Levítico 6
6
Quimsbil ba'alche'ob tu yo'olal tuus u ti'al oocol
1Yuumtzile' tu t'anaj Moisese' ca tu ya'alaj ti': 2Le máax cu nactáanta'al sipa'an tu táan Yuumtzil tu yo'olal kebanchaj iquil tu tusilac u láaktzil tumen tu yoclaj ba'ax kubenta'ab wa ba'ax dzaab u majaant wa tu jáampaytaj wa ba'ax ti', 3wa tu yo'olal u ya'alic ma' tu núuptáantaj jun p'éel ba'al saatal quex leti' j ch'a'e', wa cu jalach t'antic jun p'éel tuus (je'el ba'alac ti' le ba'alo'ob iquil u yúuchul keban), 4cu si'ipil ti' le kebano'. Bey túuno' yaan u sutic le ba'ax u yocoltmaj wa u tocmajo', bey xan le ba'ax dza'an u canant, wa le ba'ax tu caxantaj, 5wa je'el ba'ax u láak óolal jalach t'aanaj tu yo'olal tuuse'. Yaan u láaj sutic ti' yuumil, yaan xan u dzáic, ti' cinco jaatzulo'obe', jun jaatz u tip'a'anil le quéen u bis le quíimsbil ba'alche' tu yo'olal u si'ipilo'. 6Le quíimsbil ba'alche' u ti'al Yuumtzilo', unaj jun túul j taman láaj utz yanil u wíinclil, u tojole' teech bíin a tuculte, unaj u ch'a'ic tu múuch'ul u yaalako'ob u ti'al u bis ti' le aj kiin bey quíimsbil ba'alche' tu yo'olal le si'ipilo'. 7Le aj kiin túuno' bíin u kam ti' Yuumtzil u sa'atsaj si'ipilil ti' je'el ba'alac keban u beetmaj le máaco', cu sa'atsa'al túun u keban.
U tzol t'aanilo'ob bix u láaj tóoca'al quíimsbil ba'alche'ob
8Yuumtzile' tu t'anaj Moisese' ca tu ya'alaj ti': 9Dzáa ti' Aarón yéetel u paalal u tzol t'aanilo'ob bix cun láaj tóocbil le quíimsbil ba'alche'obo': Le ba'alche' cu quíimsa'alo', unaj u p'áatal buul áakab yóokol le chúuc t'aba'an ti' le u multuunil kultajo', ca tóoca'ac tumen le káako'. 10Le aj kiino' bíin u búuquint u nook yéetel u xut' eexo'ob beeta'ano'ob yéetel lino u ti'al u balic u wíinclil; cu dzo'ocole' cu molic u ta'anil le ba'alche' j tóoca'ab yóokol le u multuunil kultajo', cu dzáic jun tzéelil ti'. 11Cu dzo'ocole', cu kexic u nooke', cu bisic le ta'an ti' jun p'éel cúuchil ma' manba'alcuna'an, tu paach le x péetcaajo'.
12Le káak cu tóoch' yóokol le u multuunil kultajo' mix bikin unaj u tu'upul. Le aj kiino' unaj u dzáic u si'il sáamsamal ja'atzcab kiin, bey xan bíin u dzáa yóokol le káako' le ba'alche' cun j tóocbilo', yaan xan u tóoquic te tu multuunil kultaj u tzaatzelo'ob le quíimsbil ba'alche' u ti'al ca'a bisbáilo'. 13U káakil le u multuunil kultajo', unaj t'aba'an mantadz. Mix bikin unaj u tu'upul.
