1 Maŋtsɛmɛi 11
11
Solomon gbo Nyɔŋmɔ nɔ toi
1 #
Deut 17.17
Maŋtsɛ Solomon sumɔ maŋsɛɛ yei pii yɛ Ijipt maŋtsɛ biyoo lɛ sɛɛ. Ekɛ maŋsɛɛ yei ni jɛ Moab kɛ Amon kɛ Edom kɛ Sidon kɛ Hit shikpɔji lɛ fɛɛ anɔ hi shi. 2#Ɛks 34.16; Deut 7.3-4 Tsɛbelɛ Yehowa ekã Israelbii akitã ekɛɛ amɛ akɛ, “Nyɛkɛ maŋsɛɛ yei akabotea gbãlãshihilɛ mli, ejaakɛ bɔ fɛɛ bɔ ni fee lɛ, amɛaalaka nyɛ koni nyɛyaja amɛnyɔŋmɔi lɛ.” Solomon yasumɔ nɛkɛ maŋsɛɛ yei nɛɛ moŋ. 3Maŋtsɛ Solomon kpee maŋtsɛmɛi abiyei ohai kpawo ni eto hemɛi ohai etɛ̃. Ni nɛkɛ maŋsɛɛ yei nɛɛ hã ekpa yɛ Israel Nyɔŋmɔ lɛ sɛɛ. 4Be ni Solomon gbɔ lɛ, eŋãmɛi lɛ etsake lɛ kwraa, ni ekpa yɛ Yehowa eNyɔŋmɔ lɛ sɛɛ, ni eyayeee Yehowa anɔkwa tamɔ etsɛ David fee lɛ. 5Ejaakɛ Solomon yaja Astarte, Sidonbii lɛ anyɔŋmɔ lɛ, kɛ Molek, Amonbii lɛ anyɔŋmɔ, ni Yehowa hiɔ lɛ. 6No hewɔ lɛ, Solomon fee nɔ ni ji efɔŋ yɛ Yehowa hiɛ, ni eyeee Yehowa anɔkwa kɛwulaaa shi tamɔ etsɛ David. 7#Num 21.29; 2 Maŋ 23.13 Kɛkɛ ni Solomon mã jamɔhe ehã Kemosh, Moabbii anyɔŋmɔ ni Yehowa hiɔ lɛ, kɛ Molek ni ji Amonbii anyɔŋmɔ ni Yehowa hiɔ lɛ hu, yɛ Yerusalɛm bokãgbɛ. 8Ni efee nakai nɔŋŋ ehã eŋãmɛi fɛɛ hu ni jɛ majiasɛɛ, mɛi ni shãa tsofakɛŋma kɛ afɔlei hu amɛhãa amɛnyɔŋmɔi lɛ.
9 #
1 Maŋ 3.5; 9.2 Kɛkɛ ni Yehowa mli fu Solomon, ejaakɛ eje lɛ Yehowa, Israel Nyɔŋmɔ lɛ, sɛɛ: Yehowa mɔ ni jie ehe kpo etsɔ̃ɔ lɛ shii enyɔ sɔŋŋ lɛ. 10Yehowa ewo lɛ enɛ he kitã akɛ ekaja nyɔŋmɔi krokomɛi; shi Solomon yeee kitã ni Yehowa wo lɛ lɛ nɔ. 11#1 Sam 14.26 No hewɔ lɛ, Yehowa kɛɛ Solomon akɛ, “Gbii abɔ ni oyeee mikpãŋmɔ kɛ mikpɔi lɛ ni miwo bo lɛ anɔ lɛ, shɔ̃ kɛ̃ mashɔ̃ omaŋtsɛyeli lɛ yɛ odɛ̃ŋ, ni mikɛaahã otsuji lɛ ateŋ mɔ kome. 12Shi kɛ̃lɛ, otsɛ David hewɔ lɛ mifeŋ enɛ yɛ oyinɔ; shi obi ni maŋɔ mahã lɛ dɛŋ mashɔ̃ yɛ. 13Asaŋ mishɔŋ omaŋtsɛyeli muu lɛ fɛɛ kɛyaŋ; maŋɔ akutso kome mahã obi lɛ, yɛ mitsulɔ David kɛ Yerusalɛm ni mihala lɛ hewɔ.”
