1 MACABEOS 9
9
Bix quíimic Judas Macabeo
1Le ca tu yojéeltaj Demetrio dzo'oc u quíimil Nicanor bey xan u aj ba'atelo'ob ich ba'atele', tu ca'a túuxtaj Báquides yéetel Alcimo tu lu'umil Judea tzaypachta'an tumen u aj ba'atelilo'ob u x no'oj kabil. 2Jo'op' u bino'ob tu bejil Galilea, tu puljuba'ob tu yóokol Mesalot, le yaan tu lu'umil Arabelae', ca tu ch'a'ajo'ob le caajo' ca tu quiimsajo'ob tuláacal u cajnáalilo'ob.
3Tu yáax winal u ja'abil ciento cincuenta y dose' je'elo'ob tu tzéel u caajil Jerusalén. 4Te'elo' tu tojtáanto'ob Berot yéetel veinte mil xíimbal oc aj ba'atelo'ob, bey xan dos mil cu nat' tzíimino'obi'. 5Judase' dzo'oquili' u je'elel tu lu'umil Elasa yéetel tres mil yéeybil aj ba'atelo'obe'. 6Le j xiibo'ob yano'ob tu yicnal Judaso' le ca tu yilajo'ob asab ya'ab le aj p'eeco'ob tu tzéelo'obo' tu ch'a'ajo'ob sajaquile', ca j púudz ya'ab ti'ob ti' le cúuchil tu'ux cu je'elelo'obo', ca j p'áat chéen ochocientos j xiibo'ob te j cúuchilo'. 7Le ca tu yilaj Judas dzo'oc u púudzul u aj ba'atelo'ob bey xan ma' tu páajtal wet'ico'ob le ba'atelo', j lúub u yóol tumen dzo'oc u náadzal le ba'atelo' ma' tu páajtal u ca'a much'quintic le aj ba'atelo'obo'. 8Bey luba'anil u yóolo' tu ya'alaj ti' máaxo'ob p'aatalo'ob tu yicnalo':
¡Péecnene'ex, cone'ex ba'atelt c aj p'eeque'ex u ti'al c ila'a wa je'el c páajtal tu yéetelo'obe'!
9Ba'ale' leti'obe' tu núucajo'ob:
¡Ma' bíin páataco'oni'! Chéen je'el u páajtal c púudzul cuxa'ano'one'. Cu dzo'ocole' c suut tu yéetel c láako'obe' c ba'atel tu yéetel c aj p'eeco'ob. ¡Bejela'e chéen jun p'íito'on!
10Judase' tu núucaj: ¡Mix u tuculta'al wa bíin púudzuquen ti' le aj p'eeco'obo'! Wa dzo'oc u kuchul u kiinil c quíimile', quíimico'ob bey u quíimil j xiibo'ob tu yo'olal c láako'obe' ma' c cha'ique'ex u manba'al c tziiquil. 11Le aj p'eeco' jóok le tu'ux jelecbalo' ca j yanchaj tu táan le judíobo'. Le cu nat' tzíimino'obo' ca'a jaatz jóokico'ob. Le cu ch'iino'ob yéetel yúutun bey xan le yaan u x p'unche'obo', cu bino'ob tu táan u yalab le aj ba'atelo'obo'. Te j yáax tzoolo' ti' dza'ano'ob le aj ba'atelo'ob asab j xiibo'obo'. 12Báquidese' ti' yaan tu no'ojile'. U ya'abil le aj ba'atelo'obo' ca'a jaatz tu puljiluba'ob j ba'atel le ca juumnaj le paaxo'obo'. 13U juum le aj ba'atelo'obo' cu beetico'ob u quíilbal le lu'umo'. Le ba'atelo' chúun ja'atzcab kiine' ca tu chucaj tac tu yoocbal kiin. 14Le ca tu yilaj Judas ti' yaan Báaquides yéetel u asab ya'abil le aj ba'atelo'ob tu no'ojilo', leti' yéetel u asab xiibil aj ba'atelo'ob yano'ob tu yicnalo' 15tu pa'ajo'ob u tzoolil le aj ba'atelo'ob yaan tu no'ojilo' ca tu ch'a'apachtajo'ob tac tu witzilo'ob Azor. 16Le ca tu yilaj le aj ba'atelo'ob yano'ob tu dzíiquil dzo'oc u pa'abal u muuk le yano'ob tu no'ojilo', j suunajo'ob tu paach Judas cu ba'atel tu tzéel le j xiibo'ob yaan tu yicnalo', ca tu ba'atelto'ob paachil. 17Le ba'atelo' sen yajchaji' ya'ab j quíimo'ob ti' tu ca'a jaatzilo'obi'. 18Judas xane' j lúub quimen u chuucáano'obe' j púudzo'ob.
