Números 31
31
Cu xu'ulsa'al Madián
1Yuumtzile' tu t'anaj Moisés ca tu ya'alaj ti': 2Sut u jeel jaadz ti' le madianil tu kaaba' le israelitaobo', cu dzo'ocole' ca quíimil.
3Moisés túune' tu ya'alaj ti' le caajo': dze'edzec ti' te'exe' u ch'a'a' u nu'ucul ba'atel u ti'al a ba'ateltique'ex le j Madianilo', u ti'al a sutique'ex ti'ob u jeel jaadz, tu kaaba' Yuumtzil. 4Ti' jujun p'éel a múuch' cajtalil a wotochnáale'exe' yaan a túuxtique'ex mil máaco'ob ma'alobo'ob u ti'al ba'atel.
5Bey túuno', ti' u múuch' cajtalil otochnáalo'ob jujun múuch' aj ba'atelo'oba' yéeya'ab mil j xiibo'ob, u ti'al u chuquic tu pa'ate'ile' doce mil máaco'ob ma'alobo'ob u ti'al j ba'atel. 6Moisese' tu túuchi'itajo'ob ba'atel yéetel Finees, u paal aj kiin Eleazar, leti' máax táan u bisic quili'ich ba'alo'ob yéetel le jóopsbil paaxo'ob u ti'al j pa'axal quéen chúunuc le ba'atelo'. 7Beyo' tu ba'ateltajo'ob le j madianilo' ca tu láaj quíimso'ob je'el bix tu ya'alaj Yuumtzil ti' Moiseso'. 8Quíimsa'ab Evi, Requem, Zur, Hur yéetel Reba, u káat ya'ale' cinco u ajaw le j madianilo'ob, yéetel Balaam, u paal Beor. 9Le j israelitaobo' tu bisajo'ob kala'anil u co'olelilo'ob madián, u mejen paalal, ca'a tu lukesajo'ob tuláacal u yalak ba'alche'ob u wacaxo'ob yéetel le ba'alo'ob co'oj u tojolo'. 10U láak ba'ale', tu tóocajo'ob tuláacal u noj caajo'ob yéetel u x péet caajo'ob. 11Tuláacal le ba'ax lukesa'ab ti'obo', le u cajnáalilo'ob yéetel u ba'alche'obo', 12tu bisajo'ob ti' Moisés yéetel ti' aj kiin Eleazar, yéetel ti' u caajil Israel, jelecbal tu táax lu'umil Moab tu jáal Jordán, actáan ti' Jericó. 13Moisés, yéetel aj kiin Eleazar yéetel tuláacal u nuuquilo'ob le caajo', jóoko'ob tu paach caaj u ti'al u kamico'ob. 14Ba'ale' Moisese' kuuxchaj yéetel le u nuuquilo'ob le aj ba'atelo'ob máaxo'ob méektáantic mili', yéetel ti' cien cu taalo'ob ti' le ba'atelo', 15ca'a tu ya'alaj ti'ob: ¿ba'axten ta p'ate'ex cuxa'an le co'olelo'obo'? 16Le ca'aj t'a'an Balaam ca loobilt u caajal Kue', leti' le co'olelo'ob j bis le j israelitaob u j ma' u'uyaj t'anto'ob Yuumtzil, yéetel ca u kulto'ob Baal peor, let o'olale' Yuumtzile' tu jadzaj u caajal yéetel báan quíimil. 17Séeba'an, quíimse'ex tuláacal le mejen j xibil paalalo'ob yéetel tuláacal le co'olelo'ob ma' x sujuyo'obo'. 18Le x sujuy x ch'úupalo'obo' p'ate'ex u cuxtalo'ob u ti'al ca p'áatac te'ex. 19Tuláacal le dzo'oc u quíimsic wa máax, wa dzo'oc u machic jun túul quimene', p'áatac tu paach caaj siete kiino'ob. Te'ex, bey le kalbil máaco'obo', yaan u láaj p'áatal utz yanile'ex tu óox p'éel kiin tac tu siete kiin. 20Yaan xan u p'áatal utz yanil tuláacal u nooko'ob je'el bix tuláacal le kéewel ba'alo'obo', u tzo'otzel j yuuc wa le ba'ax beeta'an yéetel che'o'.
21Aj kiin Eleazare' tu ya'alaj ti' tuláacal le aj ba'atelo'ob dzo'oc ca'ach u ba'atelo'obo': lela' jun p'éel a'almaj t'aan tu dzaj Yuumtzil ti' Moisés: 22Le ba'alo'ob beeta'an yéetel oro, plata, bronce, fierro, estaño wa plomoe' 23u káat ya'ale', tuláacal ba'ax ma' elelbe'ene' unaj láaj utztal ich káak yéetel cu p'o'obol yéetel u ja'il utzil sayab. Le ba'alo'ob elelbe'eno'obe' unaj u p'o'obol chéen yéetel ja'. 24Tu siete kiine' yaan u p'o'ico'ob u nook, beyo' cu p'áatalo'ob utz yanilo'ob, cu dzo'ocole' je'el u páajtal u yocolo'ob te j caajo'.