Solomon Henyɛlɔi Lɛ
14No hewɔ lɛ, Yehowa tee henyɛlɔ ko shi ewo Solomon; lɛ ji Hadad, Edomnyo lɛ; ejɛ Edom odehei aweku mli. 15#2 Sam 8.14 Ejaakɛ David kɛ Edom na ta, ni eye Edom nɔ. Be ni agbe ta lɛ naa lɛ Yoab, David tatsɛ lɛ, tee Edom koni eyafu gbohii lɛ. 16Yoab kɛ esɛɛ tabilɔi lɛ hi Edom nyɔji ekpaa, ni nakai be lɛ mli lɛ Yoab gbe hii fɛɛ ni yɔɔ Edom. 17Shi Hadad kɛ Edombii komɛi ni ji etsɛ tsuji lɛ jo foi kɛtee Ijipt. No mli lɛ oblanyo fioo ji Hadad. 18Amɛfã kɛjɛ Midian kɛtee Paran. Ni amɛŋɔ mɛi komɛi kɛjɛ Paran amɛfata amɛhe kɛtee Ijipt, ni amɛtee Ijipt maŋtsɛ lɛ ŋɔɔ. Ijipt maŋtsɛ lɛ hã Hadad shihilɛhe, ni eto niyenii ehã lɛ, ni esaa ehã lɛ shikpɔŋ hu. 19Hadad sane sa Ijipt maŋtsɛ lɛ hiɛ jogbaŋŋ aahu po ni eŋɔ lɛ diɛŋtsɛ eŋa ni ji Maŋnyɛ Tapene lɛ nyɛmi yoo ehã Hadad gbãlã. 20Hadad kɛ Tapene nyɛmi yoo lɛ fɔ ebi nuu Genubat. Tapene tse Genubat fufɔ, ni alɛ lɛ yɛ Ijipt maŋtsɛ we lɛ mli; ni Genubat kɛ maŋtsɛ bihii lɛ hi shi yɛ maŋtsɛ we lɛ.
21Be ni Hadad yɔɔ Ijipt lɛ, enu akɛ David egbo, ni etatsɛ Yoab lɛ hu egbo. Kɛkɛ ni Hadad yakɛɛ Ijipt maŋtsɛ lɛ akɛ, “Ŋmɛɛ mi gbɛ koni maya mi diɛŋtsɛ mishikpɔŋ lɛ nɔ.”
22Shi Ijipt maŋtsɛ lɛ kɛɛ Hadad akɛ, “Mɛni po he hiaa bo yɛ biɛ hewɔ ni otaoɔ akɛ oya bo diɛŋtsɛ oshikpɔŋ nɔ lɛ?” Hadad hã lɛ hetoo akɛ, “Nɔ ko nɔ ko he ehĩaaa mi, shi kɛ̃lɛ, ŋmɛɛ mi gbɛ koni maya.”
Rezon tsɔ̃ Solomon henyɛlɔ
23Nyɔŋmɔ tee henyɛlɔ kroko shi ewo Solomon. Lɛ ji Eliada bi Rezon, mɔ ni jo foi kɛjɛ enuŋtsɔ Maŋtsɛ Hadadezer ni jɛ Zoba lɛ ŋɔɔ lɛ. 24#2 Sam 8.3; 10.13 Rezon bua hii atuatselɔi anaa efata ehe, ni etsɔ̃ amɛhiɛnyiɛlɔ. Nɛkɛ be mli lɛ, David eye Maŋtsɛ Hadadezer ni jɛ Zoba nɔ kunim; ni egbe ewebii Siriabii lɛ. Rezon kɛ ewebii lɛ tee Damasko, ni amɛyahi jɛi, ni ewebii lɛ wo lɛ Siria maŋtsɛ. 25Etsɔ̃ Israel henyɛlɔ yɛ Solomon yinɔ beiaŋ fɛɛ, ni egba Solomon naa babaoo tamɔ bɔ ni Hadad fee lɛ.
Nyɔŋmɔ wo Yeroboam shi
26Mɔ ko hu ni te shi wo Maŋtsɛ Solomon ji etsulɔ Yeroboam, ni ji Nebat, Efraimnyo ko ni jɛ Zereda, bi lɛ. Yeroboam nyɛ ji Zerua, yoo okulafo ko. 27#1 Maŋ 9.15, 24 Nɔ ni kɛ atuatsemɔ lɛ ba nɛ.
