1 Korintus 8

Tentang persembahan untuk patung-patung

8:1-13

1Skarang tentang daging yang su kasi untuk jadi persembahan ke patung-patung. Tong tau kalo “tong smua su tau smua-smua.” Tapi yang begitu tu bikin orang jadi sombong, tapi kalo sayang orang lain, itu bikin kuat orang pu hati. 2Kalo ada orang yang kira de mngerti smua-smua, itu brarti de masi blum mngerti baik-baik. 3Tapi orang yang sayang Allah, Allah pasti knal orang itu.

4Tentang makan daging yang su kasi untuk jadi persembahan ke patung-patung, tong tau kalo: Di dunia ini trada patung yang hidup betul-betul, juga Allah hanya satu, trada yang lain. 5Memang benar ada yang orang bilang “allah,” mo yang di langit ka, ato yang di bumi. Juga memang benar ada “allah” banyak deng “tuhan” banyak yang orang semba. 6Tapi untuk tong, Allah tu hanya satu saja. De tu Bapa yang bikin smua-smua di dunia ini. Tong hidup untuk De saja. Trus Tuhan hanya satu saja, itu tu Yesus Kristus. Pertama Allah bikin smua-smua di dunia ini lewat De, trus tong hidup lewat De.

7Biar begitu tapi tra smua orang tau tentang itu. Ada orang yang dulu semba patung-patung. Itu jadi sampe skarang waktu dong makan daging sperti itu dong rasa macam dong semba patung lagi karna daging yang su kasi untuk jadi persembahan ke patung-patung itu. Dong rasa sala waktu makan karna dong pu percaya blum kuat. 8Makanan tra bikin tong pu hubungan deng Allah jadi lebi dekat. Tong tra rugi apapa kalo tong tra makan, trus tong tra dapat untung apapa kalo tong makan.

9Tapi hati-hati, jang sampe orang yang de pu percaya blum kuat jatu dalam dosa karna kam bebas bikin apa saja. 10Karna kalo orang liat kam yang tau smua-smua, ada duduk makan di tempat semba patung-patung, orang yang percaya blum kuat tu jadi brani untuk makan daging yang su kasi untuk jadi persembahan ke patung-patung to? 11Deng begitu, kam su bikin kam pu sodara yang de pu percaya tra kuat tu jadi hancur karna kam pu tau smua-smua tu. Padahal Kristus su mati untuk orang itu. 12Trus kalo kam bikin sala sperti begitu ke sodara-sodara yang sama-sama percaya, brarti kam su bikin rusak dong pu percaya yang tra kuat, jadi kam su bikin dosa sama Kristus. 13Itu jadi, kalo makanan bikin sampe sa pu sodara jatu dalam dosa, brarti sa trakan makan daging lagi sama skali. Supaya jang karna sa, sa pu sodara jatu dalam dosa.

Currently Selected:

1 Korintus 8: MPapua

Highlight

Copy

Compare