Números 35
35
Lu'umo'ob u ti'alo'ob le j levitaob
1Yuumtzile' tu t'anaj Moisés tu táax lu'umil Moab, tu jáal u yáalcab ja'il Jordán, actáan ti' Jericó, ca tu ya'alaj ti': 2A'al ti' le j israelitaobo', ti' le lu'um cu bin j t'oxbil ti'obo', yaan u dzáico'ob ti' le j levitaobo', caajo'ob u ti'al u cajtalo'ob, dza'abac xan le káaxo'ob yaan tu bakpacho'ob le caajo' u ti'al u tzéentico'ob j tamano'ob. 3Le j levitaobo' bíin cajlaco'ob te j caajo'obo', yéetel te j lu'umo' bíin u dza'ob u wacaxo'ob yéetel u láak ba'alche'ob. 4Le u káxilo'ob u tzéenta'al j tamano'obo' unaj a dzáiqu'ex ti'obo' tuláacal le cu bakpachtic le caajo', cuatrocientos cincuenta metros tu paach u tuulumilo'ob le caajo'. 5Ti' tuláacal le lu'umo' bíin yanac can ti'itz ti' yéetel novecientos metros ti' jujun tzéelil, tumen bíin p'i'isic láajqueet u p'iisil j lakin yéetel j chikin, j xaman yéetel j noojol. Le caajo' bíin p'áatac chúumuc, ti' u káaxilo'ob u tzéenta'al j taman, tu bakpach.
6Le caajo'ob bíin dza'abac ti' le j levitaobo', seise' u ti'al ta'acbesajil, tu'ux bíin u ta'acbesubáa máax dzo'oc u quíimsic wa máaxe'. Pa'ate' yéetel le seis caajo'obo' yaan xan u dza'abal ti'ob u láak cuarenta yéetel ca'a p'éel caajo'ob; 7tuláacale', unaj u dza'abal ti' j levitaob cuarenta yéetel ocho caajo'ob yéetel u káaxilo'ob u tzéenta'al j taman. 8Ti' u lu'um le j israelitaob le quéen dza'abac le caajo'ob ti' le j levitaobo', bíin u dza'ob jun xóot' u lu'umo'ob, le jujun múuch' cajtalil otochnáalo'obo', je'el buca'aj lu'um yaan ti'e', ti' le yaan ya'ab lu'ume' bíin u dzáa ya'ab caajo'ob wa jun p'íite' bíin u dzaj jun p'íit caajo'ob.
U caajilo'ob ta'acbesajil
9Yuumtzile' tu t'anaj Moisés ca tu ya'alaj ti': 10A'al ti' le j israelitaob le ba'alo'oba': Le quéen a ch'acte'ex u yáalcab ja'il Jordán u ti'al a wocole'ex Canane', 11unaj a yéeyique'ex dze'edzec caajo'ob u ti'al ta'acbesajil, tu'ux bíin u ta'acbesubáa máax ma' j taali' ti' u quíimsic u yéet wíiniquile'. 12Te'elo' bíin u ta'acbesubáa ti' u láaktzil caxtic u ti'al u sutic u jeel le quíimsajo', ma' xan tu páajtal u quíimsa'al wa ma' bisa'ac u ti'al u xot kinta'al. 13Ti' le caajo'ob cu bin j dzaabilo', seise' u ti'al ta'acbesajil: 14óox p'éel tu lakin Jordán yéetel óox p'éel Canaani'. 15Le seis caajo'oba', u ti'al u ta'acbescubáa le israelitaobo' bey xan le táanxel lu'umil caja'ano'obo', wa quex chéen le u'ula'ob yaan ichile'exo'. Te'elo' je'el u páajtal u ta'acbescubáa le máax ma' j taali' ti' u quíimsic u yéet wíiniquili'.
16Wa máax cu loobiltic u láak yéetel jun p'éel ba'al beeta'an yéetel fierro, wa cu quíimil le loobilta'abo', le j quíimsaj wíinico' yaan u xot kinta'al j quíimil.
17Wa máax cu kolic u láak máac yéetel tuunich, cu p'áatal j quíimsaj wíinic wa le máax tu kolajo' cu quíimil, le j quíimsaj wíinico' yaan u xot kinta'al u ti'al quíimil.
