Números 28
28
Ti'ibil óolalo'ob cu ku'ubul sáamsamal
(Ex 29.38-46)
1Yuumtzile' tu t'anaj Moisés ca tu ya'alaj ti': 2A'al ti' le j israelitaobo' sáamsamal x ma' je'elelil u najmal u kubico'ob waaj yéetel tóocbil ti'ibil óolal ti' le noj kiinbensajo'obo', bey ti'ibil óolal qui'iboc in ti'al.
3A'al xan ti'ob lela' leti' le ti'ibil óolal unaj u tóoquico'ob ti' in tzicbe'enila': sáamsamal x ma' je'elelil, ca'a túul u ja'abente'ilo'ob j tamano'ob láaj utz u wíinclilo'ob. 4Jun túul u ti'al j quíimsbil u jóokbal kiin, u láak jun túule' u yocbal kiin. 5U ti'ibil óolal janalbe'en neeko'obe' unaj ca'a wuudz ma'alob sacan ya'ach'ta'an yéetel jun litro u aceiteil oliva. 6(Lela' le tóocbil quíimsbil ba'alche' cu beeta'al ca'ach sáamsamal tu pu'uquil Sinaio', bey ti'ibil óolal qui'iboc u ti'al Yuumtzil.) 7U ti'ibil óolalil u kaab uvae' unaj jun p'éel litro u ti'al jujun túul chan j taman. Le kaab uva beya' unaj u we'equel ich quili'ich naj, ti' u tzicbe'enil Yuumtzil. 8Le u láak jun túul j tamano' yaan u quíimsa'al tu yocbal kiin, pa'ate' u ti'ibil óolal janalbe'en neeko'ob yéetel u ti'ibil óolal u kaab uva, je'el bix le j beeta'ab ocbal kiino'. Lela' jun p'éel ti'ibil óolal qui'iboc, cu tóoca'al ti' u tzicbe'enil Yuumtzil.
U ti'ibil óolalilo'ob sábado
9Sábadoe' unaj a kubique'ex ca'a túul j tamano'ob ja'abente'ob láaj utz u wíinclil, yéetel can wuudz u ma'alobil sacan ya'ach'ta'an yéetel aceite, ti'ibil óolalo'ob janalbe'en neeko'ob, pa'ate' yéetel u ti'ibil óolalilo'ob u kaab uva. 10Le láaj tóocbil ba'alche'a' bíin ku'ubuc sábado, pa'ate' yéetel le u ti'ibil óolalil u kaab uva je'el bix sáamsamal le láaj tóocbil ba'alche'o'.
U Ti'ibil óolalil u winalilo'ob ja'ab
11Tu yáax kiinil le winalo'obo' bíin ku'ubuc u ti'al láaj tóocbil ti' Yuumtzile' ca'a túul mejen wacax, jun túul j taman yéetel siete ja'abente'ob j tamano'ob, láaj utz u wíinclil. 12Tu yo'olal jujun túul mejen wacaxe' bíin ku'ubuc seis u wuudzul ma'alob sacan ya'ach'ta'an yéetel aceite. Ti' jujun túul j tamane', cuatro wuudz sacan ya'ach'ta'an yéetel aceite. 13Ti' jujun túul mejen j tamane' ca'a wuudz sacan ya'ach'ta'an yéetel aceite. Lela' jun p'éel láaj tóocbil ba'alche' cu tóoca'al ti' u tzicbe'enil Yuumtzil. 14U ti'ibil óolal u kaab uvae' unaj ca'a p'éel litro' u ti'al jujun túul mejen wacax, yéetel jun litro ca'a tac táancoch ti'olal jujun túul j taman yéetel jun litro u ti'al jujun túul mejen j taman. Lela' le láaj tóocbil ba'alche' unaj u ku'ubul tuláacal u winalilo'ob le ja'abo'. 15Sáamsamal pa'ate' yéetel le láaj tóocbil ba'alche'o', unaj u ku'ubul jun túul j yuuc quíimsbil ba'alche' tu yo'olal keban, pa'ate' yéetel ti'ibil óolalo'ob u kaab uva.
Ti'ibil óolalo'ob tu kiinilo'ob táadzmanbal
16Tu catorce kiin ti' u yáax winalil le ja'abo' yaan u kiinbesa'al le Táadz Máanbal ti' u tzicbe'enil le Yuumtzilo', 17tu quince u kiinil u kiinbensajil qui'imac óolal. Siete kiino'ob bíin jaanta'ac waaj x ma' levadurail. 18U yáax kiinil le siete kiino'obo' yaan u kiinbesa'al jun p'éel quili'ich much'tal. Ti' le kiino' ma' a beetique'ex mix jun p'éel wa ba'ax meyajil. 19Bey láaj tóocbil ba'alche', cu ku'ubul ti' Yuumtzil ca'a túul mejen wacaxo'ob, jun túul j taman yéetel siete mejen ja'abente' j tamano'ob láaj utz u wíimclil. 20Pa'ate' yéetel le quíimsbil ba'alche'obo', bíin a beete'ex u ti'ibil óolalil sacan ya'ach'ta'an yéetel aceite, bey unaj a beetique'exa': seis u wuudzul sacan ti' jujun túul mejen wacax, can wuudz ti' jujun túul j taman 21ca wuudz ti' jujun túul mejen j taman. 22Yaan xan u ku'ubul jun túul j yuuc quíimsbil u ti'al u sa'atsaj si'ipil keban. 23Tuláacal lela' bíin ku'ubuc pa'ate' yéetel láaj tóocbil ba'alche' cu ku'ubul sáamsamal tu ja'atzcabil. 24Bey unaj a beetique'ex tu siete kiinilo'ob le kiinbesajo', bey tóocbil ti'ibil óolal qui'iboc ti' u tzicbe'enil Yuumtzil. Lela' bíin ku'ubuc yéetel u ti'ibil óolalil u kaab uva, pa'ate' yéetel le quíimsbil ba'alche' sáamsamalo'. 25Tu siete kiine' unaj a kiinbesique'ex jun p'éel quili'ich much'tal. Ma' unaj a beetique'ex mix jun p'éel meyaji'.
U ti'ibil óolalil yáax jooch
(Lv 23.9-22)
26Tu kiinbesajil yáax icho'obe', le quéen a kube'ex ti' Yuumtzil u janalbe'en neekilo'ob le túumben joocho', u káat ya'ale' u kiinbesajil le semanaobo', yaan u yantal te'ex xan jun p'éel quili'ich much'talil. Ti' le kiino' ma' unaj a beetique'ex mix jun p'éel meyaji'. 27Ca kubique'ex ti' Yuumtzil, bey utz qui'iboc láaj tóocbile', ca túul mejen wacax, jun túul j taman yéetel siete ja'aben j tamano'ob. 28U ti'ibil óolal sacan ya'ach'ta'an yéetel aceite unaj seis wuudz ti' jujun túul mejen wacax, can wuudz tu yo'olal le j taman 29ca'a wuudz tu yo'olal jujun túul mejen j taman. 30Yaan u ku'ubul xan jun túul j yuuc quíimsbil u ti'al u ka'amal sa'atsaj si'ipil tu yo'olal keban. 31Le láaj tóocbil ba'alche' pa'ate' yéetel u ti'ibil óolalil janalbe'en neeko'ob yéetel u kaab uvae' yaan a táanbesique'ex sáamsamal yéetel le láaj tóocbil ba'alche'o'. Le ba'alche'obo' unaj láaj utz u wíinclilo'ob.
Currently Selected:
Números 28: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