19Jonatán yéetel Simone' tu ch'a'ajo'ob Judas u sucuno'obe' ca tu mucajo'ob tu mucnal u máanja'an ch'i'ibalo'ob tu caajil Modín. 20Tuláacal u caajil Israel okolnaj yéetel nojoch okom óolal ya'abcach kiino'ob. Táan u ya'alico'ob: 21¡Bix lúubic le nojoch xiixib máax toc Israel! 22U yalab u tzicbalil Judas yéetel u ba'atelo'ob bey xan le nucuch ba'alo'ob u beetmaje'. sen ya'ab ma' dzíiba'ano'obi'.
Jonatane' leti' u jeel náacom
23Cu dzo'ocol u quíimil Judase' le judíob j kéex óolo'obo' j bin utzil ti'ob tu ca'a téen ti' tuláacal u lu'umil Israel, ca jo'op' u chíicpajal tu ca'a téen le loolob máaco'obo'. 24Ti' le kiino'obo' yanchaj jun p'éel nojoch wi'ij ti' le lu'umo', bey túuno' tuláacalo'ob yanchaj u máano'ob tu tzéelo'ob. 25Báquidese' tu yéeyaj loolob j xiibo'ob u ti'al u dzáa tu táan le múuch' caajo'. 26Leti'obe' jo'op' u caxtico'ob tuláacal tu'ux u yéet óolo'ob Judase', u ti'al u biso'ob tu táan Báquides, leti'e' jo'op' u sutic u jeel loob ti'ob bey xan jo'op' u poch'ico'ob. 27Lelo' j suunaj u kiinilo'ob nojoch yaj óolal u ti'al Israel, ma' ila'ac u láak beyo' likbal tu kiinilo'ob mina'amac aj bóobato'ob.
28Bey túuno' tuláacal u yéet óolo'ob Judase' tu much'juba'obe' ca tu ya'alajo'ob ti' Jonatán: 29Le kiin ca j quíim a sucu'un Judase', ma' yanac jun túul j xiib je'el bix leti'e' ca ba'atelnac yéetel le aj p'eec, mix yéetel Báquides mix yéetel u láak wíinico'ob u p'ecmajo'ob c múuch' caajale'ex. 30Le o'olale' bejela'e' c dzáiquech ca a jeelinte', u ti'al ca a beet a náacomil u ti'al a nu'uctico'on bix bin c ba'atel. 31Ti' le súutuco' Jonatane' tu ch'a'aj le náacomil cu beetic ca'ach Judas u sucu'une'.
32Báquidese' le ca tu yojéeltaje' tu yóoltaj u quiimse. 33ba'ale' Jonatán yéetel Simón u yíidzine' bey xan le máaxo'ob yano'ob tu yéetelo'obe' tu yojéeltajo'obe', ca j púudzo'ob tu x tocoy lu'umil Tecoa, ca je'elo'ob tu tzéel u péet tuunichil ja' yaan Asfar. 34Báquidese' tu yojéeltaj lela', u ti'al u jun p'éel u kiinil je'elele', leti'e' j máan tu táanxel tzéelil u áalcab ja'il Jordán yéetel tuláacal u aj ba'atelo'ob.
35Jonatane' tu túuxtaj u yíidzin Juan, le máax cu bin táanil ti' u aj ba'atelo'ob u ti'al u káat óolte ti' le j nabateob, u yéet óolo'ob ca cha'abac u p'atico'ob te'elo' le ya'abcach nu'ucul ba'atel cu bisico'obo'. 36Ba'ale' jun jaatz j xiibo'ob ti' u ch'i'ibal Jambrie' jóoko'ob tu caajil Medebae', ca tu yocoltajo'ob Juan pa'ate' yéetel tuláacal u nu'ucul le ba'atel cu bisico' ca j púudzo'obe' ca tu bisajo'ob tuláacal.
