Levítico 4
4
Quiimsbil ba'alche'ob tu yo'olal keban
1Yuumtzile' tu t'anaj Moisés ca tu ya'alaj ti': 2A'al ti' le israelitaobo' wa yaan máax, ma' tumen wa j taali' ti' u kebanchajal ti' jun p'éel u nu'uc t'aano'ob Yuumtzile', wa cu beetico'ob le ba'ax u wet'maje', le ti'obe' unaj u beetico'ob lela': 3Wa le nojoch aj kiin cu kebanchajle', tu yo'olal lelo' cu beetic u si'ipil le caajo', kabéet u taasic ti' Yuumtzil jun túul wacax láaj utz u wíinclil, u ti'al mukyaj tu yo'olal le keban tu beetajo'. 4Unaj u taasic tu táan Yuumtzil, tu jool u noj Paselil Much'talo'; te'elo' bíin u dzáa u kab yóokol u pool le wacaxo', cu dzo'ocole' cu xotic u yúul tu táan Yuumtzil. 5Cu dzo'ocole' cu ch'a'ic jun p'íit u ki'ikel le wacaxo' cu bisic tu noj Paselil Much'talo'; 6te'elo' cu ch'ulic u yaal u kab yéetel le ki'iko', cu dzo'ocole' cu widzic siete u téenel tu táan Yuumtzil tu x káasabil le quili'ich najo'. 7Bíin u cu'ult jun p'íit le ki'ik ti' u baaco'ob u multuunil kultaj beeta'an u ti'al qui'iboc poom le yaan tu táan Yuumtzil tu noj Paselil Much'talo', tuláacal u yalab le ki'ik cu p'áatale' cu wequic tu yooc le u multuunil kultaj beeta'an u ti'al láaj tóocbil ba'alche'ob le yaan tu jool le u noj Paselil Much'talo'. 8Cu dzo'ocole' cu lukesic tuláacal le tzaatz bakpachtic u jobnel le quíimsbil chan wacaxo', 9u tzaatzel yaan tu ca'a p'éel yiiso'ob, u táamnel bey ti' u bakel u paach bíin u lukes tuláacal pa'ate' yéetel u yiisil, 10jach je'el bix u lukesa'al ti' le xiibil wacax cu ku'ubul u ti'al u ti'ibil óolalil ca'a bisajbáile'. Cu dzo'ocole' le aj kiino' cu láaj tóoquic tu yóokol u multuunil kultaj. 11Ba'ale' u kéewlel yéetel tuláacal u bakel, pa'ate' yéetel u pool, u muuk yooco'ob, u jobnel, yéetel le ma' janalbe'en ba'alo'obo', 12lela' u káat u ya'ale': tuláacal le chan wacaxo', cu jo'oksic tu paach le péet caajo' cu bisic ti' jun p'éel cúuchil manba'alcunta'an tu'ux cu pu'ulul u ta'anil káak, te'elo' tu yóokol tu'ux mulucbal le ta'ano', cu dzáic le si'o', cu dzo'ocole' cu t'abic.
13Wa tuláacal u caajil israel cu beetic ba'al kaas quex ma' u káat u beeto'obe', wa mix jun túul ichilo'ob tu yilaj dzo'oc u beetico'ob ba'ax kaas ti' u nu'ucbe'en t'aano'ob Yuumtzil cu si'ipilcuba'obe', 14le quéen ojéelta'ac ba'ax kebanil dzo'oc u beetico'obe', tuláacalo'ob u najmal u múul kubico'ob jun túul chan wacax u ti'al quíimsbil tu yo'olal keban. Cu bisico'ob tu táan u noj Paselil Muuch'talo', 15te'elo' u nuuquilo'ob le caajo', tu táan Yuumtzile' bíin u dzáa u kabo'ob tu pool le wacaxo', te'elo' cu xotco'ob u yúul. 16Cu dzo'ocole' le aj kiino' cu bisic jun p'íit u ki'ikel le wacax tu noj Paselil Muuch'talo', 17cu ch'ulic u yaal u kab te j ki'iko' cu dzo'ocole' cu widzic siete u téenel tu táan Yuumtzil, actáan ti' le x káasabo'. 18Bey xan cu cu'ultic jun p'íit le ki'ik tu baacoob le u multuunil kultaj yaan tu táan Yuumtzil, tu noj Paselil Muuch'tal. Tuláacal le u yalab le ki'iko' cu wequic tu yooc u multuunil kultaj láaj tóocbil ba'alche', yaan tu noj Paselil Muuch'talo'. 19Bey xan cu láaj luksic u tzaatzel le wacaxo' cu dzo'ocole' cu tóoquic tu multuunil kultajo', 20u káat u ya'ale' Yaan u beeta'al yéetel le wacaxa' jach je'el bix cu beeta'al ti' le wacax cu quíimsa'al tu yo'olal kebano'; beyo' le aj kiino' cu kamic sa'atsaj u ti'al le caajo', le keban túuno' cu sa'atsa'al ti'ob. 21Cu dzo'ocole' cu jo'oksic le wacax tu paach le péet caajo', te'elo' bíin u tóoque', jach je'el bix beeta'ab ti' le yáax chan wacaxo', tumen j quíimsa'ab tu yo'olal u keban le caajo'.
