Levítico 24
24
Aceite u ti'al x t'uchub sáaso'ob
(Ex 27.20-21)
1Yuumtzile' tu t'anaj Moisese' ca tu ya'alaj ti': 2Túuchi'it ti' le j israelitaob ca u taaso'ob u aceiteil chéen oliva u ti'al u t'a'abal mantadz le sáaso'obo'. 3Aarón bíin u yila'aj u p'áatal t'aba'an buul áakab tu táan Yuumtzil tu noj Paselil Much'tal, tu paach le káasab yaan tu tzéel u ba'asche'il le nup t'aano'. Lela' jun p'éel a'almaj t'aan u ti'al tuláacal kiin bíin máanac ti' taataob tac ti' u paalalo'ob. 4Bíin u máakant u sáaso'ob le t'uchub sáas beeta'an yéetel ma'alo' oro u ti'al u p'áatal t'aba'an tu táan Yuumtzil.
U waajil táanbesaj
5Ch'a' u ma'alobil juuch' ca a takancunt doce piimpiim waajo'ob, yaan ti' tu jujun p'éelile' can wuudz ca tac táancoch 6Dzaj tu yóokol le táasche' beeta'an yéetel ma'alo' oro yaan tu táan Yuumtzil, ca tzoolil u ti'al u yantal seis ti' u jujun tzoolil. 7Dzaj tu jujun tzoolil ma'alob poom tu yo'olal u meyaj ti' le waaj u ti'al u ti'ibil óolal ka'asajil cu tóoca'al tu nojbe'enil Yuumtzilo'. 8Lela' manaltzail u dza'abal tu táan Yuumtzil tu jujun p'éel sábado u ti'al u nup t'aan le j israelitaob tuláacal kiino'obo'. 9Le jaatzil je'elo', mantadz u ti'al Aarón yéetel u ch'i'ibalo'ob, unaj u jaantico'ob le waaj ti' jun p'éel quili'ich cúuchil, tumen ti' le ti'ibil óolalo'ob cu tóoca'al tu nojbe'enil Yuumtzilo', le je'ela' jun p'éel u asab quili'ichil
U jaadzil máaxo'ob poch'ic Ku
10-11Ichil le j israelitaobo', yaan ca'ach jun túul j xiib sijnal ti' jun túul maama x israelil yéetel ti' jun túul taata j egiptoil. U maamae' cu kaaba'intic ca'ach Selomit, u x ch'upul paal Dibri ti' u múuch' cajtalil u yotochnáalo'ob Dan u taal. Le j xiiba' ba'atel t'aanaj yéetel jun túul j israelita, ichil le péetcaajo', ca'aliquil ichil lelo' u j xibil paal le x israelilo', tu poch'aj yéetel tu loolob t'antaj u kaaba' Yuumtzil. Bisa'ab túun tu táan Moisese' 12ca j dzaab ma'axo'ob ch'úuctic ca'aliquil u ya'alal tumen Yuumtzil ba'ax unaj u beeta'al. 13Yuumtzile' tu t'anaj Moisese' ca tu ya'alaj ti': 14Jóokes tu paach péet caaj le máax kaakas t'aanajo'; ca u dza'ob tu yóokol u poole' u kabo'ob le máaxo'ob u'uyo', ca quíimsa'ac yéetel ch'iin tumen tuláacal le caajo'. 15-16Ti' le j israelitaobo', a'al beya': Le máax bíin poch'ic yéetel bíin kaakas t'antic u kaaba' Yuumtzil u Kue', yaan u cuchic u keban, yaan u quíimsa'al yéetel ch'iin tumen tuláacal caaj. Je'el bix wa j táanxel lu'umile', bey xan wa sijnal ichile'ex, wa cu poch'ic u kaaba' Yuumtzile' bíin xot kinta'ac u ti'al quíimil.
17Le máax bíin quíimsic u láak máaque', yaan u xot kinta'al u ti'al quíimil.
18Le máax bíin quíimsic jun túul wacaxe', yaan u sutic u jeel: ba'alche' tu yo'olal ba'alche'.
19Le máax bíin beetic loob ti' jun túul u yéet caajale', bíin u mukyajt láili' je'el bix le loob tu beetajo': 20Cach baac yéetel cach baac, ich yéetel ich, coj yéetel coj; yaan u mukyajtic tu wíinclil láili' je'el bix le loob tu beetajo'.
21Le máax bíin quíimsic jun túul ba'alche'e', yaan u sutic u jeel. Le máax quíimsic jun túul j xiibe', yaan u xot kinta'al u ti'al quíimil.
22Jun p'éel a'almaj t'aan u ti'al je'el bix le j táanxel lu'umilo', bey u ti'al le máax sijnal ichile'exe'. Tene' Yuumtzilen a Junab Ku.
23Moisés túune' j t'aanaj yéetel le j israelitaobo', ca tu jóokesajo'ob tu paach le x péetcaaj le máax kaakas t'ant Kuo', ca tu quíimsajo'ob yéetel ch'iin. Le j israelitaobo' tu beetajo'ob je'el bix tu ya'alajil Yuumtzil ti' Moiseso'.
Currently Selected:
Levítico 24: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
