Éxodo 21
21
A'almaj t'aano'ob u ti'al máaxo'ob yaan u palitzilo'ob
(Dt 15.12-18)
1Leti'e' A'almaj t'aano'ob bíin a dzáa ti'oba': 2wa ca manic jun túul hebreo a palitzilte', bíin meyajnac seis ja'abo'ob, ba'ale' tu siete ja'abe' bíin a a cha'a u bin, ma' bíin bo'olnac tu yo'olal u jóokol tu palitzili'. 3Wa j kuch tu juune' tu juunal bíin xi'ic; wa j kuch yéetel u yatane' bíin xi'ic yéetel u yatan; 4wa j dzaab co'olel ti' tumen u dzuulil cu yantal j xibil paalalo'ob wa x ch'upul paalalo'ob ti'e', le co'olel yéetel le paalalo'obo', u ti'al u dzuulil, leti'e' tu juunal bíin xi'ic. 5Ba'ale' wa le palitzil ma' tu yóoltic bin tumen u yaabiltmaj u yatan, u paalal yéetel u dzuulile', 6le dzuul túuno' bíin u bis tu táan Ku, ca u wa'acunt taakal ti' le jool naj wa ti' u pakab che'il, cu pot lomtic u xiquin yéetel púudz máascab. Beyo' cu p'áatal u palitzil tuláacal u kiinil u cuxtal.
7Wa yaan máax cu conic u x ch'upul paal u ti'al x palitzilile', leti'e' ma' bíin jáalkabta'ac je'el bix le j xiibil palitzilo'. 8Wa le dzuul ma' tu dzo'ocol u beel yéetel tumen ma' utz tu yiche', unaj u kamic u bo'olil u jáalkabtajil; Ba'ale' ma' tu páajtal u conic ti' mix jun túul j táanxel lu'umil quex ma' utz tu yichi'. 9Wa cu dzo'ocsic u beel yéetel u j xibil paale', bíin u bisubáa x yéetel bey je'el bix wa u x ch'upul paale'. 10Wa cu yantal u láak u yatane', ma' bíin u jun p'íitcuns u janal u yáax atani' mix u nook, mix u láak ba'al cu ti'alintic jun túul x atantzil. 11Ba'ale' wa ma' tu dzáic ti' mix jun p'éel ti' le óox p'éel ba'alo'oba', leti'e' cu páajtal u bin quex ma' u bo'otic mix ba'al yo'olal u p'atic u x palitzilil.
A'almaj t'aano'ob u ti'al máaxo'ob cu quíimsajo'ob
12Le máax loobiltic u láak máac, tac u quíimsique', yaan u xot kíinta'al j quíimil. 13Ba'ale', wa ma' taaliti' u beetic, tumen ti' Ku u taalbal ca quíimique', teen bíin in wa'al teech tu'ux bíin u ta'acbesubáa. 14Ba'ale', le máax cu p'u'ujul ti' u láaktzil cu quíimsic x ma' péec óolale', yaan a caxantic quex u ta'acbesubáa tu multuunil in kulta'al, yaan a xot kintic, yaan u quíimil.
15Le máax cu loobiltic u taata wa u maamae', bíin xot kíinta'ac, yaan u quíimil.
16Le máax ocoltmail jun túul máac, bey xan dzo'oc u conic wa quex ca'aliquil ti' yaan tu yicnale', bíin xot kinta'ac, yaan u quíimil.
17Le máax cu poch'ic u taata wa u maamae', yaan u xot kíinta'al j quíimil.
18Ichil ba'atelo'obe', wa jun túul máac cu loobiltic u láak máac yéetel tuunich wa yéetel loox, cu beetic u chuquic káan ma' tu quíimile', 19le máax beet le loobo' bíin a'ala'ac mina'an u si'ipil, chéen wa le máax loobilta'ano' cu líikil, cu páajtal u jóokol tu yotoch yéetel u xóolte', lelo' yaan u bo'otic u dza'acal, bey xan le kiino'ob cu p'áatal ma' tu meyajo'.
