1 MACABEOS 8
8
Le j romano'ob
1Judas tu yu'ubaj le tzicbala': le j romano'ob bino', sen mu'ukano'ob, utz u bisicuba'ob yéetel máaxo'ob cu tuuculo'ob je'el bix leti'obe', bey xan cu bisicuba'ob yéetel máaxo'ob taac u bisicuba'ob tu yéetelo'ob. 2Cu sen tzicbalta'al u mu'uka'anilo'ob. Tu yu'ubaj u ya'ala'al le ba'atelo'ob u beetmajo'obo', bey xan tu ye'esajo'ob u jach xiibilo'ob le ca tu ch'a'ajo'ob u lu'umilo'ob Galias: bix úuchic u t'onquintico'ob u ti'al ca u bo'oto'ob páatan; 3le ba'ax tu beetajo'ob España, u ti'al u ch'a'ico'ob u sayabilo'ob plata yéetel oro yano'obo'; 4bix úuchic u p'áatal tu kabo'ob tuláacal le cúuchilo'obo' chéen tu yo'olal u yojelo'ob u tzoluba'ob j ba'atel bey xan ma' tu lúubul u yóolo'ob, quex tumen sen náach yanilo'ob ti' u lu'umo'ob; bey xan bix úuchic u pa'ico'ob u muuk yéetel u xanabcha'atico'ob le ajawo'ob tac tu xuul yóokolcaab, tu puljuba'ob j ba'atel tu yéetelo'obo', u láako'obe' j yanchaj u bo'otico'ob páatan ti'ob ja'ab man ja'ab. 5Tu pajo'ob yéetel tu t'onquintajo'ob xan ich ba'atele', Filipo yéetel Perseo, u ajawo'ob Macedonia, bey xan máaxo'ob tu puljuba'ob tu yóokolo'ob. 6Tu yojéeltaj xan bix úuchic u bin j ba'ateltbilo'ob tumen nojoch Antíoco u ajaw Asia, tu puljubáa tu yóokolo'ob yéetel ciento veinte elefanteob, tzíimino'ob yéetel bolano'ob jun p'éel nojoch múuch' aj ba'atelo'ob, ba'ale' j pa'ab u muuk tumeno'ob, 7cu dzo'ocole' tu machajo'ob cuxa'ane' ca tu beetajo'ob u bo'otico'ob co'ocoj páatan, bey xan tu kubajo'ob ya'ab máaco'ob, yéetel 8u péet caajilo'ob India, Media yéetel Lidia, lelo' u asab ma'alobil péet caajo'ob, tu lukesaj ti'obe' ca j dzaab ti' ajaw Eumenes.
9Tu yu'ubaj xan u ya'ala'al le ca j óolta'ab ba'ateltbil tumen le griego'ob u ti'al ca u xu'ulso'ob le j romailo'obo', 10le ca tu yojéeltajo'obe' tu túuxtajo'ob chéen jun túul náacom u ti'al ba'ateltico'ob; le j griego'obo' j quíim ya'ab u aj ba'atelo'ob, le j romailo'obo' tu machajo'ob le co'olelo'ob greciailo'ob pa'ate' yéetel u paalalo'ob u ti'al u biso'ob, tu ch'a'ajo'ob u ayikalilo'ob le caajo' ca tu ti'alintajo'ob xan le caajo', tu kascuntajo'ob u tuulumilo'ob, tu t'onquintajo'ob u cajnáalilo'ob u ti'al u palitzilto'ob tac bejela'e'. 11Tu yojéeltaj xan le bin u láak múuch' caajo'ob yéetel peteno'ob, bey xan tuláacal le tu xachuba'obe', j pa'ab u muuko'ob bey xan ch'a'abo'ob j palitziltbilo'ob, ba'ale', le éet óolo'ob bey xan le máaxo'ob caxantic u yáantajo'obe' cu bisicuba'ob tu yéetelo'ob. 12Bey tu t'onquintajilo'ob ya'abcach ajawo'ob yano'ob naadz yéetel náach, tuláacal máaxo'ob u'uyic u tzicbalilo'oba' cu ch'a'ico'ob sajaquil. 13Le máaxo'ob cu kamico'ob u yantaj le romailo'ob u ti'al ajawile' cu kuchulo'ob u beeto'ob u ajawilo'ob; ba'ale' le quéen u yóolto'obe' cu lukesico'ob tu jalach káanche'. Beyo' tu ch'a'ajo'ob sen páajtalil. 14Ba'ale' mix jun túul ti'ob u beeto'ob u dza'abal u péet jo'oli' mix u búuquinto'ob ch'ooj chac nookil táan dzíiboltico'ob noj ba'alili'. 15Dzo'oc u nu'uctico'ob jun múuch' u nuuquilo'ob cu chuquico'ob trecientos máaco'ob sáamsamal u ti'al u jach ilo'ob cu u ba'aluba'ob le caaj yéetel u ti'al u tuculto'ob ba'ax unaj u beeta'al u ti'al u bin utzil tuláacal ba'al. 16Tu jujun ja'abe' cu kubico'ob tu kab jun túulili' máac u méektáanil yéetel u páajtalil le nojoch ajawilo', beyo' tuláacal máax u'uyaj t'antic, mix máac cu yantal kaakas dzíibolal mix p'ectajil tu yo'olal le méektáanilo'.
