1 Maŋtsɛmɛi 1
1
Maŋtsɛ David gbɔlɛbeiaŋ
1Agbɛnɛ Maŋtsɛ David egbɔ kotokoto. Tsɛbelɛ etsuji kɛ kuntui pii haa ehe moŋ nɛ shi kɛ̃lɛ ehe edɔɔɔ la. 2No hewɔ lɛ, etsuji lɛ kɛɛ lɛ akɛ, “Nii, hã ni wɔyatao oblayoo foro ko wɔbahã Nii, ni esɔmɔ Nii. Ebaakã Nii mlishi koni Maŋtsɛ he adɔ la.” 3No hewɔ lɛ, amɛtee ni amɛyatao oblayoo fɛɛfɛo yɛ Israel kpokpai anɔ fɛɛ kɛyashi amɛyana Abishag, Shunam oblayoo ko, ni amɛkɛ lɛ bahã Maŋtsɛ David. 4Oblayoo lɛ he yɛ fɛo naakpa. Ekwɛ maŋtsɛ, ni esɔmɔ lɛ kɛkɛ, shi Maŋtsɛ David kɛ Abishag naaa nuu kɛ yoo bɔlɛ.
Adonia tao ni eye maŋtsɛ
5-6 #
2 Sam 3.4
Adonia, David kɛ Hagit bi lɛ, Absalom sɛɛho ni; ni ehe yɛ fɛo naakpa. Be ko lɛ Adonia wo ehe nɔ kɛ shwãa akɛ “Mi, mibaye maŋtsɛ lɛ.” No hewɔ lɛ, etao shwiilii kɛ okpɔŋɔi kɛ hii nyɔŋmai enumɔ ni buɔ ehe. Etsɛ Maŋtsɛ David kãko lɛ pɛŋ akɛ, “Mɛɛ hewɔ ofeɔ enɛɛmɛi?” 7#1 Maŋ 2.22 Adonia kɛ Yoab, Zeruia bi lɛ, kɛ Osɔfo Abiatar kpãŋ he. No hewɔ lɛ, Yoab kɛ Abiatar kpɛlɛ̃ nɔ akɛ amɛaaye amɛbua lɛ koni eye maŋtsɛ lɛ. 8Shi Osɔfo Zadok kɛ Yehoida bi Benaia kɛ gbalɔ Natan kɛ Shimei kɛ Rei kɛ hii kakabãi ni buɔ Maŋtsɛ David he lɛ bɛ Adonia sɛɛ.
9 #
Yos 15.7
Gbi ko lɛ Adonia yagbegbee toi kɛ tsinai kɛ kooloi ni ewo fɔ yɛ Onufu Tɛsaa#1.9 Onufu Tɛsaa: Heb. Zohelet. lɛ ni bɛŋkɛ Rogel Nubu lɛ he. Ekpee enyɛmimɛi maŋtsɛbii lɛ fɛɛ kɛ Yuda hii kãkãlɔi ni ji Maŋtsɛ David tsuji lɛ fɛɛ kɛtee jɛi. 10Shi moŋ Adonia ekpeee Gbalɔ Natan kɛ Benaia, David hebulɔi lɛ, kɛ lɛ diɛŋtsɛ enyɛmi Solomon kɛyaaa jɛi.
Awo Solomon Maŋtsɛ
11 #
2 Sam 12.24
Be ni Natan nu nii nɛɛ he lɛ, eyabi Solomon nyɛ, Batsheba akɛ, “Ani onu akɛ Adonia, Hagit bi lɛ, ewo ehe maŋtsɛ, ni wɔnuŋtsɔ Maŋtsɛ David leee he eko lo? 12No hewɔ lɛ, agbɛnɛ ba ni mawo bo ŋaa, bɔ ni afee ni okɛhere bo diɛŋtsɛ kɛ obi Solomon yiwala. 13Yiŋ ni oya Maŋtsɛ David ŋɔɔ ni oyakɛɛ lɛ akɛ, ‘Nii, ani jeee bo okã oweyoo kitã akɛ obi Solomon ni baata mimaŋtsɛ sɛi lɛ nɔ lɛ? Te aye tɛŋŋ ni Adonia moŋ yeɔ maŋtsɛ lɛ nɛɛ?’ ” 14Ni Natan tee nɔ akɛ, “Be ni okɛ maŋtsɛ wieɔ lolo lɛ, mi hu manyiɛ osɛɛ kɛba mli ni mibamã owiemɔ lɛ nɔ mí.” 15Kɛkɛ ni Batsheba yiŋ etee Maŋtsɛ David ŋɔɔ yɛ pia lɛ mli. Nakai be mli lɛ, akɛni Maŋtsɛ David egbɔ kotokoto hewɔ lɛ, Abishag, Shunamyoo lɛ, ji mɔ ni sɔmɔɔ lɛ. 16Batsheba bakoto Maŋtsɛ David; ni Maŋtsɛ David bi lɛ akɛ, “Mɛni otaoɔ?”
