Levítico 25
25
U ja'abil sábado yéetel u xul palitzilil
1Yuumtzile' tu t'anaj Moisés tu witzil Sinaí ca tu ya'alaj ti': 2A'al ti' le israelitaob lela'; le quéen ocoque'ex ti' le lu'um bíin in dzáa te'exo', le lu'umo' unaj u beeta'al u sábadoil tu tzicbe'enil Yuumtzil. 3Je'el u páajtal a pakique'ex a coole'ex seis ja'abo'obe', bey xan a ch'ac ku'uktique'ex a paakal uvae' yéetel a molique'ex u yicho'ob. 4Ba'ale' tu siete ja'abo'obe' u beeta'al u sabadoiltu tzicbe'enil Yuumtzil, ma' a pakic a coole'ex ti' le ja'abo', mix a ch'acku'uktique'ex paakal uvaob. 5Ma' a xotku'uktique'ex le trigo jóok chéen tu jun le caaj dzo'oc a jochic u dzoocbalac a coolo', mix a molic u yich le uva ma' ch'acku'ukta'ano', le lu'umo' kabéet u je'elel. 6Le bíin u dzáa le lu'um tu ja'abilo'ob sábadoe', yaan u dzáic u ti'al a jaante'ex, u jaanto'ob a j palitzile'ex bey xan a x palitzile'ex, a j meyaje'ex bey xan le j táanxel lu'umilo'ob caja'an ichile'exo', 7u wacaxil yéetel le dzíidzic ba'alche'ilo'ob le lu'umo', tuláacal le bíin u dzaj le lu'umo' u ti'al a jaante'ex.
8Unaj a xoquique'ex siete u semanail ja'abo'ob, tu pa'ate'ile' cuarenta yéetel nueve ja'abo'ob, 9u diez kiino'ob le siete semanao', u kiinil sa'atsaj si'ipil, yaan u yusta'al u baac j taman ti' tuláacal le lu'umo'. 10U ja'abi' cincuentae' yaan a ka'aytique'ex quili'ich ja'ab; lelo' jun p'éel u ja'abil u ch'éenel palitzilil, yaan a wa'alique'ex ca ch'éenec palitzilil ti' tuláacal u cajnáalil le lu'umo'. Tuláacal máac bíin suunac tu yotoch yéetel tu lu'umil. 11Le cincuenta ja'abo' a ti'ale'axe' u ja'abil u ch'éenel palitzilil, ma' bíin a pake'ex mix a jochque'ex trigo chéen tu juunal joki', mix a ch'acku'uktique'ex a paakal uvaex mix a molique'ex u yich. 12Tumen a ti'ale'exe' jun p'éel u quili'ich ja'abil u ch'éenel palitzilil, yaan a jaantique'ex chéen le ba'ax bíin u dzáa le lu'umo'. 13Ti' u ja'abil u ch'éenel le palitzililo' tuláacal máac bíin suunac u ti'alint le lu'umo'. 14Wa máax cu conic wa cu manic le lu'um ti' u láak máaque' yaan u yilic ma' u yocoltic; 15le máax manico' unaj u bo'otic u kiinilo'ob j mano'ob ti' le u ja'abil p'at palitzilo', le máax conique' unaj u bo'ota'al ti' le u ti'al u chuquic u láak u ja'abil jooch cu bineltico': 16le u buca'aj ja'abil jooch cu bineltique', le u buca'aj u tojol; wa cu p'áatal jun p'íit ja'abo'obe', jun p'íit u tojol, tumen le cu co'onolo' u buca'ajil le jooch cu bineltico'.
17Mix máac u máan u kab ti' mix máac, e'ese'ex tziiquilil ti' Junab Ku, tumen teen Yuumtzil a Junab Kuex. 18Dzo'ocbese'ex ba'ax cu ya'alic in wa'almaj t'aan, cuxlene'ex ichil in tzolbe'en t'aan. Dzo'ocbese'ex ba'ax cu ya'alic u ti'al a cuxtale'ex yéetel jéedzel te j lu'uma'; 19le lu'umo' yaan u dzáaic u yich, te'exe' yaan a cuxtale'ex ich jéedzel óolal, tumen yaan a jaantique'ex le u yicho'obo' tac quéen na'ajchajaque'ex.
