafee.”
Bɔfoi lɛ yi mli amɛtee, ni amɛyabɔ Ben-Hadad amaniɛ. 10Ben-Hadad saa etsu Ahab ŋɔɔ ekoŋŋ, ni abakɛɛ lɛ akɛ, “Kɛji mikɛ tabilɔi bɔ ni sa baaa koni abakpãtã omaŋ lɛ hiɛ koni amɛloo emli mlu lɛ tete amɛhiɛ amɛdɛ̃ kɛya fĩi, no lɛ nyɔŋmɔi lɛ atswa mi nɔ amɛgbe mi.”
11Shi Israel Maŋtsɛ lɛ hã hetoo ekɛɛ, “Nyɛyakɛa Maŋtsɛ Ben-Hadad akɛ, tabilɔ kpakpa lɛ, ta sɛɛ dani eshwãa, shi jeee be ni ajeko shishi.”
12Ben-Hadad nine shɛ Ahab shɛɛ lɛ nɔ be mli ni lɛ kɛ maŋtsɛmɛi krokomɛi ni fata ehe kɛfã ta lɛ miinu dãa yɛ amɛbuui lɛ amli. Kɛkɛ ni efã esɛɛ tabilɔi lɛ akɛ, “Nyɛgbaa sa!” Ni amɛgba sa amɛwo maŋ lɛ he.
13Nakai be mli nɔŋŋ ni gbalɔ ko ba Israel Maŋtsɛ Ahab ŋɔɔ, ni ebakɛɛ lɛ akɛ, “Bɔ ni Yehowa kɛɔ nɛ: ‘Te ona asafo kpekpeŋkpekpeŋ nɛɛ fɛɛ? Naa, mibahã oye amɛnɔ kunim ŋmɛnɛ, koni ona ole akɛ mi ji Yehowa.’ ”
14Ahab bi akɛ, “Namɔ baanyiɛ hiɛ kɛyatua amɛ?” Gbalɔ lɛ to he ekɛɛ, “Bɔ ni Yehowa kɛɛ nɛ, ‘Oblahiiabii tabilɔi ni yɔɔ kpokpai anɔ amralofoi lɛ ashishi lɛ ji mɛi ni anyiɛ hiɛ.’ ”
Kɛkɛ ni Ahab bi akɛ, “Namɔ baatsɛ ta lɛ?”
Gbalɔ lɛ to he akɛ, “Bo ni.”
15No hewɔ lɛ, Maŋtsɛ Ahab bua oblahiiabii tabilɔi ni yɔɔ kpokpai anɔ amralofoi lɛ ashishi lɛ anaa. Amɛyibɔ fee ohai enyɔ kɛ nyɔŋmai etɛ̃ kɛ enyɔ. Mɛi nɛɛ asɛɛ lɛ Ahab bua mɛi fɛɛ ni ji Israelbii lɛ anaa; amɛyibɔ fee akpei kpawo.
16Israelbii ata lɛ fã shwane fintiŋŋ. Nakai be mli lɛ Ben-Hadad kɛ ewalɔi maŋtsɛmɛi nyɔŋmai etɛ̃ kɛ enyɔ lɛ miitɔ dãa yɛ amɛbuui lɛ amli. 17Amralofoi lɛ ashishi oblahiiabii tabilɔi lɛ tsutsu ni fã. Saralɔi ni Ben-Hadad etsu sa lɛ babɔ lɛ amaniɛ akɛ, “Hii komɛi miiba kɛjɛ Samaria.” 18Ben-Hadad kɛɛ akɛ, “Hejɔlɛ hewɔ amɛbaa jio, ta hewɔ amɛbaa jio, nyɛmɔmɔa amɛ hiɛkãalɔi.”
19Amralofoi lɛ ashishi oblahiiabii tabilɔi lɛ ni nyiɛ hiɛ, ni ta ni nyiɛ amɛsɛɛ lɛ je kpo kɛjɛ maŋ lɛ mli, 20ni amɛteŋ mɔ fɛɛ mɔ gbe Siria tabilɔ ni ekɛkpe. Kɛkɛ ni Siriabii lɛ jo foi, be mli ni Israelbii lɛ miitiu amɛ kɛ hiɛdɔɔ. Shi Siria Maŋtsɛ Ben-Hadad kɛ ekpɔŋɔiatsɛmɛi komɛi ho tara okpɔŋɔi anɔ kɛjo foi. 21Maŋtsɛ Ahab je kpo kɛjɛ ta lɛ naa, ni ekpãtã Siria okpɔŋɔi kɛ shwiilii lɛ ahiɛ; ekpãtã Siriabii lɛ ahiɛ butuu naakpa.
22 #
1 Maŋ 20.13
Kɛkɛ ni gbalɔ lɛ tee Maŋtsɛ Ahab ŋɔɔ, ni eyakɛɛ lɛ akɛ, “Yaa koni oyasaa ohe oto. Ojwɛŋ nɔ ni eba lɛ he, ejaakɛ wɔsɛɛ afi nɛkɛ be mli lɛ Siria maŋtsɛ lɛ baaba ebatua bo.”