17Ni Batsheba kɛɛ lɛ akɛ, “Nii, bo okã Yehowa, oNyɔŋmɔ lɛ, kitã akɛ, ‘Mibi Solomon baaye maŋtsɛ yɛ misɛɛ, ni lɛ ebaata misɛ̃i lɛ nɔ.’ 18Shi amrɔ nɛɛ naa, awo Adonia maŋtsɛ ni bo, minuŋtsɔ maŋtsɛ, oleee he eko! 19Ni egbe tsinai kɛ kooloi ni ewo fɔ babaoo, ni ekpee maŋtsɛbii lɛ fɛɛ kɛ Osɔfo Abiatar kɛ tatsɛ Yoab, shi otsulɔ Solomon lɛ ekpeee lɛ eko! 20Shi amrɔ nɛɛ, Nii, bo gbɛ Israel fɛɛ kwɛɔ akɛ oootsɔ̃ɔ amɛ mɔ ni baata minuŋtsɔ maŋtsɛ sɛ̃i lɛ nɔ kɛji ogbo sɛɛ. 21#Ɛks 5.16 Kɛjeee nakai lɛ aaaba mli akɛ be ni minuŋtsɔ maŋtsɛ etsɔ̃ esɛɛ lɛ, aaabu mi kɛ mibi Solomon gbɔmɛi gbohii, ni amɛaagbe wɔ.”
22Ni naa, be ni Batsheba wieɔ lolo lɛ, gbalɔ Natan hu ebashɛ jɛi. 23Ni ayakɛɛ Maŋtsɛ David akɛ, “Gbalɔ Natan eba jɛi!” Ni Natan bakoto maŋtsɛ lɛ 24ni ekɛɛ, “Maŋtsɛ, ani bo okɛɛ akɛ, ‘Adonia aye maŋtsɛ yɛ misɛɛ, ni eta misɛi lɛ nɔ lɛ?’ 25#2 Sam 16.16 Ejaakɛ ŋmɛnɛ gbi nɛɛ eyiŋ etee, ni eyagbe tsinai kɛ kooloi ni ewo fɔ kɛ toi babaoo; ni ekpee maŋtsɛbii lɛ fɛɛ kɛ ta lɛ nɔ asafoiatsɛmɛi lɛ kɛ Osɔfo Abiatar; ni naa, amɛtara ehiɛ amɛmiiyeyee nii, ni amɛmiinunuu dãi. Ni amɛmiibɔ oshe akɛ, ‘Maŋtsɛ Adonia yi ana wala.’ 26Shi mi, otsulɔ lɛ, kɛ Osɔfo Zadok kɛ Yehoiada bi Benaia lɛ ekpeee wɔ. 27Ani minuŋtsɔ maŋtsɛ le nɛkɛ sane nɛɛ, ni ohãaa otsuji ana ale mɔ ni baata minuŋtsɔ sɛ̃i lɛ nɔ yɛ osɛɛ lo?”
