1 Maŋtsɛmɛi 14
14
Yeroboam bi nuu gbele
1Nakai be lɛ mli lɛ Yeroboam bi Abia he baye. 2#1 Maŋ 11.31 Yeroboam kɛɛ eŋa akɛ, “Tee shi, tsakemɔ ohe koni akayoo bo akɛ bo ji Yeroboam ŋa lɛ; yaa Shilo, ejaakɛ gbalɔ Ahia ni wie yɛ mihe akɛ mibaye maŋtsɛ yɛ Israel lɛ jɛi eyɔɔ. 3Oŋɔ aboloo akwaabɔi nyɔŋma kɛ keeki kɛ wo atuŋkpã kome ohiɛ odɛ̃ kɛya eŋɔɔ. Yaabi lɛ nɔ ni baaba gbekɛ̃ lɛ nɔ; ni ebaagba bo.”
4Yeroboam ŋa lɛ fee nakai, ni etee Shilo, ni eba Ahia we lɛ. Shi Ahia enaaa nii, ejaakɛ gbɔlɛ ehã ehiŋmɛii anɔ eha. 5Shi Yehowa kɛɛ Ahia akɛ, “Naa, Yeroboam ŋa lɛ miiba oŋɔɔ ebabi nii yɛ ebi nuu lɛ hewɔ, ejaakɛ gbekɛ lɛ he miiye. Kɛji eba lɛ matsɔ̃ɔ bo nɔ ni okɛɛ lɛ.”
Be ni Yeroboam ŋa lɛ bashɛ jɛi lɛ, etsake ehe tamɔ yoo kroko. 6Shi be ni eshɛ shinaa lɛ shi ni Ahia nu enaneshi gbɛɛmɔ lɛ, ekɛɛ lɛ akɛ, “Ba mli, Yeroboam ŋa! Mɛɛba otsake ohe tamɔ mɔ kroko nɛɛ? Naa, atsu mi oŋɔɔ kɛ sane ko ni wa. 7#1 Maŋ 11.37; 16.2 Yaa, ni oyakɛɛ Yeroboam akɛ, bɔ ni Yehowa, Israel Nyɔŋmɔ lɛ kɛɛ nɛ, ‘Mikɔ bo pɛ yɛ mimaŋ Israelbii lɛ ateŋ, ni miwo bo maŋtsɛ. 8Mishɔ̃ maŋtsɛyeli lɛ tete yɛ David we lɛ dɛŋ mihã bo; shi kɛ̃lɛ otamɔɔɔ mitsulɔ David ni eye mikitãi anɔ ni enyiɛ misɛɛ kɛ etsui fɛɛ lɛ. Efee nɔ ni sa sɔŋŋ yɛ mihiɛ. 9Shi bo lɛ, ofee efɔŋ fe mɛi fɛɛ ni etsɔ̃ ohiɛ lɛ. Oto oyiŋ, ni oyafee nyɔŋmɔi krokomɛi kɛ amãgãi ni ashwie ohã ohe, ni okɛwo mimli la; ni mi lɛ oshɛ mi ofɔ̃ osɛɛ kwa. 10#1 Maŋ 15.29; 21.21 Enɛ hewɔ lɛ, naa, mahã sane fɔŋ aye Yereboam we lɛ. Maplene Yereboam we lɛ mli nuu fɛɛ nuu hiɛ yɛ Israel: nyɔŋ kɛ mɔ ni eye ehe fɛɛ. Makpãtã Yeroboam we lɛ hiɛ kwraa tamɔ abɛɔ wamɔ, ni awoɔ mli la yɛ tumo nɔ ashãa kɛyashiɔ beyinɔ ni fɛɛ shãa wɛɛ lɛ. 11#1 Maŋ 16.4; 21.24 Mɔ fɛɛ mɔ ni jɛ Yeroboam nɔ mli ni aaagbo lɛ gbei aaaye lɛ, ni kɛji emɔ ko gbo yɛ ŋa nɔ lɛ akpãŋai baaye lɛ, ejaakɛ mi Yehowa, mikɛɛ.’ ”
12Ahia tee nɔ ekɛɛ Yeroboam ŋa lɛ akɛ, “Kuu osɛɛ oya owe. Onane ni aaayi omaŋ lɛ mli pɛ, obi lɛ baagbo. 13Israel fɛɛ aaafo lɛ, ni amɛaafu lɛ; ejaakɛ lɛ pɛ ejɛ Yeroboam we lɛ mli ni aaafu lɛ; ejaakɛ lɛ pɛ emli ana nɔ kpakpa ko yɛ yɛ Yeroboam we lɛ ni sa Yehowa, Israel Nyɔŋmɔ lɛ hiɛ. 14#1 Maŋ 15.29 Asaŋ Yehowa baatee maŋtsɛ ko shi ahã ehe yɛ Israel, mɔ ni baakpãtã Yeroboam we lɛ hiɛ ŋmɛnɛ, amrɔ nɛɛ nɔŋŋ. 15#2 Maŋ 17.23 Yehowa aaatswia Israel nii, tamɔ ahosoɔ glã yɛ faa mli lɛ, ni eeefã Israel kɛjɛ nɛkɛ shikpɔŋ kpakpa ni ekɛhã etsɛmɛi lɛ nɔ. Yehowa baagbɛ amɛ eshwã Eufrate Faa lɛ sɛɛ; ejaakɛ amɛfee Ashera wɔŋ lɛ amãgãi, ni amɛkɛwo Yehowa mli la. 16#1 Maŋ 12.30; 13.34 Yehowa baakwa Israel yɛ eshai ni Yeroboam fee lɛ hewɔ, yɛ eshai ni ekɛhã Israel fɛɛ fee lɛ hewɔ.”