Aye Siriabii anɔ kunim
23Siria Maŋtsɛ Ben-Hadad tsuji lɛ kɛɛ lɛ akɛ, “Israelbii anyɔŋmɔi lɛ gɔji anɔ nyɔŋmɔi ni, no hewɔ ni amɛnine tsɔ̃ wɔnɔ lɛ. Shi hã wɔkɛ amɛ awu yɛ ŋa kplenee nɔ, koni okwɛ akɛ wɔnine tsɔŋ amɛnɔ lo? 24Enɛ sɛɛ lɛ nɔ ni ofee nɛ: Tsakemɔ maŋtsɛmɛi nyɔŋmai etɛ̃ kɛ enyɔ lɛ ateŋ mɔ fɛɛ mɔ yɛ tatsɛmɛi agbɛhei lɛ, koni okɛ asafoiatsɛmɛi ato amɛnajiaŋ yɛ jɛi. 25No sɛɛ lɛ, obua tabilɔi ni falɛ shɛɔ ta ni hiɛ kpãtã lɛ naa, kɛ okpɔŋɔi kɛ tayaa shwiilii abɔ tamɔ tsutsu nibii lɛ afalɛ lɛ, koni wɔ kɛ Israelbii lɛ awu yɛ ŋa kplenee nɔ, koni okwɛ akɛ wɔnine tsɔŋ amɛnɔ lo.”
Ben-Hadad bo etsuji lɛ agbee toi, ni efee bɔ ni amɛkɛɛ lɛ.
26Be ni eshɛ afi naakplɔ lɛ, Ben-Hadad bua Siria tabilɔi anaa, kɛkɛ ni efã kɛba Afek koni ebatua Israelbii lɛ. 27Kɛkɛ ni abua Israelbii lɛ hu anaa. Amɛtao niyenii amɛkɛhiɛ amɛdɛŋ, ni amɛ hu amɛfã koni amɛkɛ Siriabii lɛ ayakpe. Israelbii lɛ yato shi kui enyɔ bɔ ni amɛmiikwɛ Siriabii lɛ hiɛ kɛ hiɛ. Israelbii lɛ afalɛ tamɔ too kui bibii enyɔ; shi Siriabii lɛ eyi ŋa lɛ nɔ tɔ.
28Gbalɔ ko yanina Israel maŋtsɛ lɛ, ni ekɛɛ lɛ akɛ, “Bɔ ni Yehowa kɛɛ nɛ, akɛni Siriabii lɛ ekɛɛ akɛ gɔji anɔ Nyɔŋmɔ ji mi, shi jeee jɔiaŋ Nyɔŋmɔ hewɔ lɛ, mibahã oye asafo kpekpeŋkpekpeŋ nɛɛ nɔ kunim, koni nyɛkɛna nyɛle akɛ mi ji Yehowa lɛ.”
29Asafoi enyɔ lɛ jwere shi gbii kpawo bɔ ni mɔnɛ miikwɛ mɔnɛ hiɛ. Gbi ni ji kpawo lɛ nɔ lɛ, akɛ ta lɛ yakũa naa, ni Israelbii lɛ gbe Siria tabilɔi nanenɔnyiɛlɔi akpei oha gbi kome jenamɔ. 30Siria tabilɔi ni shwɛ lɛ jo foi kɛbote Afek maŋ lɛ mli; shi maŋ lɛ gbogbo lɛ wule eshwie tabilɔi ni eshwɛ lɛ ateiaŋ mɛi akpei nyɔŋmai enyɔ kɛ kpawo nɔ. Ben-Hadad jo foi kɛjɛ ta lɛ naa kɛtee maŋ lɛ mli, ni eyatee ehe yɛ pia ko mli. 31Kɛkɛ ni Ben-Hadad tsuji lɛ kɛɛ lɛ akɛ, “Naa, wɔna wɔnu akɛ Israel we lɛ maŋtsɛmɛi lɛ, maŋtsɛmɛi mɔbɔnalɔi ji amɛ. No hewɔ lɛ, hã wɔkɔlɔ kpekpe wɔŋmɔlɔ wɔhɛ, koni wɔkɛ taŋkpee hu afimɔ wɔyitsei koni wɔya Israel maŋtsɛ lɛ ŋɔɔ; ekolɛ eeehere oyiwala.” 32No hewɔ lɛ, Ben-Hadad tsuji lɛ kɛ kpekpe ŋmɔlɔ amɛhɛ, ni amɛkɛ taŋkpee fimɔ amɛyitsei, ni amɛba Israel maŋtsɛ lɛ ŋɔɔ. Amɛbakɛɛ lɛ akɛ, “Otsulɔ Ben-Hadad kɛɛ, ‘Miikpa bo fai; hã miyi ana wala.’ ”
Ahab bi amɛ akɛ, “Ani ehiɛ kã lolo? Etamɔ minyɛmi pɛ!” 33Ben-Hadad tsuji lɛ eka amɛtoi kɛmiibo Ahab naa toi; no hewɔ lɛ, oya nɔŋŋ ni amɛtse naa akɛ, “Lɛɛlɛŋ akɛ onyɛmi ji Ben-Hadad.” Kɛkɛ ni Ahab kɛɛ tsuji lɛ akɛ, “Nyɛyaa koni nyɛkɛ lɛ abaa!” No hewɔ lɛ, Ben-Hadad je kpo kɛba Ahab ŋɔɔ. Ahab hã Ben-Hadad kwɔ etayaa shwiili lɛ. 34Kɛkɛ ni Ben-Hadad kɛɛ Ahab akɛ, “Maji ni mitsɛ shɔ̃ yɛ otsɛ dɛŋ lɛ mibadãi mahã bo. Obaanyɛ hu obafo jara yɛ Damasko ohã ohe, tamɔ bɔ ni mitsɛ bafee yɛ Samaria lɛ.” Ahab dãi sɛɛ ekɛɛ, “Mi hu miidãmɔ kpãŋmɔ nɛɛ nɔ miiŋmɛɛ ohe.” Amɛkpãŋ yɛ jɛi, kɛkɛ ni Ahab jie Ben-Hadad gbɛ.