Solomon baye Maŋtsɛ
28Maŋtsɛ David to he akɛ, “Nyɛtsɛa Batsheba nyɛhãa mi!” Ni Batsheba ba, ni ebadamɔ maŋtsɛ lɛ hiɛ. 29Ni Maŋtsɛ David kɛɛ Batsheba akɛ, “Miwo bo shi yɛ Nyɔŋmɔ Hiɛkãalɔ lɛ, mɔ ni kpɔ̃ misusuma kɛjɛ amanehului fɛɛ mli lɛ hiɛ. 30Mikã bo, Yehowa, Israel Nyɔŋmɔ lɛ kitã akɛ obi Solomon baaye maŋtsɛ yɛ misɛɛ, ni lɛ ebaata mimaŋtsɛ sɛ̃i lɛ nɔ yɛ minajiaŋ lɛ; nakai nɔŋŋ kɛ̃ mimãa nɔ mi ŋmɛnɛ gbi nɛɛ hu.”
31Kɛkɛ ni Batsheba kɛ ehiɛ bu shi, ni ekoto maŋtsɛ lɛ, ni ekɛɛ, “Minuŋtsɔ maŋtsɛ yi ana wala kɛya naanɔ!” 32Kɛkɛ ni Maŋtsɛ David kɛɛ, “Nyɛtsɛa Osɔfo Zadok kɛ Gbalɔ Natan kɛ Yehoida bi Benaia nyɛhãa mi!” Kɛkɛ ni amɛba maŋtsɛ lɛ ŋɔɔ. 33Ni David kɛɛ amɛ akɛ, “Nyɛŋɔa mitsuji lɛ nyɛfataa nyɛhe, ni nyɛkɛ mibi Solomon ataa mi diɛŋtsɛ mitejiokpɔŋɔ lɛ nɔ, ni nyɛkɛ lɛ ayaa Gihon faa lɛ naa. 34Ni Osɔfo Zadok kɛ Gbalɔ Natan afɔ lɛ mu yɛ jɛi awo lɛ Israel maŋtsɛ. Nyɛkpãa tɛtɛrɛmantɛrɛ, ni nyɛbɔa oshe akɛ, ‘Maŋtsɛ Solomon yi ana wala.’ Kɛkɛ lɛ nyɛnyiɛa esɛɛ kɛbaa. 35Ni kɛji eba lɛ, ebata mimaŋtsɛ sɛ̃i lɛ nɔ; ejaakɛ lɛ ebaaye maŋtsɛ yɛ minajiaŋ, ni lɛ mito lumɔ koni eye Israel kɛ Yuda fɛɛ nɔ.”
36Kɛkɛ ni Benaia kɛɛ, “Amen! Yehowa, minuŋtsɔ maŋtsɛ Nyɔŋmɔ lɛ, ahã aba mli nakai! 37Bɔ ni Yehowa kɛ minuŋtsɔ maŋtsɛ hi shi lɛ, nakai nɔŋŋ misɔlemɔ ji akɛ ekɛ Solomon ahi shi, ni etsɔ̃ maŋtsɛ kpele fe bo!”
38No hewɔ lɛ, Osɔfo Zadok kɛ gbalɔ Natan kɛ Yehoida bi Benaia kɛ maŋtsɛ hebulɔi lɛ wó Solomon amɛta Maŋtsɛ David tejiokpɔŋɔ lɛ nɔ, ni akɛ lɛ tee Gihon faa lɛ naa. 39#1 Kron 23.1; 1 Kron 29.22 Kɛkɛ ni Osɔfo Zadok yawo koŋ kɛ emli mu lɛ kɛjɛ Buu Krɔŋkrɔŋ lɛ mli, ni ekɛbafɔ Solomon kɛwo lɛ maŋtsɛ. Ni amɛkpã tɛtɛrɛmantɛrɛ, ni maŋbii ni yɔɔ jɛi lɛ fɛɛ bɔ oshe akɛ, “Maŋtsɛ Solomon yi ana wala!” 40Ni maŋ muu lɛ fɛɛ kpãkpãa bɛji ni amɛnyiɛ Solomon sɛɛ kɛ nyamɔ kpele kɛba maŋ lɛ mli. Ni amɛhoofeemɔ lɛ hã shikpɔŋ hoso waa diɛŋtsɛ.