Cu nup t'aan le judíob yéetel le romailo'ob
17Judas túune' tu yéeyaj Eupólemo', u paal Juan Acosil, yéetel Jasón, u paal Eleazare', ca tu túuxtajo'ob Roma u ti'al u beeto'ob jun p'éel u kax t'aanil bisajbáil yéetel nup t'aan, 18u ti'al ma' u yantal tu'ux u palitzilta'alo'ob mix u loobilta'alo'ob, tumen tu yilajo'obe' u ajawil le griego'obo' táan u péedz óoltico'ob Israel u ti'al palitzilil. 19Leti'obe' tu ch'a'ajo'ob u beelil Roma; jun p'éel chowac xíimbal; le ca j ooco'ob tu'ux yaan u nucuch múuch'ul le máaco'obo' tu ya'alajo'ob: 20Judas Macabeo yéetel u yíidzino'ob pa'ate' yéetel u caajil le judíobo', dzo'oc u túuxtico'on u ti'al ca c beet jun p'éel séeb chi'il nup t'aan yéetel jéedzel ta wéetele'ex. C káat ca wilexo'on bey a wéet óole'ex bey xan ichil a wéet t'aane'ex. 21Le romano'obo' tu éejentajo'ob le ba'ax a'alabo'. 22Lela' u ca'a dzíibil le ba'axo'ob dzíibta'abo'obe' tu yóokol jáaycab bronce u ti'al túuxtbil Jerusaén u ti'al ca yanac ti'ob u dzíibil le nup t'aan:
23¡Xi'ic utzil ti' le romailo'ob yéetel ti' u múuch' caajil judíob u ti'al kiino'ob mina'an u xuul, yóok ka'anab wa yóok lu'um!. ¡Le ba'atel yéetel le p'eequilo' yanac náach ti' leti'ob! 24Wa táanil cu kuchul u kiinil u yantal ba'atel ti' Roma wa ti' jeél máaxac ichil u yéet bisajbáilo'ob ti' je'el tu'uxac ti' le noj ajawila', 25u múuch' caajil le judíobo' bíin yanac tu tzéelo'ob le j romano'ob yéetel jun p'éelili' tuucul je'el bix kabéet ti' le kiino'. 26Le judíobo' ma' bíin u dza'ob janal, mix u nu'ucul ba'atel, mix taakin mix cheemo'ob ti' u aj p'eeco'ob Romai'. Lelo' bey u káat Roma. Le judíobo' bíin u dzo'ocbeso'ob ba'ax u ya'almajo'ob bey xan ma' bíin u káato'ob bo'olali'.
27Bey xan wa táanil cu kuchul u kiinil u yantal ba'atel ti' u múuch' caajil judíobe', le romano'obo' bíin u yáanto'ob le judíob tu jaajil u yóolo'ob je'el bix u yáanta'al éet t'aano'obe' bey xan je'el bix kabéetil le áantaj ti' le kiino' 28Ma' bíin dzabac janal ti' le aj p'eeco'obo', mix u nu'ucul ba'atel, mix taakin, mix cheemo'ob. Lelo' bey u káat Roma. Le romano'obo' bíin u dzo'ocbeso'ob x ma' tuusil ba'ax u ya'almajo'ob.
29Lela' leti' le ba'ax tu múuch' jalach t'antaj le romano'ob yéetel u caajil judío. 30Wa cu kuchul u kiinil le ca'a jaatz u káat u dzáa quex u lukes wa ba'ax t'aanile', je'el u páajtal u beetico'ob je'el bix u káato'obe', le ba'ax bíin u dza'ob wa u lukeso'obe' bíin béeychajac.
31U láak ba'ale' le romano'obo' dzo'oc u dzíibo'ob ti' ajaw Demetrio tu yo'olal le loobo'ob dzo'oc u beetico'ob ti' le judíobo', le dzíibo' cu ya'alic beya': ¿Ba'axten ca chich yedzic le judíob c éet óolo'obo'? 32Wa leti'ob cu taalo'ob tu ca'a téen u taco'ob a poole', to'one' bíin c ba'ateltech yóok lu'um yéetel yóok ka'anab.
Currently Selected:
1 MACABEOS 8: MAYADC
Highlight
Copy
Compare
Share
Want to have your highlights saved across all your devices? Sign up or sign in
Biblia Maya de Yucatán © Sociedades Bíblicas Unidas, 1992.