Números 29
29
U kimbesajil jóopsaj paax
(Lv 23.23-25)
1Ti' u yáax kiinil le siete winalo' bíin yanac te'ex jun p'éel quili'ich much'tal. Ti' le kiino' ma' bíin a beete'ex mix jun p'éel meyaji', yaan u ka'ayta'al le kiino' yéetel u jóopsa'al paax. 2U ti'al Yuumtzile' bey utz qui'iboc láaj tóocbil ba'alche', bíin a kube'ex jun túul chan wacax, jun túul j taman yéetel siete mejen ja'abente' j tamano'ob, láaj utz u wíinclilo'ob. 3Yéetele' bíin dza'abac u ti'ibil óolalil sacan ya'ach'ta'an yéetel aceite unaj seis wuudz ti' le chan wacaxo', can wuudz tu yo'olal le j taman 4ca'a wuudz tu yo'olal jujun túul chan j taman. 5Yaan u ku'ubul xan jun túul j yuuc quíimsbil u ti'al u ka'amal sa'atsaj si'ipil tu yo'olal keban. 6Tu yóokol lelo' u tóocbil ba'alche'il le jujun winale', u tóocbil ba'alche'il sáamsamal, u ti'ibil óolalil janalbe'en neeko'ob yéetel xan u kaab uva, je'el bix tu ya'alaj Kue'. Lela' jun p'éel tóocbil ti'ibil óolal qui'iboc ti' u tzicbe'enil Yuumtzil.
U ti'ibil óolalilo'ob u kiinil sa'atjsaj si'ipil
(Lv 23.26-32)
7U kiinil diez láili' ti' le winal sieteo', bíin yanac te'ex jun p'éel quili'ich much'tal. Ti' le kiino' yaan a su'ukine'ex ma' bíin a beete'ex xan mix jun p'éel meyaji'. 8Bey utz qui'iboc láaj tóocbil ba'alche' u ti'al Yuumtzil, bíin ku'ubuc jun túul chan wacax, jun túul j taman yéetel siete ja'abente'ob mejen j tamano'ob láaj utz u wíinclilo'ob, 9bíin dza'abac xan u ti'ibil óolalil sacan ya'ach'ta'an yéetel aceite unaj seis wuudzo'ob tu yo'olal jun túul chan wacax, can wuudz tu yo'olal jun túul j taman, 10ca'a wuudz tu yo'olal jun túul chan j taman. 11Bíin ku'ubuc xan jun túul j yuuc quíimsbil tu yo'olal keban, pa'ate' yéetel quíimsbil ba'alche' tu yo'olal keban cu ku'ubul tu kiinil sa'atsaj si'ipil, pa'ate' yéetel le sáamsamal láaj tóocbil ba'alche' yéetel u ti'ibil óolal janalbe'en neeko'ob yéetel xan u kaab uva.
Ti'ibil óolalo'ob u ti'al u kiinilo'ob u kiinbesajil máacano'ob
(Lv 23.33-44)
12Tu quince kiinil láili' ti' le winal sieteo' bíin yanac te'ex quili'ich much'tal. Ti' le kiino' ma' unaj a beetique'ex mix jun p'éel meyaji'. Buul siete kiino'ob bíin a kiinbese'ex chéen ti' u tzicbe'enil Yuumtzil. 13Tu yáax kiine' bíin ku'ubuc ti' Yuumtzil bey utz qui'iboc láaj tóocbil ba'alche', trece mejen wacax, ca'a túul j taman yéetel catorce ja'abente' mejen j tamano'ob láaj utz u wíinclilo'ob. 14Bíin dza'abac xan u ti'ibil óolalil sacan ya'ach'ta'an yéetel aceite unaj seis wuudz tu yo'olal jujun túul mejen wacax, can wuudz tu yo'olal jujun túul j tamano'ob, 15ca'a wuudz tu yo'olal jujun túul chan j taman. 16Bíin ku'ubuc xan jun túul j yuuc quíimsbil tu yo'olal keban, pa'ate' yéetel le sáamsamal láaj tóocbil ba'alche'o' pa'ate' yéetel u ti'ibil óolalil janalbe'en neeko'ob yéetel xan u kaab uva.
17Tu ca'a p'éel kiine' bíin ku'ubuc doce mejen wacax, ca'a túul j taman yéetel catorce mejen tamano'ob ja'abente'ob láaj utz u wíinclilo'ob. 18Bíin beeta'ac u ti'ibil óolalil janalbe'en neeko'ob, yéetel xan u kaab uva, je'el buca'aj u ya'abil mejen wacax, j tamano'ob yéetel mejen j tamano'ob, je'el bix a'ala'abic tumen Kue'. 19Bíin ku'ubuc xan jun túul j yuuc bey quíimsbil ba'alche' tu yo'olal keban, pa'ate' yéetel le sáamsamal láaj tóocbil ba'alche', yéetel u ti'ibil óolalil janalbe'en neeko'ob yéetel xan u kaab uva.