U t'ooxil le ba'ax tu taasajo'obo'
25Yuumtzile' tu ya'alaj ti' Moisés: 26Yéetel u yáantaj aj kiin Eleazar yéetel le u nojchilo'ob u cajnáalilo'ob le caajo', xoc jay túul máaco'ob, jay túul ba'alche'ob j to'oc ti' le j madianilo'obo'. 27Láajquet jóokes ca'a jaatzil ti', ca a t'ox jun jaatz ti' le j bino'ob ba'atelo' u láak jaatze' u ti'al le caajo'. 28Jóokes in ti'ale' jun jaatz ti' le ta dzaj ti' le aj ba'atelo'obo', jun túul ich quinientos máaco'ob, jun túul ich quinientos wacaxo'ob, jun túul ich quinientos burro'ob yéetel jun túul ich quinientos j tamano'ob 29ca a dzáa ti' aj kiin Eleazar bey bo'olal in ti'ale'. 30Le u láak táancocho' leti' le ta dzaj ti' le israelitaobo', jóokes xan ichil cien máaco'obe' jun túul, ichil cien burro'obe' jun túul, ichil cien j tamano'obe' jun túul, bey ti' tuláacal le ba'alche'obo', yaan a ch'a'ic jujun túul ichil cincuenta u ti'al a dzáic ti' le j levitaob táan u meyajo'ob tin quili'ich naj.
31Moisés yéetel Eleazare' tu beetajo'ob je'el bix tu ya'alaj Yuumtzil ti' Moiseso'. 32Tuláacal le ba'ax to'oc ti' le aj p'eeco'obo', jun páay le tu molaj le aj ba'atelo'obo', lelo' tu dzaj seiscientos setenta yéetel cinco mil j tamano'ob, 33setenta yéetel dos mil wacaxo'ob, 34setenta yéetel jun mil burro' 35yéetel treinta yéetel dos mil x sujuy x ch'úupalo'ob. 36le t o'olale' le táancoch t'o'ox ti' le aj ba'atelo'obo' lela', trescientos treinta yéetel cinco mil quinientos j tamano'ob, 37ti' le buca'ajo' j dza'ab seiscientos setenta yéetel cinco bey bo'olal ti' Yuumtzile'; 38ti' le treinta yéetel seis mil wacaxo'ob dza'ab sesenta yéetel dos bey bo'olal ti' Yuumtzil; 39ti' le treinta mil quinientos burro'ob dzaab sesenta yéetel jun túul bey bo'olal ti' Yuumtzil; 40ti' le dieciséis mil x ch'úupalal dzaab treinta yéetel dos bey bo'olal ti' Yuumtzil. 41Moisese' tu kubaj u ti'al Yuumtzil le bo'olalo'obo' ti' aj kiin Eleazar, je'el bix tu ya'alaj Yuumtzile'.
42U láak táancoch, bíin t'o'oxoc ichil le israelitaobo', le jun páaycunta'ab tumen Moisés u ti'al aj ba'atelo'obo', 43jach láili' buca'ajo', u káat ya'ale' trescientos treinta yéetel siete mil quinientos j tamano'ob, 44treinta yéetel seis mil wacaxo'ob, 45treinta mil quinientos burro'ob 46yéetel dieciseís mil x ch'úupalal. 47Ti' le táancocho', Moisese' tu jóokesaj jun túul ti' cincuenta, máaco'ob bey xan ti' ba'alche'ob, ca tu dzaj ti' j levitaob cu meyajo'ob tu quili'ich naj Yuumtzil, jach je'el bix tu ya'alajilac Yuumtzile'.
48Le u nojchil aj ba'atelo'ob tu méektáanto'ob mil yéetel ti' cien aj ba'atelo'ob, j bino'ob u yilo'ob Moisés 49ca tu ya'alajo'ob ti': to'on a aj meyajo'one' dzo'oc xoquic le aj ba'atelo'ob j bino'ob t éetelo' ca t ilaj mix jun túul cu binetiqui'. 50Je'el c taasic le ba'alo'ob beeta'an yéetel oro tu caxtaj jujun túulilo': U x bakal muuk kabo'ob, u x bakal kabo'ob, u x dzipito'ob yéetel u láak jadzudz ba'alo'ob, u ti'al c kubic ti' Yuumtzil bey u tojol c cuxtale'.
51Moisés yéetel Eleazare' tu kamajo'ob ti' leti'ob tuláacal qui'ichquelem ba'alo'ob beeta'an yéetel oroo'. 52Le oro bey bo'olal tu kubaj u nojchilo'ob le yaan tu táan mil ba'atelo'obe', u p'iise' maanal ciento ochenta yéetel cuatro kilos, 53tumen jujun túul j ba'atele' tu taasaj ca'ach le ba'ax tu lukesaj ti' le aj p'eeco'. 54Beyo' Moisés yéetel Eleazare' tu kamajo'ob ti' le u nojchil aj ba'atel le oro tu taasajo'obo', ca tu bisajo'ob tu Noj Paselil Much'tal u ti'al ca ka'ajac ti' Yuumtzil le j israelitaobo'.
Currently Selected:
Números 31: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
