Éxodo 30
30
U multuunil kultaj u ti'al u tóocal poom
(Ex 37.25-28)
1Beet xan jun p'éel u multuunil kultaj yéetel u che'il acacia u ti'al u tóocal poom. 2Beet can ti'itzil, cuarenta yéetel cinco centímetros u chowaquil, cuarenta yéetel cinco centímetros u cóochil yéetel noventa centímetros u ca'analil, u baacobe' unaj jun tacáalil beeta'anil yéetel u multuunil kultajo'. 3To'o' yéetel chéen oro yóokol, u can ti'itzo'ob yéetel u baaco'ob, dzáa xan u súut kax oro tu bak paach. 4Dzáa wa jay p'éel u x julubo'ob oro u ca'ajo'ob tu yáanal u jáal, ca'a p'éel ti' jun tzéel yéetel u láak ca'a p'éel ti' u láak jun tzéel, u ti'al u ju'ulul u x katáabilo'ob u ti'al u páajtal u cúuch queléembalta'al. 5Beet u x katáabilo'ob yéetel u che'il acacia to'olanto'ob xan yéetel oro. 6Cu dzo'ocole' dzáa le u multuunil kultajil u tóoca'al poom tu táan le x káasab yaan tu tzéel u ba'asche'il le nup t'aan, tu táan le maac pixmailo', tu'ux quin in nuptáantinbáa ta wéetel. 7Sáamsamal ja'atzcabilo'ob, le quéen nu'ucbesa'ac le sáaso'obo', Aarone' bíin u tóoc qui'iboc poom yóokol u multuunil kultaj u ti'al u tóocal poomo', 8bíin xan u tóoc ocnaj kiin le quéen t'a'abac le sáaso'obo'. Lela', bíin beeta'ac tu táan Yuumtzil tuláacal ja'abo'ob. 9Ma' a kubic mix jun p'éel jela'an poom yóokol u multuunil kultaj tu'ux cu tóocal le pooma', mix le ba'axo'ob u ti'al láaj tóocbilo', mix u ti'ibil óolal jejeláas neeko'ob, mix u ti'ibil óolal u wecbil u kaab uva. 10Le multuunil kultaja' bíin jun páaycunta'ac chéen u ti'al Yuumtzil, ti' jun ja'abe' chéen jun téen bíin ku'ubuc tumen Aarón yóokol u baaco'ob u ki'ikel u mukyajil quíimil u ti'al u sa'atsaj si'ipilil keban. Ti' tuláacal ja'abo'obe', bíin ku'ubuc jun téen ti' junjun ja'abil yóokol u multuunil kultaj tu'ux cu tóoca'al pooma', u mukyajil quíimil u ti'al u sa'atsaj si'ipilil keban.
U bo'olal cuxtal
11Yuumtzile' tu t'anaj Moisese' ca tu ya'alaj ti':
12Le quéen a xoc jay túulo'ob le j israelitaobo', tu junjun túulilo'obe' yaan a dzáic wa buca'aj ti' Yuumtzil bey lojil u ti'al u cuxtalo'obe', yo'olal ma' u yantal mix jun p'éel báan quíimil ti'ob iquil u xo'ocolo'ob. 13Tuláacal le máax bíin dzíibta'ac u kaaba'e', bíin u dzáa u bo'olil u lojil u cuxtale', cinco gramos plata, lelo' táancoch u aalil ti' u p'isibil quili'ich naj 14Tuláacal le máanja'an veinte u ja'abile' yaan u dzáico'ob ti' Yuumtzil le buca'aja', 15Le quéen u dza'ob tu jujun túulil u taakinil u lojil u cuxtalo'obe', mix le ayikale' bíin u dzáa maanal ti' le cinco gramos platao', mix le óotzil bíin p'áatac ma' u dzáic chuca'ani'. 16Beyo' bíin a mol le plata cun u dzáa le j israelitaob bey u taakinil u lo'ojol u cuxtalo'ob, ca kubic u ti'al u yúuchul kultaj ichil u noj Paselil Much'tal. Lelo' bíin u beet u ka'ajal le j israelitaob ti' Yuumtzilo', bey xan bíin ka'ajac ti' tu dzáajo'ob tu yo'olal u lojil le cuxtalo'.
