1 Maŋtsɛmɛi 13
13
Gbalɔ ko wie eshi Betel afɔleshãa latɛ lɛ
1Be ni Yeroboam damɔ shi yɛ afɔleshãa latɛ lɛ masɛi yɛ Betel koni eshã tsofakɛŋma lɛ, Yehowa tsu gbalɔ ko kɛjɛ Yuda kɛba Betel. 2#2 Maŋ 23.15-16 Yɛ Yehowa famɔ naa lɛ, gbalɔ lɛ gba eshi afɔleshãa latɛ lɛ, ni ekɛɛ akɛ, Bɔ ni Yehowa kɛɛ nɛ, “Ao afɔleshãa latɛ, afɔleshãa latɛ, naa, abaafɔ binuu ko yɛ David we lɛ, ni aaatsɛ egbɛi Yosia. Lɛ ebaagbe osɔfoi ni shãa afɔlei yɛ onɔ lɛ, ni gbɔmɛi awui tete lɛ eeeshã yɛ onɔ.” 3Ni gbalɔ lɛ to okadi yɛ nakai gbi lɛ nɔ nɔŋŋ ekɛɛ akɛ, “Enɛ ji okadi ni aaatsɔ̃ɔ akɛ Yehowa ŋɔɔ gbalɛ wiemɔ nɛɛ jɛ. Afɔleshãa latɛ nɛɛ abaawule lɛ ashwie shi, ni enɔ lamlu lɛ akɛbaashwã.”
4Be ni Maŋtsɛ Yeroboam nu gbalɛ wiemɔ ni gbalɔ lɛ wie eshi afɔleshãa latɛ lɛ yɛ Betel lɛ, Yeroboam kpã enine mli kɛjɛ afɔleshãa latɛ lɛ he, ni ekɛtsɔ̃ɔ gbalɔ lɛ, ni ekɛɛ akɛ, “Nyɛmɔa nɛkɛ gbɔmɔ nɛɛ!” Amrɔ lɛ nɔŋŋ lɛ enine ni ekpã mli lɛ shɔ̃ kɛkree, ni enyɛɛɛ esu dɔŋŋ. 5Kɛkɛ ni afɔleshãa latɛ lɛ wule, ni lamlu ni yɔɔ afɔleshãa latɛ lɛ nɔ lɛ gbɛ shwã tamɔ okadi ni gbalɔ lɛ kɛɛ yɛ Yehowa wiemɔ lɛ naa lɛ. 6#2 Maŋ 8.8, 12 Maŋtsɛ Yeroboam kɛɛ Nyɔŋmɔ gbɔmɔ lɛ akɛ, “Ofainɛ, kpa Yehowa, oNyɔŋmɔ lɛ, fai ni osɔle ohã mi koni atsa minine lɛ ahã mi ekoŋŋ.”
No hewɔ lɛ, gbalɔ lɛ kpa Yehowa fai, ni atsa maŋtsɛ lɛ nine lɛ ahã lɛ, ni enine lɛ ba eblema ekoŋŋ. 7Kɛkɛ ni maŋtsɛ lɛ kɛɛ gbalɔ lɛ akɛ, “Ba koni wɔtee shĩa ni oyaye nɔ ko, ni make bo nɔ ko.” 8#Num 22.18 Shi gbalɔ lɛ kɛɛ maŋtsɛ lɛ akɛ, “Kɛji okɛ omaŋtsɛyeli lɛ mli fã aaahã mi tete po lɛ, mi kɛ bo eyaŋ, ni asaŋ miyeŋ nii, ni minuŋ nɔ ko yɛ biɛ. 9Ejaakɛ nakai Yehowa wiemɔ fã mi akɛ, kaaye nɔ ko, ni kaanu nu, ni gbɛ ni otsɔ̃ nɔ kɛtee lɛ, kaatsɔ̃ no nɔŋŋ nɔ dɔŋŋ kɛba.” 10No hewɔ lɛ, etsɔ̃ gbɛ kroko nɔ kɛtee, ni ekuuu esɛɛ etsɔ̃ɔɔ gbɛ ni etsɔ̃ nɔ kɛba Betel lɛ nɔ dɔŋŋ.
