Números 30
30
U tzol t'aanilo'ob séeb chi'
1Moisese' tu ya'alaj ti' u nojchilo'ob u ch'i'ibalo'ob le j israelitaobo': Yuumtzile' dzo'oc u ya'alic 2le quéen u beet wa máax jun p'éel séeb chi'e' wa cu kax t'antic je'el bix u najmal jun p'éel jalach t'aane', unaj u dzo'ocbesic le t'aano' yéetel u beetic le ba'ax tu séeb chi'itajo'.
3Le quéen yanac jun túul x lo'obayan co'olel, u t'aan u taata cu dzo'ocbesique', cu beetic jun p'éel séeb chi' ti' Yuumtzil wa cu kax t'anticubáa tu yo'olal wa ba'axe', 4wa tu yojéeltaj u taata, dzo'oc u beetic jun p'éel séeb chi', wa kax t'aan, ma' j a'ala'ab mix ba'al ti' tu yo'olale', leti'e' u najmal u dzo'ocbesic le séeb chi'o' wa le kax t'aano'. 5Ba'ale' wa le quéen u yojéelt u taata ma' tu que'etel ti' ba'ax cu beetique', leti' túune' ma' kabéet u dzo'ocbesic le ba'ax tu séeb chi'itajo' wa le ba'ax tu kax t'antajo'. Tumen ma' j que'et ti' tumen u taatai', Yuumtzile' ma' bíin u tzáa ti' ca u dzo'ocbesi'.
6Wa jun túul co'olel tu téec beetaj jun p'éel séeb chi' ti' Yuumtzil wa cu dzo'ocol u téec beetic jun p'éel kax t'aan, wa cu dzo'ocol u beele' 7le quéen ojéelta'ac tumen yíichame', wa ma' tu ya'alic mix ba'ale', x leti'e' kabéet u dzo'ocbesic le séeb chi'o' wa le u kax t'aano'. 8Ba'ale' wa le quéen ojéelta'ac tumen u yíichame' cu ya'alic ma' tu quetic ti'e', leti' túune' ma' kabéet u dzo'ocbesic le séeb chi'o' wa le ba'ax tu téec kax t'antajo'. Yuumtzile' ma' bíin u káat ca u dzo'ocbesi'.
9Wa le máax cu beeetic jun p'éel séeb chi' x quimen íicham wa x p'atbil atane', leti'e' yaan u dzo'ocbesic tuláacal le kax t'aano'ob tu ya'alajo'.
10Wa jun túul co'olel dzoca'an u beel cu beetic jun p'éel séeb chi' wa kax t'aan yéetel jalach t'aan, ti' yaan tu yotoch u yíichame', 11u yíicham le quéen u yojéelt wa ma' tu ya'alic mix ba'ale' utz wa kaase', leti'e' kabéet u dzo'ocbesic le ba'ax tu ya'alaj u beetico'. 12Ba'ale' wa u yíicham tu mix ba'alcuntaj le ca tu yojéeltaje', ma' kabéet u dzo'ocbesiqui', tumen u yíichame' tu mix ba'alcuntaj. Yuumtzile' ma' tu tzáic ca dzo'ocbesa'ac.
13Le íichamtzilo' je'el u páajtal u éejemtic wa u ya'alic ma'il je'el ba'axac séeb chi' wa jalach t'aan ca u beet u yatan cu najmatic u su'ukine'. 14Wa le ti' ma' tu ya'alic mix ba'ale', cu máan jun p'éel kiin, u láak kiin leti'e' cu éejemtic yéetel u x ma' t'aan tuláacal le séeb chi'ob yéetel le kax t'aan tu beetaj le co'olelo'. 15Wa cu mix ba'alcuntic dzo'oc u máan dze'edzec kiino'ob u yojéelte', leti' túune' cu cuchic u si'ipil le ba'ax ma' tu dzo'ocbesaj u yatane'.
16Lela' leti' u ya'almaj t'aan Yuumtzil tu dzaj ti' Moisés bix unaj u bisicubáa le j xiib yéetel u yatan, le taata yéetel u x ch'upul paal, le x lo'obayan wa láili' u t'aan u taata cu dzo'ocbesique'.
Currently Selected:
Números 30: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
