Éxodo 22
22
U ya'almaj t'aanilo'ob u ti'al jejeláas loobo'ob
1Wa cu yantal máax ocoltic jun túul wacax wa jun túul j taman u ti'al u quíimse wa u ti'al u cone', yaan u sutic cinco wacaxo'ob tu yo'olal jun túul wacax yéetel can túul j tamano'ob tu yo'olal jun túul j taman.
2Wa cu chu'ucul jun túul j oocol, cu loobilta'al tu yo'olal táan u yoocole', lelo' ma' bíin a'ala'ac wa quíimsaj wíiniquili'. 3Ba'ale' wa dzo'oc u sáastale', lelo' jun túul quíimsaj wíiniquil.
Le máax cu yoocole' yaan u bo'otic le ba'ax cu yocoltico'. Ba'ale' wa mina'an taakin ti'e' yaan u co'onol leti' u ti'al u bo'ota'al le ba'ax tu yocoltajo'.
4Wa cu nactáanta'al ti', cuxa'an le ba'alche' tu yoclajo', yaan u bo'otic ca'a túuli', je'el ba'axaque', wa jun túul wacax, wa jun túul burro, wa jun túul j taman.
5Wa yaan máax cu jáalkabtic u yaalako'ob j janal ti' jun p'éel cool wa ichil x péet paache', wa u yaalako'ob cu janalo'ob tu cool yaanal máaque', yaan u bo'otic yéetel u asab ma'alobil u cool wa yéetel u x péet paach.
6Wa yaan máax cu t'abic káak, cu yáalcab ich ki'ixo'ob ca kuchuc u tóoc trigo much'quinta'an, wa ba'ax ta'itac u jo'ochol, wa u cúuchil tu'ux paka'ane', le máaco' yaan u bo'otic le ba'ax tu tóocaj le káako'
7Wa yaan máax cu kubentic taakin, wa ba'alo'ob co'oj u tojol ti' u láak máac, ba'ale' cu yocolta'al le ba'alo'ob tu yotoch le máac kam le kubeno', le j oocolo' leti' bíin bo'otic u ca'a máal ti' u tojol le ba'ax j ocla'ab, wa cu chu'ucul máax ocoltmilo'; 8ba'ale' wa ma' j chu'uc le j oocolo', u yuumil le najo' yaan u bisa'al tu táan Ku u ti'al u yila'al wa ma' leti' j ch'a'a le ba'axo'ob kubenta'ab ti'o'.
9Wa yaan máax cu ch'a'ic jun túul wacax, wa jun túul burro, wa jun túul j taman, wa jun p'éel búuc, wa je'el ba'alac cu sa'atale' wa yaan máax a'alic u ti'ale', le ca'a túul máaco'obo' yaan u bisa'alo'ob tu táan Ku, le máax cun jóokol j sipa'anile', yaan u bo'otic ca'a téen u tojol.
10Wa yaan máax cu kubentic ti' u láak máac jun túul burro, wa jun túul wacax, wa jun túul j taman wa jun túul je'el ba'axac ba'alche'ile', wa cu quíimil le ba'alche'o', wa cu quiimbesa'ale', wa cu yocolta'al ca'aliquil mix máac ilique', 11le máaco', tu kaaba' Yuumtzil yaan u jalach t'antic ti' u yuumil le ba'alche'o' ma' leti' j ch'a'a' le ba'ax kubenta'ab ti'o'. U yuumil le ba'alche'o' yaan u éejemtic le t'aan beya', beyo' u láak máaco' ma' bíin u bo'ot mix ba'ali'. 12Ba'ale' wa tu táan yich ocolta'ab le ba'alche'o', yaan u bo'otic ti' u yuumil. 13Wa le ba'alche' xe'exe'et'a'ab tumen j chi'ibal ba'alche', yaan u ye'esa'al u yalab le j quimen ba'alche' u ti'al ca ila'ac jaaj.
