Levítico 14
14
U tzol xiquin u ti'al máaxo'ob cu yutztalo'ob ti' jáaway
1Yuumtzile' tu t'anaj Moisese' ca tu ya'alaj ti': 2Lela' u tzol xiquinilo'ob u ti'al máaxo'ob cu yutztalo'ob ti' jáaway: Le koja'ano' bíin bisa'ac tu táan aj kiin, 3le aj kiino' cu jóokesic tu paach caaj u xakal ile. Wa le aj kiin cu yilic dzo'oc u yutztal le jáaway ti' le koja'ano', 4cu ya'alic ca taasa'ac ca'a túul mejen ch'íich'o'ob cuxa'antac jana'albeno'ob, u che'il cedro, chac nook yéetel x widzib u ti'al le máax cu yutztalo'. 5Cu beetic u quíimsa'al jun túul le ch'íich' tu yóokol jun p'éel cuum beeta'an yéetel kat dza'an u ja'il sayab ichil, 6cu ch'a'ic le cuxa'an ch'íich'o', u che'il cedro, le chac nook yéetel le x widzibo', cu láaj pa'ate' ch'ulic tac le cuxa'an ch'íich' yéetel u ki'ikel le quimen ch'íich' tu yóokol u ja'il le sayabo'. 7Cu dzo'ocole' cu widzic siete u téenel yéetel le ki'ik le máax cu bin j p'a'atal yutzil ti' le jáawayo', le aj kiino' cu ya'alic utz yanil. Le cuxa'an ch'íich'o' cu jáalkabtic.
8Le máax cu p'áatal utzo' unaj u p'o'ic u nook, u p'o'icubáa yéetel u láaj dziquicubáa, tu yo'olal u p'áatal utzil. Cu dzo'ocole' je'el u páajtal u suut ichil le x péet caaj, quex tumen yaan u p'áatal táancab siete kiino'ob. 9Tu siete kiine' cu láaj kolistic u pool, cu dziquic u me'exil u no'och yéetel u mojton bey xan tuláacal u tzo'otzel, cu p'o'ic u nook yéetel cu p'o'icubáe', cu p'áatal utz yanil. 10Tu ocho kiine' cu ch'a'ic ca'a túul mejen j taman láaj utz u wíinclilo'ob, jun túul chan x ja'aben x taman láaj utz u wíinclil; bey xan seis u wuudzil ca tac táancoch u ma'alobil juuch' u ti'al u ti'ibil óolal jejeláas neeko'ob xa'akta'an yéetel aceite, bey xan jun jatz ti' óox jaatzil jun litro aceite. 11Le aj kiin beetic u meeyjul le utzquinajilo', bíin u dzáa le máac cun j bin u lukes u kaasilo', tu tzéel u ba'aluba'ob tu jool u noj Paselil Muuch'tal tu táan Yuumtzil; 12cu dzo'ocole' cu ch'a'ic jun túul chan j tamane', cu táanbesic yéetel jun jatz ti' óox jaatzil jun litro aceite u ti'al quíimsbil ba'alche' tu yo'olal si'ipile' cu táanbesa'al ti' Yuumtzil. 13Unaj u quíimsic le chan j taman ti' le cúuchil jun páaycuna'an tu'ux cu xo'otol u yúul le ba'alche'obo'. Le quíimsbil ba'alche' tu yo'olal si'ipilo', u ti'al le aj kiino', bey xan le cu quíimsa'al tu yo'olal kebano', tumen sen quili'ich.
14Cu dzo'ocole' le aj kiino' cu ch'a'ic jun p'íit u ki'ikel le ba'alche' quíimsa'an tu yo'olal si'ipilo', cu cu'ultic ti' le máax cu bin ca luksa'ac u kaasilo', yáanal u x no'oj xiquin, tu poloquil u yaal u x no'oj kab yéetel tu poloquil u yaal u x no'oj ooc. 15Cu dzo'ocole' cu ch'a'ic jun p'íit aceite', cu yalic tu táan u x dzíic kab; 16cu ch'ulic u yaal u x no'oj kab yéetel le aceite yaan tu táan u kabo', cu widzic siete u téenel tu táan Yuumtzil yéetel u yaal u kabo'. 17Ti' le aceite cu p'áatal tu táan u kab le aj kiino', yaan u ch'a'ic jun p'íit u ti'al u cu'ult ti' le máax cu luksa'al u kaasil yanilo', yáanal u x no'oj xiquin, tu poloquil u yaal u x no'oj kab yéetel tu poloquil u yaal u x no'oj ooc tu yóokol tu'ux cu'ulta'ab u ki'ikel le ba'alche' quíimsa'an tu yo'olal si'ipilo', 18u yalab le aceiteo' cu cu'ultic tu pool le máax cu luksa'al u kaasilo'. Beyo' le aj kiino' cu kamic ti' Yuumtzil u sa'atsaj si'ipil le máaco'. 19Cu dzo'ocole' le aj kiino' cu táanbesic le quíimsbil ba'alche' tu yo'olal keban u ti'al u yutztal le koja'ano'; tu paache' bíin táanbesa'ac le quíimsbil ba'alche' láaj tóocbilo', 20cu táanbesic tu yóokol u multuunil kultaj tu tzéel u ti'ibil óolalil jejeláas neeko'ob. Beyo' le aj kiino' cu kamic sa'atsaj si'ipil u ti'al le máaco', cu p'áatal utz yanil.
