1 Korintus 9

Kristus pu utusan pu hak

9:1-27

1Sa ni orang bebas to? Sa ni utusan to? Sa perna liat tong pu Tuhan Yesus to? Kam tu hasil dari sa pu kerja untuk Tuhan to? 2Biar orang lain tra akui sa ni Kristus pu utusan, tapi kam akui itu. Karna kam pu hidup dalam Tuhan tu bukti kalo sa ni utusan.

3Kalo orang kas sala sa, sa jawab begini: 4Tong trada hak untuk trima makan deng minum karna tong pu kerja ka? 5Tong trada hak untuk bawa istri Kristen sama-sama deng tong waktu tong pigi kastau Brita Baik ka? Sperti yang Tuhan Yesus pu ade-ade deng utusan-utusan yang lain, juga Kefas#1 Korintus 1:12 dong bikin. 6Ato cuma sa deng Barnabas saja ka yang harus cari uang sendiri untuk kas cukup tong dua pu hidup stiap hari?

7Trada tentara yang biaya de pu diri sendiri waktu ikut prang to? Trada orang yang tanam anggur di de pu kebun, trus tra makan anggur pu hasil dari kebun itu to? Trada orang yang piara domba, trus tra minum susu dari de pu domba-domba itu to? 8Yang sa bilang ni bukan hanya manusia pu pikiran saja. Tapi hukum Musa juga bilang sperti begitu to? 9Karna dalam hukum Musa ada tatulis: “Ko jang tutup sapi pu mulut waktu de ada kerja injak-injak gandum!”#Ulangan 25:4; 1 Timotius 5:18 Memang sapi saja yang Allah pratikan ka? 10Ato tong yang De maksud ka? Iyo, itu dapa tulis untuk tong suda. Itu tu orang yang kerja tana, harus kerja deng penu harap. Trus orang yang kas bersi gandum, harus kas bersi deng penu harap untuk trima de pu bagian.

11Jadi, kalo tong su tanam bibit rohani untuk kam, tra bole ka kalo tong panen hasil dunia dari kam? 12Kalo orang lain pu hak untuk harap itu dari kam, brarti tong pu hak lebi besar dari dong to?

Tapi tong tra pake hak itu. Mala tong tanggung smua-smua, supaya tong tra pele ajaran Brita Baik tentang Kristus. 13Kam tra tau ka kalo dong yang layani dalam Ruma Allah tu trima makanan dari situ to? Trus dong yang layani tempat bakar korban tu trima dong pu bagian dari tempat bakar korban itu to? 14Begitu juga Tuhan su kas printa kalo dong yang kastau Brita Baik, harus hidup dari orang-orang yang dengar Brita itu.

15Tapi sa tra perna pake satu dari sa pu hak itu. Juga sa bukan tulis smua ini supaya sa juga dapa bikin begitu. Lebi baik sa mati daripada bikin sperti begitu, karna trada satu orang juga yang bisa rampas itu smua yang bikin sa bangga. 16Karna kalo sa kastau Brita Baik, itu bukan alasan untuk sa mo sombong, karna memang itu yang harus sa bikin. Sa claka skali kalo sa tra kastau Brita Baik. 17Kalo sa kerja karna sa pu mau sendiri, memang sa pu hak untuk dapat bagian. Tapi sa bikin itu bukan karna sa pu mau sendiri, itu tu Allah yang kasi sa tanggung jawab untuk bikin itu. 18Kalo begitu, sa pu bagian apa? Sa pu bagian tu ini: Sa bisa kastau Brita Baik deng cuma-cuma, karna sa tra pake sa pu hak.

19Biar sa bebas dari smua orang, tapi sa bikin sa pu diri macam budak untuk smua orang, supaya bisa tolong orang lebi banyak lagi untuk percaya Kristus. 20Untuk orang Yahudi, sa bikin diri macam orang Yahudi, supaya sa bisa tolong orang Yahudi untuk percaya Kristus. Untuk orang-orang yang taikat deng hukum Musa, sa bikin diri macam orang yang taikat deng hukum Musa, biar lagi sa sendiri tra taikat deng hukum Musa. Sa bikin begitu supaya sa bisa tolong dong yang taikat deng hukum Musa untuk percaya Kristus. 21Untuk orang-orang yang tra taikat deng hukum Musa, sa bikin diri macam orang yang tra taikat deng hukum Musa. Sa bikin begitu supaya sa bisa tolong dong yang tra taikat deng hukum Musa. Tapi itu bukan brarti sa hidup di luar Allah pu printa, itu tu sa hidup ikut Kristus pu printa. 22Untuk orang-orang yang pu percaya tra kuat, sa bikin diri macam orang yang percaya tra kuat, supaya sa bisa tolong dong yang pu percaya tra kuat untuk percaya Kristus. Sa su bikin diri jadi apa saja untuk smua orang, supaya kalo bisa sa kas slamat brapa orang dari dong. 23Smua ini sa bikin karna Brita Baik, supaya sa juga dapat berkat dari Brita itu.

24Kam tra tau ka kalo dalam lomba smua orang yang lomba tu ikut lari, tapi hanya satu orang saja yang dapat hadia? Itu jadi, usaha lari sunggu-sunggu sampe kam trima kam pu hadia. 25Stiap orang yang mau ikut lomba tu, dong tahan diri dari smua-smua. Dong bikin begitu karna dong mau dapat makota yang bisa rusak, tapi tong untuk dapat makota yang tra bisa rusak. 26Itu jadi, sa bukan lari sembarang trada tujuan, trus sa bukan tukang tinju yang tinju angin saja. 27Tapi sa lati sa pu badan sampe sa bisa kuasai sa pu badan, supaya jang sampe habis sa kastau Brita Baik ke orang lain, sa sendiri dapa tolak dari Allah.

Currently Selected:

1 Korintus 9: MPapua

Highlight

Copy

Compare