Levítico 5
5
U tzol t'aanilo'ob quíimsbil ba'alche' tu yo'olal si'ipil
1Le máax ma' tu yóoltic u ya'al ba'ax tu yilaj wa ba'ax tu yu'ubaj le quéen t'a'anac u ti'al aj jaajcunaje', cu kebantal, yaan u cuchic u si'ipilil.
2Le máax machic ba'ax ma' utz yanil, je'el bix jun túul quimen ma' janalbe'en ba'alche', alaktbil ba'alche' wa j káaxil ba'alche', wa ba'alche' jilaanquil u máane', cu p'áatal ma' utz yanili', cu yantal u si'ipil quex ma' tu yilaj ba'ax tu machaji'.
3Le máax machic je'el ba'axac ma' utz ti' wíinic u taale',#5.3 Ti' wíinic u taale', je'el bix ta'e', wa puj wa xej. cu p'áatal ma' utz yanili', wa ma' tu yilaj ti' le súutuco', le quéen u yile' cu p'áatal sipa'an.
4Le máax cu téec beetic jun p'éel jalach t'aan u ti'al u beetic ba'ax utz wa kaas je'el bix le cu beeta'alo'ob x ma' tuuculilo', ba'ale' ma' tu na'ataj ti' le súutuco', le quéen u tucult ba'ax tu beetaje' cu p'áatal sipa'anil ti' je'el ba'alaque'.
5Le máax cu yantal u si'ipil ti' je'el ba'alac ti' le ba'alo'oba', unaj u cáantic le keban tu beetajo' 6yaan xan u bisic ti' Yuumtzil jun túul x ch'upul ba'alche' ichil u yalak u ti'al u quíimsic tu yo'olal u keban, je'el u páajtal u bisic jun túul x taman wa jun túul x yuuque', tumen yéetel le quíimsbil ba'alche'a, le aj kiino' bíin u kam u sa'atsaj si'ipil u keban le máaco'.
7Wa ma' chuca'an u taakin u ti'al u manic jun túul chan j tamane', unaj u bisic ti' Yuumtzil ca'a túul mucuy wa ca'a túul u mejnil sacpacal, tu yo'olal le kebanchajico': jun túule' cu quíimsa'al tu yo'olal keban, u láak jun túule' cu láaj tóoca'al. 8Unaj u bisic ti' le aj kiino', ca u kub yáax táanil le cu dza'abal tu yo'olal le kebano', yaan u ch'otic u caal ba'ale' ma' bíin u jach joc u pooli'; 9cu dzo'ocole' cu widzic tu jun tzéel le u multuunil kultajo' jun p'íit u ki'ikel le quíimsbil ba'alche' tu yo'olal le kebano', cu yedzic u yalab le ki'ik tu chuun le u multuunil kultajo', tumen quíimsbil ba'alche'il tu yo'olal keban. 10Yéetel le u láak jun túulo', cu beetic jun p'éel láaj tóocbil ba'alche' je'el bix a'ala'anilo'; beyo' le aj kiino' cu kamic u sa'atsaj si'ipil u keban le máaco', cu sa'atsa'al xan le kebano'.
11Wa mina'an ti' u ti'al u manic mix ca'a túul mucuy wa ca'a túul u mejnil sacpacale', unaj u bisic u ti'al u ti'ibil óolal tu yo'olal u kebane', ca'a p'éel kilo u asab ma'alobil juch'bil janalbe'en neek. Ma' unaj u yalic u aceiteil, mix unaj u dzáic poom yóokoli', tumen ti'ibil óolal tu yo'olal keban. 12Unaj u bisic ti' le aj kiino', leti'e' bíin u ch'a'a jun láap' u ti'al ka'asajil, cu dzo'ocole' cu tóoquic yóokol le u multuunil kultajo', tu tzéel le ti'ibil óolalo'ob cu tóoca'alo'ob tu nojbe'enil Yuumtzilo'. Ti'ibil óolal tu yo'olal keban, 13u ti'al ca u kam le aj kiin u sa'atsaj si'ipilil je'el ba'ax keban tu beetaj le máaco', le kebano' cu sa'atsa'al. Bey je'el bix u beeta'al yéetel u ti'ibil óolil jejeláas janalbe'en neekobo', u yalabe', u ti'al le aj kiino'.
Quimsbil ba'alche'ob tu yo'olal si'ipil
14Yuumtzile' tu t'anaj Moisese' ca tu ya'alaj ti': 15Le máax cu kebantal ma' j taali' ti' u yocoltic u quili'ich ba'alo'ob Yuumtzile', unaj u ch'a'ic ti' u múuch'ul u yaalako'ob jun túul j taman láaj utz u wíinclil, bey quíimsbil ba'alche' u ti'al u keban u bis ti' Yuumtzile'. U tojol le j tamano', unaj plata u ca'aj, je'el bix buca'aj u noj p'iisil le quili'ich naj u ti'al u bo'olil u ti'ibil óolil keban. 16Le máaca' unaj u bo'otic le ba'ax tu yocoltajo' le quili'ich ba'alo'obo', pa'ate' yéetel jun jaatz u tip'a'anil, ti' cinco jaatzule' bíin u jóokes jun jaatz u kub ti' le aj kiino'. Cu dzo'ocole' yéetel le j yuuc cu quíimsa'al u ti'al si'ipilo', le aj kiino' bíin u kam u sa'atsaj si'ipilil le máaco', bey túuno' cu sa'atsa'al u keban.
17Le máax cu kebantal iquil u beetic ba'ax ma' utz tu táan u nu'ucbe'en t'aano'ob Yuumtzile', cu si'ipiltal quex ma' taali' ti', yaan u cuchic u sipa'anil. 18Bíin túun u ch'a'a ichil u múuch'ul yalak ba'alche'ob jun túul j yuuc láaj utz yanil u wíinclil, cu tucultic bajux u tojole', cu bisic ti' le aj kiin u ti'al quíimsbil tu yo'olal u si'ipil u ti'al u sa'atsa'al le máac kebanchaj ma' j taali'iti'e', beyo' cu sa'atsa'al u kebano'. 19Jun túul u quíimsbil ba'alche'il tu yo'olal keban, tumen le máaco', sipa'an tu táan Yuumtzil.
Currently Selected:
Levítico 5: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
