Éxodo 28
28
Bix beeta'abic u nooko'ob aj kiino'ob
(Ex 39.1-31)
1Ichil le j israelitaobo', p'at a sucu'un Aarón naadz ta wicnal, bey xan Nadab, Abiú, Eleazar yéetel Itamar u paalal u ti'al u beeto'ob u aj kiinilo'ob ti' teen. 2Beet nook chéen u ti'alint a sucu'un Aarón ma'alob nooko'ob, tu yo'olal u yantal sáas jope'enil yéetel qui'ichquelemil ti'. 3T'aanen yéetel tuláacal máaxo'ob yaan u kabil meyaj ti'ob, le dzo'oc in chupico'ob yéetel u na'atil u beeta'al jadzutz ba'alo'obo', ca u beeto'ob u nooko'ob Aarón beyo' ca jun páaycunta'ac u ti'al u beet u aj kiinil. 4Je'el ba'ax nookilo'ob u najmal u beetico'oba': U pix tzeem, u efod, u suyem, u yáanal búuc but' chuya'an, u pix jo'ol lino u ca'aj, yéetel u kax nak. Bey túuno' bíin beeta'ac u ti'al a sucu'un Aarón yéetel u paalalo'ob ma'alob nooko'ob chéen u ti'alinto'ob u ti'al u beetico'ob u meeyjul aj kiinil. 5Le máaxo'ob bíin beetic le nooko'obo', u najmal u beetico'ob yéetel oro, chacpuke'en nook, chacjome'en nook, chac nook yéetel jaxbil lino.
6Le efodo' yaan u beeta'al yéetel oro, chacpuke'en nook, chacjome'en nook chac nook yéetel jaxbil lino, ca beeta'ac x but' chuybil 7dzáa xan ca'a p'éel u x kaxabilo'ob tu tzéelilo'ob. 8Le kax nak cu máan yóokol le efod u ti'al pedzico', yaan u p'áatal jun tacáalili' yéetel, yaan xan u beeta'al yéetel oro, chacpuke'en nook, chacjome'en nook, chac nook, yéetel jaxbil lino.
9Cu dzo'ocole', ch'a'a ca'a p'éel u jadzutz cornalina tuunich, ca dzáa yóokolo'obe', u kaaba'ob u paalal Israel, 10tu tzoolol sijnalilo'ob; seis kaaba'ob ti' jun p'éele', seis kaaba'ob ti' jun láak. 11Le kaaba'ob bíin a dzáa yóokol le jadzutz tuunichobo', bíin beeta'ac tumen jun túul u aj meeyjul oro je'el bix u beeta'al x dzalabe'. Cu dzo'ocole' pedz le ca'a p'éel jadzutz tuunicho'ob yéetel u x t'ilcunajilo'ob oro u ca'ajo'. 12Dzáa yóokol u x kaxabilo'ob le efod bey u jadzutz tuunichilo'ob u ka'ajsajil u paalal Israele'. Beyo' Aarone' bíin u lechcúunt tu queléembal u kaaba'obe', tu táan Yuumtzil u ti'al u ka'ajsa'alo'ob. 13U x t'ilcunajilo'obe' beet yéetel oro; 14cu dzo'ocole' beet yéetel ma'alob oro jun p'éel x jóoken jook, bey xan ca'a p'éel suum, ca dzáa tu bak paach le x t'ilcunajilo'obo'.
15Le x pix tzeem yéetel u nu'uculo'ob u yojéelta'al le si'ipilo'obo' yaan u beeta'al je'el bix but' chuyta'anil le efodo', u káat ya'ale' qui'ichquelem beetbil. Beet yéetel oro, chacpuke'en nook, chacjome'en nook, chac nook, yéetel jaxbil lino. 16Ca'a yáal, can ti'itz xan, ca u p'is veinte yéetel cinco centímetros tu jujun ti'itzil u can ti'itzil. 17Tak can tzoolil jadzutz tuunicho'ob yóokol. U yáax tzole' unaj u ta'akal jun p'éel rubí, jun p'éel crisólito yéetel jun p'éel esmeralda; 18u ca'a tzole', jun p'éel granate, jun p'éel safiro, yéetel jun p'éel jade; 19u yóox tzole', jun p'éel jacinto, jun p'éel ágata yéetel jun p'éel amatista; 20u can tzole', jun p'éel topacio, jun p'éel cornalina yéetel jun p'éel jaspe. Le jadzutz tuunicho'obo' unaj u t'ilkajal ti' u x t'ilcunajilo'ob oro u ca'ajo'ob, 21u najmal doce le tuunicho'obo', tumen doce u kaaba'ob u paalal Israel. Tu jujun p'éelil le jadzutz tuunicho'ob bíin dza'abac u kaaba'ob u doce ch'i'ibalilo'ob, bey je'el bix u beeta'al x dzalabe'.