41Ni be ni Adonia kɛ emɛi lɛ eye nii lɛ etã lɛ, Adonia kɛ mɛi fɛɛ ni ekpee ni yɔɔ eŋɔɔ lɛ nu hoofeemɔ lɛ he. Be ni Yoab nu tɛtɛrɛmantɛrɛ lɛ gbɛɛmɔ lɛ, ebi akɛ, “Mɛni hewɔ afeɔ hoo kɛ bolɔmɔ yɛ maŋ lɛ mli nɛkɛ?” 42#2 Sam 15.27, 36 Ni be ni ewieɔ lolo ni enaa enyɔko shi lɛ, naa, Osɔfo Abiatar bi Yonatan ni eba jɛi; ni Adonia kɛɛ, “Ba, ejaakɛ gbɔmɔ kpakpa ji bo, ni sane kpakpa okɛbaa.”
43Yonatan to he ehã lɛ akɛ, “Dabida, wɔnuŋtsɔ David ewo Solomon maŋtsɛ! 44Bɔ ni eba lɛ nɛ. Maŋtsɛ David hã Osɔfo Zadok kɛ Gbalɔ Natan kɛ Yehoiada bi Benaia kɛ maŋtsɛ hebulɔi lɛ kɛ Solomon tee Gihon faa lɛ naa ni eta maŋtsɛ tejiokpɔŋɔ lɛ nɔ. 45Be ni Osɔfo Zadok kɛ Gbalɔ Natan efɔ lɛ mu amɛwo lɛ maŋtsɛ sɛɛ lɛ, amɛku amɛsɛɛ kɛ nyamɔ kɛba maŋ lɛ mli. No ji bolɔmɔ kɛ nyamɔ ni nyɛnu he lɛ. 46#1 Kron 28.5 Awo Solomon maŋtsɛ ata etsɛ sɛ̃i lɛ nɔ. 47Ni asaŋ maŋtsɛ tsuji lɛ ba, ni amɛjɔɔ wɔnuŋtsɔ Maŋtsɛ David akɛ, ‘oNyɔŋmɔ lɛ ahã Solomon gbɛi ahehee shi fe ogbɛi lɛ, ni emaŋtsɛyeli mli alɛɛ fe onɔ lɛ.’ Maŋtsɛ David kã esaa lɛ nɔ nakai be lɛ mli, ni ema eyi shi ni ekɛɛ, 48#1 Maŋ 3.6 ‘Ajie, Yehowa, wɔ Israel Nyɔŋmɔ lɛ yi, lɛ mɔ ni ehã mɔ kome yɛ mimusuŋbii lɛ ateŋ ebata misɛ̃i lɛ nɔ ŋmɛnɛ gbi nɛɛ; ni mihiŋmɛi enã!’ ”
49Kɛkɛ ni Adonia kɛ maŋ ni ekpee lɛ fɛɛ atsui fã, ni amɛtetee shi, ni mɔ fɛɛ mɔ kɔ egbɛ. 50Adonia diɛŋtsɛ lɛ eshe gbeyei, hewɔ lɛ etee kpee Buu Krɔŋkrɔŋ lɛ mli, ni eyamɔmɔ afɔleshãa latɛ lɛ he aklontoi lɛ amli koni akagbe lɛ. 51#1 Maŋ 2.28 Ayagba Maŋtsɛ Solomon akɛ, “Naa, Adonia miishe bo gbeyei, ni eyamɔmɔ afɔleshãa latɛ lɛ aklontoi lɛ amli, ni ekɛɛ akɛ, ‘Maŋtsɛ Solomon akã kitã akɛ ekɛ klante egbeŋ mi.’ ” 52#2 Sam 14.11 Ni Solomon kɛɛ, “Kɛji efee ehe gbɔmɔ kpakpa lɛ eyiteŋtsɔi kome nɛkɛ enyɔŋ shikpɔŋ; shi kɛjeee nakai lɛ, no lɛ ebaagbo.” 53Ni Maŋtsɛ Solomon tsu ayaŋɔ Adonia kɛjɛ afɔleshãa latɛ lɛ he kɛba; ni eba ebakoto Maŋtsɛ Solomon. Ni Maŋtsɛ Solomon kɛɛ lɛ akɛ, “Yaa owe!”
Currently Selected:
1 Maŋtsɛmɛi 1: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