22Wa jun túul jo'ol póop cu kebanchajal tu yo'olal tu beetaj ba'al kaas ti' u nu'ucbe'en t'aano'ob Ku u Yuumtzile', cu yantal u si'ipil quex ma' j taaliti' u beetiqui'. 23Le quéen u kaj óolt ba'ax kebanil tu beetaje', kabéet u bisic jun túul j yuuc utz u wíinclil bey ti'ibil óolale'. 24Cu dzáic u kab tu yóokol u pool le j yuuco' cu xotic u yúul tu táan Yuumtzil, te tu cúuchil tu'ux cu quíimsa'al le ba'alche'ob u ti'al tóocbilo'obo', tumen lelo' quíimsbil ba'alche' tu yo'olal keban. 25Cu dzo'ocole' le aj kiino' bíin u ch'a'a yéetel u yaal u kab jun p'íit u ki'ikel le ba'alche' quíimsa'an tu yo'olal le kebano', u ti'al u cu'ult tu baaco'ob le multuunil kultaj tu'ux cu tóoca'al le ba'alche'o', cu dzo'ocole' cu wequic u yalab le ki'ik láili' tu chuun le u multuunil kultajo'. 26Cu láaj tóoquic le tzaatz je'el bix u beeta'al yéetel u tzaatzel u quíimsbil ba'alche'il yo'olal ca'a bisajbáilo'. Beyo' le aj kiino' cu kamic u sa'atsaj si'ipil u keban le j jo'ol póopo', cu sa'atsa'al u keban.
27Wa jun túul óotzil máac cu kebantal ma' j taali'iti'e', tu yo'olal sipa'anchajic ti' u nu'ucbe'en t'aano'ob Yuumtzile', 28le quéen u yojéelt dzo'oc u kebanchajle', unaj u bisic jun túul x yuuc láaj utz u wíinclil u ti'al u ti'ibil óolal le keban tu beetajo'. 29Bíin u dzáa u kab yóokol u pool le ba'alche' cu ku'ubic yo'olal u kebano', cu dzo'ocole' cu xotic u yúul tu cúuchil tu'ux cu láaj tóoca'alo'ob. 30Le aj kiin túuno' cu ch'a'ic jun p'íit le ki'ik yéetel u yaal u kabe', cu cu'ultic tu baaco'ob le multuunil kultaj tu'ux cu láaj tóoca'al le ba'alche'obo', cu láaj wequic xan u yalab le ki'ik tu chuun le multuunil kultajo'. 31Unaj xan u lukesic tuláacal u tzaatzel je'el bix u luksa'al ti' le ba'alche' cu quíimsa'al u ti'al ca'a bisajbáile', ca u tóoc yóokol le u multuunil kultajo' utz qui'iboquil tu táan Yuumtzil. Beyo' le aj kiino' cu kamic u sa'atsaj si'ipilil u keban le máaco', cu p'áatal sa'atsa'an le kebano'.
32Wa le máac cu taasic jun túul j taman u ti'al quíimsbil tu yo'olal u kebane', unaj u taasic jun túul x taman láaj utz u wíinclil. 33Bíin u dzáa u kab yóokol u pool le j tamano', cu dzo'ocole' cu xot'ic u yúul bey quíimsbil ba'alche' tu cúuchil tu'ux cu quíimsa'al le ba'alche'ob cu láaj tóoca'alo'obo'. 34Le aj kiin túuno' cu ch'a'ic yéetel u yaal u kab jun p'íit u ki'ikel le ba'alche' quíimsa'an tu yo'olal kebano', cu cu'ultic tu baaco'ob u multuunil kultajo' tu'ux cu láaj tóoca'al le ba'alche'obo', cu wequic xan tu chuun le u multuunil kultaj u yalab le ki'iko'. 35Cu dzo'ocole' cu láaj lukesic u tzaatzel je'el bix u luksa'al ti' le chan j taman cu quíimsa'al u ti'al ca'a bisajbáilo', cu tóoca'al u tzaatzel ti' le u multuunil kultaj tu tzéel le ti'ibil óolalo'ob cu tóoca'alo'ob tu nojbe'enil Yuumtzilo'. Beyo' le aj kiino' cu kamic u sa'atsaj si'ipil le máac kebanchajo', cu sa'atsa'al u keban.
Currently Selected:
Levítico 4: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
