Números 24
24
1Ba'ale' le ca tu yilaj Balaam utz tu táan Yuumtzil u qui' t'antic Israele', ma' j bin tu ca'a téen u kam u láak bóobatilo'ob ti' je'el bix suuc u beetic ca'ache', ba'ale' tu sutaj u paacat te x tocoy lu'umo'. 2Ca tu yilaj Balaam jelecbalo'ob u ch'i'ibalilo'ob Israele', u pixan Kue' j ooc ti'; 3Balaam túune' tu tze'ectaj le bóobatila':
U péectzil Balaam, u paal Beor, wíinic taam u paacat,
4asab utz u paacat wa buuyul u yóol
cu kamic péectzil, yaan xan náayo'ob
cu dza'abal ti' tumen Ku.
5¡Jacob sen jadzutz a chuybil najo'ob!
¡Israel sen qui'ichquelem, a x péet caajo'ob!
6Beyo'ob u chowac t'o'olol xa'ano'obe',
bey jadzutz pakalilo'ob tu jáal áalcab ja'e',
bey u paakal áloes Yuumtzile',
¡bey ku'uk che'ob yaan tu jáal ja'e'!
7Israele' bíin yanac ya'abcach ja' ti'
u ti'al u yuk yéetel u ti'al u jóoyabtic u paakalo'ob.
U ajawe' cu pa'ic u muuk Agar;
sen nojoch u páajtalil u ajawil.
8Cu ti'alinta'alo'ob tumen Ku, máax jóokeso'ob Egipto,
Israele' dzíic u kóoch bey j káaxil wacaxe'.
Bíin u p'at jayacbal lu'um le caajo'ob aj p'eeco'obo';
bíin u cach u baaquelo'ob
bíin u beet loob ti'ob yéetel julubo'ob.
9Bey jun túul león le quéen chilac je'elele':
mix máac cu táabal u yajsej.
¡Qui' t'anta'ac le máax cu qui' t'antiquecho'.
Loolob t'aanac le máax loolob t'antiquecho'!
U bóobato'ob Balaam
10Le ca tu yu'ubaj Balac le t'aano'oba', sen p'uja'an yéetel Balaam, ca tu p'uchaj u kab táan u ya'alic; tene' tin t'aanajech u ti'al a loolob t'ant in aj p'eeco'ob, ba'ale' teche' dzo'oc óox téen a qui' t'antico'ob. 11¡Asab utz u taal teech ca suunaquech ta wotoch! tene' tin séeb chi'ita in beetic teech nucuch tzicbe'en utzo'ob, ba'ale' Yuumtzile' tu wet'aj teen.
12Balaame' tu núucaj: tin wa'alaj ti' a aj túuchi' t'aano'obe', 13quex ca a dzáaten tuláacal le oro yéetel le plata cu chupic a jala'ach naje', tene' ma' tu páajtal in j ma' u'uyaj t'antic Yuumtzil, mix in beetic kaas mix in beetic utz, tu juunal in wóol, chéen bíin in wa'al le ba'ax bíin u ya'al teno'. 14Ma'alob túun quin suut tin lu'umil; ba'ale' táanile' yaan in wa'alic teech ba'ax bíin u beet le caaj ti' a caajal, ti' le kiino'ob cu taalo'.
15Balaam túune' tu tze'ectaj le bóobatila':
U péectzil Balaam, u paal Beor, wíinic taam u paacat,
16Wa buuy u yóole' u paacate' asab utz,
cu kaj óoltic bin le ba'ax u kaj óoltmaj Yuumtzilo'
cu kamic péectzil yéetel náayil
ti' Ku ti' máax yaan tuláacal páajtalil.
17Quin wa'alic le ba'ax bíin úuchuco', quin wilic le ba'ax yaan jach náachilo':
Jun p'éel eek cu jóokol ti' Jacob,
jun túul ajaw cu líikil ti' Israel.
Yaan u pech'ic u pool Moab,
yaan u pech'ic tuláacal u ch'i'ibalo'ob Set.
18Bíin u jáanpayt Edom,
bíin u ti'alt Seir, u aj p'eec óolo'.
Israele' bíin u beet nucuch jak óolalo'ob.
19Jun túul mu'ukan máac bíin jóokoc ti' Jacob
yéetel bíin u mix ba'alcunt le máaxo'ob cu p'áatalo'ob te' j noj caajo'.
20Cu dzo'ocole' Balaame' tu yilaj Amalec, ca'a tu tze'ectaj le bóobatila':
Amaleque' jun p'éel nojoch caaj,
Ba'ale' bíin láaj mix ba'alcunta'ac.
21-22Tu yilaj xan le j quenitaob, ca tu tze'ectaj le bóobatila':
U ch'i'ibalo'ob Caín:
quex mu'uka'an tu'ux cu ta'acbescubae',
quex u dzáa u ku' ich nucuch tuunicho'obe',
le ku'o' yaan u xu'ulsa'al tumen káak
le quéen ma'achaco'ob kalbil tumen Asiriae'.
23Cu dzo'ocole' tu tze'ectaj le bóobatila':
¡Wáay! ¿máax bíin cuxlac
le quéen u beet Ku le ba'alo'oba'?
24Cu taal u cheemo'ob tu jáal u ja'il Chipre, u ti'al u mix ba'alcunta'al Asiria, yéetel Heber, tumen Hebere' yaan u xu'ulsa'al.
25Cu dzo'ocol lela' Balaame' tu ch'a'aj u beel, ca suunaj tu yotoch. Balac xane' tu ch'a'aj u beel.
Currently Selected:
Números 24: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
