Levítico 26
26
Qui'it'aano'ob u ti'al aj u'uyaj t'aano'ob
(Dt 7.12-24; 28.1-14)
1Ma' a beetique'ex kuob mix u yoochelo'ob; mix xan a líiksique'ex quili'ich tuunicho'ob mix póolbil tuunicho'ob, ma' chintale'ex tu táano'ob, tumen tene' Yuumtzilen a Junab Kuex. 2Táanbese'ex in sábado'ob, bey xan tzique'ex in quili'ich naj: Tene' Yuumtzilen. 3Wa ma' ta tzelcaba'ex ti' in wa'almaj t'aano'ob yéetel ca dzo'ocbesique'ex yéetel a cuxtale'exe', 4tene' bíin in túuchi'it ti' te'ex cháac tu kiinil, le lu'um yéetel u che'ilo'ob le káaxo' bíin yanac u yicho'ob; 5bíin yanac trigo tac u kuchbal u kiinil u t'o'ocol u yich uva, yaan u yantal u yich uva tac u kuchbal u kiinil yúuchul paakal; yaan a jaantique'ex waaj tac a na'ajtale'ex, yéetel yaan u qui'imactal a wóole'ex yéetel jéedzelil ta caajale'ex. 6Yaan in beetic u bin te'ex utzil ta caajale'ex, yaan a wenele'ex x ma' ja'asaj óolil, tumen tene' bíin in canant a caajale'ex ti' dzíidzic ba'alche'ob yéetel ti' aj ba'atelilo'ob. 7Te'exe' bíin a ch'a'apachte'ex a aj p'eeque'ex, leti'obe' bíin lúubco'ob tu yej máascab ta táane'ex; 8cinco ti' te'exe' bíin u ch'a'apacht cien, ciene' bíin u ch'a'apacht diez mil; a aj p'eeque'exo' bíin lúubuco'ob ta táane'ex yéetel yej máascab. 9Bíin in wutzil pacte'ex u ti'al in beetic a ya'abtale'ex, yéetel bíin in jedzcunt in nup t'aan ta wéetele'ex. 10Bíin a jaante'ex le trigo a kalmaje'ex ti' táanxel ja'abo'obo', cu dzo'ocole' yaan a jóokesique'ex le yaan ichil a ch'iile'ex u ti'al a kalque'ex le túumben trigoo'. 11Tene' bíin cajlaquen ichile'ex, ma' bíin in tzele'ex tin táani'; 12mantadz bíin xíimbalnaquen ta wéetele'ex, bíin a Kuintene'ex, te'ex xane' bíin in caajalte'ex. 13Tene' Yuumtzilen a Kuex máax jóokese'ex Egipto tu yo'olal u jáawal a palitzilta'ale'ex tumeno'ob: tene' tin cachaj u jokoljokil a caale'ex t'onquintmaile'exe' ca tin beetaj a mane'ex yéetel ca'anal táan jo'olil.
U sajbejsa'al lej ma' u'uyaj t'aano'ob
(Dt 28.15-68)
14Ba'ale' wa te'ex ma' ta ch'en xiquintique'ex mix ta dzo'ocbesique'ex le a'almaj t'aano'oba', 15tumen ca tzelique'ex yéetel ca kex óoltique'ex in tzolbe'en t'aano'ob, cu dzo'ocole' ma' ta dzo'ocbesique'ex mix jun p'éel ti' in wa'alaj t'aano'obe', beyo' ca j ma' u'uyaj t'antique'ex in nup t'aan.
16Teen xane' bíin in beet bey ta wéetelexa': bíin in túuchi'it te'ex sajaquil, báan quíimil, chocwil, x yayaj ichil, yéetel ma' óol wíinclil; ti' mix ba'al bíin meyajnac te'ex a paakale'ex tumen a aj p'eeque'exo'ob bíin u jaanto'ob a joche'ex.
17Teen bíin in beet ca xi'ic te'ex kaasil bíin ca pa'abac a muuke'ex tumen a aj p'eeque'exo'ob; yaan a t'onquinta'alex tumen máaxo'ob p'ecmaile'ex, bey xan yaan a púudzule'ex quex mix máac áalcabansique'ex.
18Wa ma' bíin a wu'uye'ex in t'aan quex beyo', bíin in ca'a núumsajtique'ex siete u téenel tu yo'olal a kebane'ex. 19Bíin in tzel a ca'anal ichile'ex; yaan in beetic u jáawal u káaxal ja' yéetel u ch'éenel u yantal u yich u che'ilo'ob káax.
20Chéen cunel a bine'ex a pul a muuke'ex tumen le lu'umo', ma' bíin u dzáate'ex mix ba'ali', mix u che'ilo'ob káax bíin yanac yicho'ob.
21Wa xi'ic u bíin a mukul muuke'ex ti' tene', ca pechcaba'ex a ma' wu'uyaj t'aane'exe', bíin in ca jadze'ex siete u téenel je'el bix ti' u buca'aj a kebane'exe'. 22Bíin in túuchi'it ta wóokole'ex u ba'alche'ilo'ob káax u ti'al u p'ate'exo'ob x ma' paalil, bíin u xe'exet'o'ob a wacaxe'ex bey xan bíin u p'ato'ob jun p'íite'ex tac u beet u p'áatal mina'an máax xíimbal ti' le bejo'obo'.
23Wa mix bey bíin utzchajque'ex tumen xi'ic u bin a pechicaba'ex ti' teen, 24teen xane' bíin in pechimbáa in jadze'ex u láak siete u téenel tu yo'olal a kebane'ex. 25Bíin túun in beet u taal ta wóokole'ex jun p'éel máascab ca'a mat yej u ti'al jadzique'ex úuchic a x ma' u'uyaj t'antique'ex in nup t'aan; te'exe' bíin xi'ique'ex a ta'acaba'ex ichil a caajale'ex, ba'ale' tene' bíin in túuchi'it ti' te'ex koja'anilo'ob, bey xan bíin lúubuque'ex tu táan a aj p'eeque'ex.