21Wa óotzil le máax koja'an mina'an taakin u ti'al u manic tuláacal le ba'alo'oba', cu ch'a'ic jun túul chan j taman u ti'al quíimsbil tu yo'olal si'ipil, cu táanbesic chéen u ti'al ti'ibil óolal u ti'al u ka'amal u sa'atsaj si'ipil kebano'ob, bey xan jun p'íit máanja'anil ti' ca'a wuudz ma'alob juuch' xa'akta'an yéetel aceite u ti'al u ti'ibil óolal jejeláas neeko'ob yéetel jun jatz ti' óox jaatzil jun litro aceite, 22bey xan ca'a túul mucuy wa ca'a túul u mejnil sacpacal, je'el bix bíin páatac u manique', jun túul u ti'al quíimsbil tu yo'olal kebani' yéetel u láak jun túul u ti'al láaj tóocbil. 23Tu ocho kiine' cu láaj bisic ti' aj kiin u ti'al u yutztal, cu kubic tu táan Yuumtzil tu jool u noj Paselil Muuch'tal. 24Le aj kiino' cu ch'a'ic le chan j taman quíimsa'an tu yo'olal keban yéetel jun jatz ti' óox jaatzilo'ob jun litro aceite', cu táanbesic tu táan Yuumtzil chéen u ti'al ti'ibil óolal; 25cu xotic u yúul le chan j taman cu quíimsa'al tu yo'olal kebano', cu cha'ic jun p'íit u ki'ikel u ti'al u cu'ult ti' le máax cu yutztal ti' yanilo', yáanal u x no'oj xiquin, tu poloquil u yaal u x no'oj kab yéetel tu poloquil u yaal u x no'oj ooc; 26cu dzo'ocole' cu yalic jun p'íit aceite tu táan u x dzíic kab, 27cu widzic siete u téenel yéetel u yaal u x no'oj kab tu táan Yuumtzil le aceite yaan tu kabo'. 28Yaan xan u cu'ultic ti' le máax cu yutztalo', jun p'íit aceite, yáanal u x no'oj xiquin, tu poloquil u yaal u x no'oj kab yéetel tu poloquil u yaal u x no'oj ooc le tu'ux tu cu'ultaj u ki'ikel le ba'alche' quíimsa'an tu yo'olal kebano'. 29U yalab le aceiteo', bíin u cu'ult le aj kiin tu pool le máax cu yutztal, u ti'al u kamic ti' Yuumtzil u sa'atsajil u keban. 30Cu dzo'ocole' cu táanbesa'al tumen le aj kiino' jun túul mucuy wa jun túul chan sacpacal, je'el ba'alac páatchaj u taasic le máax cu luksa'al u kaasilo'. 31Jun túul ti' le ch'íich'o'obo' u ti'al quíimsbil tu yo'olal keban, u láak jun túule' u ti'al láaj tóocbil je'el bix bíin beeta'ac yéetel u ti'ibil óolal jejeláas neeko'obo'. Beyo' le aj kiino' cu kamic ti' Yuumtzil u sa'atsaj si'ipil le máax cu luksa'al u kaasilo'.
32Lelo'oba' u a'almaj xiquinilo'ob máaxo'ob koja'ano'ob yéetel u noj yajilo'ob jáaway ma' tu chucmuktico'ob u asab nojochil ti'ibil óolal u ti'al yutztalo'ob.
