1 Maŋtsɛmɛi 12
12
Kooyigbɛ akutsei lɛ tse amɛhe
(2 Kronika 10.1-19)
1Rehoboam yiŋ etee Shekem ejaakɛ Israel fɛɛ eba Shekem koni amɛbawo lɛ maŋtsɛ. 2#1 Maŋ 11.40 Be ni Nebat bi, Yeroboam, mɔ ni jo foi yɛ Maŋtsɛ Solomon naa etee eyatee ehe yɛ Ijipt lɛ, nu sane nɛɛ he lɛ, eku esɛɛ kɛjɛ Ijipt eba. 3Maŋbii ni yɔɔ kooyigbɛ akutsei lɛ amli tsu koni ayaŋɔ lɛ kɛba. Kɛkɛ ni Yeroboam kɛ Israel asafo muu lɛ fɛɛ ba, ni amɛbakɛɛ Rehoboam akɛ 4“Otsɛ Solomon hã wɔtsu nii keketee diɛŋtsɛ. No hewɔ lɛ, agbɛnɛ kɛji ooogbɔ wɔtɔlɛ kɛ deŋmegbomɔ lɛ nɔ lɛ, no lɛ wɔɔsɔ̃mɔ bo, ni wɔɔfee nɔ fɛɛ nɔ ni otaoɔ.”
5Rehoboam kɛɛ amɛ akɛ, “Nyɛyaa dã; ni biɛ gbii etɛ̃ lɛ koni nyɛku nyɛsɛɛ nyɛba miŋɔɔ koni nyɛbahe hetoo.” No hewɔ lɛ, maŋbii lɛ shi lɛ amɛtee.
6 #
Abɛi 12.5
Kɛkɛ ni Maŋtsɛ Rehoboam bi ŋaawoo kɛjɛ onukpai ni sɔ̃mɔ etsɛ Solomon, be ni eyɔɔ jeŋ lolo lɛ adɛŋ ekɛɛ akɛ, “Mɛɛ ŋaa nyɛwoɔ mi yɛ sane ni maŋbii nɛɛ ebabi mi lɛ hetoo he?”
7Amɛhã lɛ hetoo akɛ, “Kɛji ooofee ohe tsulɔ ohã nɛkɛ maŋ nɛɛ, ni ooosɔ̃mɔ, ni ooobo amɛtoi, ni okɛ amɛ aaawie yɛ tsuijurɔ naa lɛ, no lɛ amɛaatsɔ̃mɔ otsuji kɛya naanɔ.”
8Shi Maŋtsɛ Rehoboam kwa onukpai lɛ aŋaawoo lɛ, ni ekɛ oblahii ni ji etipɛŋfoi ni ekɛje nɔ ni agbɛnɛ amɛtsɔ̃mɔ esɔ̃ɔlɔi lɛ moŋ tee ajina. 9Ebi amɛ akɛ, “Mɛɛ ŋaa nyɛ hu nyɛwoɔ ni wɔkɛhã maŋbii nɛɛ ni bakɛɛ mi akɛ, ‘Feemɔ jatsu kɛ tsiimɔ ni otsɛ kɛtere wɔ lɛ huyɛɛ ohã wɔ lɛ?’ ”
10Ni oblahii ni ji etipɛŋfoi lɛ kɛɛ lɛ akɛ, “Maŋbii lɛ ni kɛ bo bawie akɛ, ‘Otsɛ kɛ jatsu ni tsii diɛŋtsɛ tere wɔ, shi bo lɛ feemɔ jatsu lɛ huyɛɛ ohã wɔ lɛ’, bɔ ni okɛɛ amɛ nɛ, ‘Miwao sɛɛkpelɔ ti fe mitsɛ hɛ. 11Agbɛnɛ eyɛ mli akɛ mitsɛ hã nyɛtsu nii keketee moŋ nɛ, shi mi lɛ, mahã nyɛtsu nii keketee fe nakai. Mitsɛ kɛ kpelebii yi nyɛ, shi mi lɛ, mikɛ dade kpelebi baayi nyɛ!’ ”
12Gbi ni ji etɛ̃ lɛ nɔ lɛ Yeroboam kɛ maŋ muu lɛ fɛɛ ba Rehoboam ŋɔɔ taakɛ bɔ ni Rehoboam eto amɛ akɛ, “Nyɛyaa dã, ni biɛ gbii etɛ̃ lɛ koni nyɛku nyɛsɛɛ nyɛba miŋɔɔ koni nyɛbahe hetoo” lɛ. 13Rehoboam hã maŋ lɛ hetoo gbonyo. Ekwa ŋaa ni onukpai lɛ wo lɛ lɛ. 14Ekɛ amɛ wie yɛ oblahii lɛ aŋaa ni amɛwo lɛ lɛ naa akɛ, “Miwao