20Le máax cu kol jadzic yéetel che' u palitzil wa u x palitzil tac u quíimsique', yaan u beeta'al u bo'otic le loob tu beetajo'. 21Ba'ale' wa cu cuxtal quex jun p'éel kiine', ma' bíin beeta'ac, mix ba'al ti'i' tumen ba'al u ti'al le palitzilo'.
22Wa iquil u ba'atel ca'a túul máaco'ob cu loobiltico'ob jun túul x co'olel x yo'om ca kuchuc éemel u yaale', wa ma' tu kuchul tu chi'il quíimil le x co'olelo', le máax beeto' unaj u bo'otic le buca'aj bíin u káat u yíicham le x co'olelo', je'el bix cun u ya'alic le j táan óol ba'atelo'obo'. 23Ba'ale' wa cu kuchul tu chi' quíimil le co'olelo', bíin tza'abac cuxtal tu yo'olal cuxtal, 24ich tu yo'olal ich, coj tu yo'olal coj, kab tu yo'olal kab, ooc tu yo'olal ooc, 25chu'ujul tu yo'olal chu'ujul, loob tu yo'olal loob, loox tu yo'olal loox.
26Wa yaan máax cu kolic yich u palitzil wa u x palitzil ca kuchuc u ch'óopquint jun p'éel yiche', tu yo'olal le u yicho' yaan u cha'ic u bin. 27Wa cu jodzic jun p'éel u coje', tu yo'olal le cojo' yaan cha'ic u bin.
A'almaj t'aano'ob u ti'al tu'ux cu yúuchul loob
28Wa jun túul wacax cu kóochic jun túul j xiib, wa jun túul co'olel, tac u kuchul u quíimse', yaan u quíimsa'al yéetel ch'iin le wacaxo' cu dzo'ocole' ma' bíin jaanta'ac u bakeli', ba'ale' ma' tu beeta'al mix ba'al ti' u yuumil. 29Ba'ale' wa suuquili' u kóoch, tu yo'olal u kóoch cu kuchul u quíims máaque', yaan u quíimsa'al yéetel ch'iin pa'ate'e' yéetel u yuumil wa leti' u yojel suuc u kóoch u waacax. 30Wa tu cúuchil u quíimil cu dza'abal jun p'éel bo'ol ti'e', yaan u bo'otic le buca'aj bíin a'ala'ac ti' tu cúuchil u cuxtalo'. 31Le a'almaj j t'aana' leti' xan bíin meyajnac, quex wa j xi'ipal, quex wa x ch'úupal le máax cu kóochalo'. 32Wa le wacax cu kóochic jun túul palitzil wa jun túul x palitzile', cu quíimsa'al yéetel ch'iin, cu dzo'ocole' cu bo'ota'al treinta sac taakino'ob ti' u dzuulil le palitzil wa le x paliltzilo'.
33Wa máax cu je'ic jun p'éel ch'e'en wa cu jolic jun p'éel ch'e'en ma' tu maquic, let o'olal cu lúubul jun túul wacax wa jun túul burro ichile', 34U yuumil le ch'e'eno' yaan u bo'otic ti' u yuumil le ba'alche' j quíimo', ba'ale' le j quimen ba'alche'o' je'el u páajtal u p'áatal ti' u yuumil le ch'e'eno'.
35Wa u wacax jun túul máac cu kóochic u wacax u láak máaque', cu co'onol le wacax cuxa'ano', cu t'oxicuba'ob yéetel u tojol, bey xan yaan u t'o'oxol u bakel le j quimen wacaxo'. 36Ba'ale' wa ojéelta'an suuc u kóoch ca'ach le wacax chéen cu yila'al tumen u yuumilo', yaan u dza'abal cuxa'an u je'el le wacax quimeno', cu dzo'ocole' le j quimen wacaxo' u ti'al u yuumil le wacax kóochnajo'.
Currently Selected:
Éxodo 21: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