Tzol xiquino'ob u ti'al najo'ob yaan u cuuxumil jáaway ti'ob
33Yuumtzile' tu t'anaj Moisés yéetel Aarone' ca tu ya'alaj ti'ob: 34Le quéen jéedzec a cajtale'ex tu lu'umil Canaane' bíin in kub a ti'alinte'ex, wa quin túuchi'itic u báan cuuxumil jáaway tu yóokol je'el ba'axac najil te j lu'umo', 35u yuumil le najo' yaan u bin u yila'aj le aj kiino', ca u ya'al ti': Bey in wóol yaan báan cuuxumil jáaway tin wotoche'.
36Le aj kiino' ma'ili' ococ te j najo', cu beetic u láaj jóokesa'al le nu'uculo'ob yaan ichilo', tu yo'olal ma' u kastalo'ob, cu dzo'ocole' cu yocol u xakal il le báan cuuxumo'.
37Wa le quéen u xakal il le aj kiin cu yilic nucuch cuuxumo'ob tu pakil le naj ya'axcume'en wa chaccuxem t'úubul ti' le pako', 38le quéen jóokoc ti' le najo', cu beetic u p'áatal kala'an siete kiino'ob. 39Tu siete kiine' cu suut le aj kiin u xakal ile, wa dzo'oc u búucpajal le cuuxum tu pakilo'ob le najo'; 40cu ya'alic ca jo'ococ le tuunicho'ob yaan u cuuxumil u ti'al ca xi'ic pulbil tu paach le caajo', ti' jun p'éel cúuchil tu'ux cu pu'ulul u ta' míis; 41cu beetic xan u láaj jo'ocha'al ichil le najo', cu pu'ulul tu paach caaj le lu'um jo'ocha'abo', ti' jun p'éel cúuchil tu'ux cu pu'ulul u ta' míis. 42Cu ch'a'abal túun u láak tuunicho'ob u jeelinto'ob le lukesa'abo'ob, bey xan túumben luk u ti'al u pak lu'umta'al le najo'.
43Wa cu ca'a chíicpajal le cuuxum te j naj cu dzo'ocol u ke'exel u tuunichilo'ob, u jo'ocha'al u pakil yéetel u jel pak lu'umtalo', 44le aj kiino' cu yocol u xakal ile. Wa le cuuxum dzo'oc u búucbesic le najo', lelo' jáaway mina'an dzaac u ti'al, le najo' kaas yanil. 45Tu yo'olal lelo' le najo' yaan u láaj ju'utul, yaan xan u láaj pu'ulul u lu'umil le pucbil pak tu paach caaj tu'ux cu pu'ulul u ta' míis. 46Je'el máax ca ococ ichil le naj ti' le kiino'ob u ya'almaj le aj kiin ca ka'alaco', yaan u ya'alal ma' utz yanil tac u yocbal kiin. 47Je'el máax ca janac wa ca wenec ti' le najo', unaj u p'o'ic u nook u ti'al ca utzac.
48Wa le quéen ococ le aj kiin u yil le naj, cu yilic ma' búucbesa'ac tumen le cuuxumo'ob cu dzo'ocol u ca'a pak lu'umtale', cu ya'alic utz yanil le najo', tumen dzo'oc u xu'ulul u cuuxumtal. 49U ti'al u yutzquintic le najo', bíin u ch'a'a' ca'a túul ch'íich', u che'il cedro, chac nook yéetel x widzib. 50Cu quíimsic jun túul ti' le ch'íicho'ob tu yóokol jun p'éel cuum beeta'an yéetel kat, ch'a'an ichil u ja'il sayab. 51Cu dzo'ocole' cu ch'a'ic le cedro', le x widzibo', le chac nook yéetel le ch'íich' cuxa'ano', cu ch'ulico'ob yéetel u ki'ikel le j quimen ch'íich'o', bey xan yéetel u ja'il le sayabo', cu widzic siete u téenel le najo'. 52Bey bíin u yutzquint le naj yéetel u ki'ikel le j quimen ch'íich', u ja'il le sayabo', le j cuxa'an ch'íich'o', le cedro', le x widzibo' yéetel le chac nooko'. 53Cu dzo'ocole', tu paach le caajo', cu jáalkabtic le cuxa'an ch'íich'o', tumen beyo' cu dzo'ocbesic le ba'ax kabéet u ti'al u yutztal le najo'.
54Le je'elo'oba' u tzol xiquinilo'ob je'el ba'ax koja'anile' jáaway wa j ma'ak, 55wa u jáawayil nook yéetel najo'ob, 56wa chu'uchumo'ob, pawo' yéetel jóojom saquilo'ob, 57u ti'al u páajtal u kaj óolta'al ba'ax utz wa ba'ax ma' utzi'. Lelo'oba' u ya'almaj xiquinilo'ob jáaway.
Currently Selected:
Levítico 14: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
