1 Maŋtsɛmɛi 15
15
Yuda Maŋtsɛ Abia
(2 Kronika 13.1-14)
1Be ni Nebat bi Yeroboam eye maŋtsɛ afii nyɔŋma kɛ kpaanyɔ yɛ Israel lɛ, no mli Abia bɔ̃i maŋtsɛyeli yɛ Yuda. 2Eye maŋtsɛ afii etɛ̃ yɛ Yerusalɛm. Enyɛ gbɛi ji Maaka, Abishalom biyoo lɛ. 3Eshai ni etsɛ fee kɛtsɔ̃ hiɛ lɛ, nomɛi nɔŋŋ lɛ hu efee, ni eyeee Yehowa eNyɔŋmɔ lɛ anɔkwa tamɔ bɔ ni etsɛ David ye anɔkwa lɛ. 4#1 Maŋ 11.36 Kɛ̃lɛ David hewɔ lɛ Yehowa eNyɔŋmɔ lɛ hã Abia binuu ni ebaye maŋtsɛ yɛ esɛɛ yɛ Yerusalɛm koni ehã Yerusalɛm ahi shi shweshweeshwe. 5#2 Sam 11.27; 12.9 Yehowa fee enɛ, ejaakɛ David fee nɔ ni sa Yehowa hiɛ, ni egbaaa afã yɛ kitãi ni ewo lɛ lɛ eko eko he ewala gbii abɔ fɛɛ, akɛ ja yɛ Uria, Hitnyo lɛ, sane lɛ mli pɛ. 6#1 Maŋ 14.30 Ta ni te shi yɛ Rehoboam kɛ Yeroboam teŋ lɛ tsa nɔ aahu yɛ Abia maŋtsɛyeli beiaŋ fɛɛ. 7Agbɛnɛ Abia he saji ni eshwɛ kɛ nii fɛɛ ni efee lɛ aŋma fɛɛ yɛ Yuda Maŋtsɛmɛi lɛ Ayinɔ Saji Awolo lɛ mli.
8Abia gbo, ni afu lɛ yɛ David Maŋ lɛ mli, ni ebi Asa baye maŋtsɛ yɛ esɛɛ.
Yuda Maŋtsɛ Asa
(2 Kronika 15.16—16.6)
9Be ni Israel Maŋtsɛ Yeroboam eye afii nyɔŋmai enyɔ yɛ Israel sɛ̃i lɛ nɔ lɛ, no mli Asa bɔ̃i maŋtsɛyeli yɛ Yuda. 10#1 Maŋ 15.2 Ni eye maŋtsɛ afii nyɔŋmai ejwɛ kɛ ekome yɛ Yerusalɛm. Enaa gbɛi ji Maaka, Abishalom biyoo lɛ. 11Asa fee nɔ ni sa Yehowa hiɛ tamɔ bɔ ni eblematsɛ David fee lɛ. 12#1 Maŋ 14.24; 22.47 Eshwie hii kɛ yei fɛɛ ni kɛ amɛhe bɔɔ ajwamãŋ yɛ jamɔhei lɛ fɛɛ yɛ shikpɔŋ lɛ nɔ, ni ejie amãgãi ni etsɛmɛi lɛ fee lɛ fɛɛ hu. 13Asa kpa enyɛ Maaka tete maŋnyɛyeli; ejaakɛ enyɛ nɛɛ fee Ashera amãgã ko ni eji nihii nii. Asa folɔ tso amãgã lɛ mli, ni eyashã yɛ Kidron jɔɔ lɛ mli. 14#1 Maŋ 22.44 Yɛ mli akɛ Asa fiteee jamɔhei grɔŋŋi lɛ moŋ nɛ, shi kɛ̃lɛ eye Yehowa anɔkwa ewala bei abɔ fɛɛ. 15Nibii fɛɛ ni etsɛ Abia fee, kɛ nii ni lɛ diɛŋtsɛ hu efee ni atsuu he yɛ tsuijurɔ naa ahã Yehowa lɛ, eyaloo kɛba Sɔlemɔ we lɛ: jwiɛtɛi kɛ shika kɛ tsɛnsii fɛɛ. 16Yuda Maŋtsɛ Asa kɛ Israel Maŋtsɛ Baasha Maŋtsɛyeli beiaŋ fɛɛ lɛ ta kã amɛteŋ. 17Israel Maŋtsɛ Baasha fã ta kɛbatua Yuda, ni eŋɔ Rama. Kɛkɛ ni etswa gbogbo ewo Rama he bɔ ni afee ni mɔ ko mɔ ko akaje kpo kɛmiiya Yuda Maŋtsɛ Asa ŋɔɔ aloo eeje eŋɔɔ kɛmiiba. 18#2 Maŋ 12.19; 16.3 No hewɔ lɛ, Maŋtsɛ Asa loo shika fɛɛ kɛ jwiɛtɛi ni eshwɛ yɛ Yehowa We lɛ nitoohe lɛ kɛ maŋtsɛwe lɛ nitoohe lɛ hu; etu ewo etsuji lɛ adɛŋ, ni etsu amɛ kɛtee Damasko koni akɛyahã Siria Maŋtsɛ Ben-Hadad, Tabrimon bi, ni eji Hezion nabi lɛ. Wiemɔ ni fata he ji: 19“Hã kpãŋmɔ ko akã mi kɛ bo teŋ tamɔ bɔ ni ekã mitsɛ kɛ otsɛ teŋ lɛ. Naa, miimaje jwiɛtɛi kɛ shika nikeenii. Yaa ni oyaku kpãŋmɔ ni kã okɛ Israel Maŋtsɛ Baasha teŋ lɛ mli, koni ejie etabilɔi lɛ kɛje mishikpɔŋ lɛ nɔ.”
