Levítico 13
13
Tzol xiquino'ob u ti'al máaxo'ob koja'ano'ob ti' jáaway
1Yuumtzile' tu t'anaj Moisés yéetel Aarone' ca tu ya'alaj ti'ob: 2Le quéen yanac máax cu chíicpajal tu wíinclil chu'uchumo'ob, pawo', jóojom sacpoos, wa pokchaja'anil bey jáawaye', unaj u bisa'al tu yicnal aj kiin Aarón wa ti' jun túul u ch'i'ibal. 3Le aj kiino' unaj u xakal ilic le pokchaja'anilo': wa dzo'oc u sactal u tzo'otzel bey xan asab dzaamal ti' u yoot'ele', lelo' bey u koja'anil jáawaye'. Cu dzo'ocol u xakal ila'al le máac tumen le aj kiino', cu ya'alic ma' utz yanili'.
4Wa chéen jun p'éel sacpoos ma' dzaamal tu yoot'el u wíinclil mix sacchajac u tzo'otzele', le aj kiino' cu kalic siete kiino'ob le koja'ano'. 5Tu siete kiine' cu ca'a xakal ilic, wa cu yilic tu báayili' u pokchaja'anil tumen ma' búucpajac tu wíinclile', bíin u kal u láak siete kiino'ob. 6Tu siete kiine' cu ca'a xakal ilic: Wa táan u bin u sa'atal le pokchaja'anil yéetel ma' búucpajac tu wíinclile', le aj kiino' cu ya'alic utz yanil le koja'ano', tumen chéen chacpoke'en ca'ach u wíinclil. Le koja'an túuno' cu p'o'ic u nooke' cu yutztal yanil.
7Ba'ale' wa cu bin u búucbesa'al u wíinclil tumen le chacpoke'enil cu dzo'ocol u xakal ila'al yéetel u ya'alal utz yanil tumen le aj kiino', yaan u ca'a bin tu yicnal le aj kiin u ti'al u xakal ila'al tu ca'a téen. 8Wa le quéen u xakal il le aj kiin le koja'an cu yilic dzo'oc u búucbesa'al u wíinclil tumen le chacpoke'enilo', cu ya'alic ma' utz yanili', tumen koja'an ti' jáaway.
9Le quéen yanac u pokchaja'anil jáaway ti' jun túul máaque', unaj u bisa'al tu yicnal aj kiin. 10Le aj kiino' cu xakal ilic, wa cu yilic u sacpoosil u chu'uchumil u wíinclil dzo'oc u sactal u tzo'otzel bey xan dzo'oc u chíicpajal u bakel ti' le chu'uchumo', 11lelo' u jáawayil wíinclil mina'an dzaac u ti'al. Le aj kiino' cu ya'alic ma' utz yanil le máaco'. Ma' kabéet u yocsa'al kalbili', leti'e' ma' utz yanili'.
12Ba'ale' wa le jáaway cu bin u séeb búucbesic, líikbal tu yooc taac tu pool le koja'ano', tac tu'ux cu kuchul u yilic le aj kiino', 13le aj kiino' cu xakal ilic; wa dzo'oc u búucbesa'al u wíinclil tumen le jáawayo', cu ya'alic utz yanil, tumen bey dzo'oc u sacpoostal le jáawayo', leti'e' dzo'oc u p'áatal yutzil. 14Ba'ale' le kiin cun j chíicpajal u bakel ti' le sacpooso', cu p'áatal ma' utz yanili'. 15Le aj kiino' cu xakal ilic u bakelo', cu ya'alic ma' utz yanili', tumen le bako' kaas yanil: lelo' jáaway.
16Wa le bak chica'an cu ca'a sacpoostalo', le koja'ano' unaj u bin tu yicnal le aj kiino', 17u ti'al ca xakal ila'ac, wa le aj kiin cu yilic dzo'oc u sacpoostalo', cu ya'alic utz yanil le koja'ano', tumen dzo'oc u yutztal.