37Cu dzo'ocol u máan dze'edzec kiino'obe', Jonatán yéetel Simón u yíidzine' j kuch u tzicbalil tu yicnalo'ob táan u kinbesa'al jun p'éel nojoch dzo'ocol beel tumen u ch'i'ibal Jambri, sen ma'alob láakinta'anil le x ch'úupal cu bisa'alo' ti' j lukesa'ab Nadabot. Le x ch'úupal cu dzo'ocol u beelo' u x ch'upul paal jun túul u nojoch máaquil Canaán. 38Leti'ob túune' j ka'aj ti'ob bix úuchic u quiimsa'al Juan u yíidzino'ob, ca j na'aco'obe' ca tu ta'acbesjuba'ob ti' le witzo'obo'. 39Séeb tu yilajilo'ob u chíicpajal tu tojilo'ob, tu chúumuc ya'abcach máaco'ob cu bisico'ob ya'ab u nu'ucul ba'atelo'obe', le j xi'ipal cu dzo'ocol u beelo', u yéet óolo'ob yéetel u láako'ob. Táan u paxico'ob panderetaob yéetel u láak u nu'ucul paaxo'ob, cu dzo'ocole' u ma'alob ch'a'amajo'ob u nu'ucul u ba'atelo'ob. 40Le judíobo' jóoko'ob tu'ux u ta'acbesmajuba'obe' ca tu puljuba'ob tu yóokolo'ob, tu quiimsajo'ob ya'ab ti' leti'obi', tu loobilto'ob u láako'obe' ca tu ch'a'ajo'ob tuláacal ba'axo'ob cu bisico'ob, ba'ale' le j p'áato'ob cuxa'ano'obo' j púudzo'ob ti' le witzo'. 41Beyo' le dzo'ocol beelo' j suunaj okolil, le paaxo' j suunaj okom óolal. 42Beyo' tu sutajo'ob u jeel úuchic u quiimsa'al u yíidzino'ob, cu dzo'ocole' j suunajo'ob tu jáal u dzadz luukilo'ob u áalcab ja'ail Jordán.
43Báquidese' tu yojéeltaj le ba'al je'ela', u ti'al jun p'éel u kiinil je'elele', j bin tu jáal u áalcab ja'ail Jordán yéetel ya'abcach aj ba'atelo'ob. 44Jonatán túune' tu ya'alaj ti' u aj ba'atelo'ob: ¡Máanaque'ex! ¡Co'one'ex ba'atel tu yo'olal c toquic c cuxtale'ex! Mix jun téen yanaco'on tu chi' quíimil je'el bix bejela'a'. 45Le aj p'eeco'obo' cu pulicuba'ob táanil yéetel paachil, ti' u láak tzéelilo'obe' ti' yaan u áalcab ja'ail Jordán, dzadz luuk yéetel poc che'ob. ¡Mina'an tu'ux c púudzule'ex! 46Payalchi'ine'enex ti' Yuum Ku u ti'al ca u toco'on ti' c aj p'eeco'ob.
47Tu cáajsajo'ob le ba'atelo'. Jonatane' dzo'oc ca'ach u tich'ic u kab u ti'al u jedzic u ch'aac tu yóokol Báaquides, leti'e' j púudz táan u cuculpach. 48Bey túuno' Jonatán yéetel u aj ba'atelo'obe' tu p'itajo'ob le Jordano' ca j báabnajo'ob u ti'al u ch'actico'ob le áalcab ja'o'. Le aj p'eeco' ma' tu ch'actaj le áalcab ja' u ti'al u ch'a'apctico'obo'. 49Ti' le kiin je'elo' j lúub quimen bey mil ti' u aj ba'atelo'ob Báquides.
50Báquidese' j suunaj Jerusalene' ca jo'op' u dzáic u tuulumilo'ob ya'abcach u caajilo'ob Judea: tu dzaj u tuulumilo'ob Jericó, Emaús, Bet-horon, Be-tel, Timna, Piratón yéetel Tapuá, yéetel ca'anal pako'ob, jool najo'ob bey xan katab che'ob. 51Te j caajo'obo' tu dzaj aj ba'atelo'ob u ti'al loobiltic le j israelitaob. 52Tu dzaj xan u tuulumil Bet-sur, Gezer yéetel u pakil najil u canata'al Jerusalén, ca tu dzaj aj ba'atelo'ob canantic bey xan tu dzaj ba'alo'ob u ti'al jaantbil. 53Tu machaj cuxa'an u paalalo'ob u nuuquil le lu'umo' ca tu kalajo'ob tu pakil najil u cananta'al Jerusalén.
54Tu ca'a winal tu ja'abil ciento cincuenta y tres, Alcimoe' tu ya'alaj ca ju'utuc u pakil le sujuy lu'um yaan tu chúumuc u láak u sujuy lu'umil le kulnajo', u ti'al u pa'ic beyo' u meyaj le aj bóobato'obo'. Ba'ale' le ca tu cáasaj le jut pako', 55Alcimoe' téec koja'anchaje' ca j p'áat ma' tu dzo'ocbesaj le meyajoo'. J p'áat cancanqui u chi', ca p'áat ma' tu t'aan ma' páatchaj u dzíibtic ba'ax cu tucultiqui'. 56Beyo' j quíim ich nucuch mukyaj. 57Le ca tu yojéeltaj Báquides dzo'oc u quíimil Alcimoe', j suunaj te j jalach naj, beyo' Judase' yanchaj jéedzel ti' ca'a p'éel ja'abo'ob.