22Beet u ti'al le x pix tzeemo' jun p'éel x jóoken jook yéetel ma'alob oro, ch'ota'an bey suume'. 23Beet xan ca'a p'éel x julubilo'ob oro u ca'aje', ca a dza'ob tu ca'a tzéelil le x pix tzeemo'; 24cu dzo'ocole', dzáa ca'a p'éel x jokenjooko'ob ti' le ca'a p'éel x julubo'ob yaan tu ca'analil u ca'a ti'itz le x pix tzeemo', 25ca xan a dzáa u xuul le x jokenjooko'ob yóokol tu'ux taka'an le jadzutz tuunicho'obo', ca a ma'alob kalo'ob tu nu'ucul tu'ux t'ilcuna'an le efod tu táanilo'. 26Beet u láak ca'a p'éel x julubo'ob oro u caaje', ca a dzáa tu xuul u caablil le pix tzeemo', tu yóokol le sáabchi' yaan ichil cu p'áatal tu tzéel le efodo' 27Beet u láak ca'a p'éel x julubo'ob oro u caaje', ca dza'ob táanil ti' u x kaxabilo'ob le efodo', tu yáanal u tzéel u chuuyilo'ob jun p'íit ca'analil ti' u kax nakil le efodo'. 28Cu nu'upul túun u x julubilo'ob le pix tzeem yéetel u x julubilo'ob le efod yéetel jun p'éel chacpuke'en suum tu yo'olal u p'áatal le x pix tzeemo' jun p'íit ca'analil ti' u kax nakil le efodo', u ti'al ma' u p'áatal náach ti'. 29Beyo' le quéen ococ Aarón ti' le kulnaj u búuquintmaj le x pix tzeem yéetel u nu'uculo'ob p'is óolo', bíin u bis xan yóokol u tzeem u kaaba'ob u paalal Israel tu táan Yuumtzil, u ti'al ca ka'ajac ti' tuláacal kiin. 30Dzáa le Urin yéetel Tumin u nu'ucul u yojéeta'al le si'ipilo'obo', ca bisa'aco'ob tumen Aarón yóokol u tzeem tu táan Yuumtzil. Beyo' tuláacal kiin bíin u bis Aarón yóokol u tzeem u nu'ucul u yojéelta'al le si'ipilo', tu táan Yuumtzil.
31Beet láaj chacpuke'en nook u suyem nookil le efodo', 32yéetel jun p'éel u caalil chúumuc u ti'al u pool. Tu sáabchi' u caalilo', unaj u pa'acal je'el bix yaan ti' le búuco'ob beeta'ano'ob yéetel kéewelo', u ti'al ma' u jáatal. 33Dzáa u jadzutzilo'ob u sáabchi' le j suyem nook yéetel u wóolis ba'alilo'ob, chacpuke'en nook, chacjome'en nook yéetel chac nook, xa'akbesa'an yéetel mejen campanaob oro u caajo'ob ti' tuláacal u sáabchi'. 34Bíin dza'abac jun p'éel chan campana oro u ca'aj, cu dzo'ocole' jun p'éel wóolis ba'al, u láak chan campana, u láak wóolis ba'al, bey bíin beeta'ac tuláacal u sáabchi' le j suyem nooko' 35Aarone' unaj u búuquintmaj le j suyem nook le quéen u beet u aj kiinile', yo'olal le quéen ococ wa le quéen jóokoc tu quili'ich naj Yuumtzile', cu yu'uba'al u tzilin le chan campana u ti'al ma' u quíimilo'
36Beet jun p'éel xamach oro u caaje', ca dzáa je'el bix u dza'abal dzalab, le t'aanoba': Jun páaycuna'an u ti'al Yuumtzil. 37Kax le xamach tu táan le pix jo'ol yéetel chacpuke'en suum yo'olal ma' u péec. 38Beyo' bíin yanac mantadz kiino'ob tu táan jo'olal Aarón, Aarón túune' cu cuchic u si'ipilo'ob le j israelitaob, ti' le quili'ich ba'alo'obo', bey xan le quéen u jun páaycunto'ob u ti'ibil óolalo'obe'; ba'ale' le xamacho', bíin u beet u ka'amal tumen Yuumtzil le ti'ibil óolo'obo'.
39Beet le búuc nook but' chuya'an yéetel lino', beet xan yéetel lino le pix jo'olo'. Le kax nako' bíin but' chuya'ac xan. 40Beet xan u ti'al u paalal Aarón búuco'ob, kax nako'ob yéetel pix jo'olo'ob yo'olal u yantal sáas jome'enil yéetel qui'ichquelemil ti'ob.
41Bey unaj a dzáic u búuco'ob a sucu'un Aarón yéetel u paalal, cu dzo'ocole' ca wequic aceite tu poolo'ob u ti'al a dzáic noj páajtalil ti'ob, ca a jun páaycunto'ob bey in aj kiino'obe'. 42Beet u xut' eexo'ob u ti'al u pixico'ob líikbal u nako'obe' tac tu muuk yooco'ob, 43Aarón yéetel u paalale' unaj u búuquintico'ob le quéen j ococo'ob tu noj Paselil Much'tal, wa le quéen náadzaco'ob tu chuun u multuunil le kultaj u ti'al u meyajo'ob bey aj kiino'ob tin quili'ich naj yo'olal ma' u yantal u si'ipilo'ob ca quíimico'ob. Lela' jun p'éel a'almaj t'aan u ti'al tuláacal kiino'ob ti' Aarón yéetel u paalal.
Currently Selected:
Éxodo 28: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