18Le quéen utzac jun túul máac ti' u pokchaja'anil u wíinclile', 19cu p'áatal tu'ux yaan ca'ach le pokchaja'anil jun p'éel chu'uchum sacpoos wa jun p'éel jóom sacchac oot'el, unaj u bin yicnal aj kiin. 20Wa le aj kiin cu yilic tu'ux yaj asab dzaamal ti' u yoot'el u wíinclil yéetel dzo'oc u sactal u tzo'otzele', cu ya'alic ma' utz yanil le máaco', tumen le joka'an yaan ti'o' u pokchaja'anil jáaway. 21Wa cu yilic mina'an mix jun p'éel u sac tzo'otzel le tu'ux yaj mix asab dzaamal ti' u yoot'el u wíinclil tumen dzo'oc u jo'op'ol u bin u yutztale', cu kalic le máac siete kiino'obo'. 22Ba'ale' wa cu bin u búucbesa'al u wíinclil tumen le koja'anilo', cu ya'alic ma' utz yanil le máaco', tumen yaan u pokchaja'anil jáaway ti'. 23Ba'ale' wa ma' tu búucbesa'al u wíinclil tumen le koja'anilo', lelo' chéen u dzoyel pokchaja'anil jáaway, le aj kiino' cu ya'alic utz yanil.
24Le máax chuujul u wíinclil cu chíicpajal tu bakel u chuujil jun p'éel sacchacposil wa sacpoosile', 25le aj kiino' cu xakal ilic. Wa dzo'oc u sactal u tzo'otzel u jóojom saquil bey xan asab dzaamal ti' u yoot'el u wíinclile', le ba'ax jóok tu chuujilo', jáaway; le aj kiino', bíin u ya'al ma' utz yanil tu yo'olal yanchaj ti' u pokchaja'anil jáaway. 26Wa le quéen u xakal ila'aj le aj kiin le jóojom saquil cu yilic mina'an u sac tzo'otzel mix asab dzaamal ti' yoot'el u wíinclil tumen táan u bin u yutztale', cu kalic le máac siete kiino'obo'. 27Tu siete kiine' le aj kiino' cu xakal ilic, wa dzo'oc u búucbesa'al u wíinclil tumen le jóojom saquilo', cu ya'alic ma' utz yanil le máaco', tumen yaan ti' u pokchaja'anil jáaway. 28Ba'ale' wa ma' tu bin u búucbesa'al u wíinclil tumen le jóojom saquilo'ob tumen táan u bin u booxtale', lelo' u chuupil le chuujilo', le aj kiino' cu ya'alic utz yanil le koja'ano' tumen chéen u dzoyel tu'ux chuujul.
29Le quéen yanac jun p'éel pokchaja'anil tu pool wa tu no'och jun túul j xiib wa jun túul co'olele', 30le aj kiino' bíin u xakal il le pokchaja'anilo'. Wa asab dzaamal ti' u yoot'el u wíinclil bey xan yaan u tzo'otzel samal kankan yéetel chéen jun p'íite', le aj kiino' cu ya'alic ma' utz yanil le máaco', tumen yaan j ma'ak ti', lelo' u jáawayil pool yéetel no'och. 31Wa le quéen u xakal il le aj kiin u pokchaja'anil le máac cu yilic ma' asab dzaamal ti' u yoot'el u wíinclil yéetel mina'an u tzo'otzel booxe', cu kalic le máac siete kiino'obo'. 32Tu siete kiine' le aj kiino' cu xakal ilic le pokchaja'anilo', wa ma' búucpajac mix asab dzaamal ti' u yoot'el u wíinclil yéetel mina'an u tzo'otzel samal kankane', 33le aj kiino' cu ya'alic ca u dzicubáa le koja'ano', ba'ale' ma' tac le tu'ux yaan u j ma'akilo', cu dzo'ocole' cu kalic u láak siete kiino'ob. 34Le quéen máanac le siete kiino'obo', le aj kiino' cu xakal ilic le pokchaja'anil, wa ma' búucpajac le j ma'ak mix chica'an wa asab dzaamal ti' u yoot'el u wíinclile', le aj kiino' cu ya'alic utz yanil le máac koja'ano', leti'e' cu p'o'ic u nooko'obe' cu p'áatal utz yanil. 35Ba'ale' wa cu bin u búucbesa'al tumen le j ma'ak le quéen dzo'ococ u ya'alal utz yanile', 36le aj kiino' unaj u xakal ilic tu ca'a téen le máac koja'ano'; wa dzo'oc u búucbesa'al tumen le j ma'ako', ma' kabéet u caxtic u kankan tzo'otzeli': le máaco' ma' utz yanili'. 37Ba'ale' wa cu yilic dzo'oc u jáawal u búucbesa'al tumen le j ma'ak, bey xan wa dzo'oc u jóokol u jeel u box tzo'otzele', le ma'ako' dzo'oc u yutztal bey xan dzo'oc u p'áatal utz yanil.
