Éxodo 7
7
1Yuumtzil túune' tu ya'alaj ti' Moisés:
Ile bin in ca'aj in p'at a beetic le ba'alo'ob tu táan faraón tin kaaba'e, a sucu'un Aarón túune' cu t'aan ta kaaba'. 2Teche' bíin a tzol ti' Aarón tuláacal le ba'ax bíin in wa'al teche', cu dzo'ocole' leti'e', cu t'aan yéetel faraón u ti'al ca u cha'a u jóokol tu lu'um le j israelitaobo'. 3Ba'ale' tene' bin in ca'aj in beet u pechicubáa faraón, tu yo'olal in beetic ya'abcach chíiculalo'ob yéetel jak óol ba'alo'ob tu lu'umil Egipto. 4Faraone' ma' bíin u táan óolte'exi', ba'ale' tene' bíin in láal in páajtalil tu yóokol Egipto. Yéetel nucuch ti'ibil beel ba'alo'ob bíin in jóokes in múuch' aj ba'atelo'ob, in káat in wa'ale' Israel in caajal. 5Le quéen dzo'ococ in chíicbesic in páajtalil yóokol Egipto, yéetel cu dzo'ocol in jóokesic Israele', le j Egipciobo' bíin u yojéelto'ob teen Yuumtzil.
6Moisés yéetel Aarone' tu beetajo'ob tuláacal je'el bix tu tzolajil Yuumtzile'. 7Moisese' yaan ca'ach ochenta ja'abo'ob ti', Aarone' ochenta yéetel óox p'éel, ja'abo'ob yaan ti' le ca j t'aanajo'ob yéetel faraone'.
U xóolte' Aarone' u nu'ucul chíiculalo'ob
8Yuumtzile' tu ya'alaj ti'ob Moisés yéetel Aarón: 9Wa faraón cu káatic te'ex ca a beete'ex jun p'éel chíiculale', ca wa'alic ti' Aarón ca u ch'a'a u xóolte' u pul j lu'um tu táan faraón, u ti'al ca suunac jun túul caan.
10Moisés yéetel Aarone' j bino'ob u yilo'ob faraón, ca tu beetajo'ob ba'ax a'ala'ab ti'ob tumen Yuumtzil: Aarone' tu pulaj u xóolte' j lu'um tu táan faraón yéetel tu táan u nuuquil u aj meyajo'obe', ca j suunaj caanil le xóolte'o'. 11Faraón xane' tu t'anaj u j na'ato'ob yéetel u aj meeno'ob, ca xan tu queto'ob yéetel u pulya'ajo'ob lelo': 12Tu pulajo'ob j lu'um u xóolte'ob tu jujun túulile' ca j suunajo'ob caanil tu jujun p'éelil le xóolte'obo'. Ba'ale' u xóolte' Aarone' tu lukaj u xóolte'ob le aj na'ato'ob yéetel aj meeno'obo'. 13Quex beyo', faraone' tu pechubáa ma' tu táan óoltajo'ob je'el bix u ya'almajil Yuumtzilo'.
Cu suut ki'ikil u ja'il Egipto
14Cu dzo'ocole', Yuumtzile' tu ya'alaj ti' Moisés:
Faraone' dzo'oc u pechicubáa ma' u káat u cha'a u jóokol le j israelitaobo'. 15Ba'ale', jach ja'atzcab sáamale' bíin xi'iquech a wila'a le quéen éemec ti' le áalcab ja'o', pa'at tu jáal, bis ta wicnal le xóolte' j suunaj caanilo'. 16Te'elo' ca wa'alic ti': Yuumtzil u Ku le hebreobo' dzo'oc u túuchi'itiquen in wa'al teech: cha'a u bin in caajal u kulten ti' le x tocoy lu'umo'. Ba'ale' tac bejela'a' ma' a táan óolti'. 17Let o'olale' Yuumtzile' dzo'oc u ya'alic: Le quéen in kol le ja' yéetel le xóolte' yaan tin kaba', le ja'o' bíin suunac ki'ikil. 18Yaan u quíimil u cayilo'ob, yaan xan u sen tu'uchajal u ja'il, tac u ti'al u beetic u taactal u xej le egipciob le quéen u yóolto'ob u yuko'obe'.
19Tu ya'alaj xan Yuumtzil ti' Moisés:
A'al ti' Aarón ca u ch'a'a u xóolte' ca u tich' u kab tu yóokol áalcab ja'ob, mejen áalcab ja'ob, yóokol áakalo'ob yéetel tuláacal u nu'ucul tu'ux cu dza'abal ja' Egipto; tu yóokol tuláacal ti' ba'ax yaan ja'e', u ti'al ca suunac ki'ikil. ¡Beyo' bíin yanac ki'ik je'el bix ti' le nu'uculo'ob beeta'an yéetel che'o' tac le beeta'an yéetel tuunicho'!
20Moisés yéetel Aarone' tu beetajo'ob le ba'ax túuchi'ita'ab ti'ob tumen Yuumtzil. Aarone' tu líiksaj u xóolte' ca tu kolaj le ja' tu táan yich faraón yéetel tu táan yich u nuuquil u aj meyajo'obe', ca j suunaj ki'ikil le ja'o'. 21J quíim le cayo'obo', ca sen tu'uchaj le áalcab ja'o', ca j p'áat ma' tu páajtal u yu'ukul tumen le j egipciobo' ¡Yaan ki'ik ca'ach tuláacal u lu'umil Egipto!
22Ba'ale' u aj meenilo'ob Egiptoe' tu queto'ob yéetel u pulya'ajo'ob, beyo' faraone' tu pechubáa ma' tu táan óoltaj Moisés yéetel Aarón, jach je'el bix tu ya'alajil Yuumtzilo'. 23Farone' j suunaj tu jalach najil bey mix ba'al ucha'ane', 24Tuláacal le j egipciobo' tu joolo'ob ch'e'eno'ob tu jáal le áalcab ja' u ti'al u jóokesico'ob sac ja'o', tumen le yaan ti' le áalcab ja'o' ma' paatal u ti'al ukbili'.
Cu báanal muucho'ob
25Cu dzo'ocol u máan siete kiino'ob ko'oloc le áalcab ja' tumen Yuumtzilo'.
Currently Selected:
Éxodo 7: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
