Levítico 9
9
Cu chúunul u beetic u aj kiinil Aarón
1Tu ocho kiine' Moisese' tu t'anaj Aarón yéetel u paalal, bey xan u nuuquilo'ob Israel. 2Tu ya'alaj ti' Aarón: Taas jun túul chan wacax u ti'al quíimsbil tu yo'olal keban, yéetel jun túul j taman láaj utz u wíinclil u ti'al láaj tóocbil, ca a táanbeso'ob tu táan Yuumtzil. 3Ti' le j israelitaobo' a'al ti'ob ca u taaso'ob jun túul j yuuc u ti'al quíimsbil tu yo'olal keban, jun túul chan wacax yéetel jun túul chan j taman ja'abeno'ob láaj utz u wíinclilo'ob u ti'al táanbesbilo'ob láaj tóocbil, 4bey xan jun túul wacax yéetel jun túul j taman u ti'al quíimsbilo'ob tu táan Yuumtzil u ti'al ca'a bisajbáil. Yaan xan u taasico'ob jun p'éel u ti'ibil óolal jejeláas janalbe'en neeko'ob ya'ach'ta'an yéetel aceite, tumen Yuumtzile' bíin u ca'aj u chíicbesubáa ti'ob bejela'e'.
5Le j israelitaobo' tu bisajo'ob tu táan u noj Paselil Muuch'tal le ba'ax tu ya'alaj Moiseso', bey xan tu láaj nadzubáa le caajo', ca j wa'alajo'ob tu táan Yuumtzil 6Moisés túune' tu ya'alaj: Lela' leti' le ba'axo'ob tu nu'ucbe'en t'antaj Yuumtzila'. Dzo'ocbese'ex ca u chíicbesubáa te'ex Yuumtzil yéetel qui'ichquelmil sáasjome'enil.
7Cu dzo'ocole' tu ya'alaj Moisés ti' Aarón: Nadzabáa ti' le u multuunil kultajo', ca táanbes le quíimsbil ba'alche' tu yo'olal a keban, bey xan le láaj tóocbil ba'alche' u ti'al u sa'atsaj si'ipilil u keban u caajil Israelo'. Táanbes xan u ti'ibil óol le j israelitaob u ti'al u sa'atsa'al u si'ipilil u kebano'ob, je'el bix u ya'almajil Yuumtzilo'.
8Aarone' tu nadzubáa ti' le u multuunil kultajo' ca tu xotaj u yúul le ba'alche' cu táanbesic ca'ach tu yo'olal u kebano'obo'. 9Tu séeblaquil j na'adz le ki'ik ti' tumen u paalalo', j Aarone' tu ch'ulaj u yalo'ob u kab yéetele', ca tu cu'ultaj tu baaco'obo' le u multuunil kultajo', tu wecaj xan u yalab tu tzéelo'ob. 10Cu dzo'ocole' tu tóocaj yóokol le u multuunil kultajo' u tzaatzel, u yiisilo'ob yéetel u tzaatzel u táamnel le ba'alche' quíimsa'an tu yo'olal keban je'el bix tu ya'alajil Yuumtzil ti' Moiseso'. 11Ba'ale' u bakel yéetel u kéewelile', tu tóocaj tu paach le x péet caajo'.
12Aarone' tu xotaj xan u yúul le ba'alche' cu táanbesa'al u ti'al láaj tóocbilo', ca j bisa'ab le ki'ik ti' tumen u paalalo', ca tu wecaj tu yóokol yéetel tu tzelo'ob le u multuunil kultajo'. 13Cu dzo'ocole', bisa'ab ti'e' u pool yéetel u xéexet'al le ba'alche' xo'oxo'ota'an cu táanbesa'al láaj tóocbilo', ca tu tóocaj Aarón tu yóokol le u multuunil kultajo'; 14cu dzo'ocol xane' tu p'o'aj u choochel yéetel u muuk yooco'obe', ca tu tóocaj tu yóokol le u multuunil kultajo' bey xan le túulis ba'alche'o'.
15Aarone' tu kubaj xan u ti'ibil óol le j israelitaobo'. Tu ch'aj le j yuuc u quíimsbil ba'alche'il tu yo'olal keban ca'ach le caajo', ca tu xotaj u yúul u ti'al u táanbesic tu yo'olal u keban je'el bix tu beetajil yéetel le yáax ti'ibil óolo'. 16Le ba'alche' tu bisaj u ti'al láaj tóocbil, tu beetaj je'el bix a'ala'anilo'. 17Cu dzo'ocole' tu taasaj u ti'ibil óolal jejeláas janalbe'en neeko'obe', ca tu ch'aj jun lóoch'e', ca tu tóocaj tu yóokol le multuunil kultaj pa'ate' yéetel le ba'alche'ob cu tóoca'al ja'atzcab kiino'.
18Aarone' tu xotaj xan u yúul le wacax yéetel le j taman cu táanbesa'al tumen le j israelitaob u ti'al u quíimsbil ba'alche'il ca'a bisajbáilo'. J ku'ub le ki'ik ti' tumen u paalal ca tu wecaj tu yóokol yéetel tu tzelo'ob le u multuunil kultajo'. 19J ku'ub ti' xan u tzaatzelo'ob le wacax yéetel le j tamano', u nej, u tzaatzel u jobnel, u yiisilo'ob yéetel u tzaatzel u táamnel, 20dzaab u tzaatzelo'ob tu tzéel u tzeemo'ob. Aarón túune' tu tóocaj le tzaatz tu yóokol le u multuunil kultajo'. 21Ba'ale' le tzeemo'ob yéetel le muuk oocobo', chéen tu beetaj u tich'kabil jun páaycunaj je'el bix u ya'almajil Yuumtzil ti' Moiseso'.
22Aarone' tu líikesaj u kab tu yóokol le j israelitaobo', ca tu qui' t'antajo'ob, cu dzo'ocol u kubic le quíimsbil ba'alche' tu yo'olal kebano', le ba'axo'ob cu láaj tóoca'al yéetel le quíimsbil ba'alche' u ti'al ca'a bisajbáilo', ca tu tzelajubáa tu yicnal le u multuunil kultajo'. 23Cu dzo'ocole', Moisés yéetel Aarone' j oocob tu noj Paselil Muuch'tal, u ti'al u jóokbalo'obe', tu qui' t'antajo'ob le j israelitaobo'. Yuumtzil túune' tu chíicbesubáa yéetel nojoch qui'ichquelmil ti' tuláacal le caajo'. 24Jóok káak tu táan Yuumtzile', ca tu tóocaj le ba'alche' bíin tóoca'ac ca'ach pa'ate' yéetel le tzaatzo'ob yaan tu yóokol le u multuunil kultajo'.
Le ca j ilab bey tumen le j israelitaobo', awat t'aanajo'ob yéetel qui'imac óolal, ca j chinlajo'ob tac u cóojol u táan poolo'ob j lu'um.
Currently Selected:
Levítico 9: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