58Tuláacal le judíob kéex óolo'obo' tu much'juba'ob u ti'al u yilico'ob ba'ax je'el u páajtal u beetico'obe', ca tu ya'alajo'ob: Jonatán yéetel u j tzay pacho'obe' ich jéedzel cu cuxtalo'ob. Co'ox taasic Báquides u ti'al machic chéen ti'jun p'éelili' áakab. 59Leti'ob túune' j bino'ob j t'aan tu yéetel Báquides, 60leti'e' tu ch'a'aj bej yéetel ya'acach aj ba'atelo'ob. Ti' tuláacal le máxo'ob yano'ob Judea cu bisicuba'ob tu yéetelo' tu túuxtaj mucul dziibil ju'uno'ob ti'ob, tu'ux cu káatic ca ma'achac Jonatán yéetel máaxo'ob áantic, ba'ale' leti'obe' tu yojéeltajo'ob le kax tuuculo', le o'olale' ma' páatchaj u ma'achalo'obi'. 61U j tzaypacho'ob Jonatane' tu machajo'ob cincuenta u j poolilo'ob le líiksaj óolo' ca tu kalajo'ob, bey tumen leti'ob cáajs le lik óolalo' j quiimsa'abo'ob. 62Jonatán, Simón bey xan le máaxo'ob yano'ob tu yicnalo'obo' j bino'ob Betbasi, te x tocoy lu'umo', lelo' jun p'éel caaj jena'an, leti'obe' tu yutzquintajo'ob yéetel tu dzajo'ob u tuulumil.
63Le ca tu yojéeltaj Báquidese', tu much'quintaj tuláacal u aj ba'atelo'obe', ca tu túuxtaj t'aan ti' u yéet óolo'ob yaan Judea. 64Tu cáajsaj u bine' ca j yanchaj tu táan Betbasi, ca tu puljubáa tu yóokol ya'abcach kiino'ob yéetel u nucuch nu'ucul ba'atelo'ob u beetmaj. 65Jonatane' tu p'ataj u yídzin Simón te j caajo', ca jóok ti' le cúuchilo' yéetel jun p'íit j xiibo'ob. 66Tu puljubáa tu yóokol Odomera bey xan tu yóokol Fasirón tu'ux yaan u cúuchilo'ob je'elelo'ob. Cu dzo'ocol u náajaltic le yáax ba'atelo'oba', j suunaj yéetel u láak aj ba'atelo'ob. 67Simón yéetel u aj ba'atelo'obe' jóok te j caajo' ca tu tóocajo'ob u nucuch nu'ucul le ba'atelo'obo'. 68J ba'atelnajo'ob tu yéetel Báquides, ca tu t'onquintajo'ob tu beetajo'ob u yilicubáa ich mukyajil ca tu beetajo'ob u bin kaasil ti'. 69Báquides túune' j p'u'uj ti' le judíob kéex óolo'obo', le máaxo'ob tzol u xiquin u ti'al ca u ch'a'a' le lu'umo', ca tu túuxtaj quiimsbil ya'ab ti'obi'. Cu dzo'ocole' leti' yéetel u aj ba'atelo'obe' tu tucultajo'ob u suuto'ob tu lu'umo'ob.
70Le ca tu yojéeltaj Jonatáne', tu túuxtaj aj bisaj t'aano'ob ti' Báquides u ti'al u biso'ob u t'aanil jéedzel bey xan u ti'al ca su'utuc le j israelitaob macha'ano'ob bisbilo'obo'. 71Báquidese' tu éejentaj ba'ax tu ya'alaj Jonatán, ca tu jalach t'antaj, mix bikin bíin u ca'a beet kaas ti' ca'aliquil cuxa'an. 72Tu yóokol lelo' tu sutaj xan le máaxo'ob j ma'acho'ob Judea tu túuxtaj bisbilo'ob cuxa'ano'ob, j suunaj tu lu'ume' ba'ale' ma' j suunaj judea tu ca'a téeni'. 73Bey dzo'oquic le ba'atel Israelo'. Jonatane' j cajlaj tu caajil Micmas, tu'ux tu cáajsaj u méektáantic le caajo', ca tu tzelaj Israel tuláacal le kéex ocsaj óolo'obo'.
Currently Selected:
1 MACABEOS 9: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.