1 Maŋtsɛmɛi 16
16
1Yehowa kɛ Hanani bi Yehu wie, ni ekɛ shɛɛ nɛɛ hã lɛ akɛ ekɛyahã Israel Maŋtsɛ Baasha: 2#1 Maŋ 14.7 “Kulɛ ojeee mɔ ko, shi miwo onɔ kɛjɛ mlu mli, ni mifee bo lumɔ kɛ hiɛnyiɛlɔ yɛ mimaŋ Israel. Oyakɔ Yeroboam jeŋba lɛ, ni ohã mimaŋ Israel fee esha, ni amɛkɛ amɛhe eshai lɛ wo mimli la. 3#1 Maŋ 15.29 Hewɔ lɛ mibabɛɛ Baasha kɛ ewe lɛ mashwie, ni mibafee ewe lɛ tamɔ mifee Nebat bi Yeroboam we lɛ lɛ. 4#1 Maŋ 14.11 Baasha wekunyo fɛɛ wekunyo ni aaagbo yɛ maŋ lɛ, gbei aaaye egbonyo lɛ; ni ewekunyo ni aaagbo yɛ ŋa nɔ lɛ, ŋwɛi loofɔji aaaye eloo.”
5Nibii krokomɛi fɛɛ ni Baasha fee kɛ ekãa nibii hu ni efee lɛ, aŋma yɛ Israel Maŋtsɛmɛi Ayinɔ Saji Awolo lɛ mli. 6Baasha gbo, ni afu lɛ yɛ Tirza; kɛkɛ ni ebi Ela baye maŋtsɛ yɛ esɛɛ.
7Yehowa wiemɔ ni ekɛshiɔ Baasha kɛ ewe lɛ akɛtsɔ̃ Hanani bi Yehu nɔ, yɛ eshai ni Baasha fee eshi Yehowa lɛ ahewɔ. Baasha wo Yehowa mli la, jeee yɛ nibii fɔ̃ji ni efee, tamɔ bɔ ni Maŋtsɛ Yeroboam efee kɛtsɔ̃ ehiɛ momo lɛ kɛkɛ ahewɔ, shi moŋ akɛ egbe Yeroboam we lɛ mlibii fɛɛ lɛ.
Ela ye Israel Maŋtsɛ
8Yuda Maŋtsɛ Asa yinɔ afi ni ji nyɔŋmai enyɔ kɛ ekpaa lɛ nɔ lɛ, Baasha musuŋ binuu Ela bɔ̃i Israel maŋtsɛyeli yɛ Tirza. Eye maŋtsɛ afii enyɔ. 9#1 Maŋ 15.27 Shi etsulɔ Zimri, etayaa shwiili lɛ amlijaa fã kome ko nɔ asafoiatsɛ lɛ, kpãŋ eyinɔ. Gbi ko be ni Maŋtsɛ Ela etɔ dãa kpɔtɔɔ yɛ etsulɔ Arza, mɔ ni kwɛɔ Tirza maŋtsɛwe lɛ nɔ lɛ we lɛ mli lɛ, 10#2 Maŋ 9.31; 2 Maŋ 15.10; 10.14; 25.30 Zimri bote Arza we lɛ mli, ni eyatswa Maŋtsɛ Ela nɔ, ni egbe lɛ. Yuda Maŋtsɛ Asa yinɔ afi ni ji nyɔŋmai enyɔ kɛ kpawo lɛ nɔ sane nɛɛ ba. Kɛkɛ ni Zimri baye Israel maŋtsɛ yɛ Ela sɛɛ.
11Maŋtsɛyeli lɛ ni shɛ Zimri dɛŋ nɔŋŋ pɛ, kɛkɛ ni egbe Baasha we lɛ mlibii fɛɛ, eshiii Baasha we lɛ mli nuu kome nɛkɛ; egbe kɛ Baasha nanemɛi tete hu. 12Belɛ Zimri kpãtã Baasha we lɛ fɛɛ tswɛm hiɛ, tamɔ bɔ ni Yehowa etsɔ̃ gbalɔ Yehu nɔ ewie eshi Baasha, 13yɛ eshai fɛɛ ni Baasha fee kɛ eshai ni ebi Ela hu fee, ni amɛkɛhã Israel fee esha, ni amɛkɛ amãgãjamɔ wo Yehowa, Israel Nyɔŋmɔ lɛ, mli la lɛ hewɔ. 14Nibii krokomɛi fɛɛ ni Ela fee kɛ ehe saji ni eshwɛ lɛ, aŋma yɛ Israel Maŋtsɛmɛi Ayinɔ Saji Awolo lɛ mli.