18Wa máax cu kolic u láak yéetel che' tu yo'olal lelo' cu quíimile', yaan u ya'alale' jun túul j quíimsaj wíinic, le quíimsajnajo' yaan u xot kinta'al u ti'al j quíimil. 19U láaktzil le máax quíimsa'abo', leti' bíin u quíims le j quíimsaj wíinic le quéen u nactáante'.
20Wa máax cu léench'intic u láak máac tumen u p'ectmaje' wa quex cu pulic wa ba'ax tu yóokol yéetel kaakas tuucule', 21wa xan tu yo'olal kuuxil cu loxique', wa cu quíimil le máac tu loxaj tu yo'olal le loob tu beetajo', yaan u xot kinta'al u ti'al quíimil tumen j quíimsaj wíinic. U láaktzil naadz ti' le máax j quíimo' leti' bíin u quíims le j quíimsaj wíinic, le quéen u nactáante'.
22Wa máax cu léench'intic u láak máac ma' j taali' ti'e', mix tu yo'olal kuuxile', wa quex ma' tu yo'olal u loobil cu pulic wa ba'ax tu yóokole', 23wa le tu pulaj jun p'éel tuunich tu yóokol wa máax cu quíimil ti'olale', ba'ale' mina'an kuuxil ichilo'ob mix taali' ti' u beetic kaas ti'e', 24le caaj túuno' bíin u beeticubáa aj p'is óol ichil le j quíimsaj wíinico', yéetel le láaktzil u káat u sut u jeelo', je'el bix le a'almaj t'aan beeta'ano' cu sa'atsic le j quíimsaj wíinico' tu kab u láaktzil le quimeno'. 25Le caajo' unaj u canantic u ti'al ma' u quíimsa'al tumen u láaktzil le quimeno', unaj u beetic u bin tu caajil ta'acbesajbáil. Le j quíimsaj wíinico' bíin p'áatac te'elo', yaan u pa'atic u quíimil le nojoch aj kiin jach jun páaycunta'ano'. 26Ba'ale' wa cu jóokol tu lu'umil u caajil ta'acbesajil, 27u láaktzil le dzo'oc u quíimilo' ma' tu si'ipiltal wa cu quíimsic le quéen u nactáant táanxel lu'umile'. 28Le j quíimsaj wíinico' unaj u p'áatal tu caajil ta'acbesaj tac quéen quíimic le nojoch aj kiino'. Cu dzo'ocole' cu páajtal u suut tu lu'umil.
29Lela' yaan a ti'alintique'ex bey jun p'éel a'almaj t'aan bíin máanac ti' taata tac ti' u paalal, je'el tu'ux bíin cajlaque'exe'.
U tzol t'aanil tacpoolo'ob yéetel u bo'olilo'ob
30Chéen tu yo'olal u tac pool dze'edzec máaxo'ob il tu jaajile' je'el u páajtal u jajcunta'al u xot kinta'al j quíimil jun túul j quíimsaj wíinique'. Wa chéen jun túul j ile' ma' tu páajtal u xot kinta'al j quíimil mix máac.
31Ma' tu páajtal u ka'amal taakin bey u bo'olil u cuxtal jun túul j quíimsaj wíinic, xot kinta'an j quíimil; le máaco' unaj u quíimil.
32Ma' tu páajtal u ka'amal taakin u ti'al u jóokol jun túul j quíimsaj wíinic, u kalmubáa ca'ach tu caajil ta'acbesajil u ti'al suut tu caajal wa ma' quíimic le nojoch aj kiino'.
33Ma' a manba'alcuntique'ex yéetel u quíimsa'al wíinico'ob le lu'um tu'ux bíin cajlaque'exo', tumen le j quíimsaj wíiniquilo' cu manba'alcuntic jun p'éel caaj, yéetel mina'an u láak bo'ol je'el u páajtal u beeta'al tu yo'olal u quíimsa'al wíinique', chéen u xot kinta'al j quíimil le máax j beeto'.
34Ma' a malba'alcuntique'ex le lu'um tu'ux bíin cajlaque'ex yéetel tu'ux bíin cajlaquen, tumen teen Yuumtzil, cajacbalen ichil le j israelitaobo'.
Currently Selected:
Números 35: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
