Éxodo 29
29
Bix u yúuchul jun páaycunajil u ti'al aj kiinil
(Lv 8.1-36)
1U ti'al a jun páaycuntic u ti'al u beeto'ob in aj kiinilo'obe', je'el ba'ax u najmal a beetic yéetelo'oba': ch'a'a jun túul wacax yéetel ca'a túul j tamano'ob, láaj utz u wíinclilo'ob; 2ch'a'a xan u ma'alob sacamil juuch'il trigoe', ca a beet waajo'ob yéetel piimpiim waajo'ob x ma' levadura ya'ach'ta'an yéetel aceite, beet xan oop'il waajo'ob yala'an yéetel aceite, 3ca dzáa ti' jun p'éel xaac u ti'al bisbil quili'ich naj pa'ate'e' yéetel le wacaxo', bey xan le ca'a túul j tamano'obo'. 4Cu dzo'ocole' bis Aarón yéetel u paalal tu jool u noj Paselil Much'tal, beet xan ca ichquinaco'ob; 5cu dzo'ocole' ch'a'a u búuquilo'ob le aj kiinilo', ca u búucbes Aarón, yéetel le x jaajay nooko', u suyem nookil le efodo', bey xan le efod yéetel le x pix tzeemo'. Dzáa ma'alob u kax nakil le efodo'; 6dzáa tu pool le pix jo'olo', dzáa xan tu yóokol le pix jo'ol le u xamach oroil u jun páaycunta'al bey aj kiinilo'. 7Ch'a'a túun u aceiteil le jun páaycunajo' ca wec yóokol u pool Aarón u ti'al a jun páaycuntic bey aj kiine'. 8Beet xan u náadzal u paalal ca búucbeso'ob yéetel le nooko'obo'. 9Dzáa u kax nako'ob Aarón yéetel u paalal, ca xan a dzáa u pix jo'olo'ob tu poolo'ob. Beyo' bíin a dzáa chuca'an páajtalil ti'ob, u aj kiinilo'obe' bíin p'áatac jun p'éel u a'almaj t'aanil mina'an keexil ti'
10Cu dzo'ocole', ca bisic le wacax tac tu noj Paselil le Much'talo', ca a beet u dzáico'ob u kabo'ob Aarón yéetel u paalal yóokol u pool le ba'alche'o'. 11Quíims le wacax tu táan Yuumtzil tu jool u najil le nuptáantajo'. 12Ch'a'a túun yéetel u yaal a kab jun p'íit u ki'ikele', cu'ult tu baaco'ob u multuunil le kultajo', ca xan a wec tu chuun u multuunil kultaj tuláacal yalab le ki'iko'. 13Lukes u tzaatzelo'ob u choochilo'ob, u táamnelo'ob yéetel u yiizilo'ob u ti'al a tóoc yóokol le multuunil kultajo'; 14ba'ale' u bakel, u kéewelil yéetel u ta' le wacaxo', tóoco'ob tu paach le x péet caajo', tumen lelo' u bo'olal keban.
15Ch'a'a jun túul le j tamano' ca u dzáa u kab Aarón yéetel u paalal yóokol u pool. 16Cu dzo'ocole' quíimse, u ki'ikele' tzitz yóokol yéetel tu bak paach le u multuunil kultajo'. 17Cu dzo'ocole', xot u xéexet'al, p'o'o u choochelo'ob yéetel u yooco'obe', ca dza'ob tu tzéel u pool. 18Kub túun le j taman yóokol multuunil kultajo', bey qui'iboc tóocbil ti'ibil óolal tu tzicbe'enil Yuumtzile'.
19Ch'a'a túun u láak j taman ca u dza'ob u kabo'ob yóokol u poole', Aarón yéetel u paalal. 20Quíims le j tamano', ch'a'a jun p'íit u ki'ikele' cu'ult yáanal u x no'oj xiquino'ob Aarón yéetel u paalal, dzáa xan tu polquil u yaal u x no'oj kabo'ob, yéetel tu poloquil u yaal u x no'oj ooco'ob. Cu dzo'ocole' widz u yalab le ki'ik yóokol yéetel tu bak paach u multuunil le kultajo'. 21Ti' le ki'ik bíin p'áatac yóokol u multuunil kultaj yéetel u aceiteil le jun páaycunajo', ch'a'a jun p'íite', ca widz yóokol Aarón yéetel yóokol u nook, bey xan yóokol u paalal yéetel yóokol u nooko'ob. Beyo' cu jun páaycunta'al Aarón yéetel u paalal, bey xan u nooko'ob.