17Kɛkɛ ni Yeroboam ŋa lɛ te shi, ni eyi mli etee Tirza. Be ni eshɛ shĩa lɛ shinaa lɛ shi lɛ pɛ, kɛkɛ ni gbekɛ lɛ gbo. 18Israel fɛɛ fo lɛ, ni amɛfu lɛ tamɔ bɔ ni Yehowa wie kɛtsɔ̃ etsulɔ gbalɔ Ahia nɔ lɛ.
Yeroboam Gbele
19Agbɛnɛ Yeroboam he saji fɛɛ, nii ni efee, bɔ ni ewu tai kɛ bɔ ni eye maŋtsɛ ehã lɛ, aŋma yɛ Israel Maŋtsɛmɛi lɛ Ayinɔ Saji Awolo lɛ mli. 20#1 Maŋ 15.25 Yeroboam ye maŋtsɛ afii nyɔŋmai enyɔ kɛ enyɔ. Egbo, ni afu lɛ, ni ebi Nadab baye maŋtsɛ yɛ esɛɛ.
Yuda Maŋtsɛ Rehoboam
(2 Kronika 11.5—12.15)
21Solomon bi Rehoboam ye maŋtsɛ yɛ Yuda. Rehoboam eye afii nyɔŋmai ejwɛ kɛ ekome be ni ebɔ̃i maŋtsɛyeli lɛ; ni eye maŋtsɛ afii nyɔŋma kɛ kpawo yɛ Yerusalɛm. Yerusalɛm nɛɛ ji maŋ ni Yehowa kɔ yɛ Israel akutsei lɛ fɛɛ ateŋ akɛ jɛi aja lɛ yɛ. Rehoboam nyɛ gbɛi ji Naama, ni Amonyoo ji lɛ.
22Yudabii lɛ fee esha shi Yehowa, ni amɛkɛ amɛhe eshai ni amɛfee lɛ hã Yehowa ye awuŋã. Eshai ni amɛfee lɛ fa kwraa fe nii ni amɛblematsɛmɛi lɛ fee lɛ. 23Ejaakɛ amɛ hu amɛmãmɔ jamɔhei grɔŋŋi amɛhã amɛhe; amɛkɛ tɛi mãmɔ shiui kɛ Ashera amãgãi, ni amɛjaa yɛ gɔŋkpɔ fɛɛ gɔŋkpɔ ni kwɔ nɔ kɛ tso fɛɛ tso ni ebu kusuu shishi. 24Nɔ ni fe fɛɛ ji akɛ, hii kɛ yei yɛ jɛi ni kɛ amɛhe bɔɔ ajwamãŋ yɛ jamɔhei lɛ. Yudabii lɛ fee hiɛgbejianii ni jeŋmaji abii ni Yehowa shwie yɛ Israelbii lɛ ahiɛ lɛ fee lɛ.
25Maŋtsɛ Rehoboam maŋtsɛyeli afi ni ji enumɔ lɛ nɔ lɛ, Ijipt Maŋtsɛ Shishak fã ta ebatua Yerusalɛm. 26#1 Maŋ 10.16-17 Ebaloo Yehowa we lɛ mli jwetri lɛ kɛ maŋtsɛ we lɛ mli jwetri lɛ; eloo fɛɛ kwa kɛtee. Esaa eloo shika tsɛŋi lɛ ni Solomon fee lɛ kɛtee. 27No hewɔ lɛ, Maŋtsɛ Rehoboam hã afee akɔɔble tsɛŋi eto najiaŋ, ni etu fɛɛ ewo bulɔi ni buɔ maŋtsɛwe lɛ agbo lɛ naa lɛ asafoiatsɛmɛi lɛ adɛŋ. 28Be fɛɛ be ni maŋtsɛ lɛ yaa Yehowa we lɛ bulɔi lɛ hiɛɔ tsɛŋi lɛ, ni kɛfee sɛɛ lɛ amɛkɛkuɔ sɛɛ amɛkɛyatoɔ bulɔi lɛ atsu lɛ mli ekoŋŋ.
29Rehoboam he saji ni eshwɛ lɛ kɛ nii fɛɛ ni efee lɛ, aŋma fɛɛ yɛ Yuda Maŋtsɛmɛi lɛ Ayinɔ Saji Awolo lɛ mli. 30#1 Maŋ 15.6 Nakai bei lɛ amli fɛɛ lɛ Rehoboam kɛ Yeroboam kɛ amɛhe wu ta be fɛɛ be. 31#1 Maŋ 14.21 Rehoboam gbo, ni afu lɛ yɛ etsɛmɛi lɛ afũuhe ni yɔɔ David maŋ lɛ mli lɛ. Ni enyɛ gbɛi ji Naama, Amonyoo lɛ. Ni ebi Abia baye maŋtsɛ yɛ esɛɛ.
Currently Selected:
1 Maŋtsɛmɛi 14: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
