Números 23
23
1Tu ya'alaj túun Balaam ti': Beet teen siete u multuunilo'ob kultaj, máakant teen siete mejen wacaxo'ob yéetel siete j tamano'ob.
2Balaque' tu beetaj ba'ax tu ya'alaj Balaam, tu ca'a túulalo'obe' tu quíimsajo'ob jun túul chan wacax yéetel jun túul j taman u ti'al jujun p'éel u multuunil kultaj.
3Cu dzo'ocole' Balaame' tu ya'alaj ti' Balac: P'áaten tu yicnal le quíimsbil ba'alche'o', ca'aliquil in bin in wila'a wa cu taal Yuumtzil u nuptáantajubáa tin wéetel. Cu dzo'ocole' quin tzicbaltic teech ba'ax bíin u ya'al teen.
Balaame' cu qui' t'antic Israel Balaame' j bin ti' jun p'éel chan x tocoy ca'anal lu'um
4Tu'ux chíicpaj Yuumtzil ti'; Balaame' tu ya'alaj ti': Dzo'oc in máakantic siete u multuunilo'ob kultaj, tu'ux tin kubaj jun túul chan wacax yéetel jun túul j taman ti' jujun p'éel.
5Yuumtzil túune' tu dzaj tu chi' Balaam le ba'ax bíin u ya'ale', ca tu ya'alaj ti': suunen tu'ux yaan Balac ca a wa'al ti' le ba'ax dzo'oc in wa'alic techa'.
6Suunaj Balaam ca tu nuptáantaj Balac wa'alacbal, tu tzéel le quíimsbil ba'alche'o', yéetel tuláacal u nojchililo'ob le moabitaobo'. 7Balaame' tu tze'ectaj le bóobatila':
Tu pu'uquilo'ob j lakin, ti' Arame',
Balac u ajawil Moab tu beetaj in taal.
Co'oten tu ya'alaj teen, loolob t'ant Israel,
dzíibolt kaas ti' u caajil Jacob.
8Ba'ale' ¿Bix bíin in loolob t'ant máax ma' tu loolob t'anta'al tumen Ku?
¿Bix bíin in káat kaas wa Yuumtzil ma' tu beetic?
9Tu ca'analil le nucuch tuunicho'obo' cu páajtal in wilic,
ti' le mejen ca'anal lu'umo'obo' quin pactic:
Leti'e' jun p'éel caaj jun páay caja'anil
jela'an ti' le u láak caajo'obo'
10Beyo'ob sa'am lu'ume'; ¿máax je'el u páajtal u xoquic jay túulo'obe'?
¿Máax je'el u yojéeltic jay túulo'obe'?
¡Quexi' wa ca quíimiquen je'el bix le máaco'ob toj u cuxtalo'obo',
ca dzo'ococ in kiinilo'obe' je'el bix le ti'obe'!
11Balac túune' tu tzáa káat chi'itaj ti' Balaam: ¿Ba'ax ca beetic? tene' tin taasajech u ti'al a loolob t'ant le in aj p'eeco'obo', ba'ale' teche' dzo'oc a qui' t'antico'ob.
12Balaame' tu núucaj: t paaclan j kax t'antaj, chéen bíin in wa'al le ba'ax bíin u dzáa Yuumtzil tin chi'e'.
13Balaque' tu sen a'alaj ti': Co'oten tin wéetel tu láak cúuchil, tu'ux bíin a wil chéen u bakpach le péet caajo', ba'ale' ma' bíin a wil tuláacal u múuch'cabilo'obo'. Te'elo' loolob t'anto'ob.
14Balaque' tu bisaj Balaam tu káaxil Zofín, tu ca'analil u witzil Pisga, tu'ux tu beetaj siete u multuunilo'ob kultaj ca tu quíimsaj ti' jujun p'éele', jun túul chan wacax yéetel jun túul j taman. 15Te'elo' Balaame' tu ya'alaj ti' Balac: p'áaten tu yicnal le quíimsbil ba'alche'ob ca'aliquil táan in bin in nuptáantinbáa yéetel Ku.
16Yuumtzile' jóok u nuptáant Balaame' ca tu dzaj tu chi'e' ba'ax unaj u ya'alic. Tu ya'alaj xan ti': Suunen tu'ux yaan Balac ca a wa'al ti', le ba'ax dzo'oc in wa'alic techo'.
17Balaame' j suunaje' ca tu yilaj Balac wa'alacbal tu tzéel u multuunil kultaj láakinta'an tumen u nuuquilo'ob le j moabitaobo'. Balaque' tu káat chi'itaj: ¿ba'ax tu ya'alaj teech Yuumtzil?
18Balaam túune' tu ya'alaj le bóobatila'.
Balac, u paal Zipor, u'uy in t'aan
Kue' ma' je'el bix j quíimilbe'en wíinique'
19ma' tu tuus, mix tu kexic u t'aan.
Le quéen u ya'al jun p'éel ba'ale', cu béeycuntic
le quéen u beet jun p'éel séeb chi'e' cu dzo'ocbesic
20Tu ya'alaj teen ca in qui' t'aanaquen;
wa Ku cu qui' t'aane' tene' ma' tu páajtal in wa'alic ma'il ti'.
21Mix máac ilmail tuusil, tu caajil Israel,
mix kasa'anil tu caajil Jacob.
Yuumtzil u Kue' ti' yaan yéetelo'obe',
leti'ob xane' cu ka'aytico'ob bey ajawe'.
22Ti'alinta'ano'ob tumen Ku máax jóokeso'ob Egiptoe', Israele' dzíic u kóoch bey j káaxil wacaxe'.
23Ma' tu lúubul loolob t'aano'ob yóokol Jacob
mix ba'al u biilal pulya'ajo'ob ti' Israel:
Bejela'e' unaj u ya'alal ti' Israel:
¡Buca'aj jak óol ba'alo'ob dzo'oc u beetic Ku ta wéetel!
24Le caaja' cu líikil
bey jun túul león p'uja'ane',
ma' tu je'elel tac u xupic ba'ax u dzoonmae',
cu yukic xan u ki'ikel u quíimsajo'ob.
25Balac túune' tu ya'alaj ti' Balaam: ¡bey ma' tu páajtal a loolob t'antic le caaja', bic túun a qui' t'ante!
26Ti'olal lelo' tu ya'alaj Balaam: ¿Ma' wa tin wa'alaj teech, tene' chéen bíin in wa'al ba'ax bíin u nu'ucten Yuumtzil?
27Balac túune' tu ya'alaj ti': Co'oten bin in ca'aj in bisech tu láak tu'ux. Je'elajquij te'elo' ma' tu kuuxtal Ku wa ca loolob t'antic Israel líikbal te'elo'.
28Beyo' Balaque' tu bisaj Balaame' tu ca'analil u pu'uquil Peor, tu'ux cu páajtal u yila'al tuláacal le x tocoy lu'umo'. 29Te'elo' Balaame' tu ya'alaj ti' Balac: líikes siete u multuunil kultajo'ob máaka'ant teen siete mejen wacaxo'ob yéetel siete j tamano'ob. 30Balaque' tu beetaj ba'ax a'ala'ab ti' tumen Balaam, ti' jujun p'éel multuunil tu quíimsaj jun túul chan wacax yéetel jun túul j taman.
Currently Selected:
Números 23: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
