Éxodo 19
19
Le j israelitaobo' cu kuchulo'ob tu pu'uquil Sinaí
1Le j israelitaobo' j kucho'ob tu x tocoy lu'umil sinaí tu yóox p'éel mesil jóokico'ob tu lu'umil Egipto. 2Cu dzo'ocol u jóokolo'ob Refidime' j kucho'ob tu lu'umil Sinaie', ca j je'elo'ob actáan ti' le pu'uco'. 3Te'elo' ti' j na'ac Moisés u ti'al u nuptáantubáa yéetel Kue', tumen j t'a'an te j pu'uc tumen Yuumtzilo' ca a'ala'ab ti': Ca a'al le t'aano'ob je'el: ti' le j israelitaobo' u ch'i'ibalo'ob Jacoba', 4Te'exe' ta wilaje'ex ba'ax tin beetaj yéetel le j Egipciobo', bey xan bix úuchic in taasique'ex bey ti' u xiknal cóot tac le tu'ux yanena'. 5Bey túuno' wa ca láaj u'uyique'ex in t'aan yéetel ca dzo'ocbesique'ex in nup t'aane', bíin a beetaba'ex in j yéeybil caajal ichil tuláacal caajo'ob, tumen tuláacal le lu'umo' in ti'al. 6Te'exe' bíin a beetaba'ex jun p'éel u ajawil aj kiino'ob, jun p'éel jun páaycuntbil caaj in ti'al. A'al tuláacal le je'el ti' le j israelitaobo'.
7Moisese' j bin u t'aan u nuuquilo'ob le caajo', ca tu láaj a'alaj ti'ob le ba'ax j túuchi'ita'ab ti' tumen Yuumtzil cu ya'alo'. 8Le j israelitaob túuno' tu núucajo'ob yéetel jun p'éelili' t'aan; Bíin c beet tuláacal le ba'ax dzo'oc u ya'alic Yuumtzilo'. Moisés túune' tu bisaj ti' Yuumtzil u núuc t'aan le caajo'. 9Yuumtzile' tu ya'alaj ti' leti': Ile, bin in ca'aj taal ta táan chúumuc ti' jun p'éel j tat múuyal, yo'olal u yu'uba'al in t'aan ta wéetel tumen le máaco'obo', ca u táan óolteno'ob mantadz kiin. Moisese' tu ca a'alaj ti' Yuumtzil u núuc t'aan le caajo'. 10Yuumtzile' tu ya'alaj ti': Xeen a nu'ucbes le caaj bejela'e' yéetel sáamal, u ti'al u kulteno'ob. Kabéet u p'o'ico'ob u nooko'ob 11yéetel u nu'ucbesicuba'ob u ti'al ca'abej, tumen teen Yuumtzile' ca'abej in wéemel tu pu'uquil Sinaí tu táan yich tuláacal le caajo'. 12Dzáa xu'uko'ob tu jáal le pu'uc u ti'al ma' u ch'acta'al tumen le máaco'obo', a'al ti'ob xan ma' u na'acalo'ob te j pu'uco', mix u náadzalo'ob tu bakpach, tumen tuláacal máax bíin náadzaque' yaan u xot' kíintal u cuxtal. 13Ba'ale' mix máac bíin u dzáa u kab yóokol, tumen yaan u quíimsa'al yéetel ch'iin wa yéetel x julubo'ob. Quex wa máac quex wa ba'alche', ma' unaj u p'a'atal u cuxtali'. Le máaco'obo' je'el u páajtal na'acalo'ob te j pu'uco' chéen le quéen u yu'ubo'ob u jóopsa'al u baac le j tamano'.
14Moisese' j éem te j pu'uc u nu'ucbes le caaj u ti'al u kultic Ku. Le máaco'obo' tu p'o'ojo'ob u nooko'ob, 15ca j a'ala'ab ti'ob tumen Moisés: Nu'ucbesaba'ex u ti'al ca'abej, ca'aliquile' ma' wenele'ex yéetel a watane'ex.
16U ti'al u sáaschajal tu yóox p'éel kiine' yanchaj léembal cháaco'ob yéetel juumbal cháaco'ob, ca j jay jun p'éel tat múuyal yóokol le pu'uco'. Jun p'éel ka'amcach jóopsaj trompetaob tu beetaj u quíilbal yéetel sajacquil tuláacal le máaxo'ob yano'ob ichil le caajo'. 17Moisés túune' tu jóokesaj le caaj ti' le jaatoo' u ti'al u nuptáantuba'ob yéetel Ku, ca j je'elo'ob tu jáal le pu'uco'. 18Tuláacal ca'ach u pu'uquil Sinaí cu buudzilanquil úuchic u yéemel Yuumtzil tu chúumuc jun p'éel káak. Le buudzo' cu bin ca'anal bey u buudzil chujcabe', táan xan ca'ach u sen quíilbal le pu'uco'. 19U jóopsajil le trompetaobo' táan ca'ach u bin u sen ka'amtal; Cu t'aan ca'ach Moisese', cu núuca'al ti' tumen Ku yéetel jun p'éel ka'amcach t'aan bey u juum jaadz cháaque'.
20J éem Yuumtzil yóokol u asab ca'anlil u pu'uquil Sinaio', ca'a tu ya'alaj ti' Moisés ca náacac tu'ux yaan leti'o'. Moisese' j na'aqui'. 21Yuumtzile' tu ya'alaj ti': Éemen a wa'al ti' le máaco'ob ma' u ch'actico'ob le xu'uko'ob dza'an tu jáal le pu'uco', mix u p'iscuba'ob u yiliqueno'ob, ma' xan ca lúubuc quimenil ya'ab ichilo'obi'. 22Tac le aj kiino'ob cu páajtal u náadzalo'ob teno', kabéet u ma'alob ichquilo'ob, ma' xan ca in beet nojoch loob ichilo'obi'.
23Moisese' tu núucaj ti' Yuumtzil: Le caaja' ma' bíin táabac na'acal tu pu'uquil Sinaia', tumen teche' ta kuben t'antaj ca dza'abac xu'uko'ob tu jáal paach, ta wa'alaj xan quili'ich.
24Ba'ale' Yuumtzile' tu ya'alaj ti': Xeen, éemen, cu dzo'ocole' ca na'acal yéetel Aarón, ba'ale' le aj kiino'ob yéetel le caajo' ma' unaj u ch'actico'ob le xu'uko'ob u ti'al ca na'acaco'ob tu'ux yanena', ma' xan ca in beet u yantal quíimil ichilo'obi'.
25Moisese' j éem te j pu'uco' ca tu ca'a a'alaj le ba'alo'ob ti' le j israelitaobo'.
Currently Selected:
Éxodo 19: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.