Betel gbalɔ nuumo lɛ
11Nakai be lɛ mli lɛ gbalɔ nuumo ko hi shi yɛ Betel. Ebihii lɛ ateŋ mɔ kome bagba lɛ nii fɛɛ ni Nyɔŋmɔ gbɔmɔ ni jɛ Yuda lɛ etsu yɛ Betel nakai gbi lɛ; egba lɛ wiemɔ ni ekɛ maŋtsɛ Yeroboam wie lɛ hu. 12Nuumo lɛ bi akɛ, “Be ni eshi jɛi lɛ nɛgbɛ etsɔ̃?” Ni ebii lɛ tsɔ̃ɔ lɛ gbɛ nɔ ni Nyɔŋmɔ gbɔmɔ ni jɛ Yuda kɛba lɛ tsɔ̃ lɛ. 13Nuumo lɛ kɛɛ ebii lɛ akɛ, “Nyɛwoa teji nɔ nii nyɛhãa mi.” Kɛkɛ ni amɛwo teji nɔ nii amɛhã lɛ, ni eho eta nɔ. 14Nuumo gbalɔ lɛ tiu Nyɔŋmɔ gbɔmɔ ni jɛ Yuda lɛ, ni eyanina lɛ ni eta tso agbo ko shishi. Ebi lɛ akɛ, “Ani bo ji Nyɔŋmɔ gbɔmɔ ni jɛ Yuda ba lɛ?” Ni ehã lɛ hetoo akɛ, “Mi ni.”
15Gbalɔ nuumo lɛ kɛɛ lɛ akɛ, “Ba wɔtee shĩa ni oyaye nii.”
16Shi gbalɔ ni jɛ Yuda lɛ kɛɛ lɛ akɛ, “Minyɛŋ misɛɛ maku ni mikɛ bo aya, ni asaŋ mi kɛ bo yeŋ nii, ni mi kɛ bo enuŋ nu yɛ biɛ. 17Ejaakɛ Yehowa wo mi kitã akɛ, kaaye nii, ni kaanu nɔ ko hu yɛ jɛi, asaŋ kaatsɔ̃ gbɛ ni otsɔ̃ nɔ kɛtee lɛ nɔ kɛmiiba dɔŋŋ.”
18Kɛkɛ ni gbalɔ nuumo ni jɛ Betel lɛ kɛɛ lɛ akɛ, “Mi hu gbalɔ ji mi tamɔ bo nɔŋŋ, ni Yehowa fã ebɔfo, ni ekɛ mi bawie akɛ, yaakpale lɛ ni okɛ lɛ aba shĩa koni ebaye nii ni enu nu.” Shi gbalɔ nuumo lɛ miimale.
19No hewɔ lɛ, gbalɔ lɛ ni jɛ Yuda lɛ kɛ gbalɔ nuumo lɛ tee ni eyaye nii yɛ ewe lɛ, ni enu nii. 20Be ni amɛtara okplɔ̃ lɛ he amɛyeɔ nii lɛ, Yehowa wie kɛtsɔ̃ gbalɔ nuumo lɛ ni yakpale Yuda gbalɔ lɛ kɛba lɛ nɔ, 21ni egba ekɛɛ Nyɔŋmɔ gbɔmɔ ni jɛ Yuda eba lɛ akɛ, “Bɔ ni Yehowa kɛɛ nɛ, ‘Akɛni obooo Yehowa wiemɔ toi, ni oyeee kitã ni Yehowa oNyɔŋmɔ lɛ wo bo lɛ nɔ,’ 22ni oku osɛɛ oba obaye nii, ni onu nii, yɛ he ni ekɛɛ bo yɛ he akɛ, ‘Kaaye nii, ni kaanu nɔ ko hu yɛ jɛi,’ lɛ nɛɛ lɛ, gbo ooogbo, ni ogbonyo eyaŋ otsɛmɛi lɛ afũuhe lɛ.”