26Le quéen dzo'ococ in xu'ulsic tu'ux cu taal a wo'oche'exe', diez co'olelo'ob bíin u póoco'ob ti' jun p'éel xamach a wo'och waaje'ex cu dzo'ocole' cu t'oxico'ob te'ex a jaante'ex, ba'ale' ma' bíin na'ajaque'exi'.
27Wa mix bey bíin a wu'uyaj t'antene'ex tumen xi'ic u bin a pechcaba'ex ti' tene', 28teen xane' quin pechquimbáa te'ex, yéetel p'uujul bíin in jadze'ex u láak siete u téenel tu yo'olal a kebane'ex. 29Te'ex túune' bíin a jaante'ex a j xibil paale'ex yéetel a x ch'upul paalale'ex. 30Tene' bíin in jut u quili'ich naj a beetbil kuex bey xan bíin in jóokes ca'a búuj ti' u multuunil u kultajil a tóoc poome'ex; bíin in nijcunt a j quimen wíinclile'ex tu yóokol u j quimen wíinclil a beetbil kuex, yaan in we'esic te'ex in kéex óolal. 31Bíin in p'at x la' caajil a caajale'ex bey xan bíin in láaj jut a quili'ich najilo'ob, cu dzo'ocole' ma' bíin qui'imacchajac in wóol yéetel a qui'iboc ja'obi'. 32Bíin in láaj kascunt a lu'ume'ex, le a aj p'eeque'exo'obo' bíin u cáajbeso'ob, p'áatal jaka'an u yóolo'ob. 33Te'exe' bíin in ki'itbese'ex yóokolcaab, bíin in ch'a'apachte'ex yéetel in máascab; a lu'ume'exe' bíin suunac x tocoy lu'umil, bíin suunaco'ob u caajilo'ob jak óolal. 34Le lu'umo' bíin u kiinbes le sábado'ob tu kiinilo'ob chéen x tocoy ca'aliquil ti' yane'ex tu lu'um a aj p'eeque'exo'obo'; beyo' bíin máans u sábadoilo'ob le kiino'ob ma' páatchaj ca'achoo'. 35Tuláacal le kiino'ob p'áatal x tocoye', le lu'umo' bíin yanac u sábado ti' tuláacal le kiino'ob ma' ta cha'aje'ex u yanatal ca'aliquil ti' cajnáale'exo'. 36Le je'enque'ex ti' te'ex bíin p'áatac cuxtal tu lu'um le aj p'eeco'ob, bíin in beet a sen sajactale'ex chéen tu yo'olal u juum u lúubul u le' che'; leti' bíin beetic a wáalcabe'ex, bíin púudzuque'ex óoli' bey ch'a'apachta'ane'ex yéetel máascabe', bíin lúubuque'ex x ma' ch'a'apachtajil; 37bíin a jéentantaba'ex óoli' bey táan a púudzule'ex ti' ba'atele', quex mix máac ch'a'apachtique'ex; ¡mix jun túul ti' te'ex bíin páatac u yantal actáan ti' u aj p'eeco'obi'! 38Bíin xu'ulsa'aque'ex ich múuch' caajo'ob, u lu'um a aj p'eeque'exo'ob bíin xu'ulsique'ex; 39cu dzo'ocole' le máaxo'ob bíin p'áataco'ob tu lu'um u aj p'eeco'obe', yaan u quíimilo'ob tu yo'olal u kasa'anilo'ob; ¡bíin quíimique'ex pa'ate' yéetel a taataex yo'olal u kasa'anilo'ob! 40Quex ca a kaj óolte'ex a kasa'anile'ex yéetel u kasa'anil a taataex, bey xan tu yo'olal ma' u táan óolteno'ob yéetel tu pechuba'ob tene', 41teen xane' bíin in pechimbáa te'ex u ti'al in bisique'ex tu lu'um a aj p'eeque'exo'ob; a j ma' ocsaj óol tuucule'ex bíin sublacchajac te'elo', yéetel bíin a kame'ex u jaadzil a kebane'ex. 42Teen túune' bíin ka'ajac teen le nup t'aan tin beetaj yéetel Jacob, Isaac yéetel Abraham, bey xan bíin ka'ajac teen le lu'umo', 43bíin p'áatac jáalkabil u ti'al u yantal u jéedzelil ca'aliquil mina'ane'exi'; beyo' te'exe' bíin a kame'ex u jaadzil a kasa'anile'ex tumen ta kex óolte'ex in tzolbe'en t'aano'ob yéetel ta manbalcunte'ex in wáalmaj t'aano'ob. 44Quex beyo', quex ti' yane'ex tu lu'um a aj p'eeque'exe', ma' bíin in kex óolte'exi'; mix bíin in p'ate'exi', ma' bíin tu'ubuc teen in nup t'aan tin beetaj yéetel a taataob, tumen tene' Yuumtzilen a Junab Kuex. 45Ba'ale' bíin ka'ajac teen le nup t'aan tin beetaj yéetelo'ob le ca tin jóokeso'ob Egipto tu táan yich múuch' caajo'ob u ti'al in beetiquinbáa u Kuob. Tene' Yuumtzilen. 46Lelo'oba' leti' le a'almaj t'aano'ob, tzolbe'en t'aano'ob yéetel ca'ansajo'ob dzaab tu chi' Moisés tumen Yuumtzil tu witzil Sinaí u ti'al leti' yéetel le j israelitaobo'.
Currently Selected:
Levítico 26: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