20Tu yóox p'éel kiine' bíin ku'ubuc once mejen wacax, ca'a túul j taman yéetel catorce mejen j tamano'ob ja'abente'ob láaj utz u wíinclilo'ob. 21Bíin beeta'ac u ti'ibil óolalil janalbe'en neeko'ob yéetel xan u kaab uva je'el jay túul le mejen wacax, le j taman yéetel mejen j tamano'ob je'el bix a'ala'abic tumen Kue'. 22Bíin ku'ubuc jun túul j yuuc u ti'al quíimsbil tu yo'olal keban, pa'ate' yéetel le sáamsamal láaj tóocbil ba'alche', pa'ate' u ti'ibil óolalil janalbe'en neeko'ob yéetel xan u kaab uva.
23Tu can p'éel kiine' bíin ku'ubuc diez mejen wacax, ca'a túul j taman yéetel catorce mejen j tamano'ob ja'abente'ob láaj utz u wíinclilo'ob. 24Bíin beeta'ac u ti'ibil óolalil janalbe'en neeko'ob yéetel xan u kaab uva je'el bix buca'aj u ya'abil le mejen wacaxo'obo', j taman yéetel chan j tamano', je'el bix a'ala'abic tumen Ku. 25Bíin ku'ubuc xan jun túul j yuuc quíimsbil tu yo'olal keban, pa'ate' yéetel le láaj tóocbil ba'alche' cu ku'ubul sáamsamal yéetel u ti'ibil óolalil janalbe'en neeko'ob yéetel xan u kaab uva.
26Tu jo' p'éel kiine' bíin ku'ubuc nueve mejen wacax, ca'a túul j taman yéetel catorce mejen j tamano'ob ja'abente'ob láaj utz u wíinclilo'ob. 27Bíin beeta'ac u ti'ibil óolalil janalbe'en neeko'ob yéetel xan u kaab uva je'el jay túul le mejen wacaxo'obo', j taman yéetel mejen j tamano'ob, je'el bix a'ala'abic tumen Kue'. 28Bíin ku'ubuc jun túul j yuuc quíimsbil tu yo'olal keban, pa'ate' yéetel láaj tóocbil ba'alche' sáamsamal yéetel u ti'ibil óolalil janalbe'en neeko'ob yéetel xan u kaab uva.
29U seis kiine' bíin ku'ubuc ocho mejen wacax, ca'a túul j tamano'ob yéetel catorce ja'aben j tamano'ob láaj utz wíinclilo'ob 30Bíin beeta'ac u ti'ibil óolalil janalbe'en neeko'ob yéetel xan u kaab uva je'el jay túul le mejen wacaxo'obo', j taman yéetel mejen j tamano'ob, je'el bix a'ala'abic tumen Kue'. 31Bíin ku'ubuc xan jun túul j yuuc quíimsbil tu yo'olal keban, pa'ate' yéetel le láaj tóocbil ba'alche' cu ku'ubul sáamsamal yéetel u ti'ibil óolalil janalbe'en neeko'ob yéetel xan u kaab uva.
32Tu siete kiin yaan u ku'ubul siete mejen wacaxo'ob, ca'a túul j taman yéetel catorce mejen ja'abente' j tamano'ob, láaj utz u wíinclilo'ob. 33Bíin beeta'ac u ti'ibil óolalil janalbe'en neeko'ob yéetel xan u kaab uva, je'el buca'aj u ya'abil wacaxo'ob, j tamano'ob yéetel mejen j tamano'ob je'el bix a'ala'abic tumen Kue'. 34Yaan xan u ku'ubul jun túul j yuuc quíimsbil ba'alche' tu yo'olal keban pa'ate' yéetel láaj tóocbil ba'alche' sáamsamal pa'ate' yéetel u ti'ibil óolalil janalbe'en neeko'ob yéetel xan u kaab uva.
35Tu ocho kiine' bíin kiinbesa'ac jun p'éel quili'ich múuch'cabil, ma' bíin beeta'ac mix jun p'éel meyaji'. 36Bíin ku'ubuc bey láaj tóocbil utz qui'iboc ti' Yuumtzil jun túul chan wacax, jun túul j taman yéetel siete ja'abente' mejen j tamano'ob láaj utz u wíinclilo'ob. 37Yéetel yaan u beeta'al u ti'ibil óolalil janalbe'en neeko'ob, yéetel xan u kaab uva tu yo'olal le wacaxo', le j tamano' yéetel le mejen j tamano'ob je'el bix a'ala'abic tumen Kue'. 38Yaan xan u ku'ubul jun túul j yuuc u ti'al quíimsbil ba'alche' tu yo'olal keban, pa'ate' yéetel le láaj tóocbil ba'alche' sáamsamal yéetel u ti'ibil óolalil janalbe'en neeko'ob, yéetel xan u kaab uva.
39Lela' leti' le quíimsbil ba'alche' bíin ku'ubuc ti' Yuumtzil ti' le kiino'ob jóokesa'ano'ob u ti'alo'obo', yaan xan a kubique'ex u ti'ibil óolal u dzo'ocbesa'al a séeb chi'ex wa quex bey chéen tu juunal óolal, wa quex bey láaj tóocbil ba'alche' wa u ti'ibil óolalil janalbe'en neeko'ob, wa bey quíimsbil ba'alche' u ti'al ca'a bisajbáil.
40Moisese' tu ya'alaj ti' lej israelitaobo' je'el bix a'ala'abic tumen Yuumtzile'.
Currently Selected:
Números 29: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
