1 Korintus 10

Israel jadi satu conto

10:1—11:1

1Sodara-sodara, sa mau supaya kam ingat kalo tong pu nene moyang smua dapa jaga dari awan, trus dong smua su menyebrang laut. 2Itu sama sperti dong smua su dapa baptis dalam awan deng dalam laut untuk jadi Musa pu pengikut. 3Dong smua makan makanan yang sama yang Tuhan kasi. 4Trus dong smua minum minuman yang sama yang Tuhan kasi, karna dong minum dari gunung batu rohani yang ikut dong, trus gunung batu itu tu Kristus. 5Biar begitu, Allah tra snang sama sbagian besar dari dong, itu yang dong dapa bunu di tempat sepi yang kring.

6Smua itu jadi conto untuk tong, untuk kas ingat tong supaya tong jang mau lagi bikin yang jahat sperti dong. 7Trus supaya tong jang jadi orang-orang yang semba patung-patung, sama sperti brapa orang dari dong, sperti ada tatulis: “Bangsa itu mulai makan deng minum; trus dong mnari deng snang-snang sampe lewat batas.”#Keluaran 32:6 8Tong jang bikin barang kurang ajar sperti brapa orang dari dong, sampe 23.000 orang dari dong mati dalam satu hari.#10:8 bikin barang kurang ajar... sampe 23.000 orang dari dong mati dalam satu hari ‒ Crita ini ada di Bilangan 25:1-18. 9Tong tra bole coba-coba Kristus sperti brapa orang dari dong, sampe dong mati dapa patok dari ular bisa. 10Trus tra bole sungut-sungut sperti brapa orang dari dong, sampe dong dapa bunu dari malaikat yang bikin hancur.

11Smua yang su jadi sama dong tu jadi conto, trus ini tatulis untuk kas ingat tong yang hidup su dekat akir jaman. 12Itu jadi, sapa yang kira kalo de bisa bediri kuat, hati-hati supaya de jang jatu! 13Stiap kali kam dapa coba untuk bikin dosa, kam harus ingat kalo smua manusia juga perna dapa coba macam begitu. Karna Allah setia, jadi De trakan kas biar kam dapa coba lebi dari yang kam bisa tanggung. Waktu kam dapa coba, De yang nanti kasi kam jalan kluar, sampe kam bisa tahan.

14Itu jadi, sa pu sodara-sodara yang sa sayang, kam tra bole sama skali semba patung! 15Karna kam pu pintar jadi sa mo bicara ini ke kam. Kam harus putuskan sendiri apa yang sa bilang ini! 16Waktu tong minum glas anggur deng bilang trima kasi ke Allah, itu kas tunjuk kalo tong jadi satu deng Kristus pu dara to? Trus waktu tong pata-pata roti untuk makan sama-sama, itu kas tunjuk kalo tong jadi satu deng Kristus pu badan to? 17Karna roti tu satu, jadi biar tong banyak, tong tu satu badan karna tong smua dapat bagian dalam roti yang satu itu.

18Coba liat bangsa Israel, dong yang makan makanan yang jadi persembahan di tempat bakar korban, dong ikut ambil bagian dari tempat bakar itu to? 19Sa pu maksud apa deng bicara begitu? Daging yang su kasi untuk jadi persembahan ke patung-patung tu penting ka? Ato patung tu penting ka? 20Bukan! Sa pu maksud tu dong pu persembahan yang dong kasi tu ke setan, bukan ke Allah. Tapi sa tra mau kalo kam jadi bagian dari setan-setan.

21Kam tra bisa minum dari Tuhan pu glas trus minum juga dari setan pu glas. Kam tra bisa ambil bagian dalam Tuhan pu makan minum trus makan minum juga dalam setan-setan pu makan minum. 22Ato tong mo bikin Tuhan cemburu ka? Tong lebi kuat dari Tuhan ka?

23Ada yang bilang, “Tong bisa bikin apa saja yang tong mau.” Memang benar, tapi tra smua yang tong mau tu ada guna. “Tong bisa bikin apa saja yang tong mau.” Memang benar, tapi tra smua yang tong mau tu bisa bantu tong untuk lebi percaya. 24Tra bole ada orang yang cari untung untuk de pu diri sendiri. Tapi tiap-tiap orang harus cari untung untuk orang lain.

25Kam bisa makan apa saja yang dong jual di pasar daging, tra usa priksa-priksa karna kam pu suara hati. 26Karna, “Bumi ni deng smua yang di dalam TUHAN yang punya.”#Mazmur 24:1

27Kalo kam dapa undang dari orang yang tra percaya untuk makan, trus kam trima undangan itu, makan saja apa yang dong kas siap untuk ko, tra usa priksa-priksa karna kam pu suara hati. 28Tapi kalo ada orang yang bilang ke kam, “Itu makanan yang dong su kasi ke patung!” kam tra usa makan, karna kam harus pratikan orang itu pu suara hati. 29Suara hati yang sa maksud tu bukan kam pu suara hati, tapi orang lain itu pu suara hati. Mungkin ada orang yang bilang, “Knapa orang lain pu suara hati harus kas batas sa untuk bikin apapa? 30Kalo sa makan deng bilang trima kasi ke Allah, knapa orang harus bicara sa yang tra baik karna makanan itu, padahal sa su bilang trima kasi ke Allah?”

31Jadi, kalo ko makan ato minum ka, ato mo bikin apa saja, bikin smua itu supaya Allah dapa puji kas tinggi. 32Kam jang bikin sampe orang lain jatu dalam dosa, mo dong orang Yahudi ato orang bukan Yahudi ka, ato Allah pu jemaat juga. 33Sama sperti sa slalu brusaha kas snang smua orang pu hati waktu sa bikin apa saja, bukan untuk sa pu untung, tapi untuk orang banyak pu untung, supaya dong dapa kas slamat.

Currently Selected:

1 Korintus 10: MPapua

Highlight

Copy

Compare