Gbalɔ ko bu Ahab fɔ
35Yɛ Yehowa fãmɔ naa lɛ, gbalɔi abii lɛ ateŋ mɔ ko kɛɛ enaanyo gbalɔi abii lɛ nɔŋŋ eko akɛ, “Ofainɛ, tswaa mi nɔ!” Shi enaanyo lɛ ekpɛlɛ̃ɛɛ ni etswa lɛ nɔ. 36#1 Maŋ 13.24 No hewɔ lɛ, gbalɔ bi lɛ kɛɛ enaanyo lɛ akɛ, “Akɛni obooo Yehowa gbee toi hewɔ lɛ, amrɔ pɛ ni oooshi mi lɛ jata aaagbe bo.” Be ni enaanyo nɛɛ kɛ lɛ egbɛ mli ni eyaa lɛ jata ko yatua enaanyo lɛ, ni egbe lɛ.
37Gbalɔ nɛɛ nɔŋŋ na nuu kroko ko, ni ekɛɛ mɔ lɛ akɛ, “Ofainɛ, tswaa mi nɔ!” Mɔ lɛ tswa lɛ nɔ, ni epila lɛ. 38Kɛkɛ ni gbalɔ lɛ tee, ni eyadamɔ gbɛ lɛ nɔ eemɛ Israel Maŋtsɛ Ahab hoo mli. No mli lɛ gbalɔ lɛ kɛ yitsofii nɔ efĩ ehiɛsɛɛ ekɛtsake ehe. 39#2 Maŋ 10.24 Be ni Maŋtsɛ Ahab hoɔ lɛ, gbalɔ lɛ bo etsɛ lɛ, ni ekɛɛ lɛ akɛ, “Otsulɔ tee ta lɛ eko. Ta lɛ mli lɛ tabilɔ ko kɛ henyɛlɔ ko ni emɔ bahã mi shitoo, ni ekɛɛ mi akɛ, ‘Okɛ gbɔmɔ nɛɛ ato. Kɛji ejo foi lɛ, no lɛ okɛ owala baatse, aloo obaawo eyi nyɔmɔ jwiɛtɛi talenta kome.’ 40Shi be ni otsulɔ hiɛ edɔ yɛ nibii krokomɛi ahe lɛ, nuu lɛ jo foi.”
Maŋtsɛ Ahab kɛɛ akɛ, “Obu atɛŋ lɛ, bo diɛŋtsɛ. Ja ona owo shika lɛ.”
41Gbalɔ lɛ he fee oya nɔŋŋ ni ekpɔ yitsofii nɔ lɛ yɛ ehiɛsɛɛ. Jɛi ni Israel Maŋtsɛ lɛ yoo lɛ akɛ gbalɔi lɛ eko ni. 42Kɛkɛ ni gbalɔ lɛ kɛɛ Maŋtsɛ Ahab akɛ, “Bɔ ni Yehowa kɛɛ nɛ: ‘Akɛni oŋmɛɛ mɔ ni mijɔɔ enɔ mihã bo koni ogbe lɛ lɛ hewɔ lɛ, okɛ bo diɛŋtsɛ ohe baatse yɛ enajiaŋ kɛ omaŋ lɛ hu yɛ emaŋ lɛ najiaŋ.’ ”
43Maŋtsɛ Ahab yiŋ etee ewe yɛ Samaria be mli ni efee gblinii, asaŋ ni ehao hu.
Currently Selected:
1 Maŋtsɛmɛi 20: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
