Levítico 8
8
1Yuumtzile' tu t'anaj Moisese' ca tu ya'alaj ti': 2Actáant Aarón yéetel u paalal, ch'a'a xan le nookob u ti'al le aj kiino'obo', u aceiteil jun páaycunaj,#8.2 Jun páaycunaj u káat ya'ale' quili'ich aceite chen u ti'al u dza'abal ti' aj kiino'ob wa ti' noj poolo'ob. le chan wacax cu quíimsa'al tu yo'olal kebano', le ca'a túul j tamano'ob yéetel u xaaquil le waajo'ob x ma' levadurao', 3ca much'quint tuláacal u caajil Israel tu jool u noj Paselil Muuch'tal.
4Moisese' tu dzo'ocbesaj le ba'ax túuchi'ita'ab ti' tumen Yuumtzilo', ca j much'laj le caaj tu jool u noj Paselil Much'talo'. 5Moisés túune' tu ya'alaj ti' le caajo': Lela' leti' le ba'ax dzo'oc u túuchi'itic Yuumtzil ca beeta'aca'
6Cu dzo'ocole' Moisese' tu beetaj u nadzicuba'ob Aarón yéetel u paalale', ca tu p'o'ajo'ob yéetel ja' 7Cu dzo'ocole' tu dzaj u búuc Aarón, tu bakaj u kaxnake', ca tu dzaj u búuquint u suyem; cu dzo'ocole' tu dzaj u efod#8.7 Efod jun p'éel t'aan u káat u ya'al léech caal cu léechcaltico'ob le aj kiino'ob ca'ach, yaan ca'ach ti' jun p'éel cúuchil tu'ux ta'aca'al wa ba'ax u iti'al u yojéeltico'ob u yóolal Ku. tu yóokole' ca tu jokaj yéetel u kaxabil 8cu dzo'ocole' tu dzaj u pix tzeem tu yóokole', ca xan tu dzaj le Urim yéetel le Tumim ti' le pix tzeemo'. 9Cu dzo'ocole' tu dzaj u pix jo'ol tu poole', ca tu dzaj tu táanil u pix jo'ol le xamach oro u ca'aj u ti'al jun páaycuntic bey aj kiin jach je'el bix u ya'almajil Yuumtzilo'.
10Cu dzo'ocole' Moisese' tu ch'a'aj u aceiteil le jun páaycunajo' ca tu wecaj tu yóokol le quili'ich naj, yéetel tuláacal le ba'ax yaan ichile', ca j p'áat jun páaycuna'an. 11Láili' xan yéetel le aceiteo', tu widzaj siete u téenel u multuunil kultaj yéetel u nu'uculo'obo', bey xan tu yóokol le nojoch cáat yéetel u nu'ucul u yedztal u ti'al u jun páaycuntico'obo'.
12Cu dzo'ocole' Moisese' tu wecaj yóokol Aarón u aceiteil jun páaycunaj u ti'al u jun páaycuntic bey aj kiine'. 13Tu beetaj xan u náadzal u paalal Aarone' ca tu dzaj u búuco'ob, tu bakaj u kaxnako'obe', ca tu dzaj u pix joolo'ob je'el bix tu ya'alajil Yuumtzilo'.
14Cu dzo'ocole' Moisese' tu túuchi'itaj taasbil le chan wacax u ti'al quíimsbil tu yóolal kebano', ca tu dzaj u kabo'ob Aarón yéetel u paalal tu yóokol u pool le chan wacaxo'. 15Cu dzo'ocole' Moisese' tu xotaj u yúul, tu ch'a'aj u ki'ikel yéetel ca dzíit u yaal u kabe' ca tu cu'ultaj tu baaco'ob yéetel u tzelo'ob le u multuunil kultaj u ti'al u yutzil antal, ca xan tu wecaj tu tzéelilo'ob le u multuunil kultaj, u yalab le ki'iko'.
16Cu dzo'ocole' Moisese' tu ch'a'aj tuláacal le tzaatz balmail u jobnelo', u tzaatzel u táamnel yéetel u ca'a p'éel yiisilo'ob pa'ate' yéetel u tzaatzele', ca tu tóocaj tu yóokol le u multuunil kultajo'; 17ba'ale' le u yalab le chan wacaxo', je'el bix u kéewlel, u bakel yéetel u choochele', tu tóocaj tu paach le x péetcaaj je'el bix tu ya'alajil Yuumtzil ca beeta'aco'.
18Moisese' tu beetaj u náadzal le j taman cu táanbesa'al u ti'al láaj tóocbilo', ca tu dzaj u kabo'ob Aarón yéetel u paalal tu yóokol u pool le j tamano'. 19Cu dzo'ocole' Moisese' tu xotaj u yúule' ca tu wecaj u ki'ikel tu yóokol yéetel tu tzéelo'ob le u multuunil kultajo', 20tu xotaj u xéexet'al le j tamano', ca tu tóocaj u pool, u xóoxot'al yéetel u tzaatzel; 21cu dzo'ocole' tu p'o'aj yéetel ja' u choochel yéetel u muuk yooco'ob le j tamano', ca tu láaj tóocaj tu yóokol le u multuunil kultaj bey tóocbil ti'ibil óol utz qui'iboc tu táan Yuumtzil je'el bix u ya'alamajil leti'o'.
