Levítico 15
15
U ya'almaj xiquinilo'ob jun túul j xiib yaan koja'anil tu j xiibil
1Yuumtzile' tu t'anaj Moisés yéetel Aarone' ca ya'alaj ti'ob: 2A'ale'ex ti' le j israelitaobo' le quéen koja'anchajac jun túul j xiib tu yo'olal cu ya'alal u pujil u j xiibile', le puj cu jóokolo', ma' utzi'. 3Le j xiib ma' utz yanil tu yo'olal cu pujanquil je'el bix wa tu ya'alal tu j xiibile', bey xan wa tzuutzul tumen. Je'el bix ca úuchuque' leti'e', ma' utz yanili'.
4Tuláacal tu'ux ca chilac le j xiib yéetel je'el tu'ux cu ch'áajal u koja'anile' cu p'áatal ma' utz yanili'. Ti' je'el ba'alac ca culaque', yaan u ya'alal ma' utz yanil le nu'uculo'.
5Je'el máaxac ca cóojoc ti' le cúuchil tu'ux chilaj le j xiibo', u najmal u p'o'ic u nook bey xan u p'o'icubáa yéetel ja', cu ya'alal ma' utz yanil tac u yocbal kiin.
6Je'el máaxac ca culac tu'ux culaj le j xiibo' u najmal u p'o'ic u nook bey xan u p'o'icubáa yéetel ja', cu p'áatal ma' utz yanil tac u yocbal kiin.
7Je'el máax bíin machic le máax cu chooj le puj ti'o', u najmal u p'o'ic u nook bey xan u p'o'icubáa yéetel ja', cu p'áatal ma' utz yanil tac u yoocbal kiin.
8Wa le máax cu mukyajtic u chooj pujil u j xiibil cu túub tu yóokol jun túul máax utz yanile', le máaco' yaan u p'o'ic u nook bey xan u p'o'icubáa yéetel ja', cu ya'ala'al ma' utz yanil tac u yocbal kiin.
9Je'el ba'ax jéequeb xéec ca meyajnac ti' le máax koja'an ti' u yáalal u pujil u j xiibilo', yaan u ya'ala'al ma' utz yanili'.
10Je'el máaxac ca u mach wa ba'ax tu'ux culaj le j xiib koja'an ti' u pujanquil u j xiibilo' cu ya'alal ma' utz yanil tac u yocbal kiin. Je'el máaxac ca u bis wa ba'ax ti' le ba'alo'obo', u najmal u p'o'ic u nook bey xan u p'o'icubáa yéetel ja', cu ya'alal ma' utz yanil tac u yocbal kiin.
11Je'el máaxac bíin ma'achac tumen le máax koja'an ti' u pujanquil u j xiibil ca'aliquil ma' u p'o'o u kabe', unaj u p'o'ic u nook yéetel u p'o'icubáa yéetel ja', cu ya'alal xan ma' utz yanil tac u yocbal kiin.
12Le u cuumil kat cu ma'achal tumen le máax koja'an ti' u pujil j xiibilo' unaj u pa'abal; le ba'alo'ob beeta'an che' u ca'ajo'obo' unaj u p'o'obol.
13Wa cu yutztal le j xiib máax cu yáalal u pujil u j xiibilo', unaj u xoquic siete kiino'ob u ti'al u páatal utz yanil; unaj u p'o'ic u nook yéetel u p'o'icubáa yéetel u ja'il sayab, bey túuno' cu p'áatal utz yanil. 14Tu ocho kiine' cu ch'a'ic ca'a túul mucuy wa ca'a túul mejen sacpacale', cu bin tu jool u noj Paselil Muuch'tal u ti'al ca u láaj kub ti' aj kiin tu táan Yuumtzil. 15Le aj kiino' cu quíimsic jun túul ti'ob u ti'al u kub tu yo'olal keban, u láak jun túulo' cu láaj tóoquic, beyo' cu dzo'ocbesic tu táan Yuumtzil le ba'ax kabéet u ti'al u p'áatal utz yanil le máax koja'an ti' u pujanquil u j xiibilo'.
16Le quéen koja'anchajac jun túul j xiib ti' u yáalal u pujil u j xiibile', bíin u láaj p'o' u wíinclil yéetel ja', bey xan yaan u ya'alal ma' utz yanil tac u yocbal kiin.