sɛɛkpelɔ ti fe mitsɛ hɛ. Eyɛ mli akɛ mitsɛ hã nyɛtsu nii keketee moŋ nɛ, shi mi lɛ, mahã nyɛtsu nii keketee fe nakai. Mitsɛ kɛ kpelebii yi nyɛ, shi mi lɛ, mikɛ dade kpelebii baayi nyɛ!” 15#1 Maŋ 11.31 No hewɔ lɛ, Maŋtsɛ Rehoboam booo maŋbii lɛ toi, ejaakɛ Yehowa dɛŋ sane lɛ jɛ, bɔ ni afee ni Yehowa ahã ewiemɔ ni etsɔ̃ Ahia, Shilonyo lɛ, nɔ ni ekɛ Nebat bi Yeroboam wie lɛ aba mli.
16 #
Abɛi 15.1; 2 Sam 20.1 Be ni Israelbii lɛ na akɛ Maŋtsɛ Rehoboam eŋɔɔɔ onukpai lɛ aŋaawoo lɛ, maŋbii lɛ hã lɛ hetoo akɛ, “Ani wɔyeɔ David gboshinii ko lo? Wɔyeee Yishai bi David nii. Ataamɛi Israelbii, nyɛhãa wɔyaa wɔshĩai amli. Rehoboam,#12.16: Rehoboam: Heb. David agbɛnɛ kwɛ bo diɛŋtsɛ owe nɔ!”
Hewɔ lɛ Israelbii lɛ yiŋ kɛtee amɛshĩai amli. 17Shi Rehoboam ye Israelbii ni yɔɔ Yuda kpokpai anɔ maji lɛ amli lɛ anɔ maŋtsɛ.
18Shi Maŋtsɛ Rehoboam tsu Adoram, mɔ ni kwɛɔ nitsulɔi lɛ fɛɛ anɔ lɛ, kɛtee Israelbii lɛ aŋɔɔ; shi amɛtswia lɛ tɛi, ni amɛgbe lɛ. Kɛkɛ ni Maŋtsɛ Rehoboam he fee oya, ni ebote etayaa shwiili mli, ni ejo foi kɛtee Yerusalɛm. 19Kɛjɛ no sɛɛ lɛ, Israel Kooyigbɛ maŋtsɛyeli lɛ tse David we lɛ hiɛ atua kɛbashi ŋmɛnɛ.
20Be ni Israelbii lɛ fɛɛ nu akɛ Yeroboam eku esɛɛ kɛjɛ Ijipt kɛba ekoŋŋ lɛ, amɛtsu ayaŋɔ lɛ kɛba Israel asafo muu ni ekpe hiɛ, ni amɛwo lɛ Israel fɛɛ nɔ maŋtsɛ. Mɔ ko mɔ ko bɛ ni nyiɛ David we lɛ sɛɛ akɛ ja Yuda akutso lɛ pɛ kɛkɛ.
Shemaia gbalɛ lɛ
(2 Kronika 11.1-4)
21Be ni Rehoboam yashɛ Yerusalɛm lɛ ebua hii tawulɔi akpei oha kɛ nyɔŋmai kpaanyɔ naa kɛjɛ Yuda we lɛ kɛ Benyamin akutso lɛ mli koni amɛkɛ Israel we lɛ ayawu, koni amɛshɔ̃ maŋtsɛyeli lɛ amɛhã Solomon bi Rehoboam ekoŋŋ. 22Shi Nyɔŋmɔ kɛ Shemaia, Nyɔŋmɔ gbɔmɔ lɛ, wie akɛ, 23“Kɛɛmɔ Yuda Maŋtsɛ Rehoboam, Solomon bi lɛ, kɛ Yuda we lɛ kɛ Benyamin we lɛ kɛ maŋ lɛ mli mɛi ni eshwɛ lɛ fɛɛ akɛ, 24Bɔ ni Yehowa kɛɛ nɛ. ‘Nyɛkayaa, ni asaŋ nyɛkɛ nyɛnyɛmimɛi Israelbii lɛ akawua. Nyɛteŋ mɔ fɛɛ mɔ aku esɛɛ eya ewe; ejaakɛ midɛŋ nɛkɛ sane nɛɛ jɛ.’ ” No hewɔ lɛ, Rehoboam kɛ Yudabii kɛ Benyaminbii kɛ maŋbii lɛ bo Yehowa wiemɔ lɛ toi, ni amɛku amɛsɛɛ amɛtee amɛshĩai ekoŋŋ yɛ Yehowa wiemɔ lɛ naa.
