Éxodo 6
6
1Yuumtzile' tu núucaj ti':
Bejela'e' bíin a wil ba'ax quin in beet ti' le faraono', tumen chéen yéetel yajil bíin u cha'a a jóokole'ex tu caajal, ma' chéen lelo', leti' bíin u tojolch'inte'ex.
Yuumtzile' cu ca'a t'anic Moisés
2Kue' tu t'anaj Moisese' ca tu ya'alaj ti': TENE' YUUMTZILEN.#6.2 Yuumtzilen (EL SEÑOR) Je'el bix suuquil u dzíibtal tumen le úuchben judiob, cu dzíibta'al Yuumtzil u ti'al u jeelint le can p'éel letraob hebreob YHVH u káat u ya'alo'ob quiili'ich kaaba'. 3Tin chíicbesinbáa ti' Abraham, ti' Isaac yéetel ti' Jacob, yéetel u kaaba', Junab Ku tuláacal páajtalil, ba'ale' ma' tin dzajimbáa ca u kaj óolteno'ob yéetel u jaajil in kaaba'i': YHVH. 4Tin beetaj xan jun p'éel jalach t'aan tu yéetelo'ob ca tin wa'alaj in dzáic ti'ob u lu'umil Canaán, le tu'ux cajlajo'ob bey j táanxel lu'umil dze'edzec kiino'obe'. 5Bejela'e' dzo'oc in wojéeltic táan u mukyaj le israelitaob yéetel táan u beeta'al u talam meyajo'ob tumen le j egipciobo', dzo'oc u ka'ajal teen in nup t'aan. 6Bey túuno' xeen a wa'al ti' le j israelitaobo', teen Yuumtzile', bin in ca'aj in lukeso'ob ti' le palitzilil yéetel ti' le talam meyajo'ob iquil u ye'edzelo'ob tumen le j egipciobo'. Bíin in chóol in páajtalil yéetel u nucuch meyajilo'ob ti'ibil óolal, u ti'al in jáalkabtique'ex. 7Bíin in ch'a'ex bey in caajale', ca in beetinbáa a Kuex. Beyo' bíin ojéelta'ac tene' Yuumtzilen a Kuex máax lukese'ex ti' le talam meyajo'ob dza'an te'ex ca'ach tumen le j egipciobo'. 8Bíin in bise'ex ti' le lu'um tin séeb chi'itaj ti' Abraham Isaac yéetel Jacob, in dzáic a ti'alinte'exo'. Tene' Yuumtzilen.
9Lelo' Moisese' tu ca'a a'alaj ti' le j israelitaobo', ba'ale' leti'obe' ma' tu táan óoltajo'obi' tumen jach luba'an u yóolo'ob tu yo'olal le talam palitzililo'. 10Yuumtzil túune' tu ya'alaj ti' Moisés:
11Xeen a wa'al ti' faraón ca u cha'a u jóokol Egipto le j israelitaobo'.
12Ba'ale' Moisese' tu núucaj ti' Yuumtzil: Mix le j israelitaob táan óoltiqueno', ¿Bix bíin u táan óolten faraón wa jach kalkalac in t'aan?
13Yuumtzil túune' tu túuchi'itaj Moisés yéetel Aarón u ti'al u ya'alo'ob ti' le j israelitaob yéetel ti' faraón: Dzo'oc u jach a'ala'al ti'ob ca u jóokeso'ob le j israelitaob tu caajil Egiptoo'.
U ch'i'ilancabilo'ob Aarón yéetel Moisés
14Lelo'oba' u nuuquilo'ob j otochnáalob, tu kaaba'ob u taataob:
U paalal Rubén u j yáax paal Israele', tu kaaba'intajo'ob: Hanoc, Falú, Ezrón yéetel Carmi. Lelo'oba' u yotochnáalo'ob Rubén.
15U paalal Simeone' tu kaaba'intajo'ob: Jemuel, Jamín, Zohar yéetel Saúl, u yaal jun túul x cananitail. Lelo'oba' u yotochnáalo'ob Simeón.
16Levie' tu chucaj ciento treinta yéetel siete u ja'abilo'ob. Lela' u kaaba'ob u paalalo'ob líikbal tu nojochil tac tu chichanil: Jersón, Coat yéetel Merari. 17U paalal Gersón tu tzoolil u láaktzilo'ob: Libni yéetel Simei. 18Coate' tu chucaj ciento treinta yéetel óox p'éel u ja'abilo'ob. U paalalo'obe', Amrán, Izhar, Hebrón yéetel Uziel. 19U paalal Merarie': Mahli yéetel Musi. Lelo'oba' u yotochnáalo'ob Leví líikbal u nojochil tac u chichanil
20Amrane' j dzo'oc u beel yéetel x Jocabed yíidzin u x dzeyum máax j síijs Aarón yéetel Moisés. Amrane' j cuxlaj ciento treinta ja'abo'ob.
21U paalal Ishare' tu kaaba'intajo'ob: Coré, Nefeg yéetel Zicri.
22U paalal Uziele' tu kaaba'intajo'ob: Misael, Elzafán yéetel Sitri.
23Aarone' j dzo'oc u beel yéetel Elizabet u x ch'upul paal ca'ach Aminadab, x quictzil xan ti' Naasón, leti'e' tu síijsaj Nadab, Abiú, Eleazar yéetel Itamar.
24U paalal Coree' tu kaaba'intajo'ob: Asir, Elcana yéetel Abiasaf. Lelo'oba' u j yotochnáalo'ob le j coreitailo'obo'.
25Eleazar jun túul ti' u paalal Aarone', j dzo'oc u beel tu yéetel jun túul ti' u x ch'upul paalal Futiel, leti'e' tu síijsaj Fines. Lelo'oba' u yotochnáalo'ob le j levitaob tu tzoolil u láaktzilo'obo'.
26Lelo'oba' leti'ob Aarón yéetel Moisés máaxo'ob j a'ala'ab ti'ob tumen Yuumtzil ca u jóokeso'ob le j israelitaob tu lu'umil Epiptoo' máaxo'ob u tzolmajuba'ob bey u múuch'ul aj ba'atelo'obe'. 27Lelo'oba' láili' leti'obe', Aarón yéetel Moisés máaxo'ob j t'aanajo'ob yéetel u ajawil Egipto u ti'al u jóokesico'ob ti' le múuch' caaj lej israelitaobo'.
Kue' cu t'anic Aarón yéetel Moisés
28Le kiinac ca j t'aanaj Yuumtzil yéetel Moisés Egiptoe', 29tu ya'alaj ti':
A'al ti' u ajawil Egipto tuláacal ba'ax bin in ca'aj in wa'al techa'.
30Ba'ale' Moisese' tu núucaj ti': Yuumtzil tene' jach kalkalac in t'aan, let o'olale' ¿Bix bíin u táan óolten faraón?
Currently Selected:
Éxodo 6: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