17Je'el ba'axac nookil wa kéewel tu'ux bíin ch'áajac u pujil u j xiibilo', unaj u p'o'obol yéetel ja' bey xan cu p'áatal ma' utz yanil tac u yocbal kiin.
18Wa cu núupcubáa jun túul xiib yéetel jun túul co'olele', tu ca'a túulal unaj u p'o'icuba'ob yéetel ja', cu p'áatalo'ob xan ma' utz yanilo'ob tac u yocbal kiin.
U ya'almaj xiquinilo'ob co'olel cu p'áatal ma' utz yanili'.
19Wa jun túul co'olel cu yilic u nook je'el bix suuquil u yilique', bíin a'ala'ac ma' utz yanil siete kiino'obi'. Je'el máaxac bíin machique', yaan u ya'alal ma' utz yanil tac u yocbal kiin.
20Je'el ti' ba'ax bíin chilac tu kiinilo'ob cu yilic u nooke', yaan u ya'alal ma' utz yanili'. Ti' je'el ba'axac bíin culaque', bíin a'ala'ac ma' utz yanili'.
21Je'el máaxac bíin machic tu'ux chilaj x letie', unaj u p'o'ic u nook u p'o'icubáa yéetel ja', bíin a'ala'ac ma' utz yanil tac u yocbal kiin.
22Je'el máaxac bíin machic tu'ux culaj x letie', unaj u p'o'ic u nook u naj xan u p'o'icubáa yéetel ja', cu ya'alal ma' utz yanil tac u yocbal kiin. 23Quex chéen ca u mach wa tu'ux chilaj le co'olelo', bíin a'ala'ac ma' utz yanil tac u yocbal kiin.
24Wa jun túul j xiib cu nupicubáa x yéetele', cu táacpajal ti' u kaasil yanil, yaan xan u ya'alal ma' utz yanil siete kiino'ob, bey xan bíin a'ala'ac ti' le tu'ux j chilajo'.
25Wa cu máansic ki'ik jun túul co'olel quex ma' kuchuc u kiinil u yilic u nook, bey xan cu ya'abtal u kiinilo'ob je'el bix wa cu máan u kiinil táan u yilic u nooke', bíin a'ala'ac ma' utz yanil tuláacal u kiinil u máansic ki'ik je'el bix wa táan u yilic u nooke'.
26Je'el tu'ux ca wenec leti, wa je'el ba'ax ti' bíin culac tu kiinil u máansic le ki'iko', bíin a'ala'ac ma' utz yanil je'el bix wa táan u yilic u nooke'.
27Je'el máaxac ca u mach le ba'alo'oba', yaan u ya'alal ma' utz yanili'. U najmal u p'o'ic u nook bey xan u p'o'icubáa yéetel ja', cu ya'alal ma' utz yanil tac u yocbal kiin.
28Le quéen jáawac u máansic ki'ike', je'el u páajtal u xoquic siete kiino'obe', cu dzo'ocole' cu p'áatal utz yanil. 29Cu máan ocho kiino'obe' cu ch'a'ic ca'a túul mucuy wa ca'a túul mejen sacpacale', cu bisic ti' le aj kiin tu noj Paselil Muuch'tal. 30Le aj kiino', cu quíimsic jun túul tu yo'olal keban yéetel u láak jun túulo', cu láaj tóoquic. Beyo' le aj kiino' cu dzo'ocbesic tu táan Yuumtzil u ti'al u yutztal le co'olel ti' u máansic u ki'ikelo', 31bey túuno' ca náachcuntique'ex le j israelitaob ti' u kaasilo'ob tu yo'olal ma' u quíimilo'ob iquil u kascuntico'ob yéetelo'ob in cúuchil tu'ux quin cajtal ichile'ex.
32Lelo'oba' u tzol xiquinilo'ob u ti'al máaxo'ob koja'ano'ob ti' u máansic ki'ik yéetel máaxo'ob cu yáalal u pujil u j xiibilo'ob, cu p'áatalo'ob ma' utz yanilo'ob tu yo'olali'; 33tac xan tu yo'olal co'olelo'ob cu u yilico'ob u nooko'ob, bey xan ti' tuláacal máaxo'ob mukyajtic u máansico'ob ki'ik, je'el bix j xiibe' bey x co'olel, bey xan le j xiibo'ob cu chitalo'ob yéetel jun túul co'olel táan u yilic u nooko'.
Currently Selected:
Levítico 15: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