23Be ni Nyɔŋmɔ gbɔmɔ lɛ eye nii ni enu nii sɛɛ lɛ, gbalɔ nuumo lɛ wo teji lɛ nɔ nii ehã Nyɔŋmɔ gbɔmɔ lɛ ni jɛ Yuda lɛ. 24#1 Maŋ 20.36 Kɛkɛ ni gbalɔ ni jɛ Yuda lɛ yiŋ etee; shi be ni eyaa lɛ jata ko kɛ lɛ bakpe ni egbe lɛ. Egbonyo lɛ kã gbɛ lɛ nɔ, ni teji lɛ kɛ jata lɛ damɔ emasɛi. 25Mɛi komɛi ni batsɔ̃ gbɛ lɛ nɔ lɛ na gbonyo lɛ kã gbɛ lɛ nɔ, ni jata lɛ damɔ gbonyo lɛ masɛi. Ni amɛba amɛbagba yɛ Betel maŋ lɛ mli he ni gbalɔ nuumo lɛ yɔɔ lɛ.
26Be ni gbalɔ nuumo lɛ ni yakpale lɛ kɛjɛ gbɛ lɛ nɔ kɛba lɛ nu sane lɛ ekɛɛ akɛ, “Nyɔŋmɔ gbɔmɔ lɛ ni yabooo Yehowa wiemɔ lɛ toi lɛ ni; no hewɔ ni Yehowa jie jata ewo ehe lɛ, ni etserɛ emli, ni egbe lɛ yɛ wiemɔ ni Yehowa kɛ lɛ wie lɛ naa nɛɛ.” 27Kɛkɛ ni ekɛɛ ebii lɛ akɛ, “Nyɛwoa teji nɔ nii nyɛhãa mi.” Ni amɛwo enɔ nii. 28Kɛkɛ ni eyiŋ etee, ni eyana gbonyo lɛ kã gbɛ lɛ nɔ; teji lɛ kɛ jata lɛ damɔ gbonyo lɛ masɛi; jata lɛ yeko gbonyo lɛ, ni esaa etserɛko teji lɛ. 29Gbalɔ nuumo lɛ wo Nyɔŋmɔ gbɔmɔ lɛ, ni ekɛ lɛ ŋmɛ teji lɛ nɔ, ni ekɛ lɛ ku sɛɛ kɛba emaŋ lɛ mli koni amɛbafo lɛ ni amɛfu lɛ. 30#Yer 22.18 Eto gbonyo lɛ yɛ lɛ diɛŋtsɛ egbonyobu mli; ni amɛfo lɛ amɛkɛɛ akɛ, “Kpoo, minyɛmi nuu!” 31Agbɛnɛ be ni efu gbonyo lɛ sɛɛ lɛ, ekɛɛ ebii lɛ akɛ, “Kɛji migbo lɛ nyɛfua mi yɛ bu ni afu Nyɔŋmɔ gbɔmɔ lɛ yɛ mli lɛ nɔŋŋ mli; nyɛtoa miwui lɛ yɛ ewui lɛ amasɛi; 32ejaakɛ wiemɔi ni Yehowa fã lɛ koni ewie eshi afɔleshãa latɛ lɛ ni yɔɔ Betel lɛ kɛ jamɔhei ni yɔɔ hei grɔŋŋi lɛ ni yɔɔ Samaria maji lɛ anɔ lɛ, bɔ fɛɛ bɔ ni fee lɛ gbalɛ wiemɔi lɛ baaba mli kɛ̃.”
Esha kpele ni Yeroboam fee lɛ
33 #
1 Maŋ 12.31; Ɛks 28.41 Enɛɛmɛi fɛɛ asɛɛ lɛ Israel Maŋtsɛ Yeroboam efɔ̃ɔɔ efɔŋ ni efeɔ lɛ feemɔ, shi moŋ eŋɔ mɛi komɛi kɛkɛ, ni ewo amɛ hei grɔŋŋi jamɔhei lɛ osɔfoi. Mɔ fɛɛ mɔ ni sumɔɔ akɛ eye osɔfo lɛ, ewoɔ lɛ osɔfo. 34#1 Maŋ 12.30 Nɛkɛ enifeemɔ nɛɛ batsɔ̃ esha kpele ehã Yeroboam we lɛ. Enɛ ji nɔ ni hã emaŋtsɛyeli lɛ gbee shi.
Currently Selected:
1 Maŋtsɛmɛi 13: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