20Ma' xan ca káat chi'ite'ex: ¿ba'ax bíin c jaant tu kiinilo'ob u siete ja'abo' wa ma' tu páajtal c paakal mix tu páajtal c molic jooch? 21Wa ti'olal lelo' bíin in túuxt ti' te'ex in qui' t'aan tuláacal le seis ja'abo'obo', tumen le joocho' je'el u chúucpajal tac u ti'al óox p'éel ja'abo'ob; 22le beetic yaan a jaantique'ex le janalbe'en neek a kalma'exo' ca'aliquil a paakale'ex tu ca'a téen tu ocho ja'abil, tac tu nueve ja'abil je'el u yantal u ti'al a jaante'ex le janalbe'en neeko'ob a kalme'exo, ca'aliquil u kuchul u kiinil le jocho'.
23Le lu'umo' ma' unaj a conique'ex jun puli'i'; tumen in ti'al, te'exe' chéen máanalbe'ene'ex beye'ex in wu'ulabe'. 24Le t óolale' je'el ba'ax lu'umil yaan te'ex bey ba'al a ti'ale'exe', unaj a p'atic u manic u yúuchben yuumilo'ob.
25Wa jun túul a wéet caajal cu p'áatal nakan óotzil tu yo'olal lelo' cu taal u contech u lu'ume', jun túul u nadza'an láaktzile' cu páajtal u ca'a bo'otic le ba'ax tu conaj u láaktzilo'.
26Wa máax mina'an u láaktzil ca páatac u ca'a bo'otique', wa le ti' cu much'quintic u tojole' je'el u páajtal u ca'a bo'otique'. 27Yaan u xoquic buca'aj kiino'ob dzo'oc u máan le ca tu conajo', u ti'al u sutic le taakin cu chíicpajal ti' le máax tu manajo', beyo' cu p'áatal u ti'alinte. 28Wa ma' tu páajtal u much'quintic u ti'al u bo'otique', le lu'umo' cu p'áatal u ti'al le máax tu manajo' tac quéen kuchuc u ja'abil u xuul palitzilil, le máax tu conajo' cu suut u ti'alinte.
29Wa máax cu conic jun p'éel u yotoch ti'an ti' jun p'éel tuulum caaje', je'el u páajtal u ca manque' le quéen máanac jun p'éel ja'ab le ca tu conajo'. 30Ba'ale' wa ma' tu páajtal u manic ti' le ja'ab cu bin j máano', yaan u p'áatal jun puli' ti' le máax j ma'ano' yéetel ti' u ch'i'ibalo'ob. Lelo' ma' tu páajtal u ma'anal tu ja'abil u xuul palitzilil. 31Ba'ale' le najo'ob yano'ob ti' le mejen caajo'ob ma' kala'an u paacho'ob mina'an u jela'anil ti' u cajtalilo'ob cool: lelo'obo' je'el u páajtal u maanale' tumen yaan u jáalkabta'alo'ob tu ja'abil u xuul palitzilil.
32Le j levitaob je'el u páajtal u ca'a manico'ob le najo'ob yaan ichil le noj caaj u ti'alo'obo'. 33Wa jun túul j levie', le máax cu maano' unaj u jóokol ti' le najo' tu ja'abil u xuul palitzilil xi'ic tu noj caaj tu'ux yaan yotoch tumen le ba'ax u ti'al le j levitaob ichil israele' chéen le naj yaan ti'ob te j noj caajo'. 34Le u lu'umilo'ob u cananta'al j tamano'ob te noj caajo'obo', ma' tu páajtal u coonol tumen chéen u ti'alo'ob láaj kiin.