22Cu dzo'ocole' ch'a'a u tzaatzel u nej le j tamano', bey xan u tzaatzel yóokol u choochel bey tu táamnel, ch'a'a u ca'a p'éel yiisilo'ob, yéetel u tzaatzel, bey xan u muuk u x no'oj ooc, tumen lelo' u j tamanil u jun páaycunta'al aj kiino'ob. 23Ti' le waajo'ob x ma' levadurail yaan ti' le xaac tu táan Yuumtzilo', ch'a'a jun p'éel wóolis waaj, jun p'éel waaj ya'ach'ta'an yéetel aceite yéetel jun p'éel j oop'il waaj; 24Kub tuláacal tu kab Aarón yéetel tu kab u paalal, beet u táanbesajil jun páaycunaj tu táan Yuumtzil. 25Cu dzo'ocole', lukes tu kabe' ca tóoquic yóokol u multuunil le kultajo', tu tzéel le ba'ax cu láaj tóocal qui'iboc tu táan Yuumtzil. Lelo' jun p'éel ba'al cu tóocal qui'iboc tu tzicbe'enil Yuumtzil
26U ti'al u jun páaycuntajil Aarone', ch'a'a xan u tzeem le j tamano', beet u táanbesajil le jun páaycunaj tu táan Yuumtzilo'. 27Jun páaycunt le tzeem kuba'an bey ti'ibil óolal chéen u ti'al le táanbesajilo', bey xan le muuk ooc cu dza'abal bey chúucbesajile', tumen u yéetelo'ob u j tamanil le jun páaycunajo', cu p'a'atal u ti'al Aarón yéetel u ti'al u paalal. 28Lelo', u ti'al Aarón yéetel u paalal. Jun p'éel x ma' kexpajal a'almaj t'aan u ti'al le j israelitaobo': Le ti'ibil óola' jun p'éel chúucbesajil cu beeta'al tumen le j israelitaob bey u quíimsbil ba'alche'il ca'a bisajbáile'.
29U quili'ich nooko'ob Aarone', bíin p'áatac ti' u ch'i'ibalo'ob le quéen jun páaycunta'aco'ob u ti'al u kamico'ob chuca'an páajtalil bey aj kiino'obe'. 30Le aj kiin u ch'i'ibal Aarono', bíin u kam le cúuchil u ti'al u yocol tu noj Paselil Much'tal u ti'al kultaj ti' le quili'ich najo', u najmal u xáantal siete kiino'ob u búuquintmail le nooko'.
31Cu dzo'ocole' ch'a'a u j tamanil le jun páaycunajo', máakant u janalil le u bakel ti' jun p'éel quili'ich cúuchil. 32Aarón yéetel u ch'i'ibalo'obe' bíin u jaanto'ob u bakel le j taman yéetel u waajil le xaac tu jool u noj Paselil Much'talo'. 33Bíin u jaanto'ob, tumen j táanbesa'abo'ob u ti'al u ka'amal u sa'atsaj si'ipilil keban, le ca jun páaycunta'abo'obe' tu kamo'ob chuca'an páajtalil bey aj kiino'obe'. Ba'ale' le ba'alo'oba' ma' u najmal u jaanta'al tumen yaanal máaqui', tumen quili'ichtac. 34Wa cu p'áatal dze'edzec tu láak kiin u waajil yéetel u bakel le jun páaycunajo', tóoc u yalab, ma' u jaanta'al tumen mix máac, tumen lelo' quili'ich.
35Beet bey yéetel Aarono', bey xan yéetel u paalal je'el bix tin túuchi'itaj techo'. Jun páaycunt siete kiino'ob u ti'al a dzáic páajtalil ti'ob, 36táanbes xan sáamsamal jun túul chan wacax u ti'al quíimsbil yo'olal u ka'amal u sa'atsaj si'ipilil keban; utzquint yanil u multuunil kultaj iquil a táanbesic yóokol jun túul ba'alche' tu yo'olal keban, wec xan aceite yóokol u ti'al a jun páaycuntic. 37Buul siete kiino'ob bíin a kub yóokol u multuunil le kultajo', quíimsbil ba'alche'ob yo'olal keban; beyo' ca jun páaycuntic ti' Ku u ti'al ca kuchuc béeytal jun p'éel sen quili'ich multuunil kultaje': Je'el ba'axac ca táakac ti' u multuunil kultaje' cu p'áatal quili'ich.
Ti'ibil óolalo'ob cu ku'ubul sáamsamal
(Nm 28.1-8)
38Sáamsamal x ma' je'elelil u najmal a kubic ca'a túul j ja'abente'ilo'ob j tamano'ob yóokol u multuunil le kultajo'. 39Jun túul bíin a kub jóokbal kiini', yéetel jun túul yocbal kiini'. 40Yéetel le yáax jun túulo', bíin a kub ca'a wuudz ma'alob harina ya'ach'ta'an yéetel jun litro u aceiteil oliva, ca wequic xan jun litro u kab uva bey ti'ibil óolale'. 41Bey xan bíin a beet tu yocbal kiin yéetel u láak j taman pa'ate'e' yéetel u ti'ibil óolil juuch' yéetel u kaab uva, u tóocbil qui'iboc ti'ibil óolalo'ob cu lu'ubul utzil ti' Yuumtzil. 42Le tóocbil ti'ibil óolalo'ob tin tzicbe'enila', leti' bíin ku'ubuc tin táan tuláacal kiino'ob tu jool u najil u noj Paselil Much'tal tu'ux bíin in nupt áantiquinbáa ta wéetel u ti'al in t'aniquech. 43Ti' bíin in nuptáant le j israelitaobo', beyo' le cúuchilo', cu jun páaychajal tu yo'olal ti' yaneni'. 44Bíin in jun páaycunt u noj Paselil Much'tal yéetel u multuunil kultajo', quin jun páaycuntic xan Aarón yéetel u paalal bey in aj kiino'obe'. 45Tene' bíin cajlaquen ichil le j israelitaobo', tene' quin beetquimbáa u Kuob. 46Beyo' bíin u yojéelto'ob teen Yuumtzil u Ku, máax jóokeso'ob Egipto u ti'al in cajtal ichilo'ob. Teen Yuumtzil u Kuob.
Currently Selected:
Éxodo 29: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