38Le quéen yanac sacpooso'ob tu wíinclil jun túul j xiib wa jun túul x co'olele', 39le aj kiino' yaan u xakal ilic u wíinclil, wa joka'an tu wíinclil jóojom saquilo'ob, sacpile'eno'ob yéetel sacpooso'obe', lelo' chéen pawo' jóok tu wíinclil; le máaco' utz yanil.
40Wa jun túul máac cu júutul u tzo'otzel u pool tac u p'áatal kolise', utz yanil. 41Wa u tzo'otzel u táan pool cu júutul u ti'al u p'áatal kolis u táan poole', láili' utz yanile'. 42Ba'ale' wa cu chíicpajal jun p'éel pokchaja'anil tu táan jo'ol wa je'el tu'ux ti' u kolisil u poole', lelo' táan u jóokol u jáawayil. 43Le aj kiino' cu xakal ilic, wa u chu'uchumil le pokchaja'anil tu'ux kolis sacchac je'el bix u yila'al le jáaway tu yoot'el u wíinclile', 44le máaco' koja'an ti' jáaway, pokchaja'an u pool. Le aj kiino', unaj u ya'alic ma' utz yanil le máaco'.
45Le máax cu yantal u pokchaja'anil jáaway ti'e', unaj u búuquintic ja'ajat nook, yéetel xa'axa'ak u tzo'otzel u pool bey xan u pixmaj u no'oche', bíin u yawat a'al ¡Ma' utz yanileni'! ¡Ma' utz yanileni'! 46Ca'aliquil yaan u pokchaja'anil u wíinclile', bíin a'ala'ac ma' utz yanili'; yaan u cajtal tu juunal tu paach le x péetcaajo'.
47Le quéen yanac u cuuxumil jun p'éel búuc beeta'an yéetel u tzo'otzel j taman wa yéetel lino, 48wa jun p'éel jit'bil lino wa u tzo'otzel j taman wa quex ti' jun p'éel kéewel wa je'el ba'ax beeta'an yéetel kéewele', 49wa le cuuxum yaan ti' le ba'alo'ob ya'ax wa quex chaco', le cuuxum je'elo' jáaway, unaj u ye'esa'al ti' aj kiin. 50Le aj kiino' bíin u xakal il le cuuxumo', bey xan bíin u kal siete kiino'ob le ba'ax yaan u cuuxumilo'. 51Tu siete kiine' cu xakal ilic le cuuxumo'; wa dzo'oc u búucpajal ti' le búuc wa ti' le jit', wa ti' le kéewel wa le ba'ax beeta'an yéetel kéewelo', lelo' u cuuxumil jáaway mina'an dzaaquil yéetel ma' utz yanil le ba'alo'obo'. 52Let o'olale' je'el ba'ax ca yanac u cuuxumil beyo', unaj u láaj tóoca'al, tumen lelo' u cuuxumil jáaway mina'an dzaaquil u ti'al, 53ba'ale' wa le quéen u xakal il le aj kiin cu yilic ma' búucbesa'ac tumen le cuuxumo', 54cu ya'alic ca p'o'oboc le cuuxumo', bey xan cu ya'alic ca ka'alac siete kiino'ob le ba'alo'.
55Cu dzo'ocol u p'o'obol le cuuxumo', le aj kiino' cu xakal ilic. Wa cu yilic ma' sa'atac le cuuxumo', lelo' cuuxum mina'an dzaaquil ti', yaan u tóoca'al le ba'al quex ma' búucbesa'aco', quex ti' yaan tu yich wa ma'. 56Wa le quéen u xakal il le aj kiin cu yilic dzo'oc u sa'atal le cuuxum cu dzo'ocol u p'o'obole', cu jatic u xéet'el le búuc, le kéewel wa le jit'o'. 57Ba'ale' wa cu ca'a chíicpajal yéetel cu búucpajal ti' le búuc wa ti' le jit', wa quex ti' le ba'ax beeta'an yéetel kéewelo', yaan u tóoca'al le ba'ax cuuxumchajano'. 58Le búuc wa le jit', wa le ba'ax beeta'an yéetel kéewel cu sa'atal u cuuxumil le quéen p'o'oboque', cu ca'a p'o'obol túune' cu p'áatal utz yanil,
59Lelo'oba' u ya'almaj xiquinilo'ob u ti'al u cuuxumilo'ob jáaway cu jóokol ti' búuco'ob beeta'an yéetel u tzo'otzel j taman wa lino, bey xan ti' jit'o'ob yéetel ba'alo'ob beeta'an yéetel kéewel, u ti'al u ya'alal ma' utz yanilo'obi'.
Currently Selected:
Levítico 13: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
