1 Maŋtsɛmɛi 17
17
Elia gba akɛ abaaye nuhɔmɔ
1 #
Yak 5.17; Kpoj 11.6 Gbalɔ ko ni gbɛi ji Elia, Tishbinyo ni ejɛ Gilead, lɛ kɛɛ Maŋtsɛ Ahab akɛ, “Miikɛɛ bo, yɛ Yehowa, Israel Nyɔŋmɔ hiɛkãalɔ lɛ, mɔ ni misɔ̃mɔɔ lɛ, gbɛi mli akɛ bɔ enyɔŋ, ni nu hu enɛŋ kɛyashi biɛ afii enyɔ loo afii etɛ̃, bɛja mi, miwie dã.”
2Kɛkɛ ni Yehowa kɛɛ Elia akɛ, 3“Shi biɛ nɛɛ koni oya bokãgbɛ oyatee ohe yɛ Kerit faa nine lɛ masɛi yɛ Yordan lɛ bokãgbɛ. 4Obaana faa nine lɛ mli nu onu, ni mifã kwãakwãalabitei koni amɛlɛ bo yɛ jɛi.”
5No hewɔ lɛ, Elia ye Yehowa fãmɔ lɛ nɔ: eyi mli, ni etee eyahi Kerit faa nine lɛ ni yɔɔ Yordan lɛ bokãgbɛ lɛ he. 6Kwãakwãalabitei lɛ yahãa lɛ aboloo kɛ loo daa leebi kɛ gbɛkɛ, ni faa lɛ mli nu lɛ ji nu ni enuɔ. 7Shi be ko sɛɛ lɛ, faa lɛ baŋala, ejaakɛ nu enɛɛɛ shikpɔŋ lɛ nɔ.
Elia kɛ Zarefat Okulafo lɛ
8Kɛkɛ ni Yehowa kɛɛ Elia akɛ, 9#Luk 4.25, 26 “Agbɛnɛ yaa Zarefat, Sidonbii amaŋ lɛ mli, koni oyahi jɛi. Mifã yoo okulafo ko koni elɛ bo yɛ jɛi.” 10No hewɔ lɛ, Elia yi mli, ni etee Zarefat. Be ni eshɛ maŋ lɛ agbo lɛ naa lɛ, ena yoo okulafo ko yɛ jɛi ni eebua lai ŋmɛŋmlɛbii anaa. Elia kɛɛ yoo lɛ akɛ, “Ofainɛ ni ohã mi nu fioo manu.” 11Be ni yoo lɛ yaa koni eyayɛ nu lɛ, Elia tsɛ eyisɛɛ, ni ekɛɛ lɛ akɛ, “Ofainɛ ni oŋɔ aboloo atrɔma ko ohiɛ odɛ̃ obahã mi.”
12 #
1 Maŋ 18.10
Yoo okulafo lɛ to he akɛ, “Mina Yehowa hiɛkãalɔ, oNyɔŋmɔ lɛ, akɛ mibɛ aboloo kuku nɛkɛ. Nɔ pɛ ni miyɔɔ ji mamu dɛ̃ kɔkɔ obɔ̃ kome pɛ yɛ gbɛ mli, kɛ mu fioo yɛ tɔ mli. Miilɛ lai ŋmɛŋmlɛbii enyɔ oo ko koni mikɛyashã aboloo mahã mi kɛ mibi lɛ koni wɔye; no sɛɛ lɛ wɔɔgboi kɛ hɔmɔ.”
13Elia kɛɛ yoo lɛ akɛ, “Kaashe gbeyei! Yaa koni oyafee bɔ ni okɛɛ lɛ. Shi moŋ ŋɔɔ mamu lɛ eko okɛshã aboloo fioo ko obahã mi tsuutsu dã; no sɛɛ dani ofee bo kɛ obi lɛ nɔ lɛ. 14#2 Maŋ 4.2-4 Ejaakɛ bɔ ni Yehowa, Israel Nyɔŋmɔ lɛ, kɛɛ nɛ, ‘Mamu kɛ gbɛ lɛ etaŋ, ni mu kɛ tɔ lɛ hu etaŋ aahu kɛyashi gbi nɔ ni Yehowa aaahã nu abanɛ yɛ shikpɔŋ lɛ nɔ.’ ”
15Yoo lɛ yi mli etee, ni eyafee bɔ pɛpɛɛpɛ ni Elia kɛɛ lɛ lɛ; ni Elia kɛ yoo lɛ kɛ ewe lɛ na nii amɛye gbii kplaŋŋ. 16Taakɛ Yehowa tsɔ̃ Elia nɔ ekɛɛ lɛ hewɔ lɛ, mamu kɛ gbɛ lɛ etãaa, ni mu kɛ tɔ lɛ hu etãaa.
Elia tsiɛ̃ Okulafo lɛ Binuu hiɛ
17Nɛkɛ saji nɛɛ asɛɛ lɛ, yoo lɛ ni ji shĩanyɛ lɛ, binuu lɛ he baye; ehela lɛ mli wo wu, ni naagbee lɛ egbo. 18#Luk 5.8 Kɛkɛ ni yoo lɛ kɛɛ Elia akɛ, “Ao Nyɔŋmɔ gbɔmɔ, mɛni mifee bo! Obato mi koni akai efɔŋ ni mifee, koni agbe mibinuu lɛ lo?”
19Elia kɛɛ yoo lɛ akɛ, “Kɛ obi lɛ ahã mi!” Elia he gbekɛ lɛ yɛ yoo lɛ kpɔkɔiaŋ; kɛkɛ ni ehiɛ lɛ kɛtee ŋwɛi tsu lɛ mli he ni eyɔɔ lɛ, ni ekɛ gbekɛ lɛ yaŋmɛ lɛ diɛŋtsɛ esaa nɔ. 20Kɛkɛ ni Elia bo etsɛ Yehowa, ni ekɛɛ, “Ao Yehowa, miNyɔŋmɔ! Aso yoo okulafo ni mibato eŋɔɔ nɛɛ hu okɛyeɔ sane kɛ joomɔ nɛkɛ, ni ogbeɔ ebi lɛ nɛɛ?” 21#2 Maŋ 4.34, 35; Bɔf 20.10 Elia ho ekpã emli ebu gbekɛ lɛ nɔ shii etɛ̃. Kɛkɛ ni ebo waa etsɛ Yehowa ekɛɛ, “Yehowa, miNyɔŋmɔ! Miikpa bo fai; hã gbekɛ nɛɛ mumɔ akpale aba emli ekoŋŋ koni ehiɛ atsɛ̃!” 22Nuŋtsɔ lɛ bo Elia faikpamɔ lɛ toi, ni gbekɛ lɛ mumɔ kpale kɛba emli ekoŋŋ, ni ehiɛ tsɛ̃.
23 #
Luk 7.15; Heb 11.35 Agbɛnɛ Elia wo gbekɛ lɛ, ni ekɛ lɛ kpeleke shi kɛjɛ ŋwɛi tsu lɛ mli kɛba shĩa lɛ, ni ekɛ lɛ bahã enyɛ lɛ; ni Elia kɛɛ lɛ akɛ, “Naa obi lɛ; eyi ena wala.”
24Yoo lɛ here Elia nɔ ekɛɛ, “Kpaako mina mile akɛ Nyɔŋmɔ gbɔmɔ ji bo lɛɛlɛŋ, ni asaŋ Yehowa wieɔ kɛtsɔ̃ɔ onɔ!”
Currently Selected:
1 Maŋtsɛmɛi 17: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
