Génesis 49
49
U qui' t'aano'ob Jacob ti' u paalal
1Jacobe' tu t'anaj u paalal ca tu ya'alaj ti'ob: Nadzaba'ex u ti'al in wa'alic te'ex ba'ax cu taal u kiinil:
2Nadzaba'ex u ti'al a wu'uye'ex u paalale'ex Jacob,
táan óolte'ex u t'aan Israel a taataex.
3Rubén teche' in nojoch paalech,
in muuk yéetel u yáax ich in táanquelemil,
teech yáax ti' tzicbe'enil yéetel ti' páajtalil.
4Ba'ale' bejela'e' ma' teech u yáax paali',
tumen teche' bey jun p'éelech u muuk ja' cu sen tuul ma' tu páajtal u yedzcunta'al;
tumen ta manba'alcuntaj u cúuchil in wenel
iquil chilajiquech yéetel in x keech.
5Simeón yéetel Leví, te'exe' ca'a túul sucu'untzile'ex;
a máascabe'exe' u nu'ucul meyaj loob.
6¡Mix bikin bíin yanaquen tu cúuchil a much'tale'ex!
Tumen le ca j p'u'uje'exe' ta quíimsaje'ex wíinico'ob,
chéen tu yo'olal bey ta wóoltilaque'ex,
ta cachaje'ex u yooco'ob le wacaxo'obo'.
7¡Loolob t'anta'ac, bey,
loolob t'anta'ac u sen dzíidzic p'u'ujulo'ob!
¡Teen quin in ma'alob ki'itbese'ex
ichil tuláacal u caajil Israel!
8Judá a láaktzilo'obe' bíin u qui' t'aan techo'ob.
Bíin a bidz u yúul a aj p'eeco'ob,
le jach a láaktzilo'obo' bíin u chíin pooltecho'ob.
9¡Teech Judá in paal!
Beyech u chichnil león
le quéen u p'at u jaantic ba'ax tu quíimsaje';
cu mot'tal, cu chital j lu'um,
bey jun túul nojoch leóne'.
¿Máax bíin páatchajac u chi'ichnaccuntic?
10Mix máac bíin luksic u páajtalil Judá,
mix le jalach xóolte' yaan tu kabo',
tac quéen kuchuc u kiinil u taal u taatail le jalach xóolte'o',
le máax bíin u'uyaj t'anta'ac,
tumen múuch' caajo'ob bíin dzo'ocbesic u t'aan.
11Le máax cu kaxic u chan burro tu'ux cu pa'akal le uvaobo',
le máax cu p'o'ic tuláacal u nook yéetel vino,
¡Yéetel u kaab le uvaobo'!
12U neek u yiche' sen asab éek ti' le vinoo',
u cojo'obe' sactac bey saquil u kaab iime'.
13Zabulone' bíin cajlac tu jáal ka'anab,
tu'ux bíin yanac cúuchil u ti'al cheemo'ob.
U xuul u lu'umilo'obe' bíin kuchco'ob tac Sidón.
14Isacare' jun túul u ba'alche'il cuuch,
cu je'elel yáanal u najil tu'ux cu tzéenta'al ba'alche'ob.
15Le ca tu yilaj ma'alob le caajo'ob
yéetel sen utz u ti'al je'elele',
tu p'usaj u pu'uch u ti'al u bisic cuuch,
bey palitzile', ma' tu ya'alaj ma'i'.
16Dane' jach leti' bíin u méektáant u yéet ki'ikelo'ob
bey jun múuch' u cajtalil u yotochnáalilo'ob Israele'.
17Dane' bíin béeyac, bey jun túul caan
cu codzcubáa tu jáal beje',
cu chi'ic u caal yooc tzíimin,
cu beetic u lúubul máax nat'mail.
18¡In Yuumtzil quin pa'atic ca a toquen ti' quíimili'!
19Yóokol Gade' bíin u pulajuba'ob jun tzúuc aj ba'atelo'ob,
ba'ale' tu pachale' leti' bíin u ch'a'apachte.
20Asere' bíin sen yanac ba'al u jaante;
bíin u dzáa u janalbe'en janal ajawo'ob.
21Neftalie' bey x aal quéej cha'akab u máane',
yaan u mejenil jach jadzutztaco'ob.
22Josee' bey jun cúul che' yaan tu jáal ja'e', cu yantal ya'ab u yich,
u kabo'obe' cu na'acalo'ob yóokol pak.
23Ch'a'a' p'ecta'an tumen le aj ch'iin julubo'obo',
cu pulico'ob julubo' yóokol,
mantadz táan u beetico'ob u chi'ichnactal;
24ba'ale' Josee' yaan u muuk u kab,
ma'alob u machmail u x p'unche';
¡Nib óolal ti' le aj páajtalil u Junab Ku Jacobo'!
¡Nib óolal ti' u kaaba' le aj Canan j tamano', ti' u aj ta'acbesaj Israel!
25Nib óolal ti' le u Ku a taatao', máax bíin áantiquech;
ti' u Kuil tuláacal páajtalil máax bíin u dzáa ta wóokol u qui' t'aan.
¡Yéetel u qui' t'aanilo'ob ca'an!
¡Yéetel u qui' t'aanilo'ob u taamil ka'anab!
¡Yéetel xan u qui' t'aanil iimo'ob yéetel jobnel!
26A taatae' tu qui' t'aan teech asab
ti' qui' t'anta'abiquen tumen in taata.
Tac tu xuul le mantadz cuxa'an káaxo'obo',
le qui' t'aano'oba' ti' bíin p'áatac tu yóokol u pool José,
máax yéeya'ab ichil u sucu'uno'ob.
27Benjamine' jun túul dzíidzic loobo',
tu ja'atzcabile' cu jaantic ba'ax cu quíimsic, tu yoca'an kiinile' cu t'oxic u yalab.
28Lelo'oba' u doce ch'i'ibalilo'ob Israel, lela' leti' le ba'alo'ob tu ya'alaj le ca tu dzaj u qui' t'aan ti' jujun túulil u paalal.
U quíimbal Jacob
29Jun p'éel u kiinile' Jacobe' tu ya'alaj ti' u paalal: Chéen jun p'íit kiin cu bineltic in quíimil. Muquene'ex tu tzéel in máanja'an ch'i'ibalo'ob ti' le áactun yaan tu lu'um Efrón le j hititae', 30te tu lu'umil canano'; in káat in wa'ale', le áactun yaan Macpelae', actáan ti' Mamre, le tu manaj Abraham pa'ate' láili' yéetel u lu'um Efrone', u ti'al u mucnalil láaktzilo'ob. 31Ti' j mu'uc Abraham yéetel x Sara u yatani', Isaac yéetel x Rebeca u yatan, ti' xan tin mucaj x Leae'. 32Le lu'um yéetel le áactun yaan te'elo' j ma'ano'ob ti' le j hititaobo'.
33Jacob le ca j dzo'oc u ya'alic ti' u paalal ba'axo'ob bíin u beetajo'obe', j chilaj tu ca'a téene' ca j quíimi.
Currently Selected:
Génesis 49: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