Solomon miisaa eetswa Milo ni ji Yerusalɛm gbogbo ni yɔɔ bokãgbɛ lɛ. Gbogbo nɛɛ ni yɔɔ etsɛ maŋ lɛ he lɛ he ko ekumɔ. 28Solomon yoo akɛ nɛkɛ nuu Yeroboam nɛɛ lɛ, etsuɔ nii waa, hewɔ lɛ ewo lɛ onukpa yɛ nitsulɔi ni tsuɔ nii yɛ Manase kɛ Efraimwe lɛ anɔ. 29Nakai be lɛ mli gbi ko be ni Yeroboam shiɔ Yerusalɛm lɛ, gbalɔ Ahia, Shilonyo lɛ, yanina lɛ yɛ gbɛ lɛ nɔ. Gbalɔ Ahia wo atade hee kaŋŋ ko. Amɛyi enyɔ lɛ pɛ amɛyɔɔ ŋa lɛ nɔ. 30Ahia mɔ etade hee ni ewo lɛ, ni etserɛ mli bibiibii nyɔŋma kɛ enyɔ. 31#1 Maŋ 12.15; 14.2 Kɛkɛ ni ekɛɛ Yeroboam akɛ, “Kɔlɔmɔ kukuji nyɔŋma ohã ohe, ejaakɛ bɔ ni Yehowa, Israel Nyɔŋmɔ lɛ, kɛɛ nɛ, ‘Naa, mibashɔ̃ maŋtsɛyeli lɛ yɛ Solomon dɛŋ, ni maŋɔ akutsei nyɔŋma maha bo. 32Mitsulɔ David hewɔ kɛ Yerusalɛm, maŋ ni mikɔ kɛjɛ Israel akutsei lɛ ateŋ lɛ hu hewɔ lɛ, Solomon baaye akutso kome nɔ. 33Mibafee enɛ, ejaakɛ Solomon ekwa#11.33: Ekwa mi: Heb. amɛkwa mi mi, eyaja Astarte, Sidonbii lɛ anyɔŋmɔ lɛ, kɛ Kemosh, Moab nyɔŋmɔ lɛ, kɛ Molek, Amonbii anyɔŋmɔ lɛ; ebaaa ejeŋ jogbaŋŋ koni efee jalɛnii ni sa mihiɛ ni eye mikpɔi kɛ mimlai lɛ anɔ, tamɔ bɔ ni etsɛ David fee lɛ. 34#2 Sam 7.12 Shi kɛ̃lɛ mishɔŋ maŋtsɛyeli muu lɛ fɛɛ yɛ edɛŋ; shi moŋ mahã eye lumɔ ewala gbii abɔ fɛɛ. Mafee enɛ yɛ mitsulɔ David mɔ ni mihala ni eye mikitãi kɛ mikpɔi lɛ anɔ lɛ hewɔ. 35#2 Sam 12.16 Mashɔ̃ maŋtsɛyeli lɛ yɛ Solomon bi dɛŋ, ni maŋɔ emli akutsei nyɔŋma mahã bo. 36Shi maŋɔ akutso kome mahã ebi lɛ, bɔ ni afee ni David shwie ko ahi shi ahã lɛ daa yɛ mihiɛ yɛ Yerusalɛm, maŋ ni mikɔ mihã mihe koni aja mi yɛ jɛi lɛ. 37Yeroboam, mibawo bo maŋtsɛ yɛ Israel ni oye shikpɔŋ muu lɛ fɛɛ nɔ bɔ ni otaoɔ. 38#1 Maŋ 9.4 Kɛji ooobo mi toi, ni oooye kitãi ni miwoɔ bo lɛ nɔ, ni oooba ojeŋ jogbaŋŋ, ni ooofee nɔ ni ja yɛ mihiɛ, ni oooye mikpɔi kɛ mikitãi lɛ anɔ tamɔ bɔ ni mitsulɔ David fee lɛ, no lɛ mi kɛ bo aaahi shi; mawo bo Israel nɔ maŋtsɛ, ni mahã oshwiei aye lumɔ yɛ osɛɛ, tamɔ bɔ ni mifee mihã David lɛ. 39Enɛ hewɔ lɛ, magbala David shwiei lɛ atoi; shi jeee kɛmiiya naanɔ.’ ”
40 #
1 Maŋ 14.25
No hewɔ lɛ, Solomon tao Yeroboam egbe, shi Yeroboam jo foi oya kɛtee Ijipt Maŋtsɛ Shishak ŋɔɔ, ni eyahi jɛi aahu kɛyashi Solomon gbo.
Maŋtsɛ Solomon gbele
(2 Kronika 9.29-31)
41Agbɛnɛ nibii fɛɛ ni Solomon fee kɛ enitsumɔ kɛ enilee lɛ, aŋma fɛɛ yɛ Solomon he Saji Awolo lɛ mli. 42Bei abɔ ni Solomon ye Israel nɔ maŋtsɛ yɛ Yerusalɛm ji afii nyɔŋmai ejwɛ. 43Solomon gbo, ni afu lɛ yɛ etsɛ David maŋ lɛ mli, ni ebi Rehoboam baye maŋtsɛ yɛ esɛɛ.
Currently Selected:
1 Maŋtsɛmɛi 11: NEGAB
Highlight
Copy
Compare
Share
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