22Cu dzo'ocole' Moisese' tu beetaj u taasa'al u láak j taman u ti'al u tich' kabil le jun páaycunajo', ca tu dzajo'ob u kabo'ob Aarón yéetel u paalal tu yóokol u pool le j tamano'. 23Cu dzo'ocole' Moisese' tu xotaj u yúule', ca tu ch'a'aj jun p'íit u ki'ikele', ca tu cu'ultaj ti' Aarón tu caablil u x no'oj xiquin, tu poloquil u yaal u x no'oj kab yéetel tu poloquil u yaal u x no'oj yooc. 24Tu beetaj xan u náadzal u paalal Aarone', ca xan tu cu'ultaj le ki'ik, ti'ob tu caablil u x no'oj xiquin, tu poloquil u yal u x no'oj kab yéetel tu poloquil u yal u x no'oj ooc; cu dzo'ocole' ca tu wecaj u yalab le ki'ik tu yóokol yéetel tu tzéelo'ob le u multuunil kultajo'.
25Cu dzo'ocole' Moisese' tu ch'a'aj u tzaatzel, u nej, le tzaatz balic u jobnelo', u ca'a p'éel yiisilo'ob pa'ate' yéetel u tzaatzel, yéetel u muuk u noj ooquil. 26Ti' u xaaquil le waajo'ob x ma' levadura cu dza'abal tu táan Yuumtzilo', Moisese' tu ch'aj jun p'éel piimpiim waaj x ma' levadurail, jun p'éel piimpiim waaj ya'ach'ta'an yéetel aceite yéetel jun p'éel oop'il waaje', ca tu dzaj tu tzéel le tzaatzo'ob yéetel le x no'oj muuk ooco'; 27cu dzo'ocole' tu láaj kubaj tu kab Aarón yéetel u paalal u ti'al u beetico'ob u tich' kabil le táanbesajo'. 28Cu dzo'ocole' tu molaj Moisés tuláacal le ba'alo'ob tu kabo'ob Aarón yéetel tu kab u paalalo', ca tu tóocaj ti' le u multuunil kultaj tu tzéel le ba'ax u ti'al láaj tóocbil bey u ti'ibil óolal jun páaycunaj utz qui'iboquil tu nojbe'enil Yuumtzilo'.
29Cu dzo'ocole' Moisese' tu ch'a'aj le tzeemo', ca tu beetaj tu táan Yuumtzil u tich' kabil le táanbesajo'. Le u xóot'ol le j tamano' meyajnaj u ti'al le Jun páaycunajo', tu ch'a'aj Moisés, tumen u ti'al leti' je'el bix u ya'almajil Yuumtzilo'.
30Cu dzo'ocole' tu ch'a'aj Moisés jun p'íit u aceiteil le jun páaycunaj yéetel le ki'ik yaan yóokol u multuunil le kultajo', ca tu widzaj tu yóokol Aarón yéetel tu yóokol u paalal, bey xan tu yóokol u nookil u beetico'ob u aj kiinilo'ob. Bey úuchic u jun páaycuntico'ob Aarón yéetel u jun páaycuntico'ob u paalal, bey xan u nooko'ob u ti'al u beetico'ob u aj kiinilo'ob tuláacalo'ob.
31Cu dzo'ocole' Moisese' tu ya'alaj ti' Aarón yéetel ti' u paalal: Takancunte'ex le bak tu jool le u noj Paselil Muuch'talo', jaante'ex láili' te'elo', yéetel u waajil le xaac u ti'al jun páaycunaj je'el bix u túuchi'itajil Yuumtzil ca tu ya'alaj teen: Aarón yéetel u paalal bíin jaantic le baka'. 32Cu dzo'ocole' tóoque'ex u yalab le waaj yéetel le bak cu p'áatalo', 33ma' xan a náachtale'ex tu jool u noj Paselil le Much'tal siete kiino'ob, je'el bix buca'aj u xáantal u kiinilo'ob le jun páaycunajo'. 34Yuumtzile' dzo'oc u túuchi'itic ca beeta'ac u tich'kabil u ti'al u ka'amal u sa'atsaj si'ipil a kebane'ex, je'el bix beeta'abic bejela'a'. 35Let o'olale', te'exe' unaj a p'áatale'ex buul kiin yéetel buul áakab tu jool u noj Paselil Muuch'tal siete kiino'ob. Dzo'ocbese'ex u tzol t'aan Yuumtzil, yo'olal ma' a quíimile'ex, tumen leti' le tzol t'aan tin kamajo'.
36Aarón yéetel u paalale' tu beetajo'ob tuláacal ba'ax tu ya'alaj Yuumtzil tu chi' Moisés.
Currently Selected:
Levítico 8: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