Yeroboam fee shika tsinabii
25 #
Jɛn 32.31
Israel Maŋtsɛ Yeroboam yato Shekem yɛ Efraim gɔji lɛ anɔ, ni eyahi jɛi. No sɛɛ lɛ, ejɛ jɛi ni eyato Penuel hu. 26-27Kɛkɛ ni Yeroboam kɛɛ ehe akɛ, “Bɔ ni nibii yaa lɛ nɛɛ, kɛji mimaŋbii lɛ aaakã he ayaja Yehowa yɛ Sɔlemɔ we lɛ yɛ Yerusalɛm lɛ, no lɛ maŋbii nɛɛ atsui aaatsɔ̃, ni amɛaagbe mi amɛhã amɛnuŋtsɔ Rehoboam, Yuda maŋtsɛ lɛ, koni maŋtsɛyeli lɛ aku sɛɛ aya David we lɛ ekoŋŋ.”
28 #
Ɛks 32.4, 8 No hewɔ lɛ, be ni maŋtsɛ lɛ ejwɛŋ sane lɛ he sɛɛ lɛ, efee shika tsinabii amãgãi enyɔ, ni ekɛɛ emaŋbii lɛ akɛ, “Shii abɔ ni nyɛyaa Yerusalɛm nyɛyajaa lɛ efa. Ao Israel, naa onyɔŋmɔi ni yajie bo kɛjɛ Ijipt shikpɔŋ lɛ nɔ lɛ!” 29#Koj 18.30 Ni eŋɔ shika tsinabii amãgãi lɛ ateŋ ekome emã Betel, ni ekɛ ekome hu mã Dan. 30#1 Maŋ 14.16 Kɛkɛ ni enɛ tsɔ̃ esha ehã maŋ lɛ, ejaakɛ amɛyajaa amãgã ni akɛmã Betel lɛ kɛ nɔ ni akɛma Dan tɔ̃ɔ lɛ hu. 31Yeroboam mamɔ shĩai yɛ he grɔŋŋi lɛ, ni eŋɔɔ mɛi kɛjɛɔ maŋ lɛ mli he fɛɛ he kɛkɛ, ni ewoɔ amɛ osɔfoi, tsɛbelɛ amɛjɛɛɛ Leviwe lɛ.
32Yeroboam to jamɔ gbijurɔ hee ko yɛ nyɔŋ ni ji kpaanyɔ lɛ nɔ gbi ni ji nyɔŋma kɛ enumɔ lɛ nɔ, tamɔ jamɔ gbijurɔ ni ayeɔ yɛ Yuda lɛ, ni eshã afɔlei yɛ afɔleshãa latɛ lɛ nɔ. Eshã afɔlei yɛ afɔleshãa latɛ ni efee yɛ Betel lɛ nɔ ehã shika tsinabi amãgã ni efee lɛ. Ni ekɛ osɔfoi ni ewowoo lɛ to hei grɔŋŋi lɛ ni efee lɛ. 33#Lev 23.33-34 Kɛkɛ ni nyɔŋ ni ji kpaanyɔ lɛ nɔ gbi ni ji nyɔŋma kɛ enumɔ lɛ nɔ, gbi ni lɛ pɛ eto lɛ nɔ lɛ, etee eyashã afɔle yɛ Betel yɛ afɔleshãa latɛ ni efee lɛ nɔ. Eto gbijurɔ nɛɛ ehã Israel, no hewɔ ni etee eyashã tsofakɛŋma yɛ afɔleshãa latɛ lɛ nɔ lɛ.
Currently Selected:
1 Maŋtsɛmɛi 12: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