U tzol t'aanilo'ob u ti'ibil óolil jejeláas janalbe'en neeko'ob
14Le tzol t'aano'ob je'ela', u ti'al u jejeláas janalbe'en neeko'ob: Le aj kiino'obo' unaj u táanbesico'ob tu táan le u multuunil kultaj ti' Yuumtzilo'. 15Jun túul ti' leti'ob bíin u ch'a'a jun láap' u juuch'il le janalbe'en neeko'ob pa'ate' yéetel u aceiteil, bey xan tuláacal le poom cu bin yéetel le ti'ibil óolo', cu beetic u tóoch'bal ti' le multuunil kultaj bey u ti'ibil óolil ka'ajsajil, utz qui'iboquil tu táan Yuumtzil. 16U yalab le ti'ibil óolal bíin u jaant Aarón yéetel u paalal x ma' levadurail ti' jun p'éel cúuchil jun páaycuna'an tu x péetpachil u noj Paselil le Muuch'talo'. 17Ma' unaj u póoca'al le bak yéetel levadura. Dza'an ti'ob bey ba'al u ti'alo'ob ti' le ti'ibil óolalo'ob tóoca'ano'ob, quin ti'alintico', lela' sen quili'ich ba'alo'ob je'el bix le quíimsbil ba'alche'ob tu yo'olal keban yéetel tu yo'olal si'ipilo'. 18Mantadz ti' le ja'abo'ob cu taalo', tuláacal le j xiibo'ob ti' u ch'i'ibal Aarone', bíin páatchajac u jaantico'ob le jatza'an u ti'alto'obo', ti' le tóocbil ti'ibil óolalo'ob u ti'al Yuumtzilo'. Je'el ba'ax ca ta'akac ti' le ti'ibil óolo'oba', cu p'áatal sen quili'ich.
Le ti'ibil óolal bíin u dza'ob le aj kiino'obo'
19Yuumtzile' tu t'anaj Moisese' ca tu ya'alaj ti': 20Bey le ti'ibil óol bíin u táanbes Aarón yéetel u ch'i'ibalo'ob le kiin bíin jun páaycunta'aco'ob aj kiinilo'obe': Ca'a p'éel kilo u asab ma'alobil juch'bil janalbe'en neeko'ob, bíin u kubo'ob táancoch ja'atzcabi', yéetel u láak táancoche' ocnal kiin, ma' u najmal u máan jun p'éel kiini'. 21Le ti'ibil óolo' unaj u póoquico'ob ti' jun p'éel x kóom xamach, ma'alob ya'ach'ta'anil yéetel aceite, cu dzo'ocole' cu kubco'ob xo'oxo'ota'ano'ob bey ti'ibil óol utz qui'iboquil tu táan Yuumtzile'. 22Bey unaj u máakanta'al tumen le nojoch aj kiin u ch'i'ibal Aarón máax bíin jun páaycunta'ac u ti'al u jeelintej; lelo' mantadz u ti'al Yuumtzil, unaj u láaj tóoca'al. 23Tuláacal le ti'ibil óolalo'ob bíin u kub le aj kiino'obo', bíin láaj tóoca'aco'ob; mix máac unaj u jaantic.
Tzolt'aanilo'ob u ti'al quíimsbil ba'alche'ob tu yo'olal keban
24Yuumtzile' tu t'anaj Moisese' ca tu ya'alaj ti': 25Dzáa ti' Aarón yéetel ti' u paalal u tzol t'aanilo'ob le quíimsbil ba'alche'ob tu yo'olal kebano': Le ba'alche' bíin ku'ubuc tu yo'olal kebano', unaj u xo'otol u yúul tu táan Yuumtzil tu cúuchil tu'ux cu quíimsa'al le ba'alche'ob u ti'al tóocbilo', tumen sen quili'ich. 26Le aj kiin bíin u táanbes le ti'ibil óolal tu yo'olal kebane', je'el u páajtal u jaantic dze'edzeque', ba'ale' unaj u jaantic ti' jun p'éel cúuchil quili'ich, tu x péetpach u noj Paselil Muuch'tal. 27Je'el ba'ax ca táakac ti' u bakel le ba'alche'o', cu p'áatal quili'ich, wa cu ch'áajal ki'ik ti' le nooko', unaj u p'o'obol ti' quili'ich cúuchil. 28Le cáat tu'ux cha'ac u bakel le ti'ibil óolo', unaj u pa'abal; ba'ale' wa j cha'ac ti' jun p'éel cuum bronce u ca'aje', chéen kabéet u p'o'obol.
29Le quíimsbil ba'alche' beya' sen quili'ich. Chéen le aj kiino'ob cu páajtal u jaantico'ob dze'edzequi'. 30Ba'ale' ma' bíin páatac u jaanta'al mix jun túul ba'alche' kuba'an tu yo'olal keban dzo'oc u bisa'al u ki'ikel tu noj Paselil Muuch'tal u ti'al u sa'atsaj si'ipilil keban ti' le quili'ich najo'. Le quíimsbil ba'alche' beya' unaj u tóoca'al ti' káak.
Currently Selected:
Levítico 6: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