20 #
2 Maŋ 15.29
Ben-Hadad kpɛlɛ̃ Maŋtsɛ Asa wiemɔ lɛ nɔ, ni etsu etatsɛmɛi kɛtee ni amɛyatua Israel maji lɛ. Tatsɛmɛi lɛ ŋɔ maji nɛɛ: Yion kɛ Dan kɛ Abel-Bet-Maaka kɛ shikpɔŋ ni bɛŋkɛ Galilea kpaakpo lɛ kɛ Naftali kpokpai anɔ shikpɔŋ lɛ fɛɛ. 21Be ni Maŋtsɛ Baasha nu nɔ ni eba lɛ he lɛ, efɔ̃ɔ gbogbo lɛ tswaa kɛ Rama he woo, ni etee eyahi shi yɛ Tirza.
22Kɛkɛ ni Maŋtsɛ Asa hã ashiɛ yɛ Yuda fɛɛ, ashiii mɔ ko mɔ ko yɛ mli. Maŋbii lɛ tee Rama ni amɛyaloo Rama tɛi lɛ kɛ mplaŋi lɛ ni Baasha kɛtswaa gbogbo ewo Rama he lɛ kɛba. Maŋtsɛ Asa kɛ nɛkɛ nibii nɛɛ yawaje Geba, ni yɔɔ Benyamin kpokpai anɔ lɛ kɛ Mizpa.
23 #
2 Kron 14.5
Agbɛnɛ Maŋtsɛ Asa he saji fɛɛ ni eshwɛ kɛ ekãa ni efee, kɛ nii fɛɛ kɛ maji ni ewajewaje lɛ aŋma yɛ Yuda Maŋtsɛmɛi lɛ Ayinɔ Asaji Awolo lɛ mli. Shi egbɔlɛ be mli lɛ, nane hela ko kumɔ lɛ. 24#1 Maŋ 22.41 Maŋtsɛ Asa gbo, ni afu lɛ yɛ eblematsɛmɛi lɛ afũuhe lɛ yɛ eblematsɛ David maŋ lɛ mli; ni ebinuu Yehoshafat baye maŋtsɛ yɛ esɛɛ.
Israel Maŋtsɛ Nadab
25 #
1 Maŋ 14.20
Be ni Yuda Maŋtsɛ Asa eye afii enyɔ yɛ maŋtsɛ sɛi lɛ nɔ lɛ, Maŋtsɛ Yeroboam bi Nadab baye maŋtsɛ yɛ Israel. Eye maŋtsɛ yɛ Israel afii enyɔ. 26#1 Maŋ 12.30 Efee efɔŋ tamɔ etsɛ ni nyiɛ ehiɛ lɛ fee ni ekɛhã Israel fee esha lɛ.
27 #
1 Maŋ 16.9
Agbɛnɛ Ahia ni jɛ Isakar akutso lɛ mli lɛ binuu Baasha kpãŋ Nadab yinɔ, ni etswa Nadab nɔ ni egbe lɛ. No bei amli lɛ Nadab kɛ eta lɛ fɛɛ eyasa Gibeton ni yɔɔ Filistia lɛ yi. 28No hewɔ lɛ, Baasha gbe Nadab be ni Asa eye maŋtsɛ afii etɛ̃ yɛ Yuda. Kɛkɛ ni lɛ Baasha lɛ ebaye Nadab sɛɛ akɛ maŋtsɛ yɛ Israel. 29#1 Maŋ 14.10, 11 Amrɔ nɔŋŋ ni Baasha baye maŋtsɛ lɛ, egbe Yeroboam we lɛ mli bii lɛ fɛɛ, ni amɛteŋ mɔ ko mɔ ko eshwɛɛɛ ni muɔ tete yɛ Yeroboam we lɛ. Efee enɛ koni wiemɔ ni Yehowa wie kɛtsɔ̃ etsulɔ Ahia, Shilonyo lɛ, nɔ lɛ aba mli. 30Eba mli nɛkɛ ejaakɛ Yeroboam fee eshai eshi Yehowa, Israel Nyɔŋmɔ lɛ, ni ekɛ no hã Israel fɛɛ hu fee esha kɛwo Yehowa mli la. 31Agbɛnɛ Nadab he saji ni eshwɛ kɛ nii fɛɛ ni efee lɛ aŋma yɛ Israel Maŋtsɛmɛi lɛ Ayinɔ Saji Awolo lɛ mli. 32#1 Maŋ 15.16 Ni ta kã Yuda Maŋtsɛ Asa kɛ Israel Maŋtsɛ Baasha teŋ amɛwala beiaŋ fɛɛ.
Israel Maŋtsɛ Baasha
33Be ni Yuda Maŋtsɛ Asa ye afii etɛ̃ yɛ sɛi lɛ nɔ lɛ, no mli Ahia bi Baasha babɔ̃i Israel fɛɛ nɔ maŋtsɛyeli yɛ Tirza; ni eye maŋtsɛ afii nyɔŋmai enyɔ kɛ ejwɛ. 34#1 Maŋ 15.26 Efee efɔŋ yɛ Yehowa hiɛ; eba ejeŋ gbonyo tamɔ Yeroboam ni hã Israel fɛɛ fee esha lɛ.
Currently Selected:
1 Maŋtsɛmɛi 15: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