U cáatil p'o'obol' kab yéetel u p'o'obol ooc
(Ex 38.8)
17Yuumtzile' tu t'anaj Moisese' ca tu ya'alaj ti': 18Beet jun p'éel cáat yéetel bronce', ca dzáa u nu'ucul yedztal láili' bronce u ca'aje', u ti'al p'o' kab yéetel p'o' ooc; dzáa chúumuc ti' le u noj Paselil Much'tal yéetel le u multuunil kultajo', chuup yéetel ja'. 19Ti' bíin u jóokeso'ob ja' Aarón yéetel u paalal, u ti'al u p'o'ico'ob u kabo'ob yéetel u yooco'ob. 20Yaan u p'o'icuba'ob le quéen oojco'ob tu noj Paselil Much'talo', bey xan le quéen u nadzuba'ob ti' u multuunil kultaj u kubo'ob tóocbil ti'ibil óolal ti' Yuumtzil. Beyo' ma' tu quíimilo'ob. 21U ti'al ma' u quíimilo'obe' u najmal u p'o'ico'ob u kabo'ob yéetel u yooco'ob. Lela' jun p'éel a'almaj t'aan u ti'al Aarón yéetel u ch'i'ibalo'ob tuláacal ja'abo'ob.
U aceiteil jun páaycunaj
(Ex 37.29)
22Yuumtzile' tu t'anaj Moisese' ca tu ya'alaj ti': 23Teech ta kabile' yéey u asab qui'ibocquil che'ob: bey seis wuudzo'ob u ma'alobil mirra, bey óox p'éel wuudzo'ob canela yéetel bey óox p'éel wuudzo'ob ma'alob u qui'ibocquil jalal; 24bey seis wuudzo'ob casia p'isbil je'el bix u p'iisil le quili'ich najo', yéetel óox p'éel wuudzo'ob ca tac táanccoch u aceiteil oliva. 25Beet u aceiteil le jun páaycunaj yéetel tuláacal le ba'alo'oba', je'el bix u beeta'al qui'iboc ja' tumen le aj meen qui'iboc ba'alo'obo'. Lelo' u quili'ich aceiteil jun páaycunaj, 26kabéet a wequic yóokol u noj Paselil le Much'talo', yóokol u ba'asche'il le nup t'aano', 27yóokol le táasche'o' yéetel u nu'uculo'obo', yóokol le x t'uchub sáas yéetel u nu'uculo'obo', yóokol u multuunil kultaj tu'ux cu tóoca'al poom, 28yóokol u multuunil kultajil le tóocbil ti'ibil óolalo'ob yéetel tuláacal u nu'uculo'obo' yéetel yóokol le cáat yéetel yóokol u nu'ucul u yedztalo'. 29Beyo', bíin a jun páaycunto'ob u ti'al u p'áatalo'ob sen quili'icho'ob; je'el ba'ax ca cóojoque' cu p'áatal quili'ichil.
30Wec xan le aceite yóokol Aarón yéetel u paalal u ti'al a jun páaycuntico'ob bey in aj kiino'obe', 31ca wa'al ti' le j israelitaob lela': Tuláacal ja'abo'obe', lela' u quili'ich aceiteil in jun páaycunaj. 32Ma' wequique'ex tu yóokol chéen je'el máaxe', mix a nu'ucbesique'ex u láak aceite beyo'. Lelo' jun p'éel quili'ich aceite, ile'ex beyo', bic a manba'alcunte'ex. 33Wa yaan máax ca u beet u láak aceite bey je'el bix in aceite u wec yóokol yaanal je'el máaxaco', yaan u tze'elel ichil u caajal.
Bix u máakanta'al quili'ich poom
(Ex 37.29)
34Yuumtzile' tu ya'alaj ti' Moisés: Dzáa jun p'éelili' p'iis ti' u jujun p'éel le ba'alo'oba': yiitz che', qui'iboc íich'ac, ma'alob poom bey xan u qui'iboc iitz gálbano, 35beet yéetel tuláacal le ba'alo'oba' jun p'éel ma'alob quili'ich poom, ma'alob xa'akta'anil je'el bix u beeta'al tumen jun túul j meen qui'iboc ja'e'. 36Juch' jach Ma'ay jun jaatzi', dzáa yóokol u ba'asche'il le nup t'aan le tu'ux bíin in nuptáantinbáa ta wéetelo'. Le pooma', jach quili'ich a ti'ale'ex, 37Ma' utz ca beete'ex u láak je'el bix beeta'anil le je'ela', u ti'al j meyaj ti' te'ex. Lelo', u ti'al Yuumtzil, a ti'al teche' u najmal u jach quili'ich ba'altal. 38Le máax bíin u beet u láak poom je'el bix le je'ela', u ti'al u yúudzbente', yaan u tze'elel ichil u caajal.
Currently Selected:
Éxodo 30: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
