Éxodo 20
20
U diez a'almaj t'aano'ob Yuumtzil
(Dt 5.1-12)
1J t'aanaj Kue' ca tu ya'alaj tuláacal le t'aano'oba': 2Teen Yuumtzil a Junab Ku máax jóokesech Egipto tu'ux j palitzilta'abe'ex ca'achi'.
3Ma' u yantal teech yaanal kuob wa ma' teen.
4Ma' a beetic mix jun túul patbil ku, mix u yoochel ba'ax yaan j ca'an, mix le ba'ax yaan yáanal lu'umo', mix ti' le ba'ax yaan te j ka'anab tu yáanal le lu'umo'. 5Ma' a chíin pooltico'ob, mix a kultico'ob, tumen teen Yuumtzil a Junab Kue', Ku cu yaj óolal, cu jadzic u kasa'anil le taataob u p'ectmajeno'ob, líikbal ti' u paalalo'obe' tac ti' u ca'a áabilo'ob. 6Ba'ale' quin we'esic in yaacunaj ti' mil ch'i'ibalo'ob ti' le máaxo'ob u yaabiltmajeno'ob yéetel cu dzo'ocbesico'ob in wa'almaj t'aano'ob.
7Ma' ch'a'a chi'itic u kaaba' Yuumtzil a Ku chéen cunel, tumen leti'e' ma' bíin u p'at x ma' jaadzil máax ch'a'achi'itic u kaaba' chéen cuneli'.
8Ka'ajac teech sábado u ti'al ca jun páaycunt ti' Yuumtzil. 9Meyajnen seis kiino'ob, beet ichilo'obe' tuláacal ba'ax kabéet a beetic, 10Ba'ale' u siete kiine' sábado jun páaycunta'an u ti'al Yuumtzil a Ku. Teche' ma' bíin meyajnaquech ti' le kiino', mix a j xibil paal, mix a x ch'upul paal, mix a palitzil, mix a x palitzil, mix a walak ba'alche'ob, mix le j táanxel lu'umil cajnáal ta wicnalo'. 11Tumen Yuumtzile' seis kiino'ob tu beetilac ca'an, lu'um, ka'anab yéetel tuláacal le ba'axo'ob yano'obe'. Let o'olale' Yuumtzile' tu qui' t'antaj sábado, ca tu jun páaycuntaj.
12Tzic a taata, tzic xan a maama, u ti'al ca chowacchajac u kiinilo'ob a cuxtal yóokol le lu'um cu dzáic teech Yuumtzil a Kuo'.
13Ma' a quíimsaj.
14Ma' a beetic nup keban.
15Ma' a woocol.
16Ma' a tuus u ti'al a dzáic kaasil a láak
17Ma' dzíiboltic a toquic u yotoch a láak, Ma' dzíiboltic a toquic u yatan, mix u palitzil, mix u x palitzil, mix u wacax, mix u burro, mix je'el ba'ax u ti'ale'.
Le j israelitaobo' cu yantal u sajbe'entzil Ku ti'ob
(Dt 5.22-33)
18Tuláacal le j israelitaobo' tu yu'ubajo'ob le quíilbal cháac, tu ya'alajo' tu yilajo'ob u léembal cháac, tu yu'ubajo'ob xan u jóopsa'al le trompetaobo', bey xan tu yilajo'ob le pu'uc pixa'an tumen le buudzo': ba'ale' bey sajaco'ob ca'acho', j p'áato'ob náach. 19Let o'olale' tu ya'alajo'ob ti' Moisés: Teech t'aano'on, ca c u'uy a t'aan; ba'ale' ma' u t'anico'on Ku, tumen ma' xan ca quíimiconi'.
20Moisese' tu núucaj ti'ob: Ma' a sajacchajle'ex. Kue' dzo'oc u taal u túunte'ex u ti'al ca ch'a'ex sajacquil ti' tu yo'olal ma' a kebanchajle'ex.
21Ca'aliquil le caaj p'áatal náacho', Moisese' j naadz ti' le j éekjoch'e'en múuyal tu'ux yaan Kuo'.
Bix tu ya'alajilac Ku ca beeta'ac u multuunil kultaj
22Yuumtzile' tu ya'alaj ti' Moisés: A'al bey ti' le j israelitaoba': Te'exe' ta wilaje'ex bix t'aanajiquen j ca'an ta wéetele'ex. 23Ma' beetique'ex kuob oro u ca'aj wa plata u ca'aj u ti'al a kulte'ex je'el bix a kultiquene'exe'. 24Beete'ex u multuunil in kulta'al yéetel lu'um, ca kube'ex teen tu yóokol u ba'alche'ilo'ob a waalake'ex yéetel a wacaxe'ex láaj tóocbil, bey xan quíimsbil u ti'al ca'a bisbáil. Tene' bíin taaquen in qui' t'ante'ex ti' tuláacal le cúuchilo'ob tu'ux in káat ca ka'ajsa'ac in kaaba'e'. 25Wa bíin a beete'ex yéetel tuunich jun p'éel multuunil kultaje', ma' a beetique'ex yéetel póolbil tuunich. Tumen le quéen a póole'ex le tuunich yéetel u nu'ucul u yúuchul meyajo' ca manba'alcuntique'ex le multuuno'. 26U multuunil in kulta'ale' ma' unaj u yantal u eb tuunili', tu yo'olal le quéen xíimbalnaquech yóokole', ma' a we'esic a chacnulil.
Currently Selected:
Éxodo 20: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
