Números 36
36
U kam ba'albáil co'olelo'ob
1U nojchil u láaktzilo'ob u yotochnáalo'ob Galaad, jach u ch'i'ibal Maquire', Manasés yéetel Josee', j bino'ob u yilo'ob Moisés yéetel u nojchilo'ob u láaktzilo'ob le j israelitaobo' ca tu ya'alajo'ob ti leti'ob: 2Yuumtzile' tu ya'alaj teech bin, j Moisés, bíin a t'o'ox yéetel buulil ichil le j israelitaob le lu'um bíin dza'abac ti' jujun túulil, bey xan tu ya'alaj teech xan le jaatz u ti'al Zelofehad, c láaktzil ca'ache', ca a dzáa ti' u x ch'úupalo'ob. 3Ba'ale' wa leti'ob cu dzo'ocol u beelo'ob yéetel u j xiibilo'ob u láak u ch'i'ibalo'ob Israele', le lu'um dzaab ti'obo', cu jáawal u ti'alintico'ob tumen cu máan ti' u múuch' cajtalil oototochnáalo'ob ti' le máax bíin dzo'ococ u beelo'obo'. Beyo' bíin lukesa'ac to'on jun jaatz le ba'ax dzaab yéetel buulo'. 4Cu dzo'ocole' le quéen kuchuc u ja'abil jáalkabil ti' Israele', u lu'um le leti'obe' cu máan junpuli' ti' u láak múuch' cajtalil otochnáale' cu jáawal c ti'alintic.
5Moisés túune', je'el bix a'ala'abic tumen Yuumtzile', tu ya'alaj ti' le israelitaob lela': U j xiibilo'ob u ch'i'ibal Josee' jaaj ba'ax cu ya'alico'ob. 6Yuumtzil bíin u beet u dzo'ocol u beel yéetel je'el máax u káato'ob u x ch'upul paalal Zelofehad, ba'ale' ca taalaco'ob ti' u yotochnáalo'ob u múuch' cajtalil tu'ux u taal u taataob. 7Le lu'um dzo'oc u dza'abal ti' jujun túul le Israelitaobo' ma' unaj u máan ti' u láak ch'i'ibali'; tuláacal israele' unaj u p'áatal ichil u ch'i'ibal ba'ax dzaab ti'. 8Wa jun túul co'olel ti' je'el máacalmac ch'i'ibalil cu kamic lu'ume', unaj u dzo'ocol u beel yéetel jun túul j xiib u yéet ki'ikel. Beyo' tuláacal Israelitae' cu canantic u siibal tu kamaj ti' u taata. 9Mix máac unaj u dzáic le ba'ax dzaab ti'ob ti' u láak u múuch' cajtalil otochnáalo'ob, jujun p'éel u ch'i'ibalo'ob Israele' unaj u canantic le lu'um dzaab ti'ob.
10-11Bey túuno' Maala, Tirsa, Hogla, Milca yéetel Noa, u x ch'upul paalal Zelofehad, tu beetajo'ob le ba'ax tu ya'alaj Yuumtzil ti' Moisés, ca'aj dzo'oc u beelo'ob yéetel u j xibil paalal u sucu'un u taata, 12cu taalo'ob ti' u ch'i'ibalo'ob Manasés, u paal José. Beyo' le lu'um j dzaab ti'ob j p'áat ichil u ch'i'ibalo'ob u taata.
13Lela' leti' le tzolbe'en t'aan tu ya'alaj Yuumtzil ti' Moisés u ti'al le israelitaobo' tu táax lu'umil Moab, tu jáal u ja'il Jordán actáan ti' Jerico'.
Currently Selected:
Números 36: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