35Wa jun túul a wéet caajal cu yóotziltal, cu taal ta wicnale', unaj a wáantic je'el bix jun túul táanxel lu'umil cu nakan káatal, yaan a wocsic ta wotoch. 36Ma' a lukesic mix ba'al ti', mix a káatic u bo'olal yóokol ba'ax ca dzáic u paye', e'es ti' yaan teech u sajac óolal Ku, yaan a wocsic ta wotoch. 37Ma' a káatic u tip'a'anil tu yo'olal le taakin ca dzáic páayil, mix a co'ojquintic le janal ca tzáic ti'o'. 38Tene', Yuumtzilen, a Kuex tu jóokesaje'ex Egipto u ti'al u dzáicte'ex u lu'umil Canaán, yéetel u ti'al u beticubáa a Kuex.
39Wa jun túul a wéet caajal cu nakan yóotzital ti'an ta wicnal cu concubáa ti' teche', ma' a beetic u meyaj bey palitzile'; 40beet bey jun túul a j meyaje' wa bey jun túul a wu'ulabe', yaan u meyajtiquech tac tu ja'abil u xuul palitzilil, 41cu dzo'ocole' je'el u páajtal u p'atic a wotoch yéetel u paalal, u ti'al ca suunac tu ca'a téen ichil u ch'i'ibalo'ob yéetel ti' le ba'alo'ob u ti'alo', 42tumen le ti'obe' in palitzilo'ob; téen tin jóokesa'abo'ob Egipto, ma' unaj u co'onolo'ob u ti'al palitzilil. 43Ma' a loobiltico'ob; ba'ale' yanac teech u sajaquil a Ku.
44Wa a káat ca yanac teech x palitzil wa j palitzilo'obe' unaj a manico'ob táanxel lu'um ichil le yano'ob ta bakpacho'. 45Bey xan je'el u páajtal a manic le j táanxel lu'umo'ob caja'ano'ob ichile'exo', wa u paalalo'ob cu síijilo'ob ca'aliquil cajnáalo'ob ta caajal; leti'obe' je'el u páajtal a manic a ti'alinto'obe'. 46P'ato'ob u ti'al a paalal le quéen quíimque'exe'; láili' je'el u páajtal u palitziltico'obe'. Ba'ale' mix jun túul ichile'ex israelil unaj u dzáanchatic mix u beetic u mukyaj u sucu'un, u yéet ki'ikel.
47Wa jun túul táanxel lu'umil cu ayiikaltal caja'an ta lu'umile' ba'ale' jun túul a wéet caajal naadz ti' le j táanxel lu'umil, cu yóotziltal ti'olal lelo' cu concubáa ti'e', wa ti' u láak j táanxel lu'umile', 48je'el u páajtal u jóokesic tu palitzile' quex dzo'oc u concubáa, wa cu ma'anal tumen jun túul u láaktzil, 49wa u yéet ki'ik u taata wa je'el máax láaktzil naadz ti'e', bey xan je'el u páajtal u mancubáa le ti'e' wa yaan u tojol ti', 50yaan u bo'otic ti' le máax j mano' u ja'abil le ca tu conjubáe' tac u ja'abil u xuul palitzilil: u tojole' je'el bix buca'ajil le ja'abo'ob dzo'oc u maano' bey xan u jay p'éel kiinilo'ob dzo'oc u meyaj, buca'aj xan u bo'olil suuc u dza'abal ti' le j meyajo'obo'. 51Wa ya'ab ja'abo'ob cu binetique' yaan u dzáic jun jatz le taakin tu kamaj ca tu conjubáo'; 52wa jun p'íit u bin u ti'al u ja'abil p'atic palitzilile', cu bo'otic le ja'abo'ob cu bineltico'. 53Unaj u yila'al bey jun túul j meyaj cu taal u ti'al jun ja'ab ma' a cha'ic u beeta'al u yayaj meyaj.
54Wa ma' tu ma'anal ti' le kiino'obo', cu jáalkabta'al tu ja'abil u xuul palitzil pa'ate' yéetel u paalal, 55tumen le j israelitaob in palitzilo'ob, in ti'alo'ob tumen teen tin jóokeso'ob Egipto. Tene' Yuumtzilen a Junab Kuex.
Currently Selected:
Levítico 25: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