14Wa yaan máax cu káatic majnil jun túul ba'alche', wa ca kuchuc j quíimil wa ca kuchuc úuchul loob ti' le ba'alche'o', wa mina'an u yuumil te'elo', le máax káat majnilo' yaan u bo'otic; 15ba'ale' wa u yuumil tu yilaj ba'ax úuch ti'e', ma' bíin u bo'ot mix ba'ali'. Wa majan bo'olil káata'abic le ba'alche'o', u tojol u majanilo' leti' bíin p'áatac u bo'olintej.
U ya'almaj t'aanilo'ob tojil cuxtal yéetel kultaj
16Wa yaan máax cu táabsic jun túul x sujuy x ch'úupal ma' dza'aba'an u t'aanil dzo'ocol beel ti'e', yaan u bo'otic u mu'ujulil je'el bix suuquile', yaan u dzáic u x mu'ujulil dzo'ocol beel je'el bix suuquile' yaan xan u dzo'ocol beel x yéetel 17Quex wa u taata le x ch'úupal ma' u káat u dzáa ti' u ti'al u yatante', yaan u dzáic u tojol le mu'ujulil suuc u dza'abal tu yo'olal jun túul sujuy x ch'úupal.
18Ma' a p'atic cuxa'anil mix jun túul x pulya'aj.
19Le máax cu suuctal u nupcubáa yéetel jun túul ba'alche', yaan u xot kinta'al, yaan u quíimil.
20Le máax cu kubic quíimsbil ba'alche'ob ti' u láak kuob, tu yo'olal ma' tu kubic chéen ti' Yuumtzile', bíin xot kinta'ac, yaan u quíimil.
21Ma' a loobiltic mix a yedzic le j táanxel lu'umilo', tumen te'ex xane' ta beetaje'ex a j táanxel lu'umile'ex Egipto.
22Ma' a loobiltic le x quimen íichamo' mix le j ma' taataobo', 23Tumen wa iquil a loobiltico'ob leti'ob cu káatico'ob teen áantaje', tene' bíin xi'iquen u ti'al in wáanto'ob, 24bíin túun in lukes a cuxtale'ex yéetel talam p'u'ujul, yéetel xan u yej máascab. A watane'ex túune' bíin p'áataco'ob x quimen íichamo'ob, a paalale'exe' bíin p'áataco'ob j ma' taataob.
25Wa ca dzáic taakin majnil ti' jun túul u yóotzilil in caajal, cajnáal ta wicnale', ma' beetic yéetel je'el bix u beetic jun túul j dzáa majan taakine', mix a beetic u bo'otic teech u tip'anil. 26Wa le máac cu dzáic teech u nook bey u tojol le taakin ca dzáic majnil ti'o', sut ti' le quéen t'úubuc le kiino', 27tumen chéen le nook yaan ti' u ti'al u kíinticubáa ti' le que'elo'. Wa ma' ta sutic ti'e', ¿bix bíin chilac j wenel? Wa leti' cu káatic teen áantaje', bíin xi'iquen in wáantej, tumen tene' in wojel in ch'a'a óotzilil.
28Mix bikin bíin táabaquech a poch' Ku, mix bíin kaakas t'aanaquech tu yo'olal u aj méektáanil a caajal.
29Ma' u xáantal a taasic teen u ti'ibil óolalil a joocho'ob yéetel tuláacal a vino.
A j yáax paale' bíin a dzáa teen, 30bey xan u j yáax aal a wacax yéetel a j taman. Je'el u páajtal u p'áatal siete kiino'ob tu yicnal u maamae', ba'ale' tu ocho kiin síijique' ca dzáic teen.
31Te'exe', j xiibe'ex u najmal a jun páaytale'ex in ti'al.
Ma' a jaantique'ex u bakel ba'alche'ob xe'exe'et'a'an tumen j chi'ibal ba'alche'ob; pule'ex ti' peeko'ob.
Currently Selected:
Éxodo 22: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