Israel Maŋtsɛ Zimri
15 #
1 Maŋ 15.27
Yuda Maŋtsɛ Asa yinɔ afi ni ji nyɔŋmai enyɔ kɛ kpawo lɛ nɔ lɛ, Zimri bata Israel maŋtsɛ sɛ̃i lɛ nɔ yɛ Tirza. Eye maŋtsɛ gbii kpawo. Be nɛɛ mli lɛ Israel tabilɔi esa Filistibii amaŋ Gibeton lɛ yi. 16Gbi ni tabilɔi lɛ nu akɛ Zimri etee Maŋtsɛ Ela yinɔ apam, ni egbe lɛ lɛ, Israel tso muu fɛɛ wo Omri ni ji tabilɔi lɛ atsɛ lɛ Israel maŋtsɛ gbi lɛ nɔŋŋ yɛ ta lɛ naa. 17Kɛkɛ ni Omri fã kɛjɛ Gibeton kɛba ni Israel fɛɛ fata ehe, ni amɛbasa Tirza yi. 18Be ni Zimri na akɛ aŋɔ maŋ lɛ, eyabote maŋtsɛwe lɛ mɔɔ lɛ mli kɛkɛ ni ema maŋtsɛwe lɛ naa la, ni eshã shĩa lɛ eshwie enɔ, ni egbo. 19Egbo yɛ eshai ni efee, kɛ efɔŋ ni efee yɛ Yehowa hiɛ, kɛ Yeroboam jeŋba lɛ ni ekɔ efɔ̃ enɔ lɛ hewɔ, asaŋ kɛ efɔŋ ni efee ni ekɛhã Israel hu fee esha lɛ hewɔ. 20Nibii krokomɛi ni Zimri fee kɛ Maŋtsɛ Ela yinɔ apam ni etee lɛ, aŋma fɛɛ yɛ Israel Maŋtsɛmɛi Ayinɔ Saji Awolo lɛ mli.
Israel Maŋtsɛ Omri
21Kɛkɛ ni Israel maŋ lɛ mli gba enyɔ; maŋ lɛ fã kome yɛ Ginat bi Tibni lɛ sɛɛ akɛ lɛ eye maŋtsɛ, ni fã hu yɛ Omri sɛɛ. 22Shi mɛi ni yɔɔ Omri sɛɛ lɛ ye mɛi ni yɔɔ Ginat bi Tibni lɛ sɛɛ lɛ anɔ kunim. Tibni nyɔ, ni Omri baye maŋtsɛ, 23yɛ Yuda Maŋtsɛ Asa yinɔ afi ni ji nyɔŋmai etɛ̃ kɛ ekome lɛ nɔ. Omri ye Israel maŋtsɛ afii nyɔŋma kɛ enyɔ. Eye maŋtsɛ lɛ afii ekpaa yɛ Tirza.
Samaria tsɔ̃ Israel Maŋtsɛ maŋ
24Omri tse jwiɛtɛi kukuji akpei ekpaa, ni ekɛhe Samaria gɔŋ lɛ yɛ mɔ ko ni egbɛi ji Shemer lɛ ŋɔɔ. Omri to maŋ yɛ gɔŋ lɛ nɔ, ni ewo maŋ lɛ Samaria, yɛ gɔŋ lɛ tsɛ Shemer gbɛi lɛ hewɔ. Ewaje maŋ lɛ.
25 #
Mika 6.16
Omri fee efɔŋ yɛ Yehowa, Israel Nyɔŋmɔ lɛ, hiɛ. Efee esha fe maŋtsɛmɛi ni etsɔ̃ ehiɛ lɛ fɛɛ. 26#1 Maŋ 12.30 Ejaakɛ ebakɔ Nebat bi Yeroboam jeŋba lɛ pɛpɛɛpɛ, ni ehã maŋbii lɛ bote eshafeemɔ kɛ amãgãjamɔ mli, nifeemɔ ni woɔ Israel Nyɔŋmɔ lɛ mli la lɛ. 27Omri he saji ni eshwɛ kɛ nibii krokomɛi fɛɛ ni efee, kɛ ekãa ni efee lɛ aŋma fɛɛ yɛ Israel Maŋtsɛmɛi Ayinɔ Saji Awolo lɛ mli. 28Omri gbo, ni afu lɛ yɛ Samaria; kɛkɛ ni ebi Ahab baye maŋtsɛ yɛ esɛɛ.
Ahab ye Israel Maŋtsɛ
29Ato Omri bi Ahab maŋtsɛ yɛ Yuda Maŋtsɛ Asa maŋtsɛyeli afi ni ji nyɔŋmai etɛ̃ kɛ kpawo lɛ nɔ. Ahab ye Israel maŋtsɛ afii nyɔŋmai enyɔ kɛ enyɔ yɛ Samaria. 30Omri bi Ahab fee efɔŋ yɛ Yehowa hiɛ fe maŋtsɛmɛi fɛɛ ni etsɔ̃ ehiɛ lɛ. 31#1 Maŋ 16.26 Akɛni eshai ni Nebat bi Yeroboam fee lɛ jeee fɛifɛi yɛ Ahab hiɛ hewɔ lɛ, etee nɔ, ni eyaŋɔ Sidonbii amaŋtsɛ Etbaal biyoo Yezebel lɛ akɛ ŋa. No hewɔ lɛ, Ahab tee ni eyaja, ni esɔ̃mɔ Baal. 32Emã afɔleshãa latɛ yɛ Sɔlemɔtsu lɛ mli ehã Baal. 33No sɛɛ hu eshɔ̃ jemawɔŋ yoo Ashera lɛ amãgã ema shi. Ahab wo Yehowa, Israel Nyɔŋmɔ lɛ, mli la waa fe Israel maŋtsɛmɛi fɛɛ ni etsɔ̃ ehiɛ kɛho. 34#Yos 6.26 Ahab yinɔ ni Hiel, Betelnyo lɛ, yasaa etswa Yeriko maŋ lɛ mli tsui koikoi lɛ. Hiel kromɔbi ni egbɛi ji Abiram lɛ nyɔ yɛ Yeriko saamɔ lɛ shishitoo mli, ni ebi sɛɛkpelɔ Segub hu nyɔ be mli ni ataraa maŋ lɛ naa agboi lɛ. Sane nɛɛ ba mli nɛkɛ taakɛ Yehowa etsɔ̃ Nunbi Yoshua nɔ egba eto momo lɛ.
Currently Selected:
1 Maŋtsɛmɛi 16: